കാര്‍ഷിക കടാശ്വാസ കമ്മീഷന്‍ ജില്ലയിലെ കര്‍ഷകര്‍ക്ക് കാര്‍ഷിക കടാശ്വാസം അനുവദിച്ചു. ജില്ലയിലെ വിവിധ സഹകരണ ബാങ്കുകളില്‍ നിന്ന് വായ്പയെടുത്ത 141 കര്‍ഷകര്‍ക്കായി 7889485 രൂപയുടെ കടാശ്വാസമാണ് അനുവദിച്ചിരിക്കുന്നത്. കടാശ്വാസം ലഭിച്ച കര്‍ഷകരുടെ പേരും തുകയും ബന്ധപ്പെട്ട ബാങ്കുകളുടെ ഹെഡ് ഓഫീസിലും ശാഖകളിലും പരിശോധനയ്ക്കായി പ്രദര്‍ശിപ്പിക്കുമെന്ന് സഹകരണസംഘം ജില്ലാ ജോയിന്റ് രജിസ്ട്രാര്‍(ജനറല്‍) അറിയിച്ചു.

കോവിഡ് ഫസ്റ്റ് ലൈന്‍ സെന്ററുമായി ബന്ധപ്പെട്ട് പ്രവര്‍ത്തിക്കുന്നതിന് ജില്ലയിലെ സ്വകാര്യമേഖലയിലുള്ള എല്ലാ ആംബുലന്‍സ് ഉടമകളും വാഹനത്തിന്റെ വിശദവിവരം, ഉടമകളുടെ വിവരം, ഡ്രൈവറുടെ വിശദവിവരം എന്നിവ കോവിഡ്-19 ജാഗ്രതാ പോര്‍ട്ടലില്‍ രജിസ്റ്റര്‍ ചെയ്യണം. ര്ജിസ്‌ട്രേഷന്‍ നടത്തുന്നതിന് ആംബുലന്‍സ് ഉടമകളോ ഡ്രൈവര്‍മാരോ വാഹനത്തിന്റെ അസല്‍ രേഖകളും ഡ്രൈവിംഗ് ലൈസന്‍സുമായി ബന്ധപ്പെട്ട ആര്‍.ടി.ഒ, സബ്.ആര്‍.ടി.ഒ ഓഫീസുകളില്‍ ആഗസ്റ്റ് 10, 11, 12 തിയതികളില്‍ നേരിട്ട് ഹാജരാകണമെന്ന് പാലക്കാട് ആര്‍.ടി.ഒ അറിയിച്ചു.

ജില്ലയില്‍ മഴ തുടരുന്ന സാഹചര്യത്തില്‍ നിലവില്‍ മംഗലം, കാഞ്ഞിരപ്പുഴ ഡാമുകളാണ് തുറന്നിരിക്കുന്നത്. കാഞ്ഞിരപ്പുഴ ഡാമിന്റെ മൂന്ന് ഷട്ടറുകള്‍ 120 സെന്റിമീറ്റര്‍ തുറന്നിട്ടുണ്ട്. ഡാമിന്റെ പരമാവധി സംഭരണശേഷി 97.50 മീറ്ററാണ്. നിലവിലെ വെള്ളത്തിന്റെ അളവ് 94.17 മീറ്ററാണ്. 93.09 മീറ്ററിന് മേലെ ജലം ഉയര്‍ന്നതിനാലാണ്  ഡാം തുറന്നത്.

മംഗലം ഡാമിലെ ആറ് ഷട്ടറുകളും 55 സെന്റിമീറ്റര്‍ വരെയാണ് തുറന്നിട്ടുള്ളത്. ഡാമിന്റെ പരമാവധി സംഭരണശേഷി 77.88 മീറ്ററാണ്.  മംഗലം ഡാമില്‍ 77.14 മീറ്ററുമാണ് നിലവിലെ ജലനിരപ്പ്. 76.93 മീറ്ററിന് മേലെ ജലം ഉയര്‍ന്നതിനാലാണ് ഡാം തുറന്നത്.

