മുന്നാക്ക സമുദായങ്ങളിലെ സാമ്പത്തികമായി പിന്നാക്കം നില്‍ക്കുന്നവരുടെ ഭവന പുനരുദ്ധാരണ പദ്ധതിയായ ഭവനസമുന്നതിയിലേക്ക് അപേക്ഷിക്കുന്നതിനുള്ള സമയം അവസാനിച്ചു. 4.4 കോടി അടങ്കല്‍ തുകയുള്ള പദ്ധതിയില്‍ 250 പേര്‍ക്കാണ് സഹായം ലഭിക്കുക. 20,000 ത്തിലധികം അപേക്ഷകള്‍ ലഭിച്ചിട്ടുണ്ട്.

പി.എന്‍.എക്‌സ്.4227/17

സംസ്ഥാന ഫെയര്‍ റിവിഷന്‍ കമ്മിറ്റിയുടെ യോഗം 24 ന് രാവിലെ 11 ന് വഴുതയ്ക്കാട് ട്രാന്‍സ്‌പോര്‍ട്ട് കമ്മീഷണറേറ്റ് കോണ്‍ഫറന്‍സ് ഹാളില്‍ നടക്കും. കെ.എസ്.ആര്‍.ടി.സി പുതിയതായി നിരത്തിലിറക്കിയ സൂപ്പര്‍ എയര്‍ എക്‌സ്പ്രസിന്റെയും ആംബുലന്‍സുകളുടെ വാടകയും നിശ്ചയിക്കും.

പി.എന്‍.എക്‌സ്.4226/17

സംസ്ഥാനത്തെ ഭരണഭാഷ പൂര്‍ണമായും മലയാളമാക്കുക എന്ന ലക്ഷ്യം കൈവരിക്കുന്നതിനായി ഭരണഭാഷാ വര്‍ഷാഘോഷം നവംബര്‍ ഒന്നുമുതല്‍ 2018 ഒക്ടോബര്‍ 31 വരെയുള്ള ഒരു വര്‍ഷക്കാലത്തേക്കു കൂടി ദീര്‍ഘിപ്പിച്ച് ഉദേ്യാഗസ്ഥ ഭരണപരിഷ്‌കാര (ഔദേ്യാഗിക ഭാഷ) വകുപ്പ് ഉത്തരവായി. ഈ കാലയളവില്‍ വകുപ്പുകളും, ജില്ലാകളക്ടറേറ്റുകളും, സര്‍ക്കാര്‍-അര്‍ദ്ധസര്‍ക്കാര്‍ സ്ഥാപനങ്ങളും കര്‍മപരിപാടി തയ്യാറാക്കി ഭാഷാമാറ്റ പ്രവര്‍ത്തനങ്ങള്‍ തുടരണമെന്നും ഔദ്യോഗിക ഭാഷ സംബന്ധിച്ച് സര്‍ക്കാര്‍ പുറപ്പെടുവിച്ചു വരുന്ന ഉത്തരവുകളും നിര്‍ദേശങ്ങളും കര്‍ശനമായി പാലിച്ച് ഭരണഭാഷ പൊതുഭാഷയായ മാതൃഭാഷയിലാണെന്ന് ഉറപ്പുവരുത്തണമെന്നും ഉത്തരവില്‍ പറയുന്നു.

സംസ്ഥാനത്തെ വിവിധ സര്‍ക്കാര്‍/പൊതുമേഖലാ/സ്വകാര്യ സ്ഥാപനങ്ങളില്‍ നിലവിലുളള ഒഴിവുകളിലേക്ക് ഗ്രാജുവേറ്റ്/ടെക്‌നീഷ്യന്‍ അപ്രന്റീസുകളെ തെരഞ്ഞെടുക്കുന്നതിന് കേന്ദ്രസര്‍ക്കാരിന്റെ എം.എച്ച്.ആര്‍.ഡി കീഴിലുളള ചെന്നൈയിലെ ദക്ഷിണമേഖലാ ബോര്‍ഡ് ഓഫ് അപ്രന്റീസ്ഷിപ്പ് ട്രെയിനിംഗും സംസ്ഥാന സാങ്കേതിക വിദ്യാഭ്യാസ വകുപ്പിന് കീഴിലുളള കളമശ്ശേരിയിലെ സൂപ്പര്‍വൈസറി ഡെവലപമെന്റ് സെന്ററും സംയുക്തമായി, സെന്‍ട്രലൈസ്ഡ് വാക്- ഇന്‍-ഇന്റര്‍വ്യൂകള്‍ നടത്തും. ഏകദേശം 800 ഒഴിവുകള്‍ പ്രതീക്ഷിക്കുന്നു.

