പട്ടികവര്‍ഗ്ഗക്കാരായ വിദ്യാര്‍ത്ഥികള്‍ക്ക് വിദേശ സര്‍വകലാശാലകളിലെ പഠനത്തിനായി "ഉന്നതി" പദ്ധതിയിലൂടെ സ്‌കോളര്‍ഷിപ്പ് അനുവദിക്കുന്നു. 55% മാര്‍ക്കില്‍ കുറയാതെ ഡിഗ്രിയുള്ള 35 വയസ്സില്‍ താഴെ പ്രായമുള്ള പട്ടികവര്‍ഗ്ഗ വിദ്യാര്‍ത്ഥികള്‍ക്ക് അപേക്ഷിക്കാം. രജിസ്റ്റര്‍ ചെയ്യുന്നതിനായി odepc.net/unnathi എന്ന ലിങ്ക് ഉപയോഗപ്പെടുത്താം.കൂടുതല്‍ വിവരങ്ങള്‍ക്ക് 04862 222399

കുട്ടികളില്‍ വൈദ്യുതി സംബന്ധിച്ച് അവബോധം സൃഷ്ടിക്കുക എന്ന ഉദ്ദേശ്യത്തോടെ ചിത്രരചനാ മല്‍സരവും ഉപന്യാസരചനാ മല്‍സരവും സംഘടിപ്പിക്കുന്നു. ഇലക്ട്രിക്കല്‍ ഇന്‍സ്‌പെക്ടറേറ്റ് വകുപ്പാണ് സംഘാടകര്‍ . 'നവകേരളനിര്‍മ്മാണത്തില്‍ വൈദ്യുതസുരക്ഷയുടെ പങ്ക്' എന്ന വിഷയത്തിലുള്ള രചനകള്‍ സ്‌കൂള്‍ മേലധികാരിയുടെ സാക്ഷ്യപത്രത്തോടെ നവംബര്‍ 10 ന് മുമ്പ് ഇലക്ട്രിക്കല്‍ ഇന്‍സ്‌പെക്ടറുടെ കാര്യാലയം, മൂലമറ്റം പി.ഓ പിന്‍: 685 589 എന്ന വിലാസത്തില്‍ ലഭിക്കണം. നേരിട്ടും എത്തിക്കാം. ചിത്രങ്ങള്‍ എ4 ഷീറ്റിലായിരിക്കണം. ഉപന്യാസങ്ങള്‍ രണ്ട് പുറത്തില്‍ കവിയാന്‍ പാടില്ല. കൂടുതല്‍ വിവരങ്ങള്‍ക്ക് 04862 253465

സംസ്ഥാന ന്യൂനപക്ഷ കമ്മീഷന്റെ പ്രവര്‍ത്തനങ്ങളെക്കുറിച്ച് കൂടുതൽ അവബോധം ഉണ്ടാക്കുന്നതിനായി മുസ്ലിം, ക്രിസ്തൃന്‍, സിക്ക്, ബുദ്ധ, പാര്‍സി, ജൈന എന്നീ ന്യൂനപക്ഷ വിഭാഗങ്ങളെ ഉള്‍പ്പെടുത്തി എകദിന സെമിനാര്‍ സംഘടിപ്പിക്കുന്നു. ഇതിന്റെ ഭാഗമായി ന്യൂനപക്ഷ വിഭാഗങ്ങളെ പ്രതിനിധീകരിക്കുന്ന എല്ലാ മത/സംഘടനാ ഭാരവാഹികളെയും ഉള്‍പ്പെടുത്തി നവംബര്‍ 2 ന് രാവിലെ 11.30 ന് ഇടുക്കി കളക്‌ട്രേറ്റ് കോണ്‍ഫറന്‍സ് ഹാളില്‍ ആലോചനാ യോഗം ചേരും.

പട്ടികജാതി , വര്‍ഗ്ഗ വിഭാഗത്തില്‍പ്പെട്ട 18 നും 55 നും ഇടയില്‍ പ്രായമുളളവര്‍ക്ക് വൃക്തിഗത വായ്പ നൽകുന്നു. പട്ടികജാതി പട്ടികവര്‍ഗ്ഗ വികസന കോര്‍പ്പറേഷനാണ് അപേക്ഷ ക്ഷണിച്ചിട്ടുള്ളത് . പരമാവധി 4 ലക്ഷം വരെ വായ്പ ലഭിക്കും . വാര്‍ഷിക വരുമാന പരിധി 6 ലക്ഷം രൂപയില്‍ താഴെ. കൂടുതല്‍ വിവരങ്ങള്‍ക്ക് 9400068506

ഈ വർഷത്തെ ശിശുദിനാഘോഷം നവംബർ 14 ന് ജില്ലയിൽ വിപുലമായി സംഘടിപ്പിക്കുമെന്ന് കളക്ടർ ഷീബാ ജോർജ്ജ് അറിയിച്ചു. വാഴത്തോപ്പ് സർക്കാർ ഹൈസ്‌കൂൾ ഗ്രൗണ്ടിൽ രാവിലെ 8 ന് കളക്ടർ പതാക ഉയർത്തുന്നതോടെ പരിപാടികൾ ആരംഭിക്കും. തുടർന്ന് ശിശുദിന സ്റ്റാമ്പ് പ്രകാശനം നടക്കും. ജില്ലാ പഞ്ചായത്ത് പ്രസിഡന്റ് കെ ടി ബിനു ശിശുദിന റാലി ഉദ്‌ഘാടനം ചെയ്യും. തുറന്ന ജീപ്പിൽ കുട്ടികളുടെ പ്രധാനമന്ത്രി നയിക്കുന്ന റാലിയിൽ ബാൻഡ് വാദ്യം , നിശ്ചല ദൃശ്യങ്ങൾ എന്നിവ ഉണ്ടാകും.

