കേരള സ്റ്റേറ്റ് ലൈബ്രറി കൗണ്‍സില്‍ വായനാപക്ഷാചരണം സംഘടിപ്പിക്കും.  ഗ്രന്ഥശാല പ്രസ്ഥാനത്തിന്റെ ജനകീയ നേതാക്കളായ പി.എന്‍. പണിക്കരുടെ ചരമദിനമായ ജൂണ്‍ 19 ന് ആരംഭിച്ച് ഐ.വി. ദാസിന്റെ ജന്‍മദിനമായ ജൂലൈ ഏഴിന് അവസാനിക്കുന്ന രീതിയിലാണ് പക്ഷാചരണം.  സംസ്ഥാനതലത്തിലും ജില്ലാതലത്തിലും താലൂക്ക്തലത്തിലും ഗ്രന്ഥശാലകളിലും സ്‌കൂളുകളിലും പ്രത്യേക പരിപാടികള്‍ സംഘടിപ്പിക്കും.  ജൂണ്‍ 19ന് സംസ്ഥാന-ജില്ലാതല ഉദ്ഘാടനവും പി.എന്‍. പണിക്കര്‍ അനുസ്മരണവും സംഘടിപ്പിക്കും.  വിദ്യാര്‍ത്ഥികളെ പുസ്തകവായനയിലേക്ക് ആകര്‍ഷിക്കുക എന്നതാണ് വായനപക്ഷാചരണത്തിന്റെ ലക്ഷ്യം.  

    സംസ്ഥാന ദാരിദ്ര്യ നിര്‍മ്മാര്‍ജ്ജന മിഷനിലെ (കുടുംബശ്രീ) ജില്ലാ മിഷന്‍ അസി. കോ ഓര്‍ഡിനേറ്റര്‍ ഒഴിവ് ഡെപ്യൂട്ടേഷന്‍ വ്യവസ്ഥയില്‍ നികത്തുന്നതിനും പട്ടിക തയ്യാറാക്കുന്നതിനുമായി യോഗ്യരായ കേന്ദ്ര-സംസ്ഥാന സര്‍ക്കാര്‍/അര്‍ദ്ധ സര്‍ക്കാര്‍ ജീവനക്കാരില്‍ നിന്നും അപേക്ഷകള്‍ ക്ഷണിച്ചു.

    സംസ്ഥാനത്തെ വിവിധ പഞ്ചായത്തുകളിലും മുനിസിപ്പാലിറ്റി വാര്‍ഡുകളിലും അംഗങ്ങളുടെയും കൗണ്‍സിലര്‍മാരുടെയും ആകസ്മിക ഒഴിവുവന്ന സ്ഥാനങ്ങളിലേക്കുള്ള ഉപതെരഞ്ഞെടുപ്പ് മെയ് 31 നു നടക്കുന്നതിനാല്‍ തെരഞ്ഞെടുപ്പു ജോലികള്‍ക്കായി നിയോഗിക്കപ്പെട്ട വരണാധികാരികളെയും ഉപവരണാധികാരികളെയും ക്രമസമാധാനം ഉള്‍പ്പെടെ തെരഞ്ഞെടുപ്പു നടത്തിപ്പുമായി ബന്ധപ്പെട്ട മറ്റ് ഉദ്യോഗസ്ഥരെയും തെരഞ്ഞെടുപ്പ് പ്രക്രിയ തീരുന്നതുവരെ സ്ഥലം മാറ്റുന്നതില്‍ നിയന്ത്രണമേര്‍പ്പെടുത്തി പൊതുഭരണ (ഏകോപനം) വകുപ്പ് ഉത്തരവായി.

    സ്‌കൂള്‍ കുട്ടികളെ നീന്തല്‍ പരിശീലിപ്പിക്കുന്ന കായിക യുവജനകാര്യവകുപ്പിന്റെ 'സ്വിംആന്റ് സര്‍വൈവ്' പദ്ധതി കൂടുതല്‍ ജില്ലകളിലേക്ക്. തിരുവനന്തപുരത്ത് മാത്രം കഴിഞ്ഞവര്‍ഷം ഉണ്ടായിരുന്ന പദ്ധതി തൃശൂര്‍, കണ്ണൂര്‍ ജില്ലകളിലേക്ക് കൂടി ഈ അധ്യയന വര്‍ഷം വ്യാപിപ്പിക്കും. ശാസ്ത്രീയമായ പഠനത്തിനായി പ്രത്യേക കൃത്രിമ പൂള്‍ തയാറാക്കിയാണ് പരിശീലനം. വിദഗ്ധ പരിശീലകരുടെ മേല്‍നോട്ടത്തില്‍ ആദ്യഘട്ടം പരിശീലിപ്പിച്ചുകഴിഞ്ഞാല്‍ ഇവരെ നീന്തല്‍ കുളത്തില്‍ നീന്തുന്നതിന് പ്രാപ്തരാക്കും. ആണ്‍കുട്ടികള്‍ക്കും പെണ്‍കുട്ടികള്‍ക്കും പ്രത്യേക പരിശീലനമാണ് നല്‍കുന്നത്.

