പട്ടയമേള; ധർമടത്ത് 137 പട്ടയങ്ങൾ വിതരണം ചെയ്തു

ധർമടം നിയോജക മണ്ഡല പട്ടയമേളയിൽ 137 പട്ടയങ്ങൾ വിതരണം ചെയ്തു. എരുവട്ടി വില്ലേജിലെ പന്തക്കപ്പാറ ലക്ഷംവീട് നഗറിലെ മൂന്ന് പട്ടയങ്ങളും 134 ലാൻഡ് ട്രിബ്യൂണൽ പട്ടയങ്ങളുമാണ് വിതരണം ചെയ്തത്. പട്ടയ വിതരണത്തിന്റെ ഉദ്ഘാടനം റവന്യു, ഭവന നിർമ്മാണ വകുപ്പ് മന്ത്രി കെ.രാജൻ ഓൺലൈനായി നിർവഹിച്ചു. ഡിജിറ്റൽ സർവേ പൂർത്തീകരിക്കുന്ന ഘട്ടത്തിൽ ജനങ്ങൾക്ക് അവരുടെ ഭൂമിയും ഭൂമിയിൽ ഉൾപ്പെടുന്ന കെട്ടിടവും സമ്പൂർണ്ണ വിവരവങ്ങളും രേഖപ്പെടുത്തിയ ഡിജിറ്റൽ റവന്യൂ കാർഡ് എല്ലാവരുടെയും കൈകളിൽ എത്തുമെന്ന് മന്ത്രി പറഞ്ഞു. 50 വർഷത്തിൽ അധികമായി നിലനിൽക്കുന്ന നിരവധി പ്രശ്നങ്ങളാണ് പട്ടയ ഡാഷ്ബോർഡിൽ ഉൾപ്പെടുത്തി പരിഹരിക്കാൻ സാധിച്ചതെന്നും കഴിഞ്ഞ ഒമ്പത് വർഷത്തിൽ കേരളത്തിലെ നാല് ലക്ഷത്തി ഒമ്പതിനായിരത്തോളം പട്ടയം വിതരണം ചെയ്യാൻ സാധിച്ചത് ശ്രദ്ധേയമായ കാര്യമാണെന്നും മന്ത്രി പറഞ്ഞു.

പിണറായി കൺവെൻഷൻ സെന്ററിൽ നടന്ന പട്ടയമേളയിൽ മുഖ്യമന്ത്രിയുടെ മണ്ഡലം പ്രതിനിധി പി ബാലൻ അധ്യക്ഷനായി. ജില്ലാ കലക്ടർ അരുൺ കെ വിജയൻ പട്ടയ വിതരണം നടത്തി. തലശ്ശേരി ബ്ലോക്ക് പഞ്ചായത്ത് പ്രസിഡന്റ് സി.പി അനിത, എടക്കാട് ബ്ലോക്ക് പഞ്ചായത്ത് പ്രസിഡന്റ് കെ പ്രമീള, പിണറായി പഞ്ചായത്ത് പ്രസിഡന്റ് കെ.കെ രാജീവൻ, വേങ്ങാട് പഞ്ചായത്ത് പ്രസിഡന്റ് കെ ഗീത, അഞ്ചരക്കണ്ടി പഞ്ചായത്ത് പ്രസിഡന്റ് കെ.പി ലോഹിതാക്ഷൻ, പെരളശ്ശേരി ഗ്രാമപഞ്ചായത്ത് പ്രസിഡന്റ് എ.വി. ഷീബ, ചെമ്പിലോട് ഗ്രാമപഞ്ചായത്ത് പ്രസിഡന്റ് കെ.ദാമോദരൻ, മുഴപ്പിലങ്ങാട് ഗ്രാമപഞ്ചായത്ത് പ്രസിഡന്റ് ടി സജിത, കടമ്പൂർ ഗ്രാമപഞ്ചായത്ത് പ്രസിഡന്റ് പി.വി പ്രേമവല്ലി, കണ്ണൂർ തഹസിൽദാർ ആഷിഖ് തോട്ടോൻ, തലശ്ശേരി തഹസിൽദാർ എം വിജേഷ്, കെ.ശശിധരൻ, ടി.പ്രകാശൻ മാസ്റ്റർ, പുതുക്കുടി ശ്രീധരൻ, എൻ.പി.താഹിർ, ഹരീഷ് ബാബു, കെ. ശിവദാസൻ, പി.പി. നാസർ, പി.കെ. ഗിരിജൻ, എം. ജയപ്രകാശ്, അബ്ദുൾ സത്താർ കെ.കെ. എന്നിവർ പങ്കെടുത്തു.