ചിങ്ങം ഒന്ന്; ജില്ലയിൽ ഒരുങ്ങുന്നത് പതിനായിരത്തോളം പുതിയ കൃഷിയിടങ്ങൾ

ചിങ്ങം ഒന്നിന് നടക്കുന്ന കർഷക ദിനാചരണത്തിന്റെ മുന്നോടിയായി മലപ്പുറം ജില്ലയിൽ പതിനായിരത്തോളം പുതിയ സ്ഥലങ്ങളിൽ കൃഷിയിറക്കും. സംസ്ഥാനത്ത് ഒരു ലക്ഷം പുതിയ കൃഷിയിടങ്ങൾ ഒരുക്കുന്നതിന്റെ ഭാഗമായാണ് ജില്ലയിലും പദ്ധതി നടപ്പാക്കുന്നത്. ഓരോ വാർഡ് തലത്തിൽ ആറ് സ്ഥലത്തെങ്കിലും പുതിയതായി കൃഷിയിറക്കാനാണ് സർക്കാർ നിർദേശം. ഇത് പ്രകാരം ആഗസ്റ്റ് 17ന് മുമ്പായി ഓരോ വാർഡിലും പുതിയതായി കണ്ടെത്തുന്ന കൃഷിയിടങ്ങളിൽ വിത്ത് വിതയ്ക്കലിന്റെയും നടീലിന്റെയും ഉദ്ഘാടനം നടത്താനുള്ള ഒരുക്കത്തിലാണ് കൃഷി വകുപ്പ്.  എല്ലാ കൃഷിഭവനുകളിലും അതത് തദ്ദേശ സ്ഥാപന അധ്യക്ഷരുടെ നേതൃത്വത്തിൽ കാർഷിക വികസന സമിതി, കർഷക സംഘടനകൾ, കൃഷിക്കൂട്ടങ്ങൾ, കുടുംബശ്രീ, ഹരിത കർമസേന, രാഷ്ട്രീയ പാർട്ടി പ്രതിനിധികൾ, യുവജന സംഘടനകൾ, സന്നദ്ധ സംഘടനകൾ എന്നിവരുടെ യോഗം ചേർന്നാണ് പുതിയ കൃഷിയിടങ്ങൾ കണ്ടെത്തുന്നത്. പച്ചക്കറി കൃഷിക്ക് പ്രാധാന്യം നൽകിയാണ് പുതിയ കൃഷിയിടങ്ങൾ ഒരുക്കുന്നത്. പരമ്പരാഗത കാർഷിക രീതികൾക്ക് മുൻഗണന നൽകുന്നതോടൊപ്പം കാലാവസ്ഥയെ അടിസ്ഥാനപ്പെടുത്തിയും ഓരോ പ്രദേശത്തിന്റെ സാധ്യത അനുസരിച്ചുമാണ് ഏത് കൃഷി വേണമെന്നത് തീരുമാനിക്കുന്നത്. കൃഷി ഓഫീസർമാരുടെ സഹായത്തോടെയാണ് ഇത് നടപ്പാക്കുക. കൃഷിക്കൂട്ടങ്ങളുടെ സേവനവും ഉപയോഗപ്പെടുത്തും.
കർഷകരെ ആദരിക്കും
ഞങ്ങളും കൃഷിയിലേക്ക് ക്യാമ്പയിന്റെ ഭാഗമായി വാർഡ് തലത്തിൽ രൂപവത്കരിച്ചതും വാർഡ് അംഗങ്ങളുടെ അധ്യക്ഷതയിലുള്ളതുമായ വർഡ് സമിതികളുടെ നേതൃത്വത്തിൽ കർഷക ദിനത്തിൽ മികച്ച മാതൃകാ കർഷകരെ ആദരിക്കും. ഓരോ വാർഡിലേയും അഞ്ച് ഉത്തമ കൃഷി കുടുംബങ്ങളെയാണ് ആദരിക്കുക. ചിങ്ങം ഒന്നിന് തദ്ദേശ സ്ഥാപനാടിസ്ഥാനത്തിൽ കൃഷിഭവനുകൾക്ക് കീഴിലാണ് കർഷകദിനാചരണം. കാർഷിക വികസന സമിതിയാണ് ആദരിക്കേണ്ട മികച്ച കർഷകരെ കണ്ടെത്തുന്നത്. ജൈവ കൃഷിരീതി ഉപയോഗിക്കുന്നവർ, വനിതകൾ, വിദ്യാർത്ഥികൾ, മുതിർന്ന പൗരന്മാർ, എസ്.സി എസ്.ടി വിഭാഗത്തിൽ നിന്നുള്ളവർ, മുതിർന്ന കർഷക തൊഴിലാളി, തേനീച്ച കർഷകൻ എന്നിങ്ങനെ വിവിധ വിഭാഗത്തിൽ നിന്നുള്ള കർഷകരെ ആദരിക്കും.