അത്യപൂർവ്വ കിഴങ്ങ് വർഗ്ഗങ്ങൾ കാണാൻ ദേശീയ സംഘം

അത്യപൂർവ്വ കിഴങ്ങ് വർഗ്ഗങ്ങൾ കാണാൻ ദേശീയ സംഘം വേളൂക്കരയിലെത്തി. കിഴങ്ങുവർഗങ്ങളുടെ സംരക്ഷണത്തിൽ മാതൃകാ കേന്ദ്രമായി മാറിയ വേളൂക്കര പഞ്ചായത്തിലെ ഇടവന വീട്ടിൽ ഇ ആർ വിനോദിന്റെ പുരയിടത്തിലേക്കാണ് എൻ.ബി.പി.ആർ. സംഘം എത്തിയത്.
അത്യപൂർവ്വ കിഴങ്ങുവർഗങ്ങളുടെ ഇടമാണ് വിനോദിന്റെ വീട്. നാടനും വിദേശികളുമായ കിഴങ്ങുവർഗങ്ങളുടെ ശേഖരം ഇവിടെയുണ്ട്. വിത്ത് സംരക്ഷണത്തിനായി നട്ടുവളർത്തിയ അപൂർവ്വ ഇനങ്ങൾ അടക്കം നൂറിലധികം കിഴങ്ങുവർഗങ്ങളാണ് ദേശീയ സംഘത്തിന് മുന്നിൽ വിനോദ് പ്രദർശിപ്പിച്ചത്. എൻ.ബി.പി.ആർ. ഡയറക്റ്റർ ഡോ കുൽദീപ് സിങ്, ക്യു.ആർ.ടി. ചെയർമാൻ ഡോ.എം.പി.പാണ്ഡെ, ഡോ.എസ്.സി.ദുബെ, ഡോ.പി.എസ്.നായർ, ഡോ.വി.എസ്.ഗുപ്ത, ഡോ.ഭഗ്മൽ, ഡോ.എസ്.കാർത്തിക് എന്നിവരടങ്ങിയ സംഘമാണ് എത്തിയത്. വിവിധ ഇനങ്ങളെയും അവയുടെ ഗുണങ്ങളെയും സംബന്ധിച്ച് വിനോദ് സംഘത്തോട് വിശദീകരിച്ചു. പുരയിടത്തിലെ 90 സെന്റ് സ്ഥലത്താണ് നൂറിലധികം ഇനം കിഴങ്ങുകൾ കൃഷി ചെയ്തിരിക്കുന്നത്. കൃഷിയിടം സന്ദർശനത്തിനും പ്രദർശനത്തിനും ശേഷം വിവിധ ക്ലാസുകളും നടന്നു. ഇതോടൊപ്പം വിത്തുകളും വിതരണം ചെയ്തു. അപൂർവ്വ കിഴങ്ങുവർഗങ്ങൾ കാണാൻ നിരവധി സന്ദർശകരും ഇവിടെയെത്തുന്നുണ്ട്.