ദൗത്യസംഘം ജില്ലയിലെ അനധികൃത കയ്യേറ്റം ഒഴിപ്പിക്കൽ തുടരുന്നു. ഉടുമ്പൻചോല താലൂക്കിലെ ചിന്നക്കനാൽ വില്ലേജിൽ സ്വകാര്യ വ്യക്തി അനധികൃതമായി കൈവശം വച്ചിരുന്ന താവളം സർവ്വെ 222/1 ൽ ഉൾപ്പെട്ട 7.07 ഏക്കർ റവന്യൂ പുറമ്പോക്ക് ഭൂമിയാണ് ഇന്നലെ (30.10.23) ഒഴിപ്പിച്ചത്. ജില്ലാ കളക്ടറുടെ നിർദേശപ്രകാരം ഇടുക്കി സബ് കളക്ടർ അരുൺ എസ് നായരുടെ നേതൃത്വത്തിലുള്ള റവന്യൂ ദൗത്യസംഘമാണ് ഹോസ്റ്റൽ പ്രവർത്തിച്ചിരുന്ന ഏഴ് നില കെട്ടിടം ഉൾപ്പടുന്ന സ്ഥലം സർക്കാരിലേക്ക് ഏറ്റെടുത്തത്.

ഹോമിയോപ്പതി വകുപ്പിൻ്റെ 50-ാം വാർഷികത്തോടനുബന്ധിച്ച് നായരമ്പലം ഗ്രാമ പഞ്ചായത്തിൻ്റെയും നായരമ്പലം ഹോമിയോ ഡിസ്പെൻസറിയുടെയും ആഭിമുഖ്യത്തിൽ ഷീ കാമ്പയിൻ സംഘടിപ്പിച്ചു. ഗ്രാമപഞ്ചായത്ത് പ്രസിഡന്റ് നീതു ബിനോദ് ഉദ്ഘാടനം ചെയ്തു.

ജല ബജറ്റ് അവതരണവും നീരുറവ്  പദ്ധതിയുടെ സംയോജന സാധ്യതകളും- എന്ന വിഷയത്തിൽ മുളന്തുരുത്തി ബ്ലോക്ക് പഞ്ചായത്തിൽ  ജില്ലാതല ശില്പശാല സംഘടിപ്പിച്ചു. എറണാകുളം ജില്ലയിൽ ജലബജറ്റ് തയ്യാറാക്കിയ ആദ്യ ബ്ലോക്ക് പഞ്ചായത്താണ് മുളന്തുരുത്തി.ബ്ലോക്ക് പഞ്ചായത്തിൻ്റെ കൂടാതെ ആമ്പല്ലൂർ, ഉദയംപേരൂർ, മുളന്തുരുത്തി, ചോറ്റാനിക്കര, മണീട്, എടയ്ക്കാട്ടുവയൽ ഗ്രാമ പഞ്ചായത്തുകളുടെയും ജലബജറ്റ് തയ്യാറാക്കി അവതരിപ്പിച്ചു. ഒരു പ്രദേശത്തെ ജലലഭ്യതയും വിനിയോഗവും അടിസ്ഥാനമാക്കി തയ്യാറാക്കുന്ന ജല ബജറ്റ് ഇന്ത്യയിൽ ആദ്യമായി തയ്യാറാക്കുന്ന സംസ്ഥാനമായി കേരളം മാറി.

അരുവിക്കര  പരുത്തിപ്പള്ളി സർക്കാർ വൊക്കേഷണൽ ഹയർ സെക്കണ്ടറി സ്കൂളിലെ പുതിയ ബഹുനില മന്ദിരത്തിന്റ ശിലാസ്ഥാപനം ജി. സ്റ്റീഫൻ എം.എൽ.എ നിർവഹിച്ചു. സർക്കാർ നടപ്പാക്കിയ വികസന നയങ്ങളുടെ  ഭാഗമായാണ് സർക്കാർ സ്കൂളുകൾക്ക് മികച്ച അടിസ്ഥാന സൗകര്യങ്ങളോടെ മെച്ചപ്പെട്ട നിലവാരത്തിലേക്ക് ഉയരാൻ കഴിഞ്ഞതെന്ന് എം.എൽ.എ പറഞ്ഞു.

അഭിനയ കലയോടൊപ്പം സിനിമയുടെ രീതി ശാസ്ത്രവും സാങ്കേതികതയും പരിചയപ്പെടുത്താനും ഭാഷാ പഠനത്തിൽ പിന്തുണ ഉറപ്പാക്കാനുമായി ജില്ലയിലെ ഒമ്പത് മുതൽ 12 വരെ ക്ലാസുകളിലെ തിരഞ്ഞെടുത്ത കുട്ടികൾക്കായി സമഗ്ര ശിക്ഷാ കേരള, എറണാകുളം ജില്ലാ ചലച്ചിത്രോത്സവം സംഘടിപ്പിക്കുന്നു. ഒൿടോബർ 31ന് പറവൂർ കൈരളി തീയറ്ററിൽ രാവിലെ  9.30 മുതൽ വൈകിട്ട് നാല് വരെയാണ് ചലച്ചിത്രോത്സവം. നടി മുത്തുമണി ചലച്ചിത്രോത്സവത്തിന്റെ ഉദ്ഘാടനം നിർവഹിക്കും.