മാലിന്യമുക്ത നവകേരളം ക്യാമ്പയിൻ: ജില്ലയിൽ തീവ്രയജ്ഞ പരിപാടികൾ സംഘടിപ്പിക്കും

 സംസ്ഥാന സർക്കാരിന്റെ മാലിന്യ മുക്ത നവകേരളം ജില്ലയിൽ തീവ്രയജ്ഞ പരിപാടികൾ സംഘടിപ്പിക്കും.

നവംബർ ഒന്നിന് സമ്പൂർണ്ണ ശുചിത്വ പ്രഖ്യാപനം നടത്താൻ സാധിക്കുന്ന വിധത്തിൽ ജില്ലയിലെ മഴുവൻ തദ്ദേശസ്വയംഭരണ സ്ഥാപനങ്ങളും മാലിന്യ സംസ്ക്കരണ, ശുചിത്വ പ്രവർത്തനങ്ങൾ ഊർജ്ജിതമായി നടത്താൻ ജില്ലയിലെ

ഗ്രാമ പഞ്ചായത്ത്, ബ്ലോക്ക് പഞ്ചായത്ത്, മുനിസിപ്പൽ അധ്യക്ഷരുടേയും സെക്രട്ടറിമാരുടേയും യോഗത്തിൽ തീരുമാനിച്ചു.

ജില്ലാ പഞ്ചായത്ത് പ്രസിഡന്റ് എം. കെ റഫീഖ അധ്യക്ഷത വഹിച്ച യോഗത്തിൽ തദ്ദേശ സ്വയംഭരണ വകുപ്പ് ജോയിന്റ് ഡയറക്ടർ പ്രീതി മേനോൻ സർക്കാർ നിർദ്ദേശങ്ങൾ വിശദീകരിച്ചു.

 ഒക്ടോബർ ഒന്ന്, രണ്ട് തിയതികളിൽ ജനകീയ ശുചീകരണ പ്രവർത്തനങ്ങളും ക്യാമ്പയിൻ പരിപാടികളും നടത്തും. എല്ലാവരും ഹരിത കർമ്മസേനക്ക് യൂസർ ഫീ നൽകാൻ ജനങ്ങളെ ബോധവത്കരിക്കുന്നതിനും എം.സി.എഫ് വിപുലീകരികുന്നതിനും ആവശ്യമായ നടപടികൾ സ്വീകരിക്കുന്നതിന് തദ്ദേശ സ്വയംഭരണ സ്ഥാപനങ്ങൾക്കും നിർദ്ദേശം നൽകി.

ക്യാമ്പയിൻ പ്രവർത്തനങ്ങൾ ഊർജ്ജിതപ്പെടുത്തുന്നതിന്റ ഭാഗമായി ഒക്ടോബർ ആദ്യവാരം ഗ്രാമ/വാർഡ് സഭകൾ ചേരും.

ജില്ലയിൽ നടക്കാൻ പോകുന്ന നബിദിനാഘോഷങ്ങൾ ഉൾപ്പെടെയുള്ള എല്ലാ ആഘോഷങ്ങളും മറ്റ് പരിപാടികളും ഹരിത ചട്ടപ്രകാരം (ഗ്രീൻ പ്രോട്ടോകോൾ )നടത്തണമെന്നും യോഗം നിർദ്ദേശിച്ചു.

മികച്ച പ്രവർത്തനങ്ങൾ നടത്തിയ പെരിന്തൽമണ്ണ നഗരസഭ, ഒതുക്കുങ്ങൽ, വെട്ടത്തൂർ ഗ്രാമപഞ്ചായത്തുകളെ യോഗത്തിൽ അനുമോദിച്ചു. ജില്ലാ നോഡൽ ഓഫീസർ പി.ബി ഷാജു, ശുചിത്വ മിഷൻ കോഡിനേറ്റർ ബൈജു , കെ.എസ്. ഡബ്ലിയു.എം.പി കോർഡിനേറ്റർ ഫിലിപ്, കില പ്രതിനിധി ശ്രീധരൻ എന്നിവർ സംസാരിച്ചു.