ജനകീയ മത്സ്യകൃഷി പദ്ധതിയില്‍  2018-19 വര്‍ഷം നീല വിപ്ലവം പദ്ധതിയില്‍ ഉള്‍പ്പെടുത്തി ആസാംവാള (കുറഞ്ഞത് 25 സെന്റ്കുളം), കുളത്തിലെ ഗിഫ്റ്റ് കൃഷി (കുറഞ്ഞത് 50 സെന്റ്കുളം), ഓരു ജലകൂട് കൃഷി,  റീ സര്‍ക്കുലേറ്ററി അക്വാകള്‍ച്ചര്‍ സിസ്റ്റത്തിലെ ഗിഫ്റ്റ് കൃഷി, ചെമ്മീന്‍ കുളങ്ങളുടെ പുനരുദ്ധാരണം, ചെമ്മീന്‍ കൃഷി എന്നിവയില്‍ താല്പര്യമുളള കര്‍ഷകരില്‍ നിന്ന് അപേക്ഷ ക്ഷണിച്ചു.  അപേക്ഷാ ഫോമുകളും വിശദ വിവരങ്ങളും കണ്ണൂര്‍ മാപ്പിളബേയിലുളള മത്സ്യകര്‍ഷക വികസന ഏജന്‍സിയിലും തദ്ദേശ സ്വയംഭരണസ്ഥാപനങ്ങളിലെ അക്വാകള്‍ച്ചര്‍ പ്രൊമോട്ടര്‍മാരില്‍ നിന്നും ലഭിക്കും.

അണ്ടലൂര്‍ക്കാവില്‍ ഉത്സവത്തിനെത്തുന്നവര്‍ക്ക് നാട്ടുകാര്‍ സ്‌നേഹചൂര്‍വ്വം നല്‍കുന്ന വിഭവമാണ് അവിലും പഴവും. കാവിലെ പ്രധാന നൈവേദ്യവും ഇതു തന്നെ. ഇത്തവണ ഉത്സവത്തിനെത്തുന്നവര്‍ക്ക് ജില്ലാ പഞ്ചായത്തിന്റെ സ്വന്തം കൃഷിയിടത്തില്‍ നിന്ന് വിളയിച്ച നെല്ലിന്റെ അവില്‍ ലഭിക്കും. കാങ്കോല്‍ ഫാമില്‍ നിന്ന് ഉല്‍പ്പാദിപ്പിച്ച ആതിര ഇനം നെല്ല് കുത്തി ഉണ്ടാക്കിയ അവില്‍ ജില്ലാ പഞ്ചായത്ത് നേരിട്ട് വിപണനത്തിന് എത്തിച്ചിരിക്കുകയാണ്. ഒരു കിലോ അവിലിന് 50 രൂപ നിരക്കിലാണ് വില്‍പ്പന. അരകിലോ പാക്കറ്റും ലഭ്യമാണ്. ജില്ലാ പഞ്ചായത്തിന് കീഴിലെ പാലയാട് കോക്കനട്ട് ഫാമില്‍ നിന്നും അവില്‍ പാക്കറ്റുകള്‍ പൊതുജനങ്ങള്‍ക്ക് വാങ്ങാം.

നബാര്‍ഡ് നടപ്പിലാക്കുന്ന പദ്ധതികളെക്കുറിച്ചു സന്നദ്ധ സംഘടനാ ഭാരവാഹികള്‍ക്കായി നടത്തിയ ജില്ലാതല ശില്‍പശാല അസിസ്റ്റന്റ് ജനറല്‍ മാനേജര്‍ ജെയിംസ് പി ജോര്‍ജ് ഉത്ഘാടനം ചെയ്തു. നെഹ്‌റു യുവ കേന്ദ്രയുമായി ചേര്‍ന്ന് നടത്തിയ പരിപാടിയില്‍ ജില്ലാ യൂത്ത് കോര്‍ഡിനേറ്റര്‍ കെ കുഞ്ഞഹമ്മദ് അദ്ധ്യക്ഷനായി. ജന്‍ ശിക്ഷണ്‍ സന്‍സ്ഥാന്‍ ഡയറക്ടര്‍ വി. ഉമ്മര്‍കോയ, ജവഹര്‍ സോഷ്യല്‍ വെല്‍ഫെയര്‍ സൊസൈറ്റി പ്രസിഡണ്ട് സനല്‍ ജോസഫ്, ഭൂമി വികാസ് മണ്ഡല്‍ ചെയര്‍മാന്‍ എന്‍.ബി.എന്‍ നമ്പ്യാര്‍, സേവ സെക്രട്ടറി ഷാജു എന്നിവര്‍ പ്രസംഗിച്ചു. നബാര്‍ഡ് ഡിസ്ട്രിക്ട്  ഡെവലപ്‌മെന്റ്  മാനേജര്‍ പദ്ധതി വിശദീകരണം നടത്തി.

