സ്കോൾ കേരള മുഖേനയുള്ള ഹയർ സെക്കൻഡറി കോഴ്സുകളിൽ 2024-26 ബാച്ചിലേക്ക് ഓപ്പൺ റെഗുലർ, പ്രൈവറ്റ് രജിസ്ട്രേഷൻ, സ്പെഷ്യൽ കാറ്റഗറി (പാർട്ട് III) വിഭാഗങ്ങളിൽ ഒന്നാം വർഷ പ്രവേശനത്തിന് അപേക്ഷ ക്ഷണിച്ചു. എസ്.എസ്.എൽ.സിയിൽ ഉപരിപഠന യോഗ്യതയോ അല്ലെങ്കിൽ സർക്കാർ അംഗീകൃത തത്തുല്യ കോഴ്സിൽ ഉപരിപഠന യോഗ്യതയോ നേടിയവർക്ക് അപേക്ഷിക്കാം. ഉയർന്ന പ്രായപരിധി ഇല്ല.

കാഞ്ഞിരംകുളം ഗവ. കോളജിൽ കണക്ക് ഗസ്റ്റ് അധ്യാപകരെ 2025 മാർച്ച് 31 വരെ താത്കാലികമായി നിയമിക്കുന്നതിന് അഭിമുഖം നടത്തും.

ഫിഷറീസ് വകുപ്പ് ജനകിയ മത്സ്യകൃഷി 2024 - 2025 പദ്ധതി പ്രകാരം ജില്ലയിൽ നടപ്പാക്കുന്ന പിന്നാമ്പുറങ്ങളിലെ മത്സ്യവിത്ത് ഉത്പാദന യൂണിറ്റ്    (കരിമിൻ, വരാൽ) പദ്ധതികൾക്കായി അപേക്ഷ ക്ഷണിച്ചു. താത്പര്യമുള്ളവർ വെള്ളപേപ്പറിൽ തയാറാക്കിയ അപേക്ഷകൾ ഫിഷറിസ് ഡെപ്യൂട്ടി ഡയറക്ടർ (മേഖല), ജില്ലാ മത്സ്യഭവൻ മണക്കാട് പി ഒ. കമലേശ്വരം തിരുവനന്തപുരം പിൻ 695009 എന്ന വിലാസത്തിലോ ബന്ധപ്പെട്ട മത്സ്യഭവനുകൾ മുഖേനയോ ജൂലൈ അഞ്ചിനകം സമർപ്പിക്കണം. കൂടുതൽ വിവരങ്ങൾക്ക് 0471 2464076, 2450773

കെൽട്രോണിന്റെ പോസ്റ്റ് ഗ്രാജുവേറ്റ് ഡിപ്ലോമ ഇൻ ജേർണലിസത്തിൽ 2024 -25 ബാച്ചിലേക്ക് ജൂലായ് 10 വരെ അപേക്ഷിക്കാം. പത്രം, ടെലിവിഷൻ, സോഷ്യൽ മീഡിയ, ആർട്ടിഫിഷ്യൽ ഇന്റലിജൻസ് എന്നിവയിൽ അധിഷ്ഠിതമായ ജേർണലിസം, മൊബൈൽ ജേർണലിസം ആങ്കറിങ്, ന്യൂസ് ക്യാമറ, വീഡിയോ എഡിറ്റിംഗ് തുടങ്ങിയവയിൽ പരിശീലനം ലഭിക്കും. പഠനത്തോടപ്പം മാധ്യമ സ്ഥാപനങ്ങളിൽ നിബന്ധകൾക്ക് വിധേയമായി ഇന്റേൺഷിപ്പ് ചെയ്യാൻ അവസരം ഉണ്ടായിരിക്കും. വിജയകരമായി പരിശീലനം പൂർത്തിയാക്കുന്ന വിദ്യാർത്ഥികൾക്ക് പ്ലേസ്‌മെന്റ് അസിസ്റ്റൻസും ലഭിക്കുമെന്ന് തിരുവനന്തപുരം കെൽട്രോൺ നോളജ് സെന്റർ മേധാവി അറിയിച്ചു. ഉയർന്ന പ്രായപരിധി 30 വയസ്.

പട്ടികവർഗ വികസന വകുപ്പ് പ്ലസ് ടുവിന് സയൻസ്, കണക്ക് വിഷയങ്ങളിൽ വിജയിച്ച പട്ടിക വർഗ വിദ്യാർത്ഥികൾക്ക് നീറ്റ്, കീം പ്രവേശന പരീക്ഷകളിൽ സൗജന്യ പരിശീലനം നൽകുന്നു. ഫിസിക്‌സ് , കെമസ്ട്രീ, ബയോളജി വിഷയങ്ങൾക്ക് 70 ശതമാനം മാർക്കുണ്ടായിരിക്കണം. യോഗ്യരായ 100 പേർക്കാണ് പരിശീലനം. താത്പര്യമുള്ള വിദ്യാർത്ഥികൾ വെള്ളക്കടലാസിൽ തയാറാക്കിയ അപേക്ഷ, പേര്, മേൽവിലാസം, ബന്ധപ്പെടേണ്ട നമ്പർ, പരിശീലന സ്ഥലത്ത് താമസിച്ച് പരിശീലന പരിപാടിയിൽ പങ്കെടുക്കുന്നതിനുള്ള സമ്മതപത്രം, രക്ഷിതാവിന്റെ സമ്മതപത്രം, പ്ലസ് ടു , ജാതി, വരുമാന സർട്ടിഫിക്കറ്റുകളുടെ പകർപ്പുകൾ സഹിതം നെടുമങ്ങാട് ഐ.റ്റി.ഡി.പി പ്രോജക്ട് ഓഫീസിൽ സമർപ്പിക്കണം.

