പരിസ്ഥിതി കാലാവസ്ഥാ വ്യതിയാന വകുപ്പ് 2017 -2018 വര്‍ഷത്തേക്ക് പരിസ്ഥിതി വിദ്യാഭ്യാസവും പ്രോത്സാഹനവും പദ്ധതിക്കു കീഴില്‍ പാരിസ്ഥിതികം രണ്ടാംഘട്ടം പദ്ധതിയിലേക്ക് അപേക്ഷ ക്ഷണിച്ചു.  സംസ്ഥാന തലത്തില്‍ പരിസ്ഥിതി ബോധവത്കരണം നടത്തുന്നതിന് സര്‍ക്കാരിതര സംഘടനകള്‍, വിദ്യാഭ്യാസ സ്ഥാപനങ്ങള്‍, പരിശീലന കേന്ദ്രങ്ങള്‍, പ്രൊഫഷണല്‍ സംഘടനകള്‍ എന്നിവയില്‍ നിന്നാണ് അപേക്ഷ ക്ഷണിക്കുന്നത്.  മുനുഷ്യര്‍ പ്രകൃതിയിലേക്ക് എന്നതാണ് ഈ വര്‍ഷത്തെ പ്രമേയം.  നവംബര്‍ 20 മുതല്‍ 2018 ഫെബ്രുവരി 15 വരെ നീളുന്ന പദ്ധതിക്ക് 20,000 മുതല്‍ 50,000 രൂപ വരെ ധനസഹായം നല്‍കും.  

മാര്‍ച്ചില്‍ എസ്.എസ്.എല്‍.സി പരീക്ഷ എഴുതുന്ന എല്ലാ വിദ്യാര്‍ത്ഥികളുടേയും ഫോട്ടോ ഉള്‍പ്പെടെയുള്ള വിവരങ്ങള്‍ 'സമ്പൂര്‍ണ' സ്‌കൂള്‍ മാനേജ്‌മെന്റ് പോര്‍ട്ടലില്‍ നവംബര്‍ 18 ന് മുമ്പ് നല്‍കണമെന്ന് പരീക്ഷാ കമ്മീഷണര്‍ അറിയിച്ചു. വിദ്യാര്‍ത്ഥികളുടെ വിവരങ്ങള്‍ നല്‍കുന്നതിനും തിരുത്തല്‍ വരുത്തുന്നതിനും ഇത്തവണ മറ്റു സോഫ്റ്റ്‌വെയറുകള്‍ ഉപയോഗിക്കില്ല. ഈ വര്‍ഷത്തെ 38 ലക്ഷത്തോളം കുട്ടികളുടെ ആറാം പ്രവൃത്തിദിന കണക്കെടുപ്പ് പൂര്‍ണമായും 'സമ്പൂര്‍ണ' പോര്‍ട്ടല്‍ വഴി ആയിരുന്നു.

ജലസമൃദ്ധമായ കാട്ടാക്കട നിയോജകമണ്ഡലത്തിനായി ഐ.ബി. സതീഷ് എം.എല്‍.എയുടെ നേതൃത്വത്തില്‍ ത്രിതല ജനപ്രതിനിധികളുടെ സഹകരണത്തോടെ രൂപമെടുത്ത ജനകീയ സംരംഭമായ 'വറ്റാത്ത ഉറവയ്ക്കായി ജലസമൃദ്ധി' പദ്ധതിയുടെ വെബ്‌സൈറ്റ് മുഖ്യമന്ത്രി പിണറായി വിജയന്‍ പ്രകാശനം ചെയ്തു.

പദ്ധതി നടപ്പാക്കാന്‍ സംസ്ഥാന ഭൂവിനിയോഗ ബോര്‍ഡിന്റെ സാങ്കേതിക മേല്‍നോട്ടത്തില്‍ വികസന വകുപ്പുകളുടെയും തദ്ദേശസ്വയംഭരണ സ്ഥാപനങ്ങളുടെയും സഹകരണത്തോടെ തയാറാക്കിയ ജലവിഭവ പരിപാലന രേഖയിലെ പൂര്‍ണ വിവരങ്ങള്‍ ജനങ്ങള്‍ക്ക് വെബ്‌സൈറ്റിലൂടെ ലഭ്യമാകും.

