പല്ലാവൂര്‍ നവരാത്രി ആഘോഷങ്ങളുമായി ബന്ധപ്പെട്ട് വഴിയോരക്കച്ചവടക്കാരോടൊപ്പം വഴിവാണിഭത്തില്‍ ഏര്‍പ്പെട്ടിരുന്ന 14 വയസുകാരനെ ജില്ലാ ശിശു സംരക്ഷണ യൂണിറ്റിന്റെ നേതൃത്വത്തില്‍ മോചിപ്പിച്ചു. ജില്ലാ ശിശു സംരക്ഷണ യൂണിറ്റിലേക്ക് ലഭിച്ച വിവരത്തിന്റെ അടിസ്ഥാനത്തില്‍ നടത്തിയ പരിശോധനയിലാണ് നടപടി. കൊല്ലങ്കോട് പോലീസിന്റെ സാന്നിധ്യത്തില്‍ നടത്തിയ പരിശോധനയില്‍ ജില്ലാ ശിശു സംരക്ഷണ യൂണിറ്റ് ചൈല്‍ഡിലെ ഹെല്‍പ് ലൈന്‍ പ്രൊജക്റ്റ് കോ-ഓര്‍ഡിനേറ്ററുടെ നേതൃത്വത്തിലാണ് കുട്ടിയെ മോചിപ്പിച്ചത്.

കേരളശ്ശേരി ഗ്രാമപഞ്ചായത്തില്‍ 2022-23 വാര്‍ഷിക പദ്ധതിയില്‍ ഉള്‍പ്പെടുത്തി മൃഗാശുപത്രി മുഖാന്തിരം നടപ്പാക്കുന്ന കന്നുകുട്ടി പരിപാലനം പദ്ധതിയുടെ ഭാഗമായി കാലിത്തീറ്റ വിതരണം നടത്തി. കാര്‍ഷിക മേഖലയിലെ 56 വനിതാ ഗുണഭോക്താക്കള്‍ക്കാണ് കാലിത്തീറ്റ വിതരണം ചെയ്തത്. ഒരു ഗുണഭോക്താവിന് 12,500 രൂപ സബ്‌സിഡി, 12,500 രൂപ ഗുണഭോക്തൃ വിഹിതം ഉള്‍പ്പെടെ 25,000 രൂപയാണ് ഒരു പദ്ധതി മുഖേന ലഭിക്കുക. പദ്ധതിയുടെ ഉദ്ഘാടനം ഗ്രാമപഞ്ചായത്ത് വൈസ് പ്രസിഡന്റ് ഫെബിന്‍ റഹ്മാന്‍ നിര്‍വഹിച്ചു. പശു വളര്‍ത്തല്‍, പരിപാലനം എന്ന വിഷയത്തില്‍ ലൈഫ് സ്റ്റോക്ക് ഇന്‍സ്പെക്ടര്‍ ഡോ. ജയന്‍ ക്ലാസെടുത്തു.

തിരുവനന്തപുരം പി.ടി.പി നഗറിലുള്ള റവന്യൂ വകുപ്പിന്റെ സ്വയംഭരണ സ്ഥാപനമായ ഇന്‍സ്റ്റിറ്റ്യൂട്ട് ഓഫ് ലാന്‍ഡ് ആന്റ് ഡിസാസ്റ്റര്‍ മാനേജ്‌മെന്റില്‍ ആരംഭിച്ച എം.ബി.എ (ഡിസാസ്റ്റര്‍ മാനേജ്‌മെന്റ്) കോഴ്‌സിന്റെ 2023-2025 ബാച്ചില്‍ ഒഴിവുള്ള സംവരണ വിഭാഗം (പട്ടികജാതി-5, പട്ടികവര്‍ഗം-1, ഈഴവ-1, മുസ്ലിം-2) സീറ്റുകളിലേക്ക് സ്‌പോട്ട് അഡ്മിഷന്‍ നടത്തുന്നു. അര്‍ഹരായ വിദ്യാര്‍ഥികള്‍ ബന്ധപ്പെട്ട രേഖകള്‍ സഹിതം ഒക്ടോബര്‍ 30 ന് രാവിലെ 10 ന് സ്ഥാപനത്തില്‍ നേരിട്ടെത്തി രജിസ്റ്റര്‍ ചെയ്യണം.

