പുഴകളിലെ നീരൊഴുക്കിന്റെ തടസ്സം ഒഴിവാക്കുന്നതിനായി മണല്‍ നീക്കം ചെയ്യുന്ന നടപടികള്‍ ഊര്‍ജിതമാക്കുന്നതിന് തദ്ദേശസ്വയംഭരണ സ്ഥാപനങ്ങള്‍ക്ക് ജില്ലാ കളക്ടര്‍ നിര്‍ദ്ദേശം നല്‍കി.  കാലവര്‍ഷം ശക്തിപ്പെടുന്നതോടെ ജില്ലയില്‍ പലയിടങ്ങളില്‍ വെള്ളപ്പൊക്കം ഉണ്ടാകുന്നതിന് സാധ്യതയുള്ളതായി വിലയിരുത്തപ്പെട്ടിട്ടുണ്ട്.  വെള്ളപ്പൊക്ക ഭീഷണി ഒഴിവാക്കുന്നതിനായി പുഴകളിലെ നീരൊഴുക്ക് ശക്തിപ്പെടുത്തണം. ഇതിന് പുഴകളിലെ മണല്‍ നീക്കം ചെയ്യാന്‍ തദ്ദേശ സ്ഥാപനങ്ങള്‍ക്ക് അനുമതി നല്‍കിയിട്ടുണ്ട്. പ്രവൃത്തി സമയബന്ധിതമായി പൂര്‍ത്തിയാക്കണമെന്ന് കളക്ടര്‍ നിര്‍ദേശിച്ചു.

സുഭിക്ഷ കേരളം പദ്ധതിയുടെ ഭാഗമായി മേലാറ്റൂര്‍ ഗ്രാമപഞ്ചായത്തില്‍  ഫലവൃക്ഷത്തൈകള്‍ വിതരണം ചെയ്തു. ബഡ് ചെയ്ത കുടംപുളി, മാവ്, പ്ലാവ്, ടിഷ്യൂകള്‍ച്ചര്‍ വാഴ, മുരിങ്ങ, കറിവേപ്പ്, പുളി തുടങ്ങിയ തൈകളാണ് വിതരണം ചെയ്തത്. ഈ വര്‍ഷം അപേക്ഷ നല്‍കിയവര്‍ക്കും കഴിഞ്ഞ വര്‍ഷം തൈകള്‍ ലഭിക്കാതിരുന്നവര്‍ക്കുമാണ് തൈകള്‍ നല്‍കിയത്. പദ്ധതിയുടെ ഭാഗമായി ഇതുവരെ 300 തൈകള്‍ കൃഷിഭവന്‍ വഴി വിതരണം ചെയ്തു. പഞ്ചായത്തിന്റെ  2020-21 വാര്‍ഷിക പദ്ധതിയില്‍ ആറു ലക്ഷം രൂപയാണ് സുഭിക്ഷ കേരളം പദ്ധതിക്കായി നീക്കിവെച്ചിരിക്കുന്നത്.
(എം.പി.എം 2128/2020)
 

കോവിഡ് 19 രോഗ പശ്ചാത്തലത്തില്‍ വിദേശത്ത് നിന്നും ഇതര സംസ്ഥാനങ്ങളില്‍ നിന്നും  ജില്ലയിലേക്ക് തിരിച്ചെത്തിയത് 17671 പേര്‍. ഇതില്‍ 5 പ്രവാസികള്‍ മറ്റ് ജില്ലകളില്‍ നിരീക്ഷണത്തിലാണ്. നിലവില്‍ 379 പ്രവാസികളാണ് ജില്ലയില്‍ നിരീക്ഷണത്തിലുള്ളത്. കൂടുതല്‍ പേര്‍ എത്തിയത് യു.എ.ഇയില്‍ നിന്നാണ് - 147 പേര്‍. ജില്ലയിലെ ഹോട്ടലുകളിലും റിസോര്‍ട്ടുകളിലുമായി സജ്ജീകരിച്ചിട്ടുള്ള കോവിഡ് കെയര്‍ സെന്ററുകളിലും വീടുകളിലുമാണ് ഇവര്‍ നിരീക്ഷണത്തിലുള്ളത്.

