ആതവനാട് മൃഗസംരക്ഷണ പരിശീലനകേന്ദ്രത്തില്‍ രജിസ്റ്റര്‍ ചെയ്തിട്ടുളള കര്‍ഷകര്‍ക്ക് ജൂലൈ ഒന്‍പതിന് രാവിലെ 10.30ന് 'ആടുവളര്‍ത്തല്‍  സാധ്യതകളും ഫാം ആരംഭിക്കുന്നതിനുളള ചട്ടങ്ങളും' എന്ന വിഷയത്തില്‍ സൗജന്യ വെബിനാര്‍ സംഘടിപ്പിക്കുന്നു. പങ്കെടുക്കാന്‍ ആഗ്രഹിക്കുന്നവര്‍  8089293728 എന്ന നമ്പറില്‍  ബന്ധപ്പെടണമെന്ന് ഡെപ്യൂട്ടി ഡയറക്ടര്‍ അറിയിച്ചു.
 

   പൂക്കോട്ടൂര്‍ ഗവണ്‍മെന്റ് ഹയര്‍ സെക്കന്‍ഡറി സ്‌കൂളില്‍ മികച്ച സൗകര്യങ്ങളൊടെ മൂന്ന് കോടി രൂപ ചെലവില്‍ പുതിയ കെട്ടിടങ്ങളൊരുങ്ങി. പൂര്‍ത്തിയാക്കിയ കെട്ടിടം കൈറ്റ്‌സ് അധികൃതര്‍ സ്‌കൂള്‍ ഭാരവാഹികള്‍ക്ക് കൈമാറി. കിച്ചണ്‍, ഡൈനിങ് ഹാള്‍, സ്റ്റേജ്, ഗ്രീന്‍ റൂം, സ്‌പോര്‍ട്‌സ് റൂം, സയന്‍സ് ലാബ്, ലൈബ്രറി, യു.പി.എസ് റൂം, കമ്പ്യൂട്ടര്‍ ലാബ് സ്മാര്‍ട്ട് ക്ലാസ് റൂം തുടങ്ങിയ കെട്ടിടങ്ങളുടെ നിര്‍മാണ പ്രവൃത്തികളാണ് പൂര്‍ത്തിയായത്.
 

   കൂട്ടിലങ്ങാടി ഗ്രാമപഞ്ചായത്തിലെ പൂഴിക്കുന്ന് കുടിവെള്ള പദ്ധതിയുടെ നിര്‍മാണം പുരോഗമിക്കുന്നു. പഞ്ചായത്തിന്റെ 2019-20 വാര്‍ഷിക പദ്ധതിയിലുള്‍പ്പെടുത്തി പത്ത് ലക്ഷം രൂപ ചെലവിലാണ് ജലസംഭരണിയും അനുബന്ധ സംവിധാനങ്ങളും ഉള്‍പ്പെടെയുള്ള സൗകര്യം ഒരുക്കിയിട്ടുള്ളത്. പദ്ധതി പൂര്‍ത്തിയാകുന്നതോടെ പഞ്ചായത്തിലെ എട്ടാം വാര്‍ഡിലെ പൂഴിക്കുന്ന് പ്രദേശത്തെ  പതിനഞ്ചോളം കുടുംബങ്ങളുടെ കുടിവെള്ള ക്ഷാമത്തിന് പരിഹാരമാകും. ജലസംഭരണിയിലേക്കുള്ള വെള്ളത്തിനായി തൊഴിലുറപ്പ് പദ്ധതിയില്‍ ഉള്‍പ്പെടുത്തി നാലേകാല്‍ ലക്ഷം രൂപ ചെലവില്‍ കിണറു പണിയും പൂര്‍ത്തിയായിവരികയാണ്.  
 

കോഴിക്കോട് ജില്ലയില്‍ ഇന്ന് (ജൂലൈ 06) 15 കോവിഡ് പോസിറ്റീവ് കൂടി റിപ്പോര്‍ട്ട് ചെയ്തതായി ജില്ലാ മെഡിക്കല്‍ ഓഫീസര്‍ ഡോ. ജയശ്രീ വി. അറിയിച്ചു. അഞ്ചു പേര്‍ രോഗമുക്തി നേടി.