സാമൂഹിക നീതി വകുപ്പ് നടപ്പിലാക്കുന്ന വിദ്യാകിരണം, വിദ്യാജ്യോതി പദ്ധതികളിലൂടെ വിദ്യാഭ്യാസ ധനസഹായം ലഭിക്കുന്നതിന് ഭിന്നശേഷിക്കാരായ കുട്ടികളുടെ മാതാപിതാക്കള്‍ക്കും കുട്ടികള്‍ക്കും അപേക്ഷിക്കാം. അപേക്ഷകള്‍ ജില്ലാ സാമൂഹിക നീതി ഓഫീസില്‍ ലഭിക്കേണ്ട അവസാന തീയതി ഈമാസം 15. ഫോണ്‍ 0468-2325168. 

എസ്ബിഐയുടെ പത്തനംതിട്ടയിലെ ഗ്രാമീണ സ്വയംതൊഴില്‍ പരിശീലന കേന്ദ്രത്തില്‍ 10 ദിവസം ദൈര്‍ഘ്യമുള്ള വിവിധ സൗജന്യ പരിശീലനപരിപാടികള്‍ ആരംഭിക്കുന്നു. തുണിസഞ്ചി, ബിഗ്‌ഷോപ്പര്‍, പേഴ്‌സ്, വാനിറ്റി ബാഗ്, സ്‌കൂള്‍ ബാഗ് എന്നിവയുടെ നിര്‍മാണ പരിശീലനമാണ് നല്‍കുന്നത്. 18നും 45നും മധ്യേ പ്രായമുള്ളവര്‍ക്ക് അപേക്ഷിക്കാം. താല്‍പര്യമുള്ളവര്‍ 0468-2270244, 2270243 എന്നീ നമ്പരുകളില്‍ ബന്ധപ്പെട്ട് രജിസ്റ്റര്‍ ചെയ്യണം. 

സൗജന്യമായി വൈഫൈ ഡേറ്റ നല്‍കുന്നതിനായി ജില്ലയില്‍ കൂടുതല്‍ കേന്ദ്രങ്ങള്‍ ഒരുങ്ങുന്നു. രണ്ടാം ഘട്ടത്തില്‍ 194 വൈഫൈ കേന്ദ്രങ്ങളാണ് ജില്ലയില്‍ സംസ്ഥാന ഐടി മിഷന്റെ നേതൃത്വത്തില്‍ തയ്യാറാകുന്നത്. ആദ്യഘട്ടത്തില്‍  തദ്ദേശഭരണ സ്ഥാപനങ്ങള്‍, വില്ലേജ് ഓഫീസുകള്‍, കളക്ട്രേറ്റ്, അടൂര്‍, പത്തനംതിട്ട,തിരുവല്ല മിനി സിവില്‍ സ്റ്റേഷനുകള്‍, കോഴഞ്ചേരി ജില്ലാ ആശുപത്രി, ജില്ലയിലെ വിവിധ ബസ് സ്റ്റാന്‍ഡുകള്‍ എന്നിങ്ങനെ 41 ഇടങ്ങളിലായിരുന്നു സൗജന്യ വൈഫൈ ലഭ്യമാക്കിയത്. രണ്ടാംഘട്ടത്തില്‍ കോന്നി ആനക്കൂട് ഉള്‍പ്പെടെയുള്ള വിനോദ സഞ്ചാര കേന്ദ്രങ്ങളും പമ്പാ മേഖലയും ഉള്‍പ്പെടുത്തിയിട്ടുണ്ട്. 

അറുപത്തിയാറാമത് നെഹ്‌റു ട്രോഫി ജലമേളയുടെ ഭാഗ്യചിഹ്നം നിശ്ചയിക്കാന്‍ സംസ്ഥാനതല മത്സരം നടക്കുന്നു. എ ഫോര്‍ സൈസ് ഡ്രോയിംഗ് പേപ്പറില്‍ മള്‍ട്ടികളറിലാണ് ചിഹ്നം തയ്യാറാക്കേണ്ടത്. സൃഷ്ടികള്‍ മൗലികമായിരിക്കണം. തിരഞ്ഞെടുക്കപ്പെടുന്നവര്‍ക്ക് 5001 രൂപ പുരസ്‌കാരം നല്‍കും. എന്‍ട്രികള്‍ ജൂലൈ അഞ്ചിന് മുന്‍പ് കണ്‍വീനര്‍ നെഹ്‌റുട്രോഫി പബ്ലിസിറ്റി കമ്മിറ്റി, ജില്ലാ ഇന്‍ഫര്‍മേഷന്‍ ഓഫീസ്, സിവില്‍ സ്റ്റേഷന്‍ ആലപ്പുഴ 688001 എന്ന വിലാസത്തില്‍ ലഭിക്കണം. ഫോണ്‍ : 0477 2251349. 

പട്ടികജാതി പട്ടിക വര്‍ഗ വികസന കോര്‍പ്പറേഷന്‍ പട്ടികജാതി വികസനവകുപ്പുമായി ചേര്‍ന്ന് നടപ്പിലാക്കുന്ന വിദേശ തൊഴില്‍ വായ്പാപദ്ധതിയിലേക്ക് അപേക്ഷ ക്ഷണിച്ചു. 

സംസ്ഥാനത്തെ മൈനര്‍ എന്‍ജിനീയറിംഗ്, ഫര്‍ണിച്ചര്‍ ഇന്‍ഡസ്ട്രീസ് എന്നീ മേഖലകളിലെ തൊഴിലാളികളുടെ മിനിമം വേതനം പുതുക്കി നിശ്ചയിക്കുന്നതിനുള്ള ഉപസമിതിയുടെ തെളിവെടുപ്പ് യോഗം ഈ മാസം പത്തിന് രാവിലെ 10.30 നും ഉച്ചയ്ക്ക് 12 നും തിരുവനന്തപുരം തൊഴില്‍ ഭവനിലെ ലേബര്‍ കമ്മീഷണറേറ്റിലെ കോണ്‍ഫറന്‍സ് ഹാളില്‍ നടക്കും. ജില്ലയില്‍ ഈ മേഖലയുമായി ബന്ധപ്പെട്ട് പ്രവര്‍ത്തിക്കുന്ന തൊഴിലുടമകളുടേയും തൊഴിലാളികളുടേയും പ്രതിനിധികള്‍ യോഗത്തില്‍ പങ്കെടുക്കണമെന്ന് ജില്ലാ ലേബര്‍ ഓഫീസര്‍ അറിയിച്ചു.