ചാലക്കുടി സോഷ്യൽ ഫോറസ്ട്രി റേഞ്ചിൽ നക്ഷത്രവനത്തിൽപ്പെട്ട 27 ഇനം വൃക്ഷതൈകൾ അടങ്ങിയ 50 സെറ്റ് തൈകൾ വിൽപ്പനക്ക് തയ്യാറായി. ചാലക്കുടി റേഞ്ചിന് കീഴിൽ മൂഞ്ഞേലി നേഴ്സറിയിലാണ് ഒരു വർഷം പ്രായമായ തൈകൾ സജ്ജമാക്കിയിട്ടുള്ളത്. തൈ ഒന്നിന് 60 രൂപ നിരക്കിൽ ഒരു സെറ്റിന് 1620 രൂപക്ക് തൈകൾ ലഭിക്കും. ആവശ്യമുള്ളവർ തൃശൂർ സോഷ്യൽ ഫോറസ്ട്രി ഡിവിഷൻ ഓഫീസിലോ ചാലക്കുടി സോഷ്യൽ ഫോറസ്ട്രി റേഞ്ച് ഓഫീസിലോ ബന്ധപ്പെടുക. ഫോൺ : 0487 2320609, 85476037 81, 8547603777, 8547603776.

ഉറവിടം അറിയാത്ത കോവിഡ് ബാധ 2 പേർക്ക് സ്ഥിരീകരിച്ചതിനെ തുടർന്ന് കണ്ടെയ്ൻമെന്റ് സോണാക്കിയ കുന്നംകുളം നഗരസഭയിലെ 8 വാർഡുകളിൽ കടുത്ത നിയന്ത്രണം. രോഗവ്യാപന സാധ്യത തടയുന്നതിനായി ജനങ്ങൾക്ക് ജാഗ്രതാ നിർദ്ദേശം നൽകി. ഇതിന്റെ ഭാഗമായി ചില സോണുകളിൽ കൂട്ടം കൂടി നിന്നവരെ പോലീസ് പിരിച്ച് വിട്ടു. അവശ്യ സർവീസുകൾ പോലീസ് നിയന്ത്രണത്തിലാണ് നടന്നത്.

തൃശൂർ മുളങ്കുന്നത്തുകാവിലെ കിലയെ ഫസ്റ്റ് ലൈൻ ട്രീറ്റ്മെൻറ് സെൻററാക്കി (സി.എഫ്.എൽ.ടി.സി) ജില്ലാ ദുരന്തനിവാരണ അതോറിറ്റി ചെയർമാനായ ജില്ലാ കളക്ടർ ഉത്തരവിട്ടു. ഇവിടെ ആവശ്യമായ ക്രമീകരണങ്ങൾ ഏർപ്പെടുത്താൻ തൃശൂർ ഗവ. മെഡിക്കൽ കോളജ് പ്രിൻസിപ്പലിനെ ചുമതലപ്പെടുത്തി. പൂമല പി.എച്ച്.സിയിലെ ഡോ. എം.ആർ. ബാലകൃഷ്ണനെ സെൻററിന്റെ അഡ്മിനിസ്ട്രേറ്റീവ് ചാർജ് ഓഫീസറാക്കി. അവണൂർ പി.എച്ച്.സി മെഡിക്കൽ ഓഫീസർ ഡോ. മിഥുൻ റോഡ് ആയിരിക്കും സെൻററിന്റെ നോഡൽ ഓഫീസർ.
സെൻറിലെ മാലിന്യങ്ങൾ ഇമേജ് വഴി നിർമാർജനം ചെയ്യും. ആവശ്യമായ ആംബുലൻസ് സൗകര്യം സി.എഫ്.എൽ.ടി.സിയിൽ ഏർപ്പെടുത്താനും നിർദേശം നൽകി.

