ഒന്നാംവർഷ ഹയർസെക്കണ്ടറി/വൊക്കേഷണൽ ഹയർസെക്കണ്ടറി പ്രവേശനത്തിന് അപേക്ഷിക്കാനുള്ള അവസാന തിയതി ആഗസ്റ്റ് 25ന് വൈകിട്ട് അഞ്ച് വരെ ദീർഘിപ്പിച്ചു. ക്യാൻഡിഡേറ്റ് ലോഗിൻ സൃഷ്ടിക്കുന്നതിനുള്ള സമയപരിധിയും 25 വരെ നീട്ടിയിട്ടുണ്ട്. പുതുക്കിയ പ്രവേശന ഷെഡ്യൂൾ അഡ്മിഷൻ വെബ്‌സൈറ്റിൽ പ്രസിദ്ധീകരിക്കും.
പി.എൻ.എക്‌സ്. 2856/2020

പരമ്പരാഗത വ്യവസായമായ കൈത്തറി മേഖലയ്ക്ക് 41 കോടി സർക്കാർ അനുവദിച്ചു. സൗജന്യ കൈത്തറി സ്‌കൂൾ യൂണിഫോം കൂലി ഇനത്തിൽ 30 കോടിയും ഉൽപാദന ആനുകൂല്യമായി 4.2 കോടിയും റിബേറ്റ് ഇനത്തിൽ 6.8 കോടിയുമാണ് അനുവദിച്ചത്. തൊഴിലാളികളുടെ അക്കൗണ്ടിലേക്ക്  ജില്ലാവ്യവസായ കേന്ദ്രം ജനറൽ മാനേജർമാർ തുക നിക്ഷേപിക്കും.

സംസ്ഥാനത്തിന്റെ വികസനപ്രവർത്തനങ്ങളുടെ ധനശേഖരണാർഥം 1000 കോടി രൂപയുടെ കടപ്പത്രം പുറപ്പെടുവിക്കുന്നു. ഇതിനായുള്ള ലേലം ആഗസ്റ്റ് 25ന്  റിസർവ് ബാങ്കിന്റെ മുംബൈ ഫോർട്ട്് ഓഫീസിൽ ഇ-കുബേർ സംവിധാനം വഴി നടക്കും.
ലേലം സംബന്ധിച്ച വിജ്ഞാപനത്തിനും (നമ്പർ: എസ്.എസ്-1/244/2020 ഫിൻ. തിയതി 20.08.2020) വിശദാംശങ്ങൾക്കും ധനവകുപ്പിന്റെ വെബ്‌സൈറ്റ് (www.finance.kerala.gov.in) സന്ദർശിക്കുക.
പി.എൻ.എക്‌സ്. 2854/2020

തിരുവിതാംകൂർ ദേവസ്വം ബോർഡിലെ സ്‌ട്രോങ് റൂം ഗാർഡ് (കാറ്റഗറി നമ്പർ-02/2019) തസ്തികയിൽ മാർച്ച് ഒന്നിന് നടന്ന ഒ.എം.ആർ പരീക്ഷയുടെ അടിസ്ഥാനത്തിൽ കായികക്ഷമതാ പരീക്ഷയ്ക്ക് പങ്കെടുക്കുവാൻ യോഗ്യരായ ഉദ്യോഗാർത്ഥികളുടെ ചുരുക്ക പട്ടിക പ്രസിദ്ധീകരിച്ചു. ചുരുക്കപട്ടിക www.kdrb.kerala.gov.in ൽ ലഭിക്കും. കായികക്ഷമതാ പരീക്ഷയുമായി ബന്ധപ്പെട്ട വിവരങ്ങൾ പിന്നീട് അറിയിക്കും.
പി.എൻ.എക്‌സ്. 2853/2020

