അസാപ് കേരളയുടെ പാണ്ടിക്കാട് കമ്മ്യൂണിറ്റി സ്‌കില്‍ പാര്‍ക്കില്‍ മെയ് 30ന് തൊഴില്‍ മേള നടക്കും. താത്പര്യമുള്ളവര്‍ അന്നേ ദിവസം രാവിലെ 10ന് ബയോഡാറ്റയും മറ്റു അനുബന്ധ സര്‍ട്ടിഫിക്കറ്റുകളുമായി  പാണ്ടിക്കാട് കമ്മ്യൂണിറ്റി സ്‌കില്‍ പാര്‍ക്കില്‍ എത്തണം. ഫോണ്‍ 9495999704.

മഞ്ചേരി സര്‍ക്കാര്‍ ടെക്നിക്കല്‍ ഹൈസ്‌കൂളില്‍ ഒഴിവുള്ള ഹൈസ്‌കൂള്‍ അസിസ്റ്റന്റ് ഫിസിക്കല്‍ സയന്‍സ് (കെമിസ്ട്രി) അധ്യാപക ഒഴിവിലേക്ക് നിയമനം നടത്തുന്നതിന് ജൂണ്‍ രണ്ടിന് രാവിലെ 10.30ന് അഭിമുഖം നടക്കും. ബന്ധപ്പെട്ട വിഷയത്തില്‍ ബിരുദം, കേരളത്തിലെ സര്‍വകലാശാലകള്‍ അംഗീകരിച്ച ബന്ധപ്പെട്ട വിഷയത്തിലെ ബി.എഡ്, കെ-ടെറ്റ് കാറ്റഗറി 3 യോഗ്യത എന്നിവയുള്ളവര്‍ക്ക് അപേക്ഷിക്കാം. താത്പര്യമുള്ളവര്‍ അസ്സല്‍ സര്‍ട്ടിഫിക്കറ്റുകള്‍ സഹിതം സ്‌കൂളില്‍ നടക്കുന്ന അഭിമുഖത്തില്‍ പങ്കെടുക്കണം. ഫോണ്‍ 9539049552, 9495990502.

പെരിന്തല്‍മണ്ണ പി.ടി.എം ഗവ.കോളേജില്‍ സൈക്കോളജിസ്റ്റിനെ നിയമിക്കുന്നതിനുള്ള അഭിമുഖം ജൂണ്‍ രണ്ടിന് രാവിലെ 10ന് പ്രിന്‍സിപ്പല്‍ ഓഫീസില്‍ നടക്കും. റെഗുലര്‍ പഠനത്തിലൂടെയുള്ള സൈക്കോളജിയിലെ ബിരുദാനന്തര ബിരുദമാണ് അടിസ്ഥാന യോഗ്യത. ഫോണ്‍: 04933 227370, 8606603153.

മലപ്പുറം സബ്‌സിഡിയറി കേന്ദ്രീയ പോലീസ് കല്യാണ്‍ ഭണ്ഡാറില്‍ സൂക്ഷിച്ചിരിക്കുന്ന ഉപയോഗശൂന്യമായ ചട്ടപ്പെട്ടികളും സ്ട്രാപ്പുകളും ജൂണ്‍ എട്ടിന് രാവിലെ 11ന്  മലപ്പുറം സബ്‌സിഡിയറി കേന്ദ്രീയ പോലീസ് കല്യാണ്‍ ഭണ്ഡാര്‍ പരിസരത്ത് ലേലം ചെയ്യും. ഫോണ്‍- 0483- 2734921.