ശക്തമായ മഴയെ തുടർന്നുള്ള നീരൊഴുക്ക് മൂലം പെരിങ്ങൽക്കുത്ത് ഡാമിലെ ജലനിരപ്പ് 419 മീറ്ററായി ഉയർന്ന സാഹചര്യത്തിൽ തൃശൂർ ജില്ലാ കളക്ടർ റെഡ് അലേർട്ട് പുറപ്പെടുവിച്ചു. ഡാമിലെ ഷട്ടറുകൾ തുറന്നുവെച്ചിരിക്കുന്നതിനാൽ വൃഷ്ടി പ്രദേശത്തിലെ മഴയ്ക്കനുസരിച്ച് ജലനിരപ്പ് 419.41 മീറ്ററിൽ എത്തുമ്പോൾ അധികജലം ചാലക്കുടി പുഴയിലേക്ക് ഒഴുകും. ഇതുമൂലം ചാലക്കുടി പുഴയിലെ ജലനിരപ്പ് ഉയരാൻ സാധ്യതയുള്ളതിനാൽ കളക്ടർ ജാഗ്രതാ നിർദേശം പുറപ്പെടുവിച്ചു. പുഴയിലെ ജലനിരപ്പ് 418 മീറ്റർ ആയതിനെ തുടർന്ന് തിങ്കളാഴ്ച ഓറഞ്ച് അലേർട്ട് പുറപ്പെടുവിച്ചിരുന്നു. വൈകീട്ട് അഞ്ച് മണിയോടെയാണ് ജലനിരപ്പ് 419 മീറ്ററായത്.

ഓണ്‍ലൈന്‍ കമ്പ്യൂട്ടര്‍ കോഴ്‌സ്

സംസ്ഥാന വനിതാവികസന കോര്‍പ്പറേഷന്റെ കീഴില്‍ ജില്ലയിലെ പിലാത്തറയില്‍ വനിതകള്‍ക്കായി പ്രവര്‍ത്തിക്കുന്ന റീച്ച് ഫിനിഷിംഗ് സ്‌കൂളും  സംസ്ഥാന റൂട്രോണിക്‌സും സംയുക്തമായി  നടത്തുന്ന ഓണ്‍ലൈന്‍ കമ്പ്യൂട്ടര്‍ കോഴ്‌സിലേക്ക് പ്രവേശനം ആരംഭിച്ചു.   പി എസ് സി അംഗീകൃത പി ജി ഡി സി എ, ഡി സി എ, ഡാറ്റ എന്‍ട്രി കോഴ്‌സുകള്‍ ചെയ്യാന്‍ താല്‍പര്യമുള്ള ഡിഗ്രി, പ്ലസ്ടു, എസ്എസ്എല്‍സി യോഗ്യതയുള്ള വനിതകള്‍ക്ക് ്ജൂലൈ 15 ന് മുമ്പായി പേര് രജിസ്റ്റര്‍ ചെയ്യാം.  ഫോണ്‍: 0497 2800572, 9496015018.

കിടത്തി ചികിത്സ ഉള്‍പ്പെടെയുള്ള സൗകര്യങ്ങളോടെ പിണറായി ആയുര്‍വേദ ആശുപത്രിക്ക് പുതിയ കെട്ടിടമൊരുങ്ങുന്നു. കെട്ടിടത്തിന്റെ ഒന്നാം ഘട്ട പ്രവൃത്തി ഉദ്ഘാടനം ജൂലൈ ഒന്‍പതിന് രാവിലെ 11.30 ന് മുഖ്യമന്ത്രി പിണറായി വിജയന്‍ നിര്‍വഹിക്കും. ആരോഗ്യ വകുപ്പ് മന്ത്രി കെ കെ ശൈലജ ടീച്ചര്‍ അധ്യക്ഷയാകും. ഒന്നര കോടി രൂപ ചെലവിലാണ് പദ്ധതിയുടെ ആദ്യഘട്ട പ്രവൃത്തികള്‍ നടക്കുന്നത്.