സാമൂഹ്യനീതിയിൽ അധിഷ്ഠിതമായ വികസന സങ്കല്പത്തിലൂടെ എല്ലാ വിഭാഗത്തെയും ചേർത്തുനിർത്തും: മന്ത്രി എം ബി രാജേഷ്

സാമൂഹ്യനീതിയിൽ അധിഷ്ഠിതമായ വികസന സങ്കല്പത്തിലൂടെ എല്ലാ വിഭാഗത്തെയും ചേർത്തുനിർത്തുമെന്ന് തദ്ദേശ സ്വയംഭരണ, എക്സൈസ് വകുപ്പ് മന്ത്രി എം ബി രാജേഷ്. തദ്ദേശ സ്വയംഭരണ സ്ഥാപനങ്ങളിലെ ഭിന്നശേഷിയുള്ള ഉദ്യോഗാർത്ഥികൾക്കായുള്ള കൈപ്പുസ്തകം പ്രകാശനം ചെയ്തു സംസാരിക്കുകയായിരുന്നു മന്ത്രി.

ഭിന്നശേഷി സൗഹൃദ മാർഗ്ഗങ്ങൾ എല്ലാം സമഗ്രമായി ഉൾപ്പെടുത്തി കൈപുസ്തകം തയ്യാറാക്കിക്കൊണ്ട് വലിയ മാതൃകയാണ് കേരളം മുന്നോട്ട് വെക്കുന്നത്. ഈ വിഭാഗക്കാർക്ക് ചുമതലകൾ കാര്യക്ഷമമായി നിർവഹിക്കാൻ ഇത്തരം ഇടപെടലുകൾ സഹായിക്കും. പ്രത്യേകം പരിഗണന ലഭിക്കേണ്ട എല്ലാ വിഭാഗങ്ങൾക്കും പ്രശ്നങ്ങൾക്കും അവരുടെ ആവശ്യങ്ങൾ ഉൾചേർത്ത് സാമൂഹ്യനീതി ഉറപ്പാക്കും. നവ കേരളത്തിനായി എല്ലാവരെയും ചേർത്തുനിർത്തി സർക്കാർ മുന്നോട്ടു പോകുമെന്നും മന്ത്രി പറഞ്ഞു.

അന്താരാഷ്ട്ര തലത്തിലുള്ള എല്ലാ മാതൃകകളും മാനദണ്ഡങ്ങളും സ്വാംശീകരിച്ചാണ് കിലയുടെ നേതൃത്വത്തിൽ പുസ്തകം തയ്യാറാക്കിയിട്ടുള്ളത്. തദ്ദേശ സ്വയംഭരണ സ്ഥാപനങ്ങളിൽ നിന്ന് പൊതുജനങ്ങൾ അറിഞ്ഞിരിക്കേണ്ട പ്രധാനപ്പെട്ട വിഷയങ്ങളും പഞ്ചായത്ത് രാജ് നിയമം, പൗരാവകാശ രേഖ, സിവിൽ രജിസ്ട്രേഷൻ തുടങ്ങിയ വിഷയങ്ങളാണ് പ്രധാനമായും ഉൾക്കൊള്ളിച്ചിട്ടുള്ളത്. ആംഗ്യഭാഷ, പരിഭാഷ, അടിക്കുറിപ്പുകൾ, ക്യു ആർ കോഡ്, ഇ-റീഡിങ് സംവിധാനം, ശബ്ദവിവരണം, ബ്രയി ലിപി, വലിയ അക്ഷരങ്ങൾ തുടങ്ങിയ ഭിന്നശേഷി മാർഗ്ഗങ്ങൾ എല്ലാം അടങ്ങുന്നതാണ് പുസ്തകം.

കിലയിൽ നടന്ന പരിപാടിയിൽ സേവ്യർ ചിറ്റിലപ്പിള്ളി എംഎൽഎ അധ്യക്ഷനായി. ഉദ്യോഗസ്ഥരായ വിദ്യമോൾ, പി എസ് പ്രശാന്ത്, രശ്മി മോഹൻ തുടങ്ങിയവർപുസ്തകങ്ങൾ ഏറ്റുവാങ്ങി. കില ഡയറക്ടർ ജനറൽ ഡോ ജോയ് ഇളമൻ, ഗുരുവായൂർ മുനിസിപ്പാലിറ്റി ചെയർമാൻ എം കൃഷ്ണദാസ്, മുളങ്കുന്നത്തുകാവ് ഗ്രാമപഞ്ചായത്ത് പ്രസിഡന്റ് കെ ജെ ബൈജു, ജില്ലാ പഞ്ചായത്ത് മെമ്പർ ലിനി ടീച്ചർ, പുഴക്കൽ ബ്ലോക്ക് പഞ്ചായത്ത് മെമ്പർ രഞ്ജു വാസുദേവൻ, തൃശ്ശൂർ കോർപ്പറേഷൻ സ്റ്റാൻഡിങ് കമ്മിറ്റി അംഗം ഷീബ ലാൽ, കേരള ഫെഡറേഷൻ ഓഫ് ദി ബ്ലൈൻഡ് ഭാരവാഹികളായ അബ്ദുൽ ഹക്കീം, എം മുരളീധരൻ, നാഷണൽ അസോസിയേഷൻ ഓഫ് ബ്ലെൻഡ് പ്രൊജക്റ്റ് കോഡിനേറ്റർ രഘുനാഥൻ നായർ, സൈൻ ലാംഗ്വേജ് ഇന്റർപ്രറ്റർ ബി എസ് വിനയചന്ദ്രൻ, കില അസിസ്റ്റന്റ് പ്രൊഫസർ ഡോ മോനിഷ് ജോസ് തുടങ്ങിയവർ പങ്കെടുത്തു.