ക്യാമ്പ് ഓഫീസ് ഗവ. ഗസ്റ്റ് ഹൗസില്‍

നിയമസഭ തിരഞ്ഞെടുപ്പുമായി ബന്ധപ്പെട്ട പൊതുനിരീക്ഷകരും (ജനറല്‍ ഒബ്സര്‍വര്‍) പോലീസ് നിരീക്ഷകനും (പോലീസ് ഒബ്സര്‍വര്‍) പൊതുജനങ്ങളില്‍നിന്ന് ഉള്‍പ്പെടെ പരാതികള്‍ സ്വീകരിക്കും. കോഴിക്കോട് വെസ്റ്റ്ഹില്‍ ഗവ. ഗസ്റ്റ് ഹൗസാണ് ക്യാമ്പ് ഓഫീസ്. ഐ.എ.എസ് ഉദ്യോഗസ്ഥരായ ഡോ. ജിതേന്ദ്ര ഗുപ്ത, വിക്രം സിങ് മാലിക്, മുഹമ്മദ് ഐജാസ്, അപ്നീത് റിയെത്, കെ നിഖില എന്നിവരാണ് ജില്ലയിലെ പൊതുനിരീക്ഷകര്‍. ഐ.പി.എസ് ഉദ്യോഗസ്ഥന്‍ യമുന പ്രസാദാണ് പോലീസ് നിരീക്ഷകന്‍. 

തദ്ദേശസ്വയംഭരണ വകുപ്പ് ആര്‍.ജി.എസ്.എയുടെയും കോളേജ് എന്‍.എസ്.എസിന്റെയും നേതൃത്വത്തില്‍ മുണ്ടക്കൈ ചൂരല്‍മല തോട്ടം തൊഴിലാളികള്‍ക്കായി 'ടീ എസ്റ്റേറ്റ് അവേര്‍നെസ്സ് വാക്ക്  സംഘടിപ്പിച്ചു. നിയമസഭാ തെരഞ്ഞെടുപ്പില്‍ വോട്ട് രേഖപ്പെടുത്തുന്നതിന്റെ പ്രാധാന്യവും ജനങ്ങളുടെ പങ്കാളിത്തം വര്‍ദ്ധിപ്പിക്കുന്നതിനുമായാണ് ബോധവത്ക്കരണ പരിപാടി നടത്തിയത്. ജനാധിപത്യ പ്രക്രിയയില്‍ ജനങ്ങളുടെ പങ്കാളിത്തം ഉറപ്പാക്കുന്നതിന് പ്രചോദനമാകും വിധം വളണ്ടിയര്‍മാര്‍ തൊഴിലാളികളോട് സംവദിച്ചു. 

ജില്ലയില്‍ സ്വീപ് പ്രവര്‍ത്തനങ്ങളുടെ ഭാഗമായി എന്‍ ഊരില്‍ വുമണ്‍ ഇന്‍ഫ്‌ളുവന്‍സര്‍മാരുടെ പങ്കാളിത്തത്തോടെ ടീ ചാറ്റ് വിത്ത് കളക്ടര്‍ പരിപാടി സംഘടിപ്പിച്ചു. തിരഞ്ഞെടുപ്പിന്റെ പ്രാധാന്യം, വോട്ടര്‍മാരുടെ ഉത്തരവാദിത്വം, ജനാധിപത്യത്തിലെ സജീവ പങ്കാളിത്തം എന്നീ വിഷയങ്ങളില്‍ ഇന്‍ഫ്‌ളുവന്‍സര്‍മാര്‍ ജില്ലാ കളക്ടര്‍ ഡി. ആര്‍ മേഘശ്രീയോട് സംവദിച്ചു. സമൂഹത്തിലെ വിവിധ വിഭാഗങ്ങളില്‍ തെരഞ്ഞെടുപ്പ് ബോധവത്കരണം ശക്തിപ്പെടുത്തേണ്ടതിന്റെ ആവശ്യകത പരിപാടിയില്‍ ചര്‍ച്ചയായി. ജില്ലയിലെ തെരഞ്ഞെടുപ്പ് പൊതുനിരീക്ഷകന്‍ ഡോ. ശ്രീധര്‍ ബാബു അധാന്‍കി, പോലീസ് നിരീക്ഷകന്‍ ഡോ. വിഷ്ണുകാന്ത് എന്നിവര്‍ സന്നിഹിതരായി.