ഹൈടെക് ഫിഷ്മാർട്ടുകൾ സംസ്ഥാനത്തെ എല്ലാ മണ്ഡലങ്ങളിലും ആരംഭിക്കാൻ നടപടി സ്വീകരിച്ചതായി ഫിഷറീസ് മന്ത്രി ജെ.മേഴ്‌സിക്കുട്ടി അമ്മ അറിയിച്ചു. നിലവിൽ ആറ് മണ്ഡലങ്ങളിലാണ് ഹൈടെക് ഫിഷ് മാർട്ട് ഉള്ളത്.
തിരുവനന്തപുരം, പത്തനംതിട്ട, തൃശ്ശൂർ ജില്ലകളിൽ ആരംഭിച്ച ആധുനിക ഫിഷ്മാർട്ടിന്റെ ഉദ്ഘാടനം വീഡിയോ കോൺഫറൻസിലൂടെ നിർവ്വഹിക്കുകയായിരുന്നു മന്ത്രി.   ടൂറിസം - സഹകരണ മന്ത്രി  കടകംപള്ളി സുരേന്ദ്രൻ അദ്ധ്യക്ഷത വഹിച്ചു.  

ഗുരുവായൂർ ദേവസ്വത്തിലെ വിവിധ സിവിൽ വർക്കുകളുമായി ബന്ധപ്പെട്ട ഇഎ-1427/2020, ഇഎ-3835/2019, ഇഎ-11269/2019 എന്ന റീ-ഇ-ടെണ്ടർ നോട്ടീസുകൾ പ്രസിദ്ധീകരിച്ചു. വിശദ വിവരങ്ങൾക്ക് www.etenders.kerala.gov.in എന്ന വെബ്‌സൈറ്റ് സന്ദർശിക്കുക.

കേരള സംസ്ഥാന പട്ടികജാതി പട്ടികവർഗ്ഗ വികസന കോർപ്പറേഷന് ബ്രൗസർ അടിസ്ഥാനമാക്കിയുളള കോർബാങ്കിംഗ് സോഫ്റ്റ് വെയർ വികസിപ്പിക്കുന്നതിന് താല്പര്യപത്രം ക്ഷണിച്ചു. ടെണ്ടർ ഐഡി: 2020_കെഎസ്ഡിഎസ്_376840_1 വിശദവിവരങ്ങൾ https://www.etenders.kerala.gov.in എന്ന വെബ്‌സൈറ്റിൽ ലഭിക്കും. ഫോൺ: 0487 2331064.
 

ഗുരുവായൂർ ദേവസ്വം മെഡിക്കൽ സെന്ററിന്റെ പ്രവർത്തനസമയം രാവിലെ എട്ട് മുതൽ രാത്രി എട്ടു വരെയാക്കി ക്രമീകരിച്ചു. 24 മണിക്കൂറും പ്രവർത്തിച്ചിരുന്ന മെഡിക്കൽ സെന്ററിന്റെ സമയമാണ് നിലവിൽ 12 മണിക്കൂറായി നിജപ്പെടുത്തിയത്. നിലവിലുള്ള ഏഴ് ഡോക്ടർമാരിൽ മൂന്നുപേർ കോവിഡ് സമ്പർക്ക പട്ടികയിൽ ഉൾപ്പെട്ടതിനാൽ ക്വാറന്റൈനിലാണ്. നിലവിൽ നാല് ഡോക്ടർമാർ മാത്രമാണ് സേവനത്തിലുള്ളത്. അതിനാലാണ് 24 മണിക്കൂർ പ്രവർത്തിപ്പിക്കാനാകാത്ത സാഹചര്യം വന്നതെന്ന് ഗുരുവായൂർ ദേവസ്വം അഡ്മിനിസ്‌ട്രേറ്റർ അറിയിച്ചു.
 

കോവിഡ് പ്രതിരോധത്തിന്റെ ഭാഗമായി വകുപ്പുകളിലെ കൂടുതൽ ജീവനക്കാരുടെ സേവനം ഉപയോഗപ്പെടുത്തുമെന്ന് ജില്ലാ കളക്ടർ എസ് ഷാനവാസ് അറിയിച്ചു. അവശ്യസർവീസിന് പുറത്തുളള വകുപ്പുകളിലെ ജീവനക്കാരെയും വാഹനങ്ങളെയും കോവിഡ് പ്രതിരോധപ്രവർത്തനങ്ങൾക്ക് ഉപയോഗിക്കുന്നതിന് അവരുടെ പട്ടിക തയ്യാറാക്കും. ഇതിനായി ജില്ലയിലെ എല്ലാ സ്ഥാപനമേധാവികൾക്കും നിർദ്ദേശം നൽകി.