പട്ടികവര്‍ഗ്ഗ വിഭാഗക്കാരുടെ സുസ്ഥിര വികസനത്തിനായി കുടുംബശ്രീയും പട്ടികവര്‍ഗ്ഗ വികസന വകുപ്പും സഹകരിച്ച് നടപ്പിലാക്കുന്ന പി.കെ. കാളന്‍ കുടുംബ സഹായ പദ്ധതിയുടെ ഭാഗമായി മലമ്പുഴയില്‍  ആദിവാസി വനിതകളുടെ സംരംഭമായ ലക്ഷ്യ അപ്പാരല്‍ യൂണിറ്റ് പ്രവര്‍ത്തനമാരംഭിച്ചു. കെ.വി.വിജയദാസ് എം.എല്‍.എ യൂണിറ്റ് ഉദ്ഘാടനം ചെയ്തു. മലമ്പുഴ ഗ്രാമ പഞ്ചായത്ത് പ്രസിഡണ്ട് ഇന്ദിര രാമചന്ദ്രന്‍ അധ്യക്ഷത വഹിച്ചു. കുടിവെള്ളത്തിന്റെ ഗുണനിലവാരം പരിശോധിക്കുന്നതിന് വിദഗ്ദ്ധ പരിശീലനം നേടിയ അമൂല്യ ജല പരിശോധന യൂണിറ്റിന്റെയും ഉദ്ഘാടനം നിര്‍വഹിച്ചു.

അട്ടപ്പാടി മേഖലയില്‍ പുലിയറ, കുറുവമ്പാടി,  ഇന്ദിരാ കോളനി  , ചിറ്റൂര്‍ , ഒക്കോട്, നക്കുപതി  മേഖലകളാണ് പ്രധാനമായും മണ്ണിടിച്ചില്‍ , ഉരുള്‍പൊട്ടല്‍ മേഖലകളായി ജിയോളജി വകുപ്പ് കണ്ടെത്തിയിരിക്കുന്നത് .  ഇവിടങ്ങളില്‍ ജനങ്ങള്‍ക്ക് സുരക്ഷാ മുന്‍ കരുതല്‍ എടുക്കാനും  സ്വമേധയായോ അധികൃതര്‍ നിര്‍ദേശിക്കുന്ന ഇടങ്ങളിലേക്കോ മാറിതാമസിക്കാന്‍  നിര്‍ദേശമുണ്ടെന്ന് ജില്ലാ ജിയോളജിസ്റ്റ് എസ്. സൂരജ് അറിയിച്ചു.

വാളയാര്‍ ഡാമിലെ ജലനിരപ്പ് 199.95 മീറ്ററായി ഉയര്‍ന്നു. ഡാമിന്റെ പരമാവധി സംഭരണശേഷി 203 മീറ്ററാണ്. മഴ തുടരുന്ന സാഹചര്യത്തില്‍ ജലനിരപ്പ് 200.74 മീറ്ററായി ഉയര്‍ന്നാല്‍ ഇന്ന് (ആഗസ്റ്റ് 8) ഡാം തുറക്കുമെന്ന് ജില്ലാ കലക്ടര്‍ അറിയിച്ചു.  

പാലക്കാട് ജില്ലയില്‍ ഇന്ന് (ഓഗസ്റ്റ് 8) ന് കേന്ദ്ര കാലാവസ്ഥാ വകുപ്പ് റെഡ് അലെര്‍ട്ട് പ്രഖ്യാപിച്ചു. അത് പ്രകാരം അതിതീവ്രമോ അതിശക്തമോ ആയ മഴക്ക് സാധ്യതയുണ്ട്. 204.5 മി.മീ വരെ മഴ ലഭിക്കുമെന്നാണ് കാലാവസ്ഥാ വകുപ്പ് അറിയിച്ചിരിക്കുന്നത്.