മോക് ഡ്രിൽ: പട്ടണക്കാട് ടേബിൾ ടോപ്പ് എക്സർസൈസ് നടത്തി

വെള്ളപ്പൊക്കമുണ്ടായാൽ സ്വീകരിക്കേണ്ട നടപടികൾ, രക്ഷാപ്രവർത്തനം എന്നിവയെക്കുറിച്ച് അവബോധം നൽകാനും നിലവിലെ രക്ഷാദൗത്യ സംവിധാനങ്ങൾ കാര്യക്ഷമമാണോ എന്ന് പരിശോധിക്കുന്നതിനും പട്ടണക്കാട് പഞ്ചായത്തിൽ ഏപ്രിൽ 25ന് നടക്കുന്ന മോക് ഡ്രില്ലിന് മുന്നോടിയായി ടേബിൾ ടോപ് എക്‌സർസൈസ് സംഘടിപ്പിച്ചു. പട്ടണക്കാട് എൽ പി സ്കൂളിൽ ചേർന്ന യോഗത്തിൽ പഞ്ചായത്ത് പ്രസിഡന്റ് ടി എസ് ജാസ്മിൻ അധ്യക്ഷയായി. മോക്ക് ഡ്രില്ലിൻ്റെ ഭാഗമായി പട്ടണക്കാട് പഞ്ചായത്തിലെ 18-ാം വാർഡിൽ ചെള്ളപ്പുറം ഘണ്ഡാകർണ്ണ ക്ഷേത്ര സമീപത്തുനിന്നും പ്രളയ ബാധിതരെ ഒഴിപ്പിക്കും. ബിഷപ്പ് ബെന്റോ മെമ്മോറിയൽ എൽ പി സ്‌കൂൾ ആണ് ദുരിതാശ്വാസ ക്യാമ്പായി ഒരുക്കിയിരിക്കുന്നത്. റീ-ബിൽഡ് കേരള പ്രോഗ്രാം ഫോർ റിസൾട്സ് പദ്ധതിയുമായി ബന്ധപ്പെട്ട് സംസ്ഥാന ദുരന്ത നിവാരണ അതോറിറ്റിയുടേയും കേരള ഇൻസ്റ്റിറ്റ്യൂട്ട് ഓഫ് ലോക്കൽ അഡ്മിനിസ്ട്രേഷന്റെയും (കില) ആഭിമുഖ്യത്തിലാണ് മോക് ഡ്രിൽ സംഘടിപ്പിക്കുന്നത്. ചേർത്തല തഹസിൽദാർ ഷീജ, ദുരന്തനിവാരണ പ്ലാൻ കോ ഓർഡിനേറ്റർ രാഹുൽകുമാർ, കില ബ്ലോക്ക് കോ ഓർഡിനേറ്റർമാർ, വിവിധ തദ്ദേശസ്വയംഭരണ സ്ഥാപനങ്ങളിലെ പ്രസിഡന്റുമാർ, ജനപ്രതിനിധികൾ, വിവിധ വകുപ്പുകളിലെ ഉദ്യോഗസ്ഥർ തുടങ്ങിയവർ പങ്കെടുത്തു.
(പിആര്‍/എഎല്‍പി/1141)