സ്വീപിന്റെ ഭാഗമായി ജില്ലാ ശുചിത്വ മിഷന്റെയും ജില്ലാ ബൈക്കേഴ്സ് ക്ലബിന്റെയും സംയുക്താഭിമുഖ്യത്തില്‍ നിയമസഭാ തെരഞ്ഞെടുപ്പില്‍ വോട്ടര്‍മാരുടെ പങ്കാളിത്തം ഉറപ്പു വരുത്തുക,പരിസ്ഥിതി സൗഹൃദ ഗ്രീന്‍ ഇലക്ഷന്‍ സന്ദേശം പ്രചരിപ്പിക്കുക എന്നീ ലക്ഷ്യവുമായി ചെമ്പ്ര പീക്കിലേക്ക് സൈക്കിള്‍ റാലി സംഘടിപ്പിച്ചു. കല്‍പറ്റ ഹോളിഡേയ്സ് ഹോട്ടല്‍ പരിസരത്ത് നിന്നും ആരംഭിച്ച സൈക്കിള്‍ റാലി അസിസ്റ്റന്റ് കളക്ടര്‍ പി.പി അര്‍ച്ചന ഫ്ളാഗ് ഓഫ് ചെയ്തു. ജനാധിപത്യ പ്രക്രിയയില്‍ ഓരോ പൗരനും പങ്കാളികളാകണമെന്നും തെരഞ്ഞെടുപ്പിലൂടെ പ്രകൃതി സംരക്ഷണത്തിന് പ്രാധാന്യം നല്‍കണമെന്നും അസിസ്റ്റന്റ് കളക്ടര്‍ പറഞ്ഞു. 

പോളിംഗ് ഇതര ഡ്യൂട്ടിയ്ക്ക് നിയോഗിക്കപ്പെട്ട ഉദ്യോഗസ്ഥര്‍ക്ക് കല്‍പറ്റ എസ് കെ എം ജെ ഹൈസ്‌കൂളില്‍ സജ്ജീകരിച്ചിട്ടുള്ള ഡെസിഗ്‌നേറ്റഡ് വോട്ടേഴ്‌സ് ഫെസിലിറ്റേഷന്‍ സെന്ററില്‍ ഏപ്രില്‍ ഒന്ന് മുതല്‍ എട്ട് വരെയുള്ള തീയതികളില്‍ രാവിലെ പത്ത് മണി മുതല്‍ വൈകിട്ട് അഞ്ച് വരെ വോട്ട് ചെയ്യാനുള്ള സൗകര്യമുണ്ട്.

മാനന്തവാടിയില്‍ സെന്റ് പാട്രിക് ഹൈസ്‌ക്കൂള്‍, സുല്‍ത്താന്‍ ബത്തേരിയില്‍ സെന്റ് മേരിസ് കോളേജ്, കല്‍പറ്റയില്‍ എസ് കെ എം ജെ ഹൈസ്‌കൂള്‍ എന്നിവയാണ് ജില്ലയിലെ ഡിസ്ട്രിബ്യൂഷന്‍ സെന്ററുകള്‍.

ജില്ലയില്‍ പോളിങ് ഡ്യൂട്ടിക്കള്‍ക്ക് നിയോഗിക്കപ്പെട്ട ഉദ്യോഗസ്ഥര്‍ക്ക് അവരെ ഡ്യൂട്ടിക്ക് നിയോഗിച്ചിട്ടുള്ള നിയോജക മണ്ഡലത്തിലെ വിഎഫ്‌സികളില്‍ ഏപ്രില്‍ ഒന്ന് മുതല്‍ ഏഴ് വരെയുളള തീയതികളില്‍ രാവിലെ ഒന്‍പത് മണി മുതല്‍ വൈകിട്ട് അഞ്ച് വരെ വോട്ട് ചെയ്യാനുള്ള സൗകര്യമുണ്ട്. മാനന്തവാടി: സെന്റ് പാട്രിക് ഹൈസ്‌ക്കൂള്‍, സുല്‍ത്താന്‍ ബത്തേരി: അസംപ്ഷന്‍ ഹൈസ്‌ക്കൂള്‍, കല്‍പറ്റ: എസ് കെ എം ജെ എച്ച് എസ് എന്നിവയാണ്  വിഎഫ്‌സി സെന്ററുകള്‍.