മാലിന്യമുക്ത നവകേരളം ക്യാമ്പയിന്റെ ഭാഗമായി പൊതുസ്ഥലത്ത് മാലിന്യം തള്ളല്‍ സംബന്ധിച്ച് ആലത്തൂര്‍ ബ്ലോക്ക് പഞ്ചായത്തിന് കീഴിലുള്ള വിവിധ പഞ്ചായത്തുകളില്‍ വിവരങ്ങള്‍ നല്‍കാന്‍ ബന്ധപ്പെടേണ്ട ഫോണ്‍ നമ്പര്‍, ഇ-മെയില്‍ എന്നിവ ഇപ്രകാരം. മാലിന്യം കുമിഞ്ഞുകൂടി കിടക്കുന്ന സ്ഥലത്തിന്റെ ഫോട്ടോ, സ്ഥലവിവരം എന്നിവ സഹിതമാണ് അയക്കേണ്ടത്. വിവരം അറിയിക്കുന്നവര്‍ക്ക് 2500 രൂപ പാരിതോഷികം ലഭിക്കും.

സംസ്ഥാന അസംഘടിത തൊഴിലാളി സാമൂഹ്യ സുരക്ഷാ ബോര്‍ഡില്‍ ഓണ്‍ലൈന്‍ പേയ്മെന്റ് സംവിധാനം നടപ്പില്‍ വരുത്തുന്നതിന് പദ്ധതി അംഗങ്ങളുടെ അടിസ്ഥാന വിവരങ്ങള്‍ ഡാറ്റ എന്‍ട്രി ചെയ്യുന്നതിനും അനുബന്ധ രേഖകള്‍ സ്‌കാന്‍ ചെയ്ത് അപ്‌ലോഡ് ചെയ്യുന്നതിനും ടെന്‍ഡര്‍ ക്ഷണിച്ചു. നവംബര്‍ ആറിന് വൈകിട്ട് അഞ്ച് വരെ ടെന്‍ഡറുകള്‍ സ്വീകരിക്കും. മവംബര്‍ ഏഴിന് രാവിലെ 11 ന് ടെന്‍ഡറുകള്‍ തുറക്കും.

ഷൊര്‍ണ്ണൂര്‍ സെന്റ് തെരേസ ഹയര്‍ സെക്കന്‍ഡറി സ്‌കൂള്‍ കേന്ദ്രീകരിച്ച് നവംബര്‍ 17, 18 തീയതികളില്‍ നടക്കുന്ന പാലക്കാട് ജില്ലാ ശാസ്ത്രോത്സവത്തിനായി വിദ്യാര്‍ത്ഥികള്‍, അധ്യാപകര്‍, പൊതുജനങ്ങള്‍ എന്നിവരില്‍നിന്നും ലോഗോ ക്ഷണിച്ചു. ശാസ്ത്രം, ഗണിതം, സാമൂഹ്യശാസ്ത്രം, പ്രവര്‍ത്തിപരിചയം, ഇന്‍ഫര്‍മേഷന്‍ ടെക്നോളജി എന്നിവയുടെ പ്രതീകങ്ങള്‍ ഉള്‍പ്പെടുത്തിയാണ് ലോഗോ തയ്യാറാക്കേണ്ടത്. ലോഗോകള്‍ ജെ.പി.ജെ. ഫോര്‍മാറ്റില്‍ നവംബര്‍ രണ്ടിന് വൈകിട്ട് അഞ്ചിനകം ddepkd@gmail.com ല്‍ അയക്കണം.

