ആഹാരം മോഷ്ടിക്കപ്പെടുന്നുണ്ടെങ്കില്‍ കുറ്റവാളി സമൂഹം-ജസ്റ്റിസ് കുര്യന്‍ ജോസഫ് 

ഒരാള്‍ ആഹാരം മോഷ്ടിക്കുന്നുണ്ടെങ്കില്‍ കുറ്റവാളി  സമൂഹമാണെന്ന് സുപ്രീം കോടതി ജഡ്ജ് ജസ്റ്റിസ് കുര്യന്‍ ജോസഫ് പറഞ്ഞു. പാലക്കാട് ജില്ലയിലെ ന്യായാധിപരും കോടതി ജീവനക്കാരും ദേവാശ്രയ ചാരിറ്റബ്ല് സൊസൈറ്റിയുമായി സഹകരിച്ച് ജില്ലാ ആശുപത്രിയിലെ രോഗികള്‍ക്ക് എല്ലാ തിങ്കളാഴ്ചയും ഉച്ചഭക്ഷണം നല്‍കുന്ന പരിപാടി ജില്ലാ പഞ്ചായത്ത് ഹാളില്‍ ഉദ്ഘാടനം ചെയ്യുകയായിരുന്നു ജസ്റ്റിസ് കുര്യന്‍ ജോസഫ്. മനുഷ്യന്‍ മറ്റൊരുവന്‍റെ വിശപ്പിനെപ്പറ്റി ചിന്തിക്കുന്നതിന്‍റെ തെളിവാണ് അന്നദാനം. ജില്ലാ ആശുപത്രിയിലെ രോഗികള്‍ക്ക് ഭക്ഷണം വിതരണം ചെയ്തതും ദേവാശ്രയയിലെ കുട്ടികളോടൊപ്പം ഉച്ചഭക്ഷണം കഴിച്ചതും ജീവിതത്തിലെ അപൂര്‍വ അനുഭവമാണെന്ന് ജസ്റ്റിസ് പറഞ്ഞു. ഉച്ചഭക്ഷണപരിപാടിക്ക് ആശയം നല്‍കിയ കോടതി ജീവനക്കാരന്‍ കെ. രാമസ്വാമിയെ ജസ്റ്റിസ് കുര്യന്‍ ജോസഫ് അഭിനന്ദിച്ചു.
ഒരു മാസത്തെ സൗജന്യ ഭക്ഷണ പദ്ധതിയ്ക്കായുള്ള സംഭാവന ജസ്റ്റിസ് കുര്യന്‍ ജോസഫ് ദേവാശ്രയ ചാരിറ്റബിള്‍ സൊസൈറ്റി സ്ഥാപക സെക്രട്ടറി ബീന ഗോവിന്ദിനു നല്‍കി. ജില്ലാ ജഡ്ജ് കെ.പി ഇന്ദിര അധ്യക്ഷയായി. ജില്ലാ പഞ്ചായത്ത് പ്രസിഡന്‍റ് കെ.ശാന്തകുമാരി, ജില്ലാ കലക്ടര്‍ ഡി.ബാലമുരളി, അഡീഷനല്‍ ജില്ലാ ജഡ്ജ് സി.എസ്.സുധ, ബാര്‍ അസോസിയേഷന്‍ പ്രസിഡന്‍റ് കെ.കെ.സുധീര്‍, ജില്ലാ പബ്ലിക് പ്രോസിക്യൂട്ടര്‍ വിനോദ് കെ.കയനാട്ട്, ജില്ലാ മെഡിക്കല്‍ ഓഫീസര്‍ കെ.പി.റീത്ത, അഡ്വക്കേറ്റ് ക്ലാര്‍ക്ക് അസോസിയേഷന്‍ പ്രസിഡന്‍റ് രാജേശ്വര മേനോന്‍,  ചീഫ് ജുഡീഷ്യല്‍ മജിസ്ട്രേറ്റ് കെന്നത്ത് ജോര്‍ജ് എന്നിവര്‍ സംസാരിച്ചു.