സ്വീപിന്റെ ഭാഗമായി ജില്ലാ ശുചിത്വ മിഷന്റെയും ജില്ലാ ബൈക്കേഴ്സ് ക്ലബിന്റെയും സംയുക്താഭിമുഖ്യത