പൊന്നാനി താലൂക്കിലെ ചെറുവായ്ക്കര ശിവക്ഷേത്തിലെ പാരമ്പര്യേതര ട്രസ്റ്റിമാരുടെ ഒഴിവിലേക്ക് ഹിന്ദുമത ധര്‍മ്മ സ്ഥാപന നിയമപ്രകാരം അര്‍ഹരായ തദ്ദേശവാസികളില്‍ നിന്നും അപേക്ഷ ക്ഷണിച്ചു. അപേക്ഷകള്‍ ജൂണ്‍ 30ന് വൈകീട്ട് അഞ്ചിനകം തിരൂര്‍ മിനി സിവില്‍ സ്റ്റേഷനിലെ മലബാര്‍ ദേവസ്വം ബോര്‍ഡ്, മലപ്പുറം അസിസ്റ്റന്റ്  കമ്മീഷണറുടെ ഓഫീസില്‍ ലഭ്യമാക്കണം. അപേക്ഷാ ഫോമും മറ്റ് വിശദ വിവരങ്ങളും  അസിസ്റ്റന്റ് കമ്മീഷണര്‍ ഓഫീസിലും വകുപ്പിന്റെ ഗുരുവായൂര്‍ ഡിവിഷന്‍ ഇന്‍സ്‌പെക്ടറുടെ ഓഫീസിലും ലഭ്യമാണ്.

കേരള വാട്ടര്‍ അതോറിറ്റി കൊണ്ടോട്ടി സെക്ഷന്‍ കിഴിലുള്ള ചീക്കോട് കുടിവെള്ള പദ്ധതിയില്‍ മഴക്കാലപൂര്‍വ്വ പ്രവൃത്തികളുടെ ഭാഗമായി ജൂണ്‍ ഒന്നു മുതല്‍ ജൂണ്‍ അഞ്ചു വരെ രാമനാട്ടുകര, കൊണ്ടോട്ടി മുനിസിപ്പാലിറ്റികളിലും ചീക്കോട്, മുതുവല്ലൂര്‍, കുഴിമണ്ണ, പുളിക്കല്‍, പള്ളിക്കല്‍, ചെറുകാവ്, വാഴയൂര്‍, വാഴക്കാട് പഞ്ചായത്തുകളിലും കുടിവെള്ളവിതരണം താത്കാലികമായി തടസ്സപ്പെടും. ഇരട്ടമുഴി റോ-വാട്ടര്‍ പമ്പ് ഹൗസിലെ കിണര്‍ വൃത്തിയാക്കുന്ന പ്രവൃത്തിയും നിലവിലുള്ള 900 എംഎം പമ്പിങ് മെയിന്‍ മാറ്റി സ്ഥാപിക്കുന്ന പ്രവൃത്തിയും നടക്കുന്നതിനാലാണിത്.

മണ്‍സൂണ്‍ കാലത്ത് വൈദ്യുതാഘാതമേറ്റുണ്ടാകുന്ന അപകടങ്ങള്‍ ഇല്ലാതാക്കുന്നതിന്റെ ഭാഗമായി എ.ഡി.എം. സി.എസ്.രാജേഷിന്റെ അധ്യക്ഷതയില്‍ വൈദ്യുതി അപകട നിവാരണ സമിതി ജില്ലാതല യോഗം ചേര്‍ന്നു. ജില്ലയിലെ വിവിധയിടങ്ങളില്‍ വൈദ്യുതി പോസ്റ്റിലേക്ക് ചാഞ്ഞുനില്‍ക്കുന്ന സ്വകാര്യ വ്യക്തികളുടെ അപകടകരമായ മരങ്ങള്‍ മുറിച്ചുനീക്കുന്നതിന് നോട്ടീസ് നല്‍കും. മരംമുറിച്ചുനീക്കാത്തപക്ഷം തദ്ദേശ സ്ഥാപനങ്ങളുടെ സഹായത്തോടെ മരംമുറിച്ചുമാറ്റാനും തീരുമാനിച്ചു. ഇതിനുള്ള ചെലവ് ബന്ധപ്പെട്ട വ്യക്തികളില്‍നിന്ന് ഈടാക്കും.