ജില്ലയിൽ ഓർഫനേജ് കൺട്രോൾ ബോർഡിൽ ഒഴിവുള്ള ഒരു ഓഫീസ് അറ്റൻഡൻറ് തസ്തികയിൽ ദിവസക്കൂലി അടിസ്ഥാനത്തിൽ നിയമനം നടത്തുന്നതിന് ശനിയാഴ്ച (ജൂൺ 29) നിശ്ചയിച്ചിരുന്ന വാക്ക്-ഇൻ- ഇൻറർവ്യൂ ചില സാങ്കേതിക കാരണങ്ങളാൽ മാറ്റി വച്ചതായി മെമ്പർ സെക്രട്ടറി അറിയിച്ചു. പുതുക്കിയ തിയതി പിന്നീട് അറിയിക്കും. കൂടുതൽ വിവരങ്ങൾക്ക് ഓർഫനേജ് കൺട്രോൾ ബോർഡ് കാര്യാലയത്തിൽ നേരിട്ടോ, 0471-2303077 എന്ന ഫോൺ നമ്പരിലോ ബന്ധപ്പെടണം.

വ്യവസായ വകുപ്പ് വഴി നടപ്പാക്കിയ മാർജിൻമണി വായ്പ കുടിശിക തീർപ്പാക്കുന്നതിനുള്ള ഒറ്റത്തവണ തീർപ്പാക്കൽ പദ്ധതിയുടെ കാലാവധി സെപ്റ്റംബർ 10 വരെ നീട്ടി. ഈ പദ്ധതിയിലെ സംരംഭകർ മരണപ്പെടുകയും, സംരംഭം പ്രവർത്തനരഹിതമായിരിക്കുന്നതും, ആസ്തികൾ ഒന്നും നിലവിൽ ഇല്ലാത്തതുമായ യൂണിറ്റുകളുടെ മാർജിൻമണി വായ്പ കുടിശികത്തുക എഴുതിത്തള്ളുന്നതാണ്. വായ്പാ കുടിശ്ശികയുള്ള മറ്റു യൂണിറ്റുകൾക്ക് തിരിച്ചടവിൽ ഇളവ് ലഭിക്കും. കുടിശികയുള്ള യൂണിറ്റുകൾ സെപ്റ്റംബർ 10 വൈകിട്ട് അഞ്ചിനകം ജില്ലാ വ്യവസായ കേന്ദ്രത്തിലോ, താലൂക്ക് വ്യവസായ ഓഫീസിലോ സമർപ്പിക്കണമെന്ന് ജില്ലാ വ്യവസായകേന്ദ്രം ജനറൽ മാനേജർ അറിയിച്ചു.

സപ്ലൈകോ ഡിപ്പോയുടെ കീഴിൽ മാനന്തവാടിയിൽ ആരംഭിക്കുന്ന ബിപിസിഎൽ പെട്രോൾ പമ്പിന്റെ ഉദ്ഘാടനം 29 ന് വൈകുന്നേരം നാലിന് ഭക്ഷ്യ പൊതു വിതരണ ഉപഭോക്‌തൃ കാര്യ ലീഗൽ മെട്രോളജി വകുപ്പ് മന്ത്രി ജി. ആർ. അനിൽ നിർവഹിക്കും. പട്ടികജാതി പട്ടികവര്‍ഗ്ഗ പിന്നാക്ക ക്ഷേമ വകുപ്പ് മന്ത്രി ഒ.ആര്‍. കേളു അധ്യക്ഷനാകും.

വായന പക്ഷാചരണത്തിൻ്റെ ഭാഗമായി ദ്വാരക സേക്രട്ട് ഹാർട്ട് സ്കൂളിലെ വിദ്യാർത്ഥികൾ പഴശ്ശി ഗ്രന്ഥാലയം സന്ദർശിച്ചു. വായനയുടെ വളർച്ചയും വ്യാപ്തിയും മനസ്സിലാക്കുന്നതിനും സാംസ്കാരിക സ്ഥാപനമെന്ന നിലയിൽ ലൈബ്രറിയുടെ പ്രവർത്തനങ്ങൾ മനസിലാക്കുന്നതിനുമായിരുന്നു ലൈബ്രറി സന്ദർശനം. പഴശ്ശി ഗ്രന്ഥാലയം സെക്രട്ടറി തോമസ് സേവ്യർ, ലൈബ്രേറിയൻമാരായ ഷിനോജ് വി.പി. ജിതിൻ എം സി എന്നിവർ പുസ്തക വിതരണം, പുസ്തകങ്ങളിലെ വൈവിധ്യങ്ങൾ എന്നിവ സംബന്ധിച്ച് വിദ്യാർത്ഥികളോട് സംവദിച്ചു. അധ്യാപകരായ ജോബിൻ മാസ്റ്റർ, ജിഷ്ണു കെ തുടങ്ങിയവർ പരിപാടിക്ക് നേതൃത്വം നൽകി.

കേരള മീഡിയ അക്കാദമി പോസ്റ്റ് ഗ്രാജുവേറ്റ് ഡിപ്ലോമ കോഴ്‌സ് 2024-25 ബാച്ച് പൊതുപ്രവേശന പരീക്ഷാഫലം പ്രഖ്യാപിച്ചു. പരീക്ഷാഫലം www.keralamediaacademy.org ല്‍ പ്രസിദ്ധീകരിച്ചിട്ടുണ്ട്. ലിസ്റ്റില്‍ ഉള്‍പ്പെട്ടിട്ടുള്ള വിദ്യാര്‍ത്ഥികളെ ഇന്റര്‍വ്യൂ സംബന്ധിച്ച വിവരങ്ങള്‍ ഇ-മെയിലിലൂടെ അറിയിക്കും.