കോവിഡ് 19 വ്യാപനത്തിന്റെ പശ്ചാത്തലത്തില്‍ ജില്ലയില്‍ ഹോട്ടലുകളില്‍ ഇരുന്ന് ഭക്ഷണം കഴിക്കുന്നതിനുള്ള നിരോധനം ജൂലൈ 15 വരെ നീട്ടിയതായി ജില്ലാ കലക്ടര്‍ കെ.ഗോപാലകൃഷ്ണന്‍ അറിയിച്ചു. കലക്ടറേറ്റില്‍ വിളിച്ചു ചേര്‍ത്ത കേരള ഹോട്ടല്‍ ആന്‍ഡ് റെസ്റ്റോറന്റ്‌സ് ഓണേഴ്‌സ് അസോസിയേഷന്‍ ഭാരവാഹികളുടെ യോഗത്തിലാണ് തീരുമാനം. 

കോവിഡ് 19 രോഗ പ്രതിരോധത്തിന്റെ ഭാഗമായി കണ്ടൈന്‍മെന്റ് സോണുകളായി പ്രഖ്യാപിച്ച പ്രദേശങ്ങളില്‍ പ്രവര്‍ത്തിക്കുന്ന ധനകാര്യ സ്ഥാപനങ്ങളുടെ പ്രവര്‍ത്തന സമയം ദീര്‍ഘിപ്പിച്ചു.  ബാങ്കുകള്‍ക്കും ട്രഷറികള്‍ക്കും രാവിലെ 10 മുതല്‍ ഉച്ചയ്ക്ക് 2 വരെ പ്രവര്‍ത്തിക്കാന്‍ അനുമതി ഉണ്ടാകും.  നേരത്തെ ഉച്ചയ്ക്ക് 12 വരെയായിരുന്നു പ്രവര്‍ത്തനാനുമതി നല്‍കിയിരുന്നത്.  

ആദ്യഘട്ടത്തില്‍  1.25 കോടിയുടെ നവീകരണ പദ്ധതി      

അര്‍ഹരായ കുടുംബങ്ങള്‍ക്ക് അപേക്ഷിച്ച് 24 മണിക്കൂറിനുള്ളില്‍ റേഷന്‍കാര്‍ഡ് വിതരണം ചെയ്യുന്ന പദ്ധതിയില്‍ ജില്ലയില്‍ ഇതുവരെ 477 കാര്‍ഡുകള്‍ വിതരണം ചെയ്തതായി ജില്ലാ സപ്ലൈ ഓഫീസര്‍ കെ.രാജീവ് അറിയിച്ചു. താലൂക്കടിസ്ഥാനത്തിലാണ് റേഷന്‍ കാര്‍ഡ് വിതരണം ചെയ്തത്. നിലമ്പൂര്‍ - 46,  ഏറനാട് - 43, പൊന്നാനി - 134, കൊണ്ടോട്ടി- 57, തിരൂരങ്ങാടി - 21, പെരിന്തല്‍മണ്ണ- 12, തിരൂര്‍-164 എന്നിങ്ങനെയാണ് കാര്‍ഡ് വിതരണം ചെയ്തത്.

സംസ്ഥാന സര്‍ക്കാര്‍ റേഷന്‍ കട വഴി വിതരണം ചെയ്ത  സൗജന്യ ഭക്ഷ്യധാന്യകിറ്റ് വിതരണം ജില്ലയില്‍ പൂര്‍ത്തിയായി. ഇതുവരെ  9,29,996 കാര്‍ഡുടമകള്‍ക്കാണ് ഭക്ഷ്യധാന്യ കിറ്റ് വിതരണം ചെയ്തത്.  ജില്ലയില്‍ 97.86 ശതമാനം കാര്‍ഡുടമകളും കിറ്റ് കൈപ്പറ്റിയതായി ജില്ലാസപ്ലൈ ഓഫീസര്‍ കെ.രാജീവ് അറിയിച്ചു. ബാക്കിയുള്ള കാര്‍ഡുടമകള്‍ സിവില്‍ സപ്ലൈസ് വകുപ്പിന്റെ ഡൊണേറ്റ് മൈ കിറ്റ് എന്ന ലിങ്കിലൂടെ അര്‍ഹരായവര്‍ക്ക് ഭക്ഷ്യധാന്യകിറ്റ് നല്‍കിയിരുന്നു.