സംസ്ഥാനത്തെ 75.62 ലക്ഷം കുട്ടികളില്‍ അന്‍പത് ലക്ഷം പേര്‍ക്ക് മീസില്‍സ് റൂബെല്ല വാക്‌സിന്‍ നല്‍കിയതായി ആരോഗ്യമന്ത്രി കെ.കെ. ശൈലജ ടീച്ചര്‍ വാര്‍ത്താസമ്മേളനത്തില്‍ പറഞ്ഞു. നവംബര്‍ 18 വരെ കുട്ടികള്‍ക്ക് വാക്‌സിന്‍ നല്‍കാന്‍ നിര്‍ദ്ദേശിച്ചിട്ടുണ്ട്. ഇതിലൂടെ സംസ്ഥാനത്തെ 100 ശതമാനം കുട്ടികള്‍ക്കും വാക്‌സിന്‍ നല്‍കുകയാണ് ലക്ഷ്യം. പത്തനംതിട്ട ജില്ലയില്‍ 93.91 ശതമാനം കുട്ടികള്‍ക്ക് വാക്‌സിന്‍ നല്‍കി. 

കൊച്ചി: ജില്ലാതല ഭരണഭാഷാ സേവന പുരസ്‌കാരത്തിന് രജിസ്‌ട്രേഷന്‍ വകുപ്പിലെ ജീവനക്കാരന്‍ ഗിബ്‌സണ്‍ ലൂയിസ് അര്‍ഹനായി. മലയാളത്തില്‍ ഫയലുകളും ദൈനംദിന വ്യവഹാരങ്ങളും നടത്തുന്നതില്‍ പുലര്‍ത്തുന്നതിലെ മികവാണ് പുരസ്‌കാരകത്തിന് പരിഗണിച്ചത്. ഇന്ന് കളക്ടറേറ്റില്‍ നടക്കുന്ന ഭരണഭാഷാ വാരാചരണത്തിന്റെ ഉദ്ഘാടനച്ചടങ്ങില്‍ ജില്ലാ കളക്ടര്‍ മുഹമ്മദ് വൈ സഫിറുള്ള പുരസ്‌കാരം സമ്മാനിക്കും.

കൊച്ചി: ഹരിതകേരളം പദ്ധതിയുടെ ഭാഗമായുള്ള വിവിധ സമഗ്ര ശുചിത്വ മാലിന്യ പ്രൊജക്ടുകള്‍ക്ക് ജില്ലയില്‍ ഇന്ന് തുടക്കം. ജില്ലയിലെ ഇരുപതോളം തദ്ദേശസ്വയം ഭരണ സ്ഥാപനങ്ങളില്‍ സമഗ്ര ശുചിത്വ കര്‍മ്മ പദ്ധതിയുടെ ഭാഗമായുള്ള പ്രൊജക്ടുകളുടെ ഉദ്ഘാടനങ്ങള്‍ ഇന്ന് നടക്കും. പദ്ധതിയുടെ ജില്ലാതല ഉദ്ഘാടനം കുന്നുകര ഗ്രാമ പഞ്ചായത്തില്‍ പ്രൊഫ.കെ.വി.തോമസ് എം.പി. നിര്‍വ്വഹിക്കും. ഹരിത കര്‍മ്മ സേനയുടെ പ്രവര്‍ത്തനങ്ങള്‍ക്ക് ആരംഭം കുറിക്കുന്നതിനൊപ്പം പഞ്ചായത്ത് തല മെറ്റീരിയല്‍ കളക്ഷന്‍ സെന്റര്‍ ഉദ്ഘാടനവും കുന്നുകരയില്‍ ഇന്ന് നടക്കും.

കൊച്ചി: എറണാകുളം ജനറല്‍ ആശുപത്രിയിലേക്ക് ഡയാലിസിസ് ചെയറുകള്‍ വിതരണം ചെയ്യുന്നതിനും സ്ഥാപിക്കുന്നതിനും ടെന്‍ഡര്‍ ക്ഷണിച്ചു. നവംബര്‍ 29 വരെ ടെന്‍ഡര്‍ സ്വീകരിക്കും. കൂടുതല്‍ വിവരങ്ങള്‍ ഓഫീസില്‍ നിന്നും പ്രവൃത്തി സമയങ്ങളില്‍ നേരിട്ട് അറിയാം.

