നാവികസേനയില്‍ നിന്നും വിരമിച്ചവരുടേയും വിധവകളുടേയും പരാതികള്‍ സ്വീകരിക്കുന്നതിനും പെന്‍ഷന്‍ സംബന്ധമായ സംശയങ്ങള്‍ പരിഹരിക്കുന്നതിനും ഐ.എന്‍.എസ് വെണ്ടുരുത്തിയില്‍ നിന്നുള്ള ഒരു പ്രതിനിധി, നവംബര്‍ 24 രാവിലെ 11.30 മുതല്‍ ഉച്ചയ്ക്ക് ഒരു മണിവരെ തിരുവനന്തപുരം ജില്ലാ സൈനികക്ഷേമ ഓഫീസില്‍ ഉണ്ടാകുമെന്ന്  ജില്ലാ സൈനികക്ഷേമ ഓഫീസര്‍ അറിയിച്ചു.  
    തിരുവനന്തപുരം ജില്ലയിലെ ഗുണഭോക്താക്കള്‍ക്ക് ഈ അവസരം പ്രയോജനപ്പെടുത്താവുന്നതാണ്.  കൂടുതല്‍ വിവരങ്ങള്‍ക്ക് 0471 2472748.  
(പി.ആര്‍.പി 1911/2017)
 

കോട്ടയം ആരോഗ്യ കേരളം പദ്ധതിയിന്‍ കീഴില്‍ ലാബ് ടെക്‌നീഷ്യന്‍സ് തസ്തികയിലേയ്ക്ക് നിയമനത്തിന് അപേക്ഷ ക്ഷണിച്ചു. അപേക്ഷ സ്വീകരിക്കുന്ന അവസാന തീയതി നവംബര്‍ 30. കൂടുതല്‍ വിവരങ്ങള്‍ക്ക് ജനറല്‍ ആശുപത്രിയിലുളള എന്‍.എച്ച്.എം. ഓഫീസുമായി നേരിട്ടോ ഫോണിലോ ബന്ധപ്പെടുക. ഫോണ്‍: 0481 2304844 

     തിരുവനന്തപുരം വട്ടിയൂര്‍ക്കാവ് വില്ലേജിന്റെ റീസര്‍വേ അപ്‌ഡേഷന്‍ ജോലികള്‍ നടക്കുന്ന 160 ബ്ലോക്കുകളില്‍ 15 ബ്ലോക്കുകളുടെ റീസര്‍വെ നടപ്പാക്കിയതായി ഡെപ്യൂട്ടി കളക്ടര്‍ (എല്‍.ആര്‍) അറിയിച്ചു.   ഇതില്‍ പി.ടി.പി നഗറിന് തെക്ക് ഭാഗത്ത് വരുന്ന റീസര്‍വേ ബ്ലോക്ക് നമ്പര്‍ 16 മുതല്‍ 25 വരെയുള്ള 10 ബ്ലോക്കുകളുടെ റീസര്‍വേ രേഖകള്‍ ഡിസംബര്‍ ഒന്ന് മുതല്‍ നടപ്പാക്കും.  അന്ന് മുതല്‍ റീസര്‍വേ നമ്പരുകളുടെ അടിസ്ഥാനത്തില്‍ കരം സ്വീകരിക്കും.  വസ്തു കൈമാറ്റവും പോക്കുവരവും രജിസ്‌ട്രേഷനും ഈ നമ്പരുകളുടെ അടിസ്ഥാനത്തിലായിരിക്കുമെന്നും അറിയിപ്പില്‍ പറയുന്നു.  
(പി.ആര്‍.പി 1910/2017)
 

ഈ മാസത്തെ ജില്ലാ വികസന സമിതി യോഗം നവംബര്‍ 25 ന് രാവിലെ 11 ന് കളക്‌ട്രേറ്റ് കോണ്‍ഫറന്‍സ് ഹാളില്‍ ചേരും. മുന്നൊരുക്ക യോഗം അന്ന് രാവിലെ 10.30ന് കളക്ടറുടെ ചേമ്പറിലും ചേരും.  