കോഴിക്കോട് ഇന്‍ഡസ്ട്രിയല്‍ ട്രൈബ്യൂണലും എംപ്ലോയീസ് കോമ്പന്‍സേഷന്‍ കമ്മീഷണറും എംപ്ലോയീസ് ഇന്‍ഷൂറന്‍സ് കോടതി ജഡ്ജിയുമായ കെ.വി. രാധാകൃഷ്ണന്‍ ഒക്ടോബര്‍ 10, 17 തീയതികളില്‍ കണ്ണൂര്‍ ലേബര്‍ കോടതിയിലും 24 ന് തലശ്ശേരി ബാര്‍ അസോസിയേഷന്‍ ബൈസെന്റിനറി ഹാളിലും 19, 20 തീയതികളില്‍ വയനാട് കല്‍പ്പറ്റ ബാര്‍ അസോസിയേഷന്‍ ഹാളിലും 27 ന് കാസര്‍ഗോഡ് ജില്ലാ ലേബര്‍ ഓഫീസിലും നാല്, അഞ്ച്, ആറ്, 11, 12, 13 തീയതികളില്‍ ആസ്ഥാനത്തും തൊഴില്‍തര്‍ക്ക കേസുകളും എംപ്ലോയീസ് കോമ്പന്‍സേഷന്‍ കേസുകളും എംപ്ലോയീസ് ഇന്‍ഷൂറന്‍സ് കേസുകളും വിചാരണ ചെയ്യും.

പി.എന്‍.എക്‌സ്.4223/17

നാഷണല്‍ എംപ്ലോയ്‌മെന്റ് സര്‍വ്വീസ് വകുപ്പിന്റെ കീഴില്‍ എറണാകുളത്തു പ്രവര്‍ത്തിക്കുന്ന റീജിയണല്‍ പ്രൊഫഷണല്‍ ആന്റ് എക്‌സിക്യൂട്ടീവ് എംപ്ലോയ്‌മെന്റ് എക്‌സ്‌ചേഞ്ചിന്റെ ആഭിമുഖ്യത്തില്‍ പ്രൊഫഷണല്‍ വിദ്യാഭ്യാസ യോഗ്യതയുള്ളവര്‍ക്കായി മൂന്ന് ദിവസത്തെ സോഫ്ട്‌സ്‌കില്‍ പരിശീലനം സംഘടിപ്പിക്കുന്നു. മികച്ച ഉദേ്യാഗം കരസ്ഥമാക്കുന്നതിനാവശ്യമായ മാര്‍ഗ്ഗ നിര്‍ദ്ദേശങ്ങള്‍, ആശയ വിനിമയം, ഗ്രൂപ്പ് ചര്‍ച്ച, ഇന്റര്‍വ്യൂ എന്നീ മേഖലകളില്‍ പരിശീലനവുമുണ്ടാകും.

തൃപ്പൂണിത്തുറ ഗവണ്‍മെന്റ് സംസ്‌കൃത കോളേജില്‍ സംസ്‌കൃതം വേദാന്തം വിഭാഗത്തില്‍ നിലവിലുള്ള ഒഴിവിലേക്ക് അതിഥി അദ്ധ്യാപകരെ നിയമിക്കുന്നതിന് കൂടികാഴ്ച നടത്തുന്നു. ഉദേ്യാഗാര്‍ത്ഥികള്‍ 55 ശതമാനം മാര്‍ക്കോടെ ബന്ധപ്പെട്ട വിഷയങ്ങളില്‍ ബിരുദാന്തര ബിരുദം നേടിയവരും, യു.ജി.സി യോഗ്യത ഉള്ളവരും, അതാത് മേഖലാ കോളേജ് വിദ്യാഭ്യാസ ഉപ മേധാവിയുടെ അതിഥി അദ്ധ്യാപക ലിസ്റ്റില്‍ ഉള്‍പ്പെട്ടവരുമായിരിക്കണം. യു.ജി.സി യോഗ്യതയുള്ളവരുടെ അഭാവത്തില്‍ മറ്റുള്ളവരെ പരിഗണിക്കും. താല്‍പര്യമുളളവര്‍ ഒക്ടോബര്‍ ആറിന് രാവിലെ 10 മണിക്ക് അസ്സല്‍ സര്‍ട്ടിഫിക്കറ്റുകള്‍ സഹിതം പ്രിന്‍സിപ്പാള്‍ മുമ്പാകെ ഹാജരാകണം.

