മോട്ടോർ തൊഴിലാളി ക്ഷേമനിധി കുടിശ്ശിക അടയ്ക്കാം

കേരള മോട്ടോർ തൊഴിലാളി ക്ഷേമനിധിയിൽ അംഗമായതിന് ക്ഷേമനിധി കുടിശ്ശിക വരുത്തിയിട്ടുള്ള തൊഴിലാളികൾക്ക് നിബന്ധനകൾക്ക് വിധേയമായി കുടിശ്ശിക ഒടുക്കുന്നതിന് മാർച്ച് 31 വരെ സമയം അനുവദിക്കും. പഴയ പദ്ധതി പ്രകാരം ക്ഷേമനിധി കുടിശ്ശിക വരുത്തിയ ഉടമകൾക്ക് ഒറ്റത്തവണ തീർപ്പാക്കൽ പദ്ധതി ഒടുക്കുവരുത്തുന്നതിനുള്ള അവസരവും നിലവിലുണ്ട്. കേരള മോട്ടോർ തൊഴിലാളി ക്ഷേമനിധി ബോർഡിൽ അംഗങ്ങളായ തൊഴിലാളികൾക്ക് നൽകിവരുന്ന ആനുകൂല്യങ്ങൾ പരിഷ്കരിക്കാനുള്ള നടപടികൾ സർക്കാരിന്റെ പരിഗണനയിലാണെന്നും ചെയർമാൻ കെ കെ ദിവാകരൻ അറിയിച്ചു.

പദ്ധതിയിൽ അംഗങ്ങളായ തൊഴിലാളികളുടെ മക്കളിൽ കലാകായിക അക്കാദമിക് രംഗങ്ങളിൽ മികവ് തെളിയിച്ചവർക്ക് ദേശീയ തലത്തിൽ 3 ഗ്രാം സ്വർണ്ണ പതക്കവും സംസ്ഥാന തലത്തിൽ 2 ഗ്രാം സ്വർണ്ണ പതക്കവും നൽകും. പദ്ധതിയിൽ അംഗങ്ങളായ തൊഴിലാളികളുടെ പ്രൊഫഷണൽ കോഴ്സുകൾക്ക് പഠിക്കുന്ന അർഹരായ മക്കൾക്ക് സർക്കാർ അംഗീകാരത്തിന് വിധേയമായി ലാപ് ടോപ്പ് വിതരണം ചെയ്യും.

ക്ഷേമനിധി ബോർഡിൽ തൊഴിലാളി രജിസ്ട്രേഷൻ നടപടികൾ ഊർജ്ജിതമാക്കുന്നതിന്റെ ഭാഗമായി കേരളത്തിലുടനീളം പഞ്ചായത്ത്, താലൂക്ക് തലങ്ങളിൽ വിവിധ ട്രേഡ് യൂണിയനുകൾ, ഉടമാ സംഘടനകൾ എന്നിവയുടെ സഹകരണത്തോടെ അംഗത്വ വിതരണം, ബോധവത്കരണ ക്യാമ്പെയ്നുകൾ എന്നിവ നടന്നുവരുന്നു. 15 ലക്ഷത്തോളം തൊഴിലാളികളെ പദ്ധതിയിൽ രജിസ്റ്റർ ചെയ്യുന്നതിനാണ് ബോർഡ് ലക്ഷ്യമിടുന്നത്. 2022 വർഷം പുതിയതായി 50000 ൽ പരം തൊഴിലാളികൾ ബോർഡിൽ രജിസ്റ്റർ ചെയ്തിട്ടുണ്ടെന്നും ഈ സാമ്പത്തിക വർഷം 100 കോടിയിൽ പരം രൂപയുടെ ആനുകൂല്യങ്ങൾ വിതരണം ചെയ്തിട്ടുണ്ടെന്നും ചെയർമാൻ അറിയിച്ചു.