നവ കേരള സദസിൽ സമൂഹത്തിലെ എല്ലാ ജനങ്ങളുടെയും പങ്കാളിത്തം ഉറപ്പാക്കണം : മന്ത്രി പി രാജീവ്

എറണാകുളം മണ്ഡലതല സംഘാടകസമിതി യോഗം ചേർന്നു

നവ കേരള സദസിൽ സമൂഹത്തിന്റെ എല്ലാ വിഭാഗം ജനങ്ങളുടെയും പങ്കാളിത്തം ഉറപ്പാക്കണമെന്ന് വ്യവസായ വകുപ്പ് മന്ത്രി പി രാജീവ് പറഞ്ഞു. എറണാകുളം മണ്ഡലതല സംഘാടകസമിതി യോഗത്തിൽ സംസാരിക്കുകയായിരുന്നു മന്ത്രി.

ചരിത്രത്തിൽ ആദ്യമായാണ് ഒരു മന്ത്രിസഭ മുഴുവൻ ജനങ്ങളിലേക്ക് കടന്നുചെന്ന് പ്രവർത്തിക്കുന്നത്. നവ കേരള സദസ്സ്  പാർട്ടി പരിപാടിയല്ല. മറിച്ച് ജനാധിപത്യ പരിപാടിയാണ്. ജനാധിപത്യത്തിന്റെ എല്ലാ വിഭാഗം ജനങ്ങളെയും സദസ്സിലേക്ക് ഉൾക്കൊള്ളിക്കാനാണ് സർക്കാർ ശ്രമിക്കുന്നതെന്നും മന്ത്രി പറഞ്ഞു.

പരിപാടി വിജയകരമാക്കാൻ എല്ലാവരും കൂട്ടായി പ്രവർത്തിക്കണം. മികച്ച രീതിയിൽ പ്രചാരണ പരിപാടികൾ ആസൂത്രണം ചെയ്യണം. മണ്ഡലത്തിലെ അവലോകന യോഗങ്ങളിൽ കുടുംബശ്രീ, വ്യാപാര വ്യവസായ ഏകോപന സമിതികൾ, ചേംബർ ഓഫ് കോമേഴ്സ്, മർച്ചന്റ്സ് യൂണിയൻ, റസിഡന്റ്സ് അസോസിയേഷനുകൾ, സ്കൂൾ പിടിഎകൾ, അധ്യാപക സംഘടനകൾ, വിദ്യാർത്ഥി യൂണിയനുകൾ, ഹരിത കർമ്മ സേന അംഗങ്ങൾ, തൊഴിലുറപ്പ് തൊഴിലാളികൾ, സമുദായിക സംഘടനകൾ, വിവിധ സമുദായിക കമ്മിറ്റികൾ, ലൈബ്രറി അസോസിയേഷൻ ഭാരവാഹികൾ, സാംസ്കാരിക സദസ്സുകൾ, സഹകരണ സംഘങ്ങൾ, സഹകരണ ബാങ്ക് അംഗങ്ങൾ, അങ്കണവാടി പ്രവർത്തകർ, സംരംഭകർ തുടങ്ങി വിവിധ സംഘടനകളുടെ സാന്നിധ്യം ഉറപ്പാക്കണം.

സദസ്സിൽ ജനങ്ങൾക്ക് പരാതികൾ നൽകാൻ  പ്രത്യേക കൗണ്ടറുകൾ സജ്ജീകരിക്കും. എല്ലാ വിഭാഗം ജനങ്ങളെയും ഉൾക്കൊള്ളിക്കുന്നതിന്റെ ഭാഗമായി മുഖ്യമന്ത്രിയുടെ ക്ഷണക്കത്ത് നവംബർ 26, 27, 28 തീയതികളിലായി പൊതുജനങ്ങളിലേക്ക് എത്തിക്കാൻ എല്ലാവരുടെയും കൂട്ടായ പങ്കാളിത്തം വേണമെന്നും മന്ത്രി പറഞ്ഞു.

യോഗത്തിൽ എറണാകുളം മണ്ഡലതല പ്രചാരണ പോസ്റ്റർ മന്ത്രി പ്രകാശനം ചെയ്തു.

നവ കേരള സദസുമായി ബന്ധപ്പെട്ട് മണ്ഡലത്തിൽ ഇതുവരെ നടപ്പാക്കിയ പ്രചാരണ പരിപാടികൾ, വാഹന ക്രമീകരണം, ഭക്ഷണസൗകര്യം ഉറപ്പാക്കുന്നതിനുള്ള നടപടികൾ, വിവിധ ജനവിഭാഗങ്ങളുടെ പങ്കാളിത്തം ഉറപ്പാക്കുന്നതിനുള്ള നടപടികൾ തുടങ്ങി സ്വീകരിച്ച വിവിധ നടപടികൾ യോഗത്തിൽ ചർച്ച ചെയ്തു.

ഡിസംബർ 8 ന് വൈകിട്ട് ആറിന് മറൈൻഡ്രൈവിലാണ് എറണാകുളം നിയോജകമണ്ഡലം നവകേരള സദസ് സംഘടിപ്പിക്കുന്നത്.

എറണാകുളം ഇഎംഎസ് ടൗൺ ഹാളിൽ സംഘടിപ്പിച്ച യോഗങ്കിൽ  കൊച്ചി കോർപ്പറേഷൻ മേയർ അഡ്വ. എം അനിൽകുമാർ അധ്യക്ഷത വഹിച്ചു. ജില്ലാ കളക്ടർ എൻ എസ് കെ ഉമേഷ്, ജില്ലാ വികസന കമ്മീഷണർ എം എസ് മാധവിക്കുട്ടി, തദ്ദേശ സ്വയംഭരണ വകുപ്പ് ജോയിൻ്റ് ഡയറക്ടർ പി എം ഷെഫീഖ്, കൊച്ചി കോർപ്പറേഷൻ വികസനകാര്യ സ്റ്റാൻഡിങ് കമ്മിറ്റി ചെയർമാൻ പി ആർ റെനീഷ്, കിൻഫ്ര പ്രമോഷൻ ഇൻഡസ്ട്രിയൽ പാർക്ക് ചെയർമാൻ സാബു ജോർജ്, ചേരാനല്ലൂർ പഞ്ചായത്ത് പ്രതിപക്ഷ മെമ്പർ ടി ആർ ഭരതൻ, വിവിധ വകുപ്പ് ഉദ്യോഗസ്ഥർ, സബ് കമ്മിറ്റി പ്രതിനിധികൾ, എഡ്റാക്ക് പ്രതിനിധികൾ  തുടങ്ങിയവർ പങ്കെടുത്തു.