മലപ്പുറം ജില്ലയില്‍ പ്രവര്‍ത്തിക്കുന്ന വിനോദ സഞ്ചാര ബോട്ടുകള്‍ മണ്‍സൂണ്‍ കാലത്ത് കാലാവസ്ഥ അപകടകരമാകുന്ന റെഡ്, ഓറഞ്ച് അലര്‍ട്ട് ദിവസങ്ങളിലും പുഴയില്‍ ശക്തമായ ഒഴുക്കുള്ള ദിവസങ്ങളിലും സര്‍വ്വീസ് നിര്‍ത്തി വെക്കണമെന്ന് ജില്ലാ ദുരന്ത നിവാരണ അതോറിറ്റി നിര്‍ദ്ദേശിച്ചു. നിര്‍ദ്ദേശം ലംഘിച്ചു സര്‍വ്വീസ് നടത്തുന്ന ബോട്ടുകള്‍ക്കെതിരേയും ജീവനക്കാര്‍ക്കെതിരേയും ഇന്‍ലാന്റ്റ് വെസ്സല്‍ ആക്ട് പ്രകാരം ശിക്ഷാനടപടികള്‍ സ്വീകരിക്കുകയും ബോട്ട് പിടിച്ചെടുക്കുകയും ചെയ്യും.  കെ.ഐ.വി/ഐ.വി.

ഏജന്‍സി ഫോര്‍ ഡവലപ്‌മെന്റ് ഓഫ് അക്വാകള്‍ച്ചറില്‍ (അഡാക്) പരപ്പനങ്ങാടിയിലുള്ള ഉള്ളണം ഹാച്ചറിയിലും തലശ്ശേരിയിലെ എരഞ്ഞോളി ഫിഷ് ഫാമിലും ക്ലാര്‍ക്ക്-കം-അക്കൗണ്ടന്റ് തസ്തികയില്‍ ദിവസവേതനത്തില്‍ നിയമനം നടത്തുന്നതിന് ജൂണ്‍ അഞ്ചിന്  രാവിലെ 10.30ന് അഭിമുഖം നടത്തും. ബി.കോം ബിരുദം, എം.എസ്.ഓഫീസ്, ടാലി, ടൈപ് റൈറ്റിങ് ഇംഗ്ലീഷ് ഹയര്‍, മലയാളം ലോവര്‍ എന്നിവയാണ് അടിസ്ഥാന യോഗ്യതകള്‍. താത്പര്യമുള്ള ഉദ്യോഗാര്‍ത്ഥികള്‍ ഒറിജിനല്‍ സര്‍ട്ടിഫിക്കറ്റുകളും ഓരോ പകര്‍പ്പും സഹിതം തലശ്ശേരി എരഞ്ഞോളിയിലുള്ള അഡാക്ക് നോര്‍ത്ത് സോണ്‍ റീജിയണല്‍ ഓഫീസില്‍  ഹാജരാകണം. ഫോണ്‍- 0490- 2354073.

രാജ്യത്ത് ആദ്യമായി നടക്കുന്ന ഡിജിറ്റല്‍ സെന്‍സസിന്റെ ഭാഗമായി പൊതുജനങ്ങള്‍ക്ക് സ്വന്തമായി വിവരങ്ങള്‍ ഓണ്‍ലൈനായി രേഖപ്പെടുത്താനുള്ള (സെല്‍ഫ് എന്യൂമറേഷന്‍) സൗകര്യം ജൂണ്‍ 16 മുതല്‍ ലഭ്യമാകും. 2026 ജൂണ്‍ 16 മുതല്‍ 30 വരെയാണ് ഇതിനായി സമയം അനുവദിച്ചിരിക്കുന്നത്. 2026 ജൂലൈ ഒന്നു മുതല്‍ 31 വരെയാണ് സെന്‍സസ് ഉദ്യോഗസ്ഥര്‍ വീടുകളില്‍ എത്തുന്നത്. ഇതിന് മുന്‍പ് തന്നെ വ്യക്തികള്‍ക്ക് തങ്ങളുടെ കുടുംബത്തിലെ വിവരങ്ങള്‍ ഓണ്‍ലൈന്‍ പോര്‍ട്ടല്‍ വഴി നേരിട്ട് സമര്‍പ്പിക്കാനുള്ള സംവിധാനമാണ് സെല്‍ഫ് എന്യുമറേഷന്‍. ഏകദേശം 15-20 മിനിറ്റിനുള്ളില്‍ ഈ പ്രക്രിയ പൂര്‍ത്തിയാക്കാന്‍ സാധിക്കും.