*കൂടുതൽ ക്യാമ്പുകൾ തുറന്നു
കാലവർഷം കടുത്തതോടെ ജില്ലകളിൽ കൂടുതൽ ജാഗ്രത പുലർത്താൻ നിർദ്ദേശം നൽകി. ഉരുൾപൊട്ടൽ സാധ്യതയുള്ള സ്ഥലങ്ങളിൽ നിന്നും വെള്ളം ഉയർന്ന സ്ഥലങ്ങളിൽ നിന്നും ജനങ്ങളെ ക്യാമ്പുകളിലേക്ക് മാറ്റി. ആവശ്യമായ സ്ഥലങ്ങളിൽ ക്യാമ്പുകൾ തുറക്കാനും നിർദ്ദേശം നൽകിയിട്ടുണ്ട്.

കോവിഡ് രോഗബാധയുടെ സാഹചര്യത്തില്‍ ജില്ലയിലെ കര്‍ഷകര്‍ക്ക് മൃഗചികിത്സയുമായി ബന്ധപ്പെട്ട് അടിയന്തര സേവനങ്ങള്‍ക്ക് ക്രമീകരണങ്ങളായി. ഹോട്ട് സ്‌പോട്ട്/കണ്ടയിന്‍മെന്റ് സോണില്‍ ഉള്‍പ്പെട്ട സ്ഥാപനങ്ങളില്‍ നിന്നും സേവനം ലഭിച്ചുവരുന്ന കര്‍ഷകര്‍ക്ക് അടിയന്തരഘട്ടങ്ങളില്‍ താലൂക്ക് തലത്തില്‍ രൂപീകരിച്ച ഏമര്‍ജന്‍സി വെറ്ററിനറി ടീമിന്റെ സേവനം തേടാം. ടീമിന്റെ വിശദ വിവരം അതത് സ്ഥലങ്ങളിലെ മൃഗാശുപത്രികളിലെ നോട്ടീസ് ബോര്‍ഡിലും ക്ഷീരസംഘങ്ങളിലും തദ്ദേശ സ്വയംഭരണ സ്ഥാപനങ്ങളിലും പ്രദര്‍ശിപ്പിച്ചിട്ടുണ്ട്.

ജില്ലയിലെ തദ്ദേശ സ്വയംഭരണ സ്ഥാപനങ്ങളില്‍ കോവിഡ് പ്രാഥമിക ചികിത്സാ കേന്ദ്രങ്ങള്‍ ആരംഭിക്കാന്‍ ഏറ്റെടുത്ത സ്ഥാപനങ്ങളില്‍ ബയോ ടോയ്‌ലറ്റ്, സെമി-പെര്‍മനന്റ് ടോയ്‌ലറ്റുകള്‍ വേണം. ആഗസ്റ്റ് 12 വരെ ജില്ലാ ശുചിത്വ മിഷന്‍ കോ-ഓര്‍ഡിറ്ററുടെ ഓഫീസില്‍ ഇതിന് ക്വട്ടേഷന്‍ സമര്‍പ്പിക്കാം. വിശദ വിവരങ്ങള്‍ 0474-2791910, 9400850207 നമ്പരുകളില്‍ ലഭിക്കും.
(പി.ആര്‍.കെ നമ്പര്‍ 2125/2020)

കോവിഡിന്റെയും കാലവര്‍ഷത്തിന്റെയും പശ്ചാത്തലത്തില്‍ ജനങ്ങള്‍ പരമാവധി വീടിനുളളില്‍ തന്നെ കഴിയാനും പ്രളയ മേഖലയിലും മണ്ണിടിച്ചില്‍ സാധ്യതാ മേഖലയിലുമുളളവര്‍ സുരക്ഷിത സ്ഥാനങ്ങളിലേക്ക് മാറാനും കലക്ടര്‍ നിര്‍ദേശിച്ചു. ഉരുള്‍പൊട്ടല്‍ സാധ്യതയുള്ളതിനാല്‍ രാത്രി സമയത്ത് (വൈകിട്ട് ഏഴു മുതല്‍ രാവിലെ ഏഴുവരെ) മലയോര മേഖലയിലേക്കുള്ള യാത്ര പരിമിതപെടുത്തുവാന്‍ ശ്രദ്ധിക്കണം.

