പട്ടികജാതി വികസന വകുപ്പ്  മുഖേന  പഠനമുറി  നിര്‍മ്മിക്കുന്ന  പദ്ധതിക്ക്    ഗവ./എയ്ഡഡ്/ടെക്‌നിക്കല്‍/സ്‌പെഷ്യല്‍   സ്‌കൂളുകളില്‍ എട്ടാം   ക്ലാസ്സ് മുതല്‍ പ്ലസ്ടു വരെ  പഠിക്കുന്ന  പട്ടികജാതി  വിദ്യാര്‍ത്ഥികളുടെ   രക്ഷിതാക്കളില്‍   നിന്നും  അപേക്ഷ  ക്ഷണിച്ചു.   ഗ്രാമസഭാ ലിസ്റ്റ്  നിലവിലുള്ള   പഞ്ചായത്തുകളില്‍  ലിസ്റ്റിന്റെ മുന്‍ഗണനാ ക്രമത്തിലും   ഗ്രാമസഭാ ലിസ്റ്റ്  ഇല്ലാത്ത   പഞ്ചായത്തുകളില്‍    നേരിട്ടുള്ള    അപേക്ഷ  പ്രകാരവുമാണ്  തിരഞ്ഞെടുപ്പ്.  800 സ്‌ക്വയര്‍ ഫീറ്റില്‍ കൂടുതല്‍ വലുപ്പമുള്ള  വീടുള്ളവര്‍ അപേക്ഷിക്കാന്‍   അര്‍ഹരല്ല.

മീനങ്ങാടി ഗ്രാമ പഞ്ചായത്തിനെ ഹരിത സമൃദ്ധി പഞ്ചായത്തായി പ്രഖ്യാപിച്ചു. ഹരിത കേരള മിഷന്റെ ഹരിത സമൃദ്ധി പഞ്ചായത്ത് പദ്ധതിയുടെ അടിസ്ഥാനത്തിലാണ് പ്രഖ്യാപനം. പഞ്ചായത്തിലെ ഒരു വാര്‍ഡില്‍ ഒരു വര്‍ഷം പരമാവധി 2000 പച്ചക്കറി വിത്തുകളോ, തൈകളോ വിതരണം ചെയ്യുന്ന പഞ്ചായത്തുകളെയാണ് ഹരിത സമൃദ്ധി പഞ്ചായത്തായി പ്രഖ്യാപിക്കുന്നത്. മീനങ്ങാടി പഞ്ചായത്ത് വിവിധ ഘട്ടങ്ങളിലായി 5 ലക്ഷത്തില്‍പ്പരം വിത്തുകളാണ് വിതരണം ചെയ്തിട്ടുള്ളത്.

നല്ലൂര്‍നാട് അംബേദ്കര്‍ മെമ്മോറിയല്‍ കാന്‍സര്‍ ആശുപത്രിയില്‍ ചികിത്സക്ക് എത്തുന്നവര്‍ ഉച്ചകഴിഞ്ഞ് രണ്ടിനും അഞ്ചിനും ഇടയില്‍ 8281212702 എന്ന ഹെല്‍പ്പ് ലൈന്‍ നമ്പറില്‍ വിളിച്ച്  ബുക്കിംഗ് ഉറപ്പാക്കണമെന്ന് സൂപ്രണ്ട് അറിയിച്ചു. കോവിഡ് 19 വ്യാപനം തടയുന്നതിനായി ആശുപത്രിയിലെത്തുന്ന രോഗികളും കൂടെ വരുന്നവരും ആരോഗ്യ വകുപ്പിന്റെ നിര്‍ദ്ദേശങ്ങള്‍ കര്‍ശനമായി പാലിക്കേണ്ടതാണെന്നും അദ്ദേഹം അറിയിച്ചു  

------
ഡ്രൈവര്‍ക്ക് കോവിഡ് സ്ഥിരീകരിച്ച കോട്ടയം കെ.എസ്.ആര്‍.ടി.സി ഡിപ്പോ അടച്ചിടേണ്ട സാഹചര്യം നിലവിലില്ലെന്ന് ജില്ലാ ട്രാന്‍സ്പോര്‍ട്ട് ഓഫീസര്‍ മുഹമ്മദ് അബ്ദുല്‍ നാസര്‍ അറിയിച്ചു. രോഗം സ്ഥിരീകരിച്ച ഡ്രൈവറുടെ പ്രാഥമിക സമ്പര്‍ക്ക പട്ടികയിലുള്ള രണ്ടു കണ്ടക്ടര്‍മാരും ഒരു വെഹിക്കിള്‍ സൂപ്പര്‍ വൈസറും ക്വാറന്‍റയിനിലാണ്.
 
സ്റ്റാന്‍റ് അണുവിമുക്തമാക്കിയശേഷമാണ് ഇപ്പോള്‍ പ്രവര്‍ത്തിക്കുന്നത്. രോഗം സ്ഥിരീകരിച്ച ഡ്രൈവര്‍ ജൂലൈ 20നാണ് ഏറ്റവും ഒടുവില്‍ സ്റ്റാന്‍റില്‍ എത്തിയത്.

 പട്ടിക വർഗ വികസന വകുപ്പിനു കീഴിൽ മൂന്നാറിൽ പ്രവർത്തിക്കുന്ന  മോഡൽ റസിഡൻഷ്യൽ സ്കൂളിൽ പ്ലസ് വൺ കൊമേഴ്സ് ബാച്ച് പ്രവേശനത്തിന് അപേക്ഷ ക്ഷണിച്ചു. വാർഷിക കുടുംബ വരുമാനം ഒരു ലക്ഷം രൂപയില്‍ കവിയാത്ത പട്ടിക വർഗ, പട്ടിക ജാതി, പൊതു വിഭാഗത്തിൽപ്പെട്ടവർക്ക് അപേക്ഷിക്കാം. മോഡൽ റസിഡൻഷ്യൽ സ്കൂളുകൾ, ഐറ്റി ഡി പി ഓഫീസ്, ട്രൈബൽ ഡവലപ്‌മെന്റ് ഓഫീസുകൾ എന്നിവിടങ്ങളിൽ അപേക്ഷാ ഫോറം ലഭ്യമാണ്. ഓഗസ്റ്റ്  മൂന്നിന്  വൈകുന്നേരം അഞ്ചിനകം സമർപ്പിക്കണം ഫോൺ : 9446085395, 9895490567

-----
സമ്പര്‍ക്കത്തിലൂടെ കോവിഡ് ബാധിച്ചവരുടെ എണ്ണം വര്‍ധിച്ച സാഹചര്യത്തില്‍ പായിപ്പാട് ഗ്രാമപഞ്ചായത്ത് പ്രത്യേക കോവിഡ് ക്ലസ്റ്ററായി പ്രഖ്യാപിച്ച് കൂടുതല്‍ നിയന്ത്രണങ്ങള്‍ ഏര്‍പ്പെടുത്തി. ജില്ലയില്‍ ഇതുവരെ  ഏറ്റവുമധികം സമ്പര്‍ക്ക വ്യാപനം സ്ഥിരീകരിച്ച ചങ്ങനാശേരി ക്ലസ്റ്ററിന്‍റെ ഭാഗമായാണ് പായിപ്പാട് ഗ്രാമപഞ്ചായത്ത് മേഖല ഇതുവരെ പരിഗണിക്കപ്പെട്ടിരുന്നത്.

കോവിഡ് ആശുപത്രിയായ കോട്ടയം ജനറല്‍ ആശുപത്രിയിലെ സൗകര്യങ്ങള്‍ വിപുലീകരിക്കാന്‍ ജില്ലാ ദുരന്ത നിവാരണ അതോറിറ്റി തീരുമാനിച്ചു. തൊട്ടടുത്ത സെന്‍റ് ആന്‍സ് സ്കൂള്‍ കെട്ടിടം കൂടി ഉള്‍പ്പെടുത്തിയായിരിക്കും ഇതിനുള്ള ക്രമീകരണം ഏര്‍പ്പെടുത്തുക.

പൊതു ഔട്ട് പേഷ്യന്‍റ് വിഭാഗം സ്കൂള്‍ കെട്ടിടത്തിലേക്ക് മാറ്റുന്നതോടെ കോവിഡ് ചികിത്സാ വിഭാഗത്തിലും അത്യാഹിത വിഭാഗത്തിലും കൂടുതല്‍ സൗകര്യങ്ങള്‍ ഒരുക്കാനാകും. 

===================
കോട്ടയം ജില്ലയില്‍ അന്‍പതു പേര്‍ക്ക് പുതിയതായി കോവിഡ് സ്ഥിരീകരിച്ചു. ഇതില്‍ 42 പേര്‍ക്കും സമ്പര്‍ക്കം മുഖേനയാണ് രോഗം ബാധിച്ചത്. ആരോഗ്യ പ്രവര്‍ത്തകയും  വിദേശത്തുനിന്നെത്തിയ അഞ്ചു പേരും മറ്റു സംസ്ഥാനങ്ങളില്‍നിന്നെത്തിയ രണ്ടു പേരും രോഗബാധിതരുടെ പട്ടികയില്‍ ഉള്‍പ്പെടുന്നു.

രോഗം ബാധിച്ച് ചികിത്സയിലായിരുന്ന 74 പേര്‍ സുഖംപ്രാപിച്ച് ആശുപത്രി വിട്ടു. നിലവില്‍ 366 പേരാണ് ചികിത്സയിലുള്ളത്. ജില്ലയില്‍ ഇതുവരെ ആകെ 737 പേര്‍ക്ക് രോഗം ബാധിച്ചു 371 പേര്‍ രോഗമുക്തരായി.

കോട്ടയം ജില്ലയില്‍ അഞ്ച് തദ്ദേശസ്വയഭംരണ സ്ഥാപനങ്ങളിലെ ആറു വാര്‍ഡുകള്‍കൂടി കണ്ടെയ്ന്‍മെന്‍റ് സോണുകളായി പ്രഖ്യാപിച്ച് ജില്ലാ കളക്ടര്‍ എം. അഞ്ജന ഉത്തരവായി. വൈക്കം, കോട്ടയം  മുനിസിപ്പാലിറ്റികളിലെ  24-ാം വാര്‍ഡുകള്‍, അയ്മനം പഞ്ചായത്തിലെ 14-ാം വാര്‍ഡ്, പാറത്തോട് പഞ്ചായത്തിലെ 16-ാം വാര്‍ഡ്,  വെച്ചൂര്‍ പഞ്ചായത്തിലെ 1, 4 വാര്‍ഡുകള്‍ എന്നിവയാണ് പുതിയ കണ്ടെയന്‍മെന്‍റ് സോണുകള്‍.

ഇതോടെ ജില്ലയില്‍ 19 തദ്ദേശഭരണ സ്ഥാപനങ്ങളിലെ 39 വാര്‍ഡുകള്‍ കണ്ടെയ്ന്‍മെന്‍റ് സോണുകളായി.