കെ - സ്റ്റോർ സംസ്ഥാനതല ഉദ്ഘാടനം തൃശ്ശൂരിൽ മെയ് 14ന് മുഖ്യമന്ത്രി നിർവഹിക്കും

സർക്കാരിന്റെ രണ്ടാം വാർഷികാഘോഷത്തിന്റെ ഭാഗമായി നടപ്പിലാക്കുന്ന നൂറുദിന കർമ്മപദ്ധതിയിൽ ഉൾപ്പെടുത്തി ആരംഭിക്കുന്ന കെ - സ്റ്റോർ സംരംഭത്തിന് ജില്ലയിൽ തുടക്കമാകുന്നു. കെ സ്റ്റോർ സംരംഭത്തിന്റെ സംസ്ഥാനതല ഉദ്ഘാടനം മെയ് 14ന് വൈകീട്ട് 3.30ന് തൃശൂരിൽ മുഖ്യമന്ത്രി പിണറായി വിജയൻ നിർവഹിക്കുമെന്ന് ഭക്ഷ്യ പൊതുവിതരണ വകുപ്പു മന്ത്രി അഡ്വ. ജി ആർ അനിൽ പറഞ്ഞു. ഇ പോസ് മെഷീനുകൾ വെയിങ് മെഷീനുമായി ബന്ധിപ്പിക്കുന്ന പദ്ധതിക്കും ഇതോടൊപ്പം തുടക്കമാകും. കലക്ട്രേറ്റ് കോൺഫറൻസ് ഹാളിൽ നടന്ന സ്വാഗതസംഘം രൂപീകരണ യോഗം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.

 റേഷൻ കടകളുടെ പശ്ചാത്തല സൗകര്യം വിപുലമാക്കി സ്മാർട്ട് കാർഡുകളുടെ സഹായത്തോടെ മിനി ബാങ്കിംഗ്, യൂട്ടിലിറ്റി പേയ്മെന്റ്, ഛോട്ടു ഗ്യാസ് വിതരണം, മിൽമ ഉൽപന്നങ്ങൾ , ശബരി ബ്രാൻഡ് ഉൽപന്നങ്ങൾ , ഓൺലൈൻ / ഇതര സേവനങ്ങൾ ലഭ്യമാകുന്ന കോമൺ സർവ്വീസ് സെന്റർ എന്നിവ ലഭ്യമാക്കി റേഷൻ കടകൾ കെ സ്റ്റോറുകളാക്കി മാറ്റുകയാണെന്നും  മന്ത്രി പറഞ്ഞു.

ഡിജിറ്റൽ രൂപത്തിൽ സാധനത്തിന്റെ വില നൽകുന്നതിന് പുറമെ ചെറിയ ബാങ്ക് ഇടപാടുകൾ നടത്താനും ബാങ്ക് അക്കൗണ്ടിൽ നിന്നും തുക പിൻവലിക്കാനുമുള്ള സംവിധാനവും കെ സ്റ്റോറിലുണ്ടാകും. കുടിവെള്ളത്തിന്റെയും വൈദ്യുതിയുടെയും ബില്ലുകൾ അടയ്ക്കാനുള്ള സംവിധാനവും റേഷൻ കടകളിലുണ്ടാകും. പൊതുജനങ്ങൾക്ക് റേഷൻ കടകൾ വഴി നിത്യോപയോഗ സാധനങ്ങളും അവശ്യസർവ്വീസുകളും ലഭ്യമാകുന്നതോടൊപ്പം റേഷൻ ഡീലർമാർക്ക് കൂടുതൽ വരുമാനവും ലഭിക്കുന്ന വിധത്തിലാണ് കെ-സ്റ്റോറുകൾ വിഭാവനം ചെയ്യുന്നത്. റേഷൻ കടകളെ ചെറിയ സൂപ്പർ മാർക്കറ്റ്, മൈക്രോ എടിഎം എന്നിവയാക്കി മാറ്റുന്നതിനാണ് ലക്ഷ്യമിടുന്നതെന്നും മന്ത്രി പറഞ്ഞു.

ഇ - പോസ് മെഷീൻ വെയിംഗ് ബാലൻസുമായി ലിങ്ക് ചെയ്യുമ്പോൾ ഇ-പോസ് മെഷീൻ പ്രകാരം ഗുണഭോക്താക്കൾക്ക് അർഹമായ വിതരണ തോത് പ്രകാരമുള്ള അളവ് തൂക്കം വെയിംഗ് ബാലൻസിൽ കൃത്യമായി വരുമ്പോൾ മാത്രമേ ഇ-പോസ് മെഷീനിൽ ബിൽ ജനറേറ്റ് ചെയ്യാൻ കഴിയുകയുള്ളൂ എന്നതിനാൽ കൃത്യമായ തൂക്കം ഉറപ്പുവരുത്താമെന്നും മന്ത്രി കൂട്ടിച്ചേർത്തു.

ജില്ലാ സപ്ലൈ ഓഫീസർ  കൺവീനറായും ജില്ലയിലെ മന്ത്രിമാർ, തൃശൂർ എംപി, എംഎൽഎമാർ, കോർപറേഷൻ മേയർ, ജില്ലാ പഞ്ചായത്ത് പ്രസിഡന്റ് തുടങ്ങിയവർ രക്ഷാധികാരികളായും 51 അംഗ സ്വാഗതസംഘം രൂപീകരിച്ചു.

യോഗത്തിൽ പി ബാലചന്ദ്രൻ എംഎൽഎ അധ്യക്ഷനായി. ഡെപ്യൂട്ടി കളക്ടർ എം സി ജ്യോതി, റേഷൻ കൺട്രോളർ കെ മനോജ് കുമാർ, ജില്ലാ സപ്ലൈ ഓഫീസർ പി ആർ ജയചന്ദ്രൻ, ഹുസൂർ ശിരസ്തദാർ കെ ജി പ്രാൺസിംഗ് തുടങ്ങിയവർ പങ്കെടുത്തു.