ജില്ലാ പഞ്ചായത്ത് പദ്ധതിയുടെ ഭാഗമായി നിലമ്പൂര്‍ ജില്ലാ ആശുപത്രിയിലെ ജനറല്‍,
ഗൈനക് വിഭാഗങ്ങളിലേക്കാവശ്യമായ സര്‍ജറി ഉപകരണങ്ങള്‍ വിതരണം ചെയ്യുന്നതിന് സ്ഥാപനങ്ങളില്‍ നിന്ന് ദര്‍ഘാസ് ക്ഷണിച്ചു. 5 ലക്ഷം രൂപയാണ് അടങ്കല്‍ തുക.     ഫെബ്രുവരി 22 ന് 11 മണി വരെ ദര്‍ഘാസുകള്‍ സ്വീകരിക്കും. അതേദിവസം ഉച്ചക്ക് രണ്ടിന് ദര്‍ഘാസുകള്‍ തുറക്കും. ഫെബ്രുവരി 21ന് അഞ്ച് മണിവരെ ദര്‍ഘാസ് ഫോറങ്ങള്‍ ലഭ്യമാകും. കൂടുതല്‍ വിവരങ്ങള്‍ക്ക് ആശുപത്രി ഓഫീസുമായി പ്രവൃത്തി സമയങ്ങളില്‍ ബന്ധപ്പെടാവുന്നതാണെന്ന് നിലമ്പൂര്‍ ഗവ. ജില്ലാ ആശുപത്രി സൂപ്രണ്ട് അറിയിച്ചു. ഫോണ്‍ 04931 220351

സുരക്ഷിതമായ പോഷകാഹാരവുമായി ബന്ധപ്പെട്ട് ജില്ലയിലെ എട്ട്, ഒമ്പത്, 11 ക്ലാസുകളിലെ കുട്ടികള്‍ക്കായി  ഫെബ്രുവരി ഒമ്പത് മുതല്‍ ഫെബ്രുവരി 27 വരെ ക്ലാസുകള്‍ സംഘടിപ്പിക്കും.  തെരഞ്ഞെടുത്ത 16 സ്‌കൂളുകളിലെ കുട്ടികള്‍ക്കാണ് ക്ലാസ് നല്‍കുന്നത്. ഭക്ഷ്യ സുരക്ഷാ ഓഫീസര്‍മാരും ഡയറ്റീഷ്യന്‍മാരും ക്ലാസുകള്‍ നയിക്കും.  സുരക്ഷിതവും പോഷകസമൃദ്ധവുമായ ആഹാരത്തെപ്പറ്റി വിദ്യാര്‍ത്ഥികളില്‍ അവബോധം ഉണ്ടാക്കുക എന്നതാണ് ലക്ഷ്യം. ഇതിന്റെ ഭാഗമായി വിദ്യാര്‍ത്ഥികളില്‍ നിന്ന് ഫുഡ് സേഫ്റ്റി അമ്പാസഡര്‍മാരെ തെരഞ്ഞെടുക്കും.   പങ്കെടുക്കുന്ന എല്ലാ വിദ്യാര്‍ത്ഥികള്‍ക്കും സര്‍ട്ടിഫിക്കറ്റ് നല്‍കും.

കേരള കര്‍ഷക തൊഴിലാളി ക്ഷേമനിധിയില്‍ അംശദായം അടക്കുന്നതില്‍ 24 മാസത്തിലധികം കുടിശ്ശിക വരുത്തി അംഗത്വം നഷ്ടപ്പെട്ട തൊഴിലാളികളില്‍ നിന്ന് പിഴ സഹിതം അംശദായ കുടിശ്ശിക മെയ് 31 വരെ സ്വീകരിക്കുമെന്ന് വെല്‍ഫെയര്‍ ഫണ്ട് ഓഫീസര്‍ അറിയിച്ചു. 0483 2732001.

കേരള കര്‍ഷകതൊഴിലാളി ക്ഷേമനിധി ബോര്‍ഡ് മലപ്പുറം ഡിവിഷണല്‍ ഓഫീസില്‍ 2010 ഡിസംബര്‍ 31 നോ അതിനു മുമ്പോ 60 വയസ്സ് പൂര്‍ത്തിയായി അതിവര്‍ഷാനുകൂല്യത്തിന് അപേക്ഷ നല്‍കി ഇതുവരെയും ആനുകൂല്യം കൈപ്പറ്റാത്തവര്‍ ഓഫീസുമായി ബന്ധപ്പെടണമെന്ന് വെല്‍ഫെയര്‍ ഓഫീസര്‍ അറിയിച്ചു.  ഫോണ്‍ 0483 2732001.

പുഴക്കാട്ടിരി കൃഷിഭവനില്‍ കര്‍ഷക രജിസ്‌ട്രേഷന്‍ നടത്താത്ത കര്‍ഷകര്‍ ഫെബ്രുവരി 20 നകം ആവശ്യമായ രേഖകളോടെ അപേക്ഷ സമര്‍പ്പിക്കേണ്ടതാണെന്ന് കൃഷി ഓഫീസര്‍ അറിയിച്ചു.  ഫോണ്‍ : 04933 -254343

മൃഗസംരക്ഷണ വകുപ്പിന്റെ ആഭിമുഖ്യത്തില്‍ മലമ്പുഴ മൃഗസംരക്ഷണ   പരിശീലനകേന്ദ്രത്തില്‍  ഫെബ്രുവരി 15, 16 തിയ്യതികളില്‍ മുയല്‍ വളര്‍ത്തലില്‍ സൗജന്യ പരിശീലനം സംഘടിപ്പിക്കുന്നു.  താല്‍പര്യമുളളവര്‍ നേരിട്ടോ ഫോണ്‍ മുഖേനയോ ഓഫീസ് സമയങ്ങളില്‍ മുന്‍കൂട്ടി പേര് രജിസ്റ്റര്‍ ചെയ്യണം. (ഫോണ്‍ 0491 - 2815454, 8281777080)  രജിസ്റ്റര്‍  ചെയ്തവര്‍ ആധാര്‍നമ്പറുമായി  15-ന്  രാവിലെ 10 നകം  പരിശീലനകേന്ദ്രത്തില്‍ എത്തണം.