അവശ്യസര്‍വ്വീസ് വിഭാഗത്തില്‍പ്പെട്ട ഉദ്യോഗസ്ഥര്‍ക്ക് അവരുടെ ഓഫീസ് മേധാവികള്‍ മുഖേന ഫോറം ഡി അപേക്ഷ സമര്‍പ്പിച്ചിട്ടുള്ളവരില്‍ റിട്ടേണിംഗ് ഓഫീസര്‍ അംഗീകരിച്ച പട്ടിക പ്രകാരം അനുബന്ധം 12 ന്റെ അടിസ്ഥാനത്തില്‍ സ്വന്തം നിയമസഭാ മണ്ഡലത്തില്‍ ക്രമീകരിച്ചിട്ടുള്ള പോസ്റ്റല്‍ വോട്ടിങ്ങ് സെന്ററുകളില്‍ എപ്രില്‍ ഒന്ന് മുതല്‍ ആറ് വരെയുള്ള തീയതികളില്‍ രാവിലെ ഒന്‍പത് മണി മുതല്‍ വൈകിട്ട് അഞ്ച് വരെ വോട്ട് ചെയ്യാനുള്ള സൗകര്യമുണ്ട്. മാനന്തവാടി: ആര്‍ ഡി ഒ ഓഫീസ്, സുല്‍ത്താന്‍ ബത്തേരി: മിനി സിവില്‍ സ്റ്റേഷന്‍, കല്‍പറ്റ: എസ് കെ എം ജെ എച്ച് എസ് എന്നിവയാണ് പോസ്റ്റല്‍ വോട്ടിംഗ് സെന്ററുകള്‍

നിയമസഭാ പൊതുതിരഞ്ഞെടുപ്പുമായി ബന്ധപ്പെട്ട തെരഞ്ഞെടുപ്പ് ഡ്യൂട്ടിയ്ക്ക് നിയോഗിക്കപ്പെട്ടിട്ടുള്ള ഉദ്യോഗസ്ഥര്‍ക്ക് പോസ്റ്റല്‍ ബാലറ്റ് മുഖാന്തിരം വോട്ട് രേഖപ്പെടുത്തുന്നതിന് അഞ്ച് വോട്ടേഴ്‌സ് ഫെസിലിറ്റേഷന്‍ സെന്ററുകളും (വി എഫ് സി) അവശ്യ വിഭാഗത്തില്‍പ്പെട്ട ജീവനക്കാര്‍ക്ക് പോസ്റ്റല്‍ വോട്ട് രേഖപ്പെടുത്തുന്നതിന് നാല് പോസ്റ്റല്‍ വോട്ടിംഗ് സെന്ററുകളും (പി വി സി), ഒരു ഡെസിഗ്‌നേറ്റഡ് വോട്ടേഴ്‌സ് ഫെസിലിറ്റേഷന്‍ സെന്ററുമാണ് ജില്ലയില്‍ ക്രമീകരിച്ചിട്ടുള്ളത്. 

ജില്ലയിലെ പാചകവാതക സിലിണ്ടറുകളുടെ വിതരണം സുഗമമാക്കുന്നതിനായി എല്ലാ ഗ്യാസ് ഏജന്‍സികളും സഹകരിക്കണമെന്ന് ജില്ലാ സപ്ലൈ ഓഫിസര്‍ അറിയിച്ചു. ഗാര്‍ഹിക/ ഗാര്‍ഹികേതര സിലിണ്ടറുകള്‍ ബുക്ക് ചെയ്യുന്ന ഗുണഭോക്താക്കള്‍ക്ക് സമയബന്ധിതമായി ഡെലിവറി നല്‍കുന്നതിന് പ്രത്യേക ശ്രദ്ധ പുലര്‍ത്തണമെന്ന് ഏജന്‍സികള്‍ക്ക് നിര്‍ദേശം നല്‍കി.