     തീരദേശത്തെ മത്സ്യത്തൊഴിലാളികള്‍ക്ക് സുരക്ഷിത മേഖലയില്‍ സ്വന്തമായി വീട് എന്ന സ്വപ്നത്തിന് ഇന്ന് (നവംബര്‍ 22) സാക്ഷാത്ക്കാരമാകും.  മത്സ്യത്തൊഴിലാളി പുനരധിവാസ പദ്ധതിയുടെ സംസ്ഥാനതല ഉദ്ഘാടനം ഇന്ന് വൈകിട്ട് നാലിന് അഞ്ചുതെങ്ങില്‍ ഫിഷറീ വകുപ്പ് മന്ത്രി ജെ. മെഴ്‌സിക്കുട്ടി അമ്മ നിര്‍വഹിക്കും.  നിയമസഭ ഡെപ്യൂട്ടി സ്പീക്കര്‍ വി. ശശിയുടെ അധ്യക്ഷതയില്‍ നടക്കുന്ന ചടങ്ങില്‍ സഹകരണ വകുപ്പ് മന്ത്രി കടകംപള്ളി സുരേന്ദ്രന്‍ ഭവന നിര്‍മാണ ധനസഹായവിതരണം നടത്തും.

     ഈ സര്‍ക്കാരിന്റെ കാലാവധി പൂര്‍ത്തിയാക്കുന്നതിന് മുന്‍പായി 50,000 പട്ടികജാതി വിഭാഗക്കാര്‍ക്ക് തൊഴില്‍ ലഭ്യമാക്കുമെന്ന് പട്ടികജാതി വകുപ്പ് മന്ത്രി എ.കെ. ബാലന്‍ പറഞ്ഞു.  അതിനു വേണ്ടുന്ന സാഹചര്യങ്ങള്‍ ഓരോന്നായി സര്‍ക്കാര്‍ ലഭ്യമാക്കിക്കൊണ്ടിരിക്കുകയാണെന്നും മന്ത്രി അറിയിച്ചു.  പട്ടികജാതി വികസന വകുപ്പിനു കീഴുലുള്ള വിവിധ ഐ.റ്റി.ഐ കളില്‍ നിന്ന് കഴിഞ്ഞ വര്‍ഷം വ്യത്യസ്ഥ ട്രേഡുകളില്‍ പരിശീലനം പൂര്‍ത്തിയാക്കിയ വിദ്യാര്‍ഥികള്‍ക്ക് വിവിധ തൊഴില്‍ മേഖലകളില്‍ പ്ലേസ്‌മെന്റ് ലഭ്യമാക്കുന്ന തൊഴില്‍മേളയുടെ ഉദ്ഘാടനം മണ്ണന്തല അംബേദ്കര്‍ ഭവനില്‍ നിര്‍വഹിക്കുകയായിരുന്നു മന്ത്രി.

     തിരുവനന്തപുരം ജില്ലാ പഞ്ചായത്തിന്റെ രണ്ടാം വാര്‍ഷികത്തിന്റെ ഭാഗമായി, നെടുമങ്ങാട് ജില്ലാ ആശുപത്രിയില്‍ നടപ്പാക്കിയ ആറ് പുതിയ വികസന പദ്ധതികള്‍ നാളെ (നവംബര്‍ 23) ഉദ്ഘാടനം ചെയ്യും.  വൈകുന്നേരം മൂന്ന് മണിക്ക് ആശുപത്രി അങ്കണത്തില്‍ ജില്ലാ പഞ്ചായത്ത് പ്രസിഡന്റ് വി.കെ. മധുവിന്റെ അധ്യക്ഷതയില്‍ നടക്കുന്ന ചടങ്ങില്‍ തദ്ദേശ സ്വയംഭരണ വകുപ്പ് മന്ത്രി കെ.റ്റി. ജലീല്‍ പദ്ധതികള്‍ നാടിനു സമര്‍പ്പിക്കും.