സംസ്ഥാന കര്‍ഷക കടാശ്വാസ കമ്മീഷന്റെ കാര്യാലയത്തില്‍ ഓഫീസ് അസിസ്റ്റന്റ് തസ്തികയില്‍ ഡെപ്യൂട്ടേഷന്‍ വ്യവസ്ഥയില്‍ ഒരു വര്‍ഷത്തേക്ക് നിയമനത്തിന് സമാന തസ്തികയില്‍ ജോലിയില്‍ ജോലി ചെയ്യുന്ന സര്‍ക്കാര്‍ ജീവനക്കാരില്‍ നിന്നും അപേക്ഷ ക്ഷണിച്ചു. ഒരു ഒഴിവാണുള്ളത്. വകുപ്പുതലവന്‍ മുഖേന സമര്‍പ്പിക്കുന്ന അപേക്ഷകള്‍ സെക്രട്ടറി, കേരള സംസ്ഥാന കര്‍ഷക കടാശ്വാസ കമ്മീഷന്‍, അഗ്രികള്‍ച്ചറല്‍ ഹോള്‍സെയില്‍ മാര്‍ക്കറ്റ് കോമ്പൗണ്ട്, വെണ്‍പാലവട്ടം, ആനയറ പി.ഒ, തിരുവനന്തപുരം എന്ന വിലാസത്തില്‍ ഒക്ടോബര്‍ 10 നകം ലഭിക്കണം. ഫോണ്‍ : 0471 - 2743783.

പി.എന്‍.എക്‌സ്.4220/17

സി.ആര്‍.ഇസഡ് ലഭിക്കുന്നതിന് പൂര്‍ണരേഖകള്‍/വിവരങ്ങള്‍ അടങ്ങിയ അപേക്ഷകള്‍ അതോറിറ്റിയില്‍ ലഭിക്കുന്ന തീയതിക്രമത്തില്‍ മാത്രമേ പരിഗണിക്കൂവെന്ന് കേരള തീരദേശ പരിപാലന അതോറിറ്റി മെമ്പര്‍ സെക്രട്ടറി അറിയിച്ചു.

പി.എന്‍.എക്‌സ്.4219/17

കേരള ഹൈക്കോടതിയില്‍ ഇലക്ട്രീഷ്യന്‍ തസ്തികയില്‍ ഇന്ത്യന്‍ പൗരന്മാരായ യോഗ്യതയുളളവരില്‍ നിന്ന് ഓണ്‍ലൈന്‍ അപേക്ഷകള്‍ ക്ഷണിച്ചു. ഒരു ഒഴിവാണുളളത്. എസ്.എസ്.എല്‍.സി അല്ലെങ്കില്‍ തത്തുല്യ യോഗ്യതയും, ഇലക്ട്രീഷ്യന്‍ ട്രേഡില്‍ നാഷണല്‍ ട്രേഡ് സര്‍ട്ടിഫിക്കറ്റ് അല്ലെങ്കില്‍ തത്തുല്യ യോഗ്യതയും, ഇലക്ട്രീഷ്യനായി രണ്ട് വര്‍ഷത്തെ പ്രവൃത്തി പരിചയവും വേണം. ഉദ്യോഗാര്‍ത്ഥികള്‍ 1981 ജനുവരി രണ്ടിനും 1999 ജനുവരി ഒന്നിനും (രണ്ടു തീയതികളും ഉള്‍പ്പെടെ) ഇടയില്‍ ജനിച്ചവരായിരിക്കണം. പ്രായം സംബന്ധിച്ച് പട്ടികജാതി/പട്ടികവര്‍ഗം മറ്റു പിന്നാക്ക വിഭാഗങ്ങള്‍, എക്‌സ്‌സര്‍വീസ്‌മെന്‍ എന്നിവര്‍ക്ക് ഇളവുണ്ട്.