കൊച്ചി: സംസ്ഥാന പട്ടികജാതി/വര്‍ഗ വികസന കോര്‍പറേഷന്‍ ദേശീയ പട്ടിക വര്‍ഗ ധനകാര്യ വികസന കോര്‍പറേഷന്റെ സഹായത്തോടെ നടപ്പിലാക്കുന്ന 50,000 രൂപ പദ്ധതി തുകയുളള 'ആദിവാസി മഹിളാ സശാക്തീകരണ്‍ യോജന'ക്കു കീഴില്‍ വായ്പ അനുവദിക്കുന്നതിന് വിവിധ ജില്ലകളിലെ പട്ടികവര്‍ഗത്തില്‍പ്പെട്ട തൊഴില്‍ രഹിതരായ യുവതീ യുവാക്കളില്‍ നിന്നും അപേക്ഷ ക്ഷണിച്ചു. അപേക്ഷകര്‍ പട്ടികവര്‍ഗത്തില്‍പ്പെട്ട തൊഴില്‍ രഹിതരും 18 നും 50 നും മധ്യേ പ്രായമുളളവരുമായിരിക്കണം. കുടുംബ വാര്‍ഷിക വരുമാനം ഗ്രാമപ്രദേശങ്ങളില്‍ താമസിക്കുന്നവര്‍ക്ക് 98,000 രൂപയിലും നഗരപ്രദേശങ്ങളില്‍ താമസിക്കുന്നവര്‍ക്ക് 1,20,000 രൂപയിലും കവിയാന്‍ പാടില്ല.

കൊച്ചി: സംസ്ഥാന പട്ടികജാതി/വര്‍ഗ വികസന കോര്‍പറേഷന്‍ ദേശീയ പട്ടിക വര്‍ഗ ധനകാര്യ വികസന കോര്‍പറേഷന്റെ സഹായത്തോടെ നടപ്പിലാക്കുന്ന 2,00,000 രൂപ പദ്ധതി തുകയുളള സ്വയം തൊഴില്‍ വായ്പ പദ്ധതിയായ 'പട്ടികവര്‍ഗ സംരംഭകര്‍ക്കുളള വായ്പ പദ്ധതി'ക്കു കീഴില്‍ വായ്പ അനുവദിക്കുന്നതിന് വിവിധ ജില്ലകളിലെ പട്ടികവര്‍ഗത്തില്‍പ്പെട്ട സംരംഭകത്വ ഗുണമുളള യുവതീ യുവാക്കളില്‍ നിന്നും അപേക്ഷ ക്ഷണിച്ചു. അപേക്ഷകര്‍ പട്ടികവര്‍ഗത്തില്‍പ്പെട്ട തൊഴില്‍ രഹിതരും 18 നും 50 നും മധ്യേ പ്രായമുളളവരുമായിരിക്കണം.

കൊച്ചി: സംസ്ഥാന സര്‍ക്കാരിന്റെ നിര്‍ദേശപ്രകാരമുള്ള ഭരണഭാഷാ വാരാചരണത്തിന്റെ ജില്ലാതല ഉദ്ഘാടനം മലയാളദിനമായ ഇന്ന് (നവംബര്‍ ഒന്ന്) രാവിലെ 10.30ന് കളക്ടറേറ്റ് കോണ്‍ഫറന്‍സ് ഹാളില്‍ നടക്കും. ജില്ലാ കളക്ടര്‍ മുഹമ്മദ് വൈ സഫിറുള്ള ഉദ്ഘാടനം നിര്‍വഹിക്കും. ഡോ. സുനില്‍ പി ഇളയിടം മുഖ്യപ്രഭാഷണം നടത്തും. ജില്ലാ ഭരണകൂടവും പബ്ലിക്ക് റിലേഷന്‍സ് വകുപ്പും ചേര്‍ന്നാണ് പരിപാടി സംഘടിപ്പിക്കുന്നത്. വാരാചരണത്തിന്റെ ഭാഗമായി സര്‍ക്കാര്‍ ജീവനക്കാര്‍ക്കായി പി.ആര്‍.ഡി സംഘടിപ്പിക്കുന്ന മത്സരങ്ങള്‍ക്ക് നാളെ (നവം 02) തുടക്കമാകും.