പാലക്കാട് എംപ്ലോയ്മെന്റ് എക്സ്ചേഞ്ച് വി.ജി യൂണിറ്റിന്റെ എക്സ്റ്റെന്‍ഷന്‍ സെന്ററായ ചിറ്റൂര്‍ എംപ്ലോയ്മെന്റ് എക്സ്ചേഞ്ചിനോടനുബന്ധമായി പ്രവര്‍ത്തിച്ചുവരുന്ന കരിയര്‍ ഡെവലപ്മെന്റ് സെന്ററിന്റെ ആഭിമുഖ്യത്തില്‍ ബിരുദാനന്തര ബിരുദ വിദ്യാര്‍ത്ഥികള്‍ക്ക് സൗജന്യ യു.ജി.സി നെറ്റ് പരീക്ഷാ പരിശീലനം സംഘടിപ്പിക്കുന്നു. നെറ്റ് പരീക്ഷയുടെ ജനറല്‍ പേപ്പര്‍ പരിശീലനത്തില്‍ പങ്കെടുക്കാന്‍ താത്പര്യമുള്ള വിദ്യാര്‍ത്ഥികള്‍ ഒക്ടോബര്‍ 31 ന് വൈകിട്ട് അഞ്ചിനകം ചിറ്റൂര്‍ സി.ഡി.സിയില്‍ നേരിട്ടോ ഫോണ്‍ മുഖേനയോ രജിസ്റ്റര്‍ ചെയ്യണം.

കേരള കള്ളുവ്യവസായ തൊഴിലാളി ക്ഷേമനിധി ബോര്‍ഡില്‍ രജിസ്റ്റര്‍ ചെയ്തിട്ടുള്ള തൊഴിലാളികളുടെ മക്കളില്‍ നിന്ന് 2022-2023 അധ്യയന വര്‍ഷത്തെ പഠനമികവിനുള്ള സ്‌കോളര്‍ഷിപ്പ്/ക്യാഷ് അവാര്‍ഡിന് അപേക്ഷ സ്വീകരിക്കുന്ന അവസാന തീയതി നവംബര്‍ 20 വരെ ദീര്‍ഘിപ്പിച്ചതായി വെല്‍ഫെയര്‍ ഫണ്ട് ഇന്‍സ്പെക്ടര്‍ അറിയിച്ചു. ഫോണ്‍: 0491 2515765

ചിറ്റൂര്‍ ഗവ ടെക്നിക്കല്‍ ഹൈസ്‌കൂളില്‍ ഗസ്റ്റ് അധ്യാപക നിയമനം നടത്തുന്നു. ട്രേഡ്സ്മാന്‍ ടി.എച്ച്.എസ്.എല്‍.സി/ഐ.ടി.ഐ ആണ് യോഗ്യത. ഉദ്യോഗാര്‍ത്ഥികള്‍ രേഖകളുമായി ഒക്ടോബര്‍ 31 ന് രാവിലെ പത്തിന് നടക്കുന്ന കൂടിക്കാഴ്ചയില്‍ പങ്കെടുക്കണമെന്ന് സൂപ്രണ്ട് അറിയിച്ചു. ഫോണ്‍: 04923 222174, 9400006486

കെല്‍ട്രോണ്‍ നടത്തുന്ന മാധ്യമ കോഴ്സുകളുടെ 2023-24 ബാച്ചുകളിലേക്ക് കോഴിക്കോട്, തിരുവനന്തപുരം കേന്ദ്രങ്ങളില്‍ ഒക്ടോബര്‍ 30 മുതല്‍ നവംബര്‍ ആറ് വരെ അഡ്മിഷന്‍ നടക്കും. വിദ്യാഭ്യാസ യോഗ്യത തെളിയിക്കുന്ന രേഖകള്‍ സഹിതം സെന്ററുകളില്‍ നേരിട്ടെത്തി അഡ്മിഷന്‍ എടുക്കാം. പത്രം, ടെലിവിഷന്‍, സോഷ്യല്‍ മീഡിയ, ആര്‍ട്ടിഫിഷ്യല്‍ ഇന്റലിജന്‍സ് എന്നിവയില്‍ അധിഷ്ഠിതമായ ജേണലിസം, മൊബൈല്‍ ജേണലിസം, ആങ്കറിങ,് ന്യൂസ് ക്യാമറ, വീഡിയോ എഡിറ്റിങ് തുടങ്ങിയവയില്‍ പരിശീലനം ലഭിക്കും. മാധ്യമസ്ഥാപനങ്ങളില്‍ ഇന്റണ്‍ഷിപ്പ് ചെയ്യാന്‍ അവസരം ലഭിക്കും. പരിശീലനം പൂര്‍ത്തിയാക്കുന്ന വിദ്യാര്‍ത്ഥികള്‍ക്ക് പ്ലേസ്മെന്റ് അസിസ്റ്റന്‍സും നല്‍കും.