മന്ത്രിസഭാ വാര്‍ഷികാഘോഷ സമാപനവും ഗവണ്‍മെന്റ് മെഡിക്കല്‍ കോളേജില്‍ പൂര്‍ത്തീകരിച്ച വിവിധ പദ്ധതികളുടെ ഉദ്ഘാടനവും മെയ് 27ന് ഉച്ചകഴിഞ്ഞ് മൂന്നിന് മുഖ്യമന്ത്രി പിണറായി വിജയന്‍ നിര്‍വഹിക്കും.  ആരോഗ്യകുടുംബക്ഷേമവകുപ്പ് മന്ത്രി കെ. കെശൈലജടീച്ചര്‍  അധ്യക്ഷത വഹിക്കും. പൊതുമരാമത്ത്‌വകുപ്പ് മന്ത്രി ജി. സുധാകരന്‍, വനം വന്യജീവി വകുപ്പ് മന്ത്രി കെ. രാജു എന്നിവര്‍ വിശിഷ്ടാതിഥികളായിരിക്കും.

കേരളാ സ്റ്റേറ്റ് ഇലക്ട്രിസിറ്റി ലൈസന്‍സിംഗ് ബോര്‍ഡ് മെയ് 26ന് നാട്ടകം ഗവണ്‍മെന്റ് പോളിടെക്‌നിക് കോളേജില്‍ നടത്തുവാനിരുന്ന വയര്‍മാന്‍ എഴുത്തു പരീക്ഷ പ്രത്യേക സാഹചര്യത്തില്‍ മാറ്റി വച്ചതായി ഇലക്ട്രിക്കല്‍ ഇന്‍സ്‌പെക്ടര്‍ അറിയിച്ചിരിക്കുന്നു.  പുതുക്കിയ തീയതി പിന്നീട് അറിയിക്കും. 

                                            (കെ.ഐ.ഒ.പി.ആര്‍-1048/18)

ഖത്തര്‍, ബഹറൈന്‍, കുവൈറ്റ് എന്നീ രാജ്യങ്ങളിലേയ്ക്ക് ആവശ്യമായ വിദ്യാഭ്യാസ സര്‍ട്ടിഫിക്കറ്റുകളുടെ അറ്റസ്റ്റേഷന്‍  ഇനി മുതല്‍ നോര്‍ക്ക റൂട്ട്‌സിന്റെ തിരുവനന്തപുരം, എറണാകുളം, കോഴിക്കോട് റീജിയണല്‍ ഓഫീസുകള്‍ മുഖേന ചെയ്യാമെന്ന് ചീഫ് എക്‌സിക്യുട്ടീവ് ഓഫീസര്‍ അറിയിച്ചു. നിലവില്‍ ലഭ്യമായ യു.എ.ഇ, കുവൈറ്റ് എംബസി അറ്റസ്റ്റേഷനുകള്‍ക്ക് പുറമേയാണിത്.

ജില്ലയിലെ സ്‌കൂള്‍/കോളേജുകളില്‍ നിന്ന് എസ്.എസ്.എല്‍.സി, പ്ലസ്ടൂ, ഡിഗ്രി, പി.ജി, പരീക്ഷകളില്‍ ഉന്നതവിജയം കരസ്ഥമാക്കിയ പട്ടികവര്‍ഗ്ഗ വിദ്യാര്‍ത്ഥികള്‍ക്ക് ഇന്‍സെന്റീവ് ടൂ ബ്രില്യന്റ് സ്റ്റുഡന്‍സ് പദ്ധതി പ്രകാരം ധനസഹായം നല്‍കുന്നതിന് അപേക്ഷ ക്ഷണിച്ചു. പൂരിപ്പിച്ച അപേക്ഷ ജൂണ്‍ 15നകം കാഞ്ഞിരപ്പള്ളി ഐ.റ്റി.ഡിപി പ്രോജക്ട് ഓഫീസിലോ പുഞ്ചവയല്‍, മേലുകാവ്, വൈക്കം ട്രൈബല്‍ എക്സ്റ്റന്‍ഷന്‍ ഓഫീസുകളിലോ നല്‍കണം. അപേക്ഷയോടൊപ്പം മാര്‍ക്ക്‌ലിസ്റ്റ്, ജാതി സര്‍ട്ടിഫിക്കറ്റ്, ബാങ്ക് പാസ് ബുക്ക് എന്നിവയുടെ സ്വയം സാക്ഷ്യപ്പെടുത്തിയ പകര്‍പ്പുകള്‍ നല്‍കണം. കൂടുതല്‍ വിവരങ്ങള്‍ക്ക് ഫോണ്‍:  04828 202751