വയനാട് ജില്ലയിലെ മൂന്ന് നിയമസഭാ മണ്ഡലങ്ങളിലേക്കുള്ള വോട്ടെണ്ണൽ നിരീക്ഷകർ ജില്ലയിലെത്തി. കൽപ്പറ്റ നിയോജക മണ്ഡലത്തിൽ ജില്ലയുടെ ജനറൽ ഒബ്സർവറായിരുന്ന ഡോ. ശ്രീധർ ബാബു അധാൻകിയും മാനന്തവാടി നിയോജക മണ്ഡലത്തിൽ മധ്യപ്രദേശിൽ നിന്നുള്ള സ്റ്റേറ്റ് സിവിൽ സർവീസ് ഉദ്യോഗസ്ഥനായ രാജീവ് നന്ദൻ ശ്രീവാസ്തവയും സുൽത്താൻ ബത്തേരി മണ്ഡലത്തിൽ ഹരിയാന സ്റ്റേറ്റ് സിവിൽ സർവീസ് ഉദ്യോഗസ്ഥനായ കുൽദീർ സിംഗുമാണ് വോട്ടെണ്ണൽ നിരീക്ഷകരായി പ്രവർത്തിക്കുക.

നിയമസഭാ തെരഞ്ഞെടുപ്പിന്റെ വോട്ടെണ്ണൽ ഹാളിലേക്ക് നിരീക്ഷകൻ, ജില്ലാ തെരഞ്ഞെടുപ്പ് ഓഫീസർ, റിട്ടേണിംഗ് ഓഫീസർ, അസിസ്റ്റന്റ് റിട്ടേണിംഗ് ഓഫീസർ, കൗണ്ടിംഗ് ഡ്യൂട്ടിക്ക് നിയോഗിച്ച ഉദ്യോഗസ്ഥർ, സ്ഥാനാർത്ഥികൾ, ഇലക്ഷൻ ഏജന്റുമാർ എന്നിവർക്കു മാത്രമാണ് പ്രവേശനം അനുവദിക്കുക. കർശനമായ പോലീസ് പരിശോധനയ്ക്ക് ശേഷമേ ജീവനക്കാരെയും ഏജന്റുമാരെയും ഹാളിലേക്ക് പ്രവേശിപ്പിക്കുകയുള്ളു.

നിയമസഭാ തെരഞ്ഞെടുപ്പിന്റെ വോട്ടെണ്ണലിനായി ഓരോ കൗണ്ടിംഗ് ടേബിളിലും സ്ഥാനാർത്ഥികൾക്ക് ഓരോ കൗണ്ടിംഗ് എജന്റിനെ നിയമിക്കാൻ അവസരമുണ്ടാകും. കൗണ്ടിംഗ് എജന്റുമാർക്ക് തിരിച്ചറിയൽ കാർഡുകൾ ലഭ്യമാക്കുന്നതിനായി സ്ഥാനാർത്ഥികളോ തെരഞ്ഞെടുപ്പ് ഏജന്റുമാരോ ആവശ്യമായ വിവരങ്ങൾ ഫോട്ടോ സഹിതം രണ്ട് പകർപ്പുകളിൽ സമർപ്പിക്കണം. ഇതിൽ ഒരു പകർപ്പ് മുൻകൂർറായി വരണാധികാരിക്ക് നൽകേണ്ടതും രണ്ടാമത്തെ പകർപ്പ് വോട്ടെണ്ണൽ ദിവസം ഏജന്റ് വരണാധികാരിക്ക് മുൻപാകെ ഹാജരാക്കണം. സമർപ്പിച്ച അപേക്ഷകളുടെ അടിസ്ഥാനത്തിൽ വരണാധികാരി സീലും ഒപ്പും പതിച്ച ഫോട്ടോ ഐഡൻറിറ്റി കാർഡുകൾ തയ്യാറാക്കി സ്ഥാനാർത്ഥിക്കോ തെരഞ്ഞെടുപ്പ് ഏജന്റിനോ  വിതരണം ചെയ്യും.

നിയമസഭാ തെരഞ്ഞെടുപ്പ് വോട്ടെണ്ണലിനുള്ള ഉദ്യോഗസ്ഥരുടെ രണ്ടാംഘട്ട റാന്‍ഡമൈസേഷന്‍ പൂര്‍ത്തിയായി. ജില്ലയുടെ കൗണ്ടിംഗ് നിരീക്ഷകന്‍ രാജീവ് നന്ദന്‍ ശ്രീവാസ്തവയുടെ സാന്നിധ്യത്തില്‍ ജില്ലാ തെരഞ്ഞെടുപ്പ് ഓഫീസറായ ജല്ലാ കളക്ടര്‍ ഡി ആര്‍ മേഘശ്രീ റാന്‍ഡമൈസേഷന് നേതൃത്വം നല്‍കി. വോട്ടെണ്ണലിനായി 20 ശതമാനം റിസര്‍വ് ഉള്‍പ്പെടെ ആകെ 268 ഉദ്യോഗസ്ഥരെ തെരഞ്ഞെടുത്തു. ഇതോടെ ഉദ്യോഗസ്ഥര്‍ക്ക് അവര്‍ക്ക് അനുവദിച്ചിട്ടുള്ള നിയമസഭാ മണ്ഡലം ഏതാണെന്ന് വ്യക്തമാകും. നിയമന ഉത്തരവുകള്‍ ഓര്‍ഡര്‍ വെബ്‌സൈറ്റ് വഴി ഉദ്യോഗസ്ഥര്‍ക്ക് ഡൗണ്‍ലോഡ് ചെയ്യാം.