കൊല്ലം ഗവണ്‍മെന്റ് വിക്‌ടോറിയ ആശുപത്രിയിലെ മൂന്ന് ആരോഗ്യ പ്രവര്‍ത്തകര്‍ ഉള്‍പ്പടെ ജില്ലയില്‍ ഇന്നലെ(ആഗസ്റ്റ് 08) 41 പേര്‍ക്ക് കോവിഡ് സ്ഥിരീകരിച്ചു. ഒരാള്‍ വിദേശത്ത് നിന്നും മൂന്നുപേര്‍ ഇതരസംസ്ഥാനങ്ങളില്‍ നിന്നും എത്തിയവരാണ്. 30 പേര്‍ക്ക് സമ്പര്‍ക്കം വഴി രോഗം സ്ഥിരീകരിച്ചു. നാലുപേരുടെ ഉറവിടം വ്യക്തമല്ല. 38 പേര്‍  രോഗമുക്തി നേടി.

കൊല്ലത്തു നിന്നും മത്സ്യത്തൊഴിലാളികള്‍ രക്ഷാപ്രവര്‍ത്തനത്തിനായി പത്തനംതിട്ടയിലേക്ക് പുറപ്പെട്ടു. 10 വള്ളങ്ങള്‍ കയറ്റിയ ലോറികളില്‍ 20 മത്സ്യത്തൊഴിലാളികളാണ് കൊല്ലം ഹാര്‍ബറില്‍ നിന്നും തിരിച്ചത്. അഞ്ച് വള്ളങ്ങളും തൊഴിലാളികളും ആവശ്യം വന്നാല്‍ പുറപ്പെടാന്‍ തയ്യാറായി നില്‍ക്കുന്നുണ്ട്. പത്തനംതിട്ട ജില്ലയിലെത്തിയ മത്സ്യത്തൊഴിലാളികള്‍ ജില്ലാ ഭരണകൂടം സ്വീകരിച്ചു.

കടര്‍ പ്രക്ഷുബ്ധവും കാലാവസ്ഥ പ്രതികൂലവുമായതിനാല്‍ മത്സ്യത്തൊഴിലാളികള്‍ ആഗസ്റ്റ് 11 വരെ കടലില്‍ പോകരുതെന്ന് ഫിഷറീസ് ഡെപ്യൂട്ടി ഡയറക്ടര്‍ കെ സുഹൈര്‍ അറിയിച്ചു.
 (പി.ആര്‍.കെ നമ്പര്‍ 2132/2020)

ജില്ലയിലെ എല്ലാ വില്ലേജ് ഓഫീസര്‍മാരും തദ്ദേശ സ്ഥാപന സെക്രട്ടറിമാരും ജാഗരൂകരായി ഇരിക്കണമെന്ന് ജില്ലാ കലക്ടര്‍ നിര്‍ദേശം നല്‍കി. പ്രദേശിക നേതാക്കളുമായും സന്നദ്ധപ്രവര്‍ത്തകരുമായും ബന്ധപ്പെടണമെന്നും ഏത് സാഹചര്യവും നേരിടാന്‍ തയ്യാറായിരിക്കണമെന്നും കലക്ടര്‍ നിര്‍ദേശിച്ചു. മൊബൈല്‍ ഫോണുകള്‍ ഓഫാകാതെ സൂക്ഷിക്കണമെന്നും മേലുദ്യോഗസ്ഥരുടെ നിര്‍ദേശങ്ങള്‍ പാലിക്കണമെന്നും കലക്ടര്‍ അറിയിച്ചു.
(പി.ആര്‍.കെ നമ്പര്‍ 2131/2020)

കൊല്ലം മുണ്ടയ്ക്കല്‍ വില്ലേജിലെ ബീച്ചിന് സമീപപ്രദേശത്തുള്ള ആറു വീടുകളില്‍ വെള്ളം കയറി.   കടലിനോട് ചേര്‍ന്ന ആറ് കുടുംബങ്ങളെയും മാറ്റിപ്പാര്‍പ്പിക്കാന്‍  നടപടിയായി.  ആള്‍ക്കാര്‍ മാറി താമസിക്കാന്‍ തയ്യാറായാല്‍ താമസിപ്പിക്കാന്‍ അമ്യതകുളം സ്‌കൂളില്‍  സൗകര്യം ഒരുക്കി.
ആദിച്ചനല്ലൂര്‍ പഞ്ചായത്തില്‍ 13-ാം വാര്‍ഡ് ഉള്‍പ്പടെയുള്ള അമ്പലത്തറ, ഇത്തിക്കര പ്രദേശങ്ങള്‍ വെള്ളപ്പൊക്ക ഭീഷണിയിലായതിനെ തുടര്‍ന്ന് പത്തോളം കുടുംബങ്ങളെ മൈലക്കാട് പഞ്ചായത്ത് യു പി സ്‌കൂളിലേക്ക് മാറ്റി. കോവിഡ് മാനദണ്ഡം പാലിച്ചാണ് ക്യാമ്പ് തയ്യാറാക്കിയത്.