കോവിഡ് 19: വയോജനക്ഷേമത്തിനായി സാമൂഹ്യനീതി വകുപ്പിന് സംവിധായകൻ ബ്ലെസിയുടെ സന്ദേശം

സാമൂഹ്യനീതി വകുപ്പിന് വയോജനക്ഷേമ സന്ദേശവുമായി പ്രശസ്ത സംവിധായകൻ ബ്ലസി ജോർദാനിൽ നിന്ന് അയച്ച സന്ദേശം വൈറലാകുന്നു. മുതിർന്നവരെ ഏറെ കരുതലോടെ നോക്കേണ്ട കാലമാണിത് എന്നും അവരുടെ സംരക്ഷണത്തിനായി അഹോരാത്രം യത്‌നിക്കുന്ന സർക്കാരും, സാമൂഹ്യനീതി വകുപ്പും, ആരോഗ്യ പ്രവർത്തകരും മറ്റ് വകുപ്പുകളും ഏറെ പ്രശംസ അർഹിക്കുന്നു എന്നും അദ്ദേഹം അറിയിച്ചു. വളരെ ചെറുപ്പത്തിൽ അച്ഛനമ്മമാരെ നഷ്ടപ്പെട്ട തനിക്ക് മാതാപിതാക്കളുടെ വിടവ് ഏറെ അനുഭവപ്പെടാറുണ്ടെന്നും താൻ പ്രായമായവരെ കാണുന്ന സന്ദർഭങ്ങളിൽ അവരോട് കൂടുതൽ സമയം ചെലവഴിക്കാനും അവരുടെ അനുഭവപാഠങ്ങൾ ഉൾകൊള്ളാനും ശ്രമിക്കാറുണ്ടെന്നും ബ്ലെസ്സി പറഞ്ഞു. കോവിഡ് കാലത്ത് കുട്ടികൾക്ക് എന്നപോലെ മുതിർന്നവരെയും മാതാപിതാക്കളെയും പരിപാലിക്കണം. ശൈശവത്തിലേക്ക് തിരിച്ചു പോകുന്ന അവസ്ഥ അതാണ് വാർധക്യം. മക്കളുടെ സഹായം മുതിർന്നവർക്ക് വേണ്ടത് ഈ സമയത്താണ്. മുതിർന്നവരെ സംരക്ഷിക്കുന്നതാണ് ജീവിതത്തിലെ ഏറ്റവും വലിയ ഗുരുത്വം. അതിലും വലിയ ഈശ്വരാരാധന വേറെയില്ല.
കേരള സർക്കാരും സാമൂഹ്യനീതിവകുപ്പും മറ്റു വകുപ്പുകളും മുതിർന്നവരുടെ ക്ഷേമത്തിനായി യത്‌നിച്ചു ക്കൊണ്ടിരിക്കുന്നു. കോവിഡ് കാലത്ത് പ്രായമായവരുടെ സുരക്ഷിതത്വം ഉറപ്പുവരുത്തണം. സമീപത്തുള്ള പ്രായമായവരെയും മുതിർന്നവരെയും സ്‌നേഹിക്കാനും ശുശ്രൂഷിക്കാനും ഈ കാലഘട്ടത്തിൽ നമുക്ക് ലഭിക്കുന്ന അവസരം ഏറ്റവും വലിയ ഭാഗ്യമായി കരുതണം എന്നും ബ്ലെസി ഓർമിപ്പിക്കുന്നു.
കേരള സർക്കാർ, ജില്ലാ ഭരണകൂടം, സാമൂഹ്യനീതി വകുപ്പ്, വനിതാ ശിശുക്ഷേമ വകുപ്പ്, കുടുംബശ്രീ വിഭാഗക്കാർ എന്നിവയെല്ലാം സംയുക്തമായി ജില്ലയിൽ വയോജന സംരക്ഷണവും ക്ഷേമവും ഉറപ്പാക്കാൻ പരമാവധി ശ്രമിച്ചിട്ടുണ്ടന്നും, ജില്ലയിൽ കോവിഡ് പശ്ചാത്തലത്തിൽ സാമൂഹ്യനീതി വകുപ്പിന്റെയും വനിതാ ശിശുക്ഷേമ വകുപ്പിന്റെയും നേതൃത്വത്തിൽ വയോജന സെൽ കാര്യക്ഷമമായി പ്രവർത്തിക്കുന്നുണ്ടെന്നും ജില്ലാകളക്ടർ എസ് ഷാനവാസ് അറിയിച്ചു. സാമൂഹികപ്രതിബദ്ധതയുള്ള ഇത്തരം നല്ല സന്ദേശങ്ങൾ സമൂഹത്തിൽ വെളിച്ചം പകരും എന്നും അത് വയോജനക്ഷേമത്തിന് സഹായകരമാകുമെന്നും ജില്ലാകളക്ടർ പറഞ്ഞു.