ഏപ്രില്‍ മാസത്തെ പച്ചത്തേയിലയുടെ വില 15.95 രൂപയായി നിശ്ചയിച്ചതായി അസിസ്റ്റന്റ് ഡയറക്ടര്‍ അറിയിച്ചു. പച്ച തേയിലയുടെ വില തീര്‍പാക്കുമ്പോള്‍ ഫാക്ടറികള്‍ ശരാശരി വില പാലിച്ച് വിതരണക്കാര്‍ക്ക് നല്‍കണം.

കേരള ഖാദി ഗ്രാമ വ്യവസായ ബോര്‍ഡിന് കീഴിലെ കല്‍പറ്റ, പനമരം, മാനന്തവാടി ഷോറൂമുകളില്‍ വേനല്‍ക്കാല റിബേറ്റ് മേള ആരംഭിച്ചു.

2026 ഏപ്രില്‍ മാസത്തെ റേഷന്‍ വിഹിതം മെയ് അഞ്ച് വരെ എല്ലാ റേഷന്‍ കടകളില്‍ നിന്നും വാങ്ങാവുന്നതാണെന്ന് ജില്ലാ സപ്ലൈ ഓഫീസര്‍ അറിയിച്ചു. 

നിയമസഭാ തെരഞ്ഞെടുപ്പുമായി ബന്ധപ്പെട്ട വോട്ടെണ്ണല്‍ നടപടികള്‍ക്കായി നിയോഗിച്ച ഉദ്യോഗസ്ഥര്‍ക്കുള്ള രണ്ടാം ഘട്ട പരിശീലനം സംഘടിപ്പിച്ചു. ജില്ലയിലെ മൂന്ന് മണ്ഡലങ്ങളിലെ വോട്ടെണ്ണല്‍ കേന്ദ്രങ്ങളിലേക്ക് നിയോഗിച്ച കൗണ്ടിംഗ് സൂപ്പര്‍വൈസര്‍മാര്‍, കൗണ്ടിംഗ് അസിസ്റ്റന്റുമാര്‍, മൈക്രോ ഒബ്‌സര്‍വര്‍മാര്‍, അഡിഷണല്‍ എ.ആര്‍.മാര്‍ എന്നിവര്‍ക്കായാണ് പരിശീലനം സംഘടിപ്പിച്ചത്.

ജില്ലയില്‍ ആകെ 42 ഇലക്ട്രോണിക് വോട്ടിംഗ് മെഷീന്‍ (ഇവിഎം) കൗണ്ടിംഗ് ടേബിളുകളും 23 പോസ്റ്റല്‍ ബാലറ്റ് കൗണ്ടിംഗ് ടേബിളുകളുമാണ് സജ്ജീകരിച്ചിട്ടുള്ളത്. എല്ലാ മണ്ഡലത്തിനും 14 വീതം ഇവിഎം കൗണ്ടിംഗ് ടേബിള്‍ ഉണ്ടാവും. പോസ്റ്റല്‍ ബാലറ്റിന് കല്‍പറ്റ-ആറ്, സുല്‍ത്താന്‍ ബത്തേരി- ഒമ്പത്, മാനന്തവാടി- എട്ട്് എന്നിങ്ങനെ കൗണ്ടിംഗ് ടേബിള്‍ ഉണ്ടാവും. ജില്ലയിലെ ഇടിപിബി (ഇലക്ട്രോണിക്കലി ട്രാന്‍സ്മിറ്റഡ് പോസ്റ്റല്‍ ബാലറ്റ്) ഉള്‍പ്പെടെയാണിത്.

2026 ലെ കേരള നിയമസഭ തെരഞ്ഞെടുപ്പുമായി ബന്ധപ്പെട്ട് ജില്ലയില്‍ വോട്ടെണ്ണലിനുള്ള ഒരുക്കങ്ങള്‍ പൂര്‍ത്തിയായി. മെയ് നാലിന് ജില്ലയിലെ മൂന്ന് കേന്ദ്രങ്ങളിലായാണ് വോട്ടെല്‍ നടക്കുന്നത്. കല്‍പറ്റ നിയമസഭ മണ്ഡലത്തിലെ വോട്ടെണ്ണല്‍ എസ് കെ എം ജെ ഹൈസ്‌കൂളിലും സുല്‍ത്താന്‍ ബത്തേരിയിലെ വോട്ടെണ്ണല്‍ സെന്റ് മേരീസ് കോളേജിലും മാനന്തവാടി നിയമസഭ മണ്ഡലത്തിലേത്  സെന്റ് പാട്രിക് സ്‌കൂളിലുമാണ് നടക്കുക. മൂന്ന് കേന്ദ്രങ്ങളിലെയും വോട്ടെണ്ണലിന്റെ ഒരുക്കങ്ങള്‍ തെരഞ്ഞെടുപ്പ് ഓഫീസറായ ജല്ലാ കളക്ടര്‍ ഡി ആര്‍ മേഘശ്രീ സന്ദര്‍ശിച്ച് വിലയിരുത്തി.