കട്ടപ്പന താലൂക്ക് ആശുപത്രിയില്‍ പുതിയ ഒ.പി കൗണ്ടര്‍ തുറന്നു
കട്ടപ്പന താലൂക്ക് ആശുപത്രിയില്‍ രോഗികളുടെ സൗകര്യാര്‍ത്ഥം നിര്‍മ്മിച്ചിരിക്കുന്ന നവീകരിച്ച ഒ.പി കൗണ്ടറിന്റെ ഉദ്ഘാടനം അഡ്വ.ഡീന്‍ കുര്യാക്കോസ് എം.പി നിര്‍വ്വഹിച്ചു. രോഗികള്‍ക്ക് വിദഗ്ധ ചികിത്സ അടിയന്തരമായി ലഭ്യമാക്കുന്നതിന് അടിസ്ഥാന സൗകര്യ വികസനം അത്യാവശ്യമാണെന്നും അതിനായി കൂട്ടായ പരിശ്രമം ഉണ്ടാകണമെന്നും എം.പി പറഞ്ഞു. ഹൈറേഞ്ച് മേഖലയിലെ പ്രധാന സര്‍ക്കാര്‍ ആതുരാലയമായ കട്ടപ്പന താലൂക്ക് ആശുപത്രിയുടെ വികസനത്തിനായി പാര്‍ലമെന്റംഗമെന്ന നിലയില്‍ സാധ്യമായതെല്ലാം ചെയ്യുമെന്നും എം.പി. കൂട്ടിച്ചേര്‍ത്തു. കട്ടപ്പന നഗരസഭാ ചെയര്‍മാന്‍ ജോയി വെട്ടിക്കുഴി അധ്യക്ഷത വഹിച്ചു.
സംസ്ഥാന സര്‍ക്കാരില്‍ നിന്നും അനുവദിച്ച അഞ്ചു ലക്ഷം രൂപയും ചേര്‍ത്ത് 12 ലക്ഷത്തോളം രൂപ ചെലവഴിച്ചാണ് നഗരസഭ ആശുപത്രിയുടെ ഒ.പി. കൗണ്ടര്‍ നവീകരിച്ചത്. ഒ.പി കൗണ്ടറിനോട് ചേര്‍ന്ന് ജീവിതശൈലി രോഗ നിര്‍ണ്ണയത്തിനും ഡോക്ടറുടെയും ഡയറ്റീഷ്യന്റെയും സേവനം ലഭിക്കുന്നതിനുമായി എന്‍.സി.ഡി കൗണ്ടറും ക്രമീകരിച്ചിട്ടുണ്ട്. ആരോഗ്യ ഇന്‍ഷ്വുറന്‍സിന്റെ ആനുകൂല്യം താലൂക്ക് ആശുപത്രിയില്‍ അഡ്മിറ്റ് ആകുന്ന രോഗികള്‍ക്ക് ലഭ്യമാക്കുന്നതിനുളള പ്രത്യേക വിഭാഗം ഇതോടോപ്പം പ്രവര്‍ത്തനമാരംഭിക്കും. റോട്ടറി ക്ലബ് കട്ടപ്പന അപ് ടൗണാണ് ഇതിന് വേണ്ട സൗകര്യങ്ങള്‍ ആശുപത്രിക്ക് സ്‌പോണ്‍സര്‍ ചെയ്തിരിക്കുന്നത്. ആശുപത്രിക്കായി ഒരു ഐസിയു ആംബുലന്‍സ് ഉടന്‍ ലഭ്യമാക്കുമെന്ന് യോഗത്തില്‍ ആശംസ പ്രസംഗം നടത്തിയ റോട്ടറി ക്ലബ്ബ് അപ്ടൗണ്‍ പ്രസിഡന്റ് തോമസ് മാത്യു അറിയിച്ചു.
ആശുപത്രി കോണ്‍ഫ്രന്‍സ് ഹാളില്‍ നടന്ന ഉദ്ഘാടന യോഗത്തില്‍ ആര്‍ എം ഒ ഡോ. അഭിലാഷ് പുരുഷോത്തമന്‍ റിപ്പോര്‍ട്ട് അവതരിപ്പിച്ചു. നഗരസഭാ വൈസ് ചെയര്‍പേഴ്‌സണ്‍ ലൂസി ജോയി, നഗരസഭ കൗണ്‍സിലര്‍മാര്‍, എച്ച് എം സി അംഗങ്ങള്‍, വിവിധ രാഷ്ട്രീയ പാര്‍ട്ടി പ്രതിനിധികള്‍, ആശുപത്രി ജീവനക്കാര്‍ തുടങ്ങിയവര്‍ പങ്കെടുത്തു. നഗരസഭ ആരോഗ്യ സ്റ്റാന്റിംഗ് കമ്മിറ്റി ചെയര്‍മാന്‍ തോമസ് മൈക്കിള്‍ സ്വാഗതവും വാര്‍ഡ് കൗണ്‍സിലര്‍ സണ്ണി കോലോത്ത് നന്ദിയും പറഞ്ഞു.
- Log in to post comments