ലീഡ് ബാങ്കായ കനറാ ബാങ്കിന്റെ 115ാം സ്ഥാപന ദിനത്തോടനുബന്ധിച്ച്   ഓണ്‍ലൈന്‍ സൗകര്യമില്ലാത്ത വിദ്യാര്‍ത്ഥികള്‍ക്കായി 8 ടിവി സെറ്റുകള്‍ കൂടി വിതരണം ചെയ്തു. ടിവി സെറ്റുകളുടെ വിതരണോദ്ഘാടനം കളക്ടറേറ്റില്‍ അസിസ്റ്റന്റ് കളക്ടര്‍ ഡോ. ബല്‍പ്രീത് സിംഗ് എസ്.കെ.എം.ജെ സ്‌കൂള്‍ ഹെഡ്മാസ്റ്റര്‍ എം.കെ അനില്‍കുമാറിനു നല്‍കി നിര്‍വഹിച്ചു. എ.ഡി. എം  മുഹമ്മദ് യൂസഫ്,  ലീഡ്ബാങ്ക് മാനേജര്‍ ജി. വിനോദ് , കനറാ ബാങ്ക് മാനേജര്‍  കെ.ആര്‍ രോഹിത് കിരണ്‍, ടി.കെ സോഫി, കെ. ജെ ജിനു,  അരുണ്‍ ടി. ജോസ് തുടങ്ങിയവര്‍ പങ്കെടുത്തു.

ഗാര്‍ഹിക ആവശ്യങ്ങള്‍ക്കുള്ള തേക്ക്തടിയുടെ ചില്ലറ വില്‍പ്പന പുനലൂര്‍ തടി വില്‍പ്പന ഡിവിഷന്റെ കീഴിലുള്ള അരീക്കക്കാവ് (ഫോണ്‍ 8547600535) സര്‍ക്കാര്‍ തടി ഡിപ്പോയില്‍ ജൂലൈ 27 മുതല്‍ ആരംഭിക്കും. രണ്ട് ബി, രണ്ട് സി, മൂന്നു ബി, മൂന്നു സി എന്നീ ഇനങ്ങളില്‍പ്പെട്ട തേക്ക് തടികളാണ് ചില്ലറ വില്‍പ്പനയ്ക്ക് തയാറാക്കിയിട്ടുള്ളത്. തദ്ദേശസ്വയംഭരണ സ്ഥാപനങ്ങളില്‍ നിന്നും വീട് പണിക്ക് ലഭിച്ച അനുമതി പത്രം, കെട്ടിടത്തിന്റെ അംഗീകൃത പ്ലാന്‍, സ്‌കെച്ച്, പാന്‍ കാര്‍ഡ്, തിരിച്ചറിയല്‍ കാര്‍ഡ് എന്നിവയുടെ പകര്‍പ്പും, അഞ്ചു രൂപയുടെ കോര്‍ട്ട് ഫീ സ്റ്റാമ്പും ഹാജരാക്കണം. 

ജില്ലയിലെ പതിനൊന്നര ലക്ഷത്തോളം പേര്‍ക്ക് രോഗപ്രതിരോധ ശേഷി വര്‍ധിപ്പിക്കാനുള്ള ഹോമിയോപ്പതി ഇമ്യുണിറ്റി ബൂസ്റ്റര്‍ മരുന്ന് വിതരണം ചെയ്തതായി ഹോമിയോപ്പതി ജില്ലാ മെഡിക്കല്‍ ഓഫീസര്‍ ഡോ.ഡി ബിജുകുമാര്‍ അറിയിച്ചു. കോവിഡ് രോഗവ്യാപനത്തിന്റെ തുടക്കത്തില്‍തന്നെ രോഗപ്രതിരോധ ശേഷി വര്‍ധിപ്പിക്കാനുള്ള ഹോമിയോപ്പതി ഇമ്യൂണിറ്റി ബൂസ്റ്റര്‍ മെഡിസിന്‍ ജില്ലയില്‍ സര്‍ക്കാര്‍ ഹോമിയോപ്പതി വകുപ്പിന്റെ നേതൃത്വത്തില്‍ തദ്ദേശ സ്വയംഭരണ സ്ഥാപനങ്ങളുടെയും ജനപ്രതിനിധികളുടെയും  സഹായത്തോടെ വ്യാപകമായി വിതരണം ചെയ്തിരുന്നു. ജില്ലയിലെ ജനസംഖ്യയുടെ 96 ശതമാനം പേര്‍ക്ക് ഇമ്യുണിറ്റി ബൂസ്റ്റര്‍ മരുന്ന് നല്‍കി.

 കോവിഡ് കാലത്ത് 1000 കോടി രൂപയുടെ നിര്‍മ്മാണ പ്രവര്‍ത്തനങ്ങള്‍ നാടിന് സമര്‍പ്പിക്കുന്നതിനുള്ള നടപടികള്‍ സ്വീകരിച്ചിട്ടുണ്ടെന്ന് പൊതുമരാമത്ത്, രജിസ്‌ട്രേഷന്‍ വകുപ്പ് മന്ത്രി ജി.സുധാകരന്‍ പറഞ്ഞു. മല്ലപ്പള്ളി-ആനിക്കാട് പഞ്ചായത്തുകളെ ബന്ധിപ്പിച്ച് മണിമലയാറിനു കുറുകെ നിര്‍മിച്ച കാവനാല്‍കടവ് പാലത്തിന്റെ ഉദ്ഘാടനം മുരണി യുപി സ്‌കൂള്‍ കെട്ടിടത്തില്‍ ഓഡിയോ കോളിലൂടെ ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി. 

കോവിഡ് 19 പ്രതിരോധ പ്രവര്‍ത്തനങ്ങള്‍ക്കായി ഒരു വാര്‍ഡിലെ മുഴുവന്‍ കുടുംബങ്ങള്‍ക്കും മാസ്‌ക്ക് നല്‍കി കിളിവയല്‍ വാര്‍ഡിലെ കുടുംബശ്രീ മാതൃകയായി. ഏറത്ത് പഞ്ചായത്ത് കിളിവയല്‍ ആറാം വാര്‍ഡില്‍ കോവിഡ് പ്രതിരോധ പ്രവര്‍ത്തനത്തിന്റെ ഭാഗമായി വാര്‍ഡിലെ കുടുംബശ്രീ എല്ലാ വീടുകളിലും കടുംബത്തിലെ എല്ലാ അംഗങ്ങള്‍ക്കും സൗജന്യമായി മാസ്‌ക്ക് നല്‍ക്കി. 

ഇതര സംസ്ഥാനങ്ങളില്‍നിന്ന് നിസാമുദീന്‍ - എറണാകുളം, മുംബൈ-തിരുവനന്തപുരം, നിസാമുദീന്‍ - എറണാകുളം സ്‌പെഷ്യല്‍ ട്രെയിനുകളിലായി ശനി (ജൂലൈ 4), ഞായര്‍ ( ജൂലൈ 5 ) ദിവസങ്ങളിലായി പത്തനംതിട്ട ജില്ലക്കാരായ നാലുപേര്‍കൂടി എത്തി. ഇവര്‍ നാലുപേരും വീടുകളില്‍ എത്തി നിരീക്ഷണത്തില്‍ പ്രവേശിച്ചു.

തിരുവനന്തപുരം, കൊച്ചി, കരിപ്പൂര്‍, കണ്ണൂര്‍ അന്താരാഷ്ട്ര വിമാനത്താവളങ്ങള്‍ വഴി ശനി (ജൂലൈ 4), ഞായര്‍ (ജൂലൈ 5) ദിവസങ്ങളിലായി 39 വിമാനങ്ങളില്‍ പത്തനംതിട്ട ജില്ലക്കാരായ 339 പ്രവാസികള്‍കൂടി എത്തി. ഇവരില്‍ 63 പേരെ വിവിധ കോവിഡ് കെയര്‍ സെന്ററുകളിലും മൂന്നു ഗര്‍ഭിണികള്‍ ഉള്‍പ്പെടെ 276 പേരെ വീടുകളിലും നിരീക്ഷണത്തിലാക്കി.

അടൂര്‍-തുമ്പമണ്‍-കോഴഞ്ചേരി കിഫ്ബി റോഡ് സര്‍വേ ആരംഭിച്ചു. സര്‍വേയുടെ ഉദ്ഘാടനം ചിറ്റയം ഗോപകുമാര്‍ എംഎല്‍എ നിര്‍വഹിച്ചു.  കിഫ്ബി പദ്ധതിയില്‍ ഉള്‍പ്പെടുത്തി 117 കോടി രൂപാ ചെലവില്‍ 12 മീറ്റര്‍ വീതിയില്‍ 23 കിലോ മീറ്റര്‍ നീളത്തിലാണു റോഡ് നിര്‍മിക്കുന്നത്.  റോഡിന്റെ വീതി കൂട്ടുന്നതിനായി പുറമ്പോക്ക് അളന്ന് തിട്ടപ്പെടുത്തേണ്ടതുണ്ട്. ഇതിനായി നിയോഗിച്ച സര്‍വേ ടീം അടൂരില്‍ നിന്ന് സര്‍വേ തുടങ്ങി.