തിരുവനന്തപുരം കൈമനം സർക്കാർ വനിതാ പോളിടെക്‌നിക് കോളേജിലെ കൊമേഴ്‌സ്യൽ പ്രാക്ടീസ് വകുപ്പിൽ ഒഴിവുള്ള ഇൻസ്ട്രക്ടർ ഇൻ ഷോർട്ട് ഹാൻഡ് തസ്തികയിലെ താത്കാലിക അധ്യാപക നിയമനത്തിന് ആഗസ്റ്റ് 19ന് രാവിലെ 11ന് ഓൺലൈൻ അഭിമുഖം നടത്തും.  ഒന്നാം ക്ലാസ്സോടെ റഗുലർ ബി.കോമും കൊമേർഷ്യൽ പ്രാക്ടീസ് ഡിപ്ലോമയുമുള്ളവർ ബയോഡാറ്റ, യോഗ്യത തെളിയിക്കുന്ന അസ്സൽ സർട്ടിഫിക്കറ്റുകളുടെ പകർപ്പുകൾ എന്നിവ സഹിതം wptctvm@yahoo.co.in ൽ ആഗസ്റ്റ് 17ന് മുമ്പ് അയക്കണമെന്ന് പ്രിൻസിപ്പൽ അറിയിച്ചു.  
പി.എൻ.എക്‌സ്. 2718/2020

മൃഗസംരക്ഷണ വകുപ്പിലെ ഡ്രൈവർ/ ഡ്രൈവർ കം ഓപ്പറേറ്റർ തസ്തികയിലെ ജൂൺ ഒന്നിലെ നിലവച്ചുള്ള താത്കാലിക മുൻഗണനാ പട്ടിക www.ahdkerala.gov.in ൽ പ്രസിദ്ധീകരിച്ചു.  ആക്ഷേപങ്ങൾ രേഖകൾ സഹിതം നടപടിക്രമം പുറപ്പെടുവിച്ച തിയതി മുതൽ 30 ദിവസത്തിനകം മൃഗസംരക്ഷണ വകുപ്പ് ഡയറക്ടർക്ക് ലഭ്യമാക്കണം.  വൈകി ലഭിക്കുന്ന പരാതികൾ പരിഗണിക്കില്ലെന്ന് ഡയറക്ടർ അറിയിച്ചു.
പി.എൻ.എക്‌സ്. 2717/2020

തിരുവനന്തപുരം ജി.വി രാജാ സ്‌പോർട്‌സ് സ്‌കൂൾ, കണ്ണൂർ സ്‌പോർട്‌സ് ഡിവിഷൻ വിദ്യാലയങ്ങളിലേക്ക് 2020-21 അധ്യയന വർഷത്തേക്കുള്ള വിദ്യാർഥികളെ തെരഞ്ഞെടുക്കാൻ നടത്തിയ സെലക്ഷൻ ട്രയൽസിൽ പങ്കെടുത്ത കുട്ടികളിൽ മാർക്കിന്റെ അടിസ്ഥാനത്തിൽ ഷോർട്ട് ലിസ്റ്റ് ചെയ്തവരുടെ പട്ടിക  http://gvrsportsschool.org/talenthunt ൽ പ്രസിദ്ധീകരിച്ചു.  ഓൺലൈൻ ഇന്റർവ്യൂവിന്റെ അടിസ്ഥാനത്തിൽ ഫൈനൽ ലിസ്റ്റ് പ്രസിദ്ധീകരിക്കും.  തിയതി പിന്നീട് അറിയിക്കും.  കൂടുതൽ വിവരങ്ങൾക്ക്: 0471 2326644.
പി.എൻ.എക്‌സ്. 2716/2020

മുഴുവൻ സമയ പരിചരണം ആവശ്യമുള്ളവർക്ക് സഹായകരമായി പ്രതിമാസ ധനസഹായം നൽകുന്ന സാമൂഹ്യ സുരക്ഷ മിഷന്റെ ആശ്വാസ കിരണം പദ്ധതിയ്ക്ക് 19.53 കോടി രൂപയുടെ ഭരണാനുമതി നൽകിയതായി ആരോഗ്യ സാമൂഹ്യനീതി വനിത ശിശുവികസന വകുപ്പ് മന്ത്രി കെ.കെ. ശൈലജ ടീച്ചർ അറിയിച്ചു. ഒരു മുഴുവൻ സമയ പരിചാരകന്റെ സേവനം ആവശ്യമാംവിധം കിടപ്പിലായ രോഗികളെയും മാനസിക, ശാരീരിക വെല്ലുവിളി നേരിടുന്നവരെയും ഗുരുതര രോഗങ്ങളുളളവരെയും പരിചരിക്കുന്നവർക്ക് പ്രതിമാസ ധനസഹായം അനുവദിക്കുന്ന പദ്ധതിയാണ് ആശ്വാസകിരണം. കഴിഞ്ഞ സർക്കാരിന്റെ കാലത്ത് 63,544 ഗുണഭോക്താക്കൾ ആയിരുന്നത് ഈ സർക്കാർ വന്നതിനു ശേഷം 1,13,713 ആയി വർധിച്ചു.

കേരള അബ്കാരി തൊഴിലാളി ക്ഷേമനിധി ബോർഡിൽ നിന്ന് പെൻഷൻ കൈപ്പറ്റുന്നവർക്ക് കോവിഡ് 19 ന്റെ പശ്ചാത്തലത്തിൽ ഒറ്റത്തവണ സഹായമായി 2000 രൂപയും ആഗസ്റ്റ് മാസത്തിലെ പെൻഷൻ അഡ്വാൻസായി ഓണത്തിന് മുമ്പ് വിതരണം ചെയ്യാനും ബോർഡ് ചെയർമാൻ സി.കെ. മണിശങ്കറിന്റെ അധ്യക്ഷതയിൽ ചേർന്ന യോഗം തീരുമാനിച്ചു.  നിലവിൽ ബോർഡിലെ പെൻഷനേഴ്‌സിൽ മസ്റ്ററിംഗ് നടത്താത്തവർ അടിയന്തരമായി മസ്റ്ററിംഗ് പൂർത്തീകരിക്കണമെന്ന് ചീഫ് വെൽഫെയർ ഫണ്ട് ഇൻസ്‌പെക്ടർ അറിയിച്ചു.
പി.എൻ.എക്‌സ്. 2712/2020

2021 ലേക്കുള്ള ഡയറികൾ തയ്യാറാക്കുന്നതിന് കേരള നിയമസഭാ സെക്രട്ടേറിയറ്റ് താത്പര്യപത്രം ക്ഷണിച്ചു.  താത്പര്യപത്രം ആഗസ്റ്റ് 20ന് വൈകിട്ട് മൂന്നിന് മുമ്പ് സെക്രട്ടറി, കേരള നിയമസഭ, തിരുവനന്തപുരം 695033 എന്ന വിലാസത്തിൽ ലഭ്യമാക്കണം.  ഇ-മെയിൽ: research@niyamasabha.nic.in. വിശദവിവരങ്ങൾക്ക്: www.niyamasabha.org.      
പി.എൻ.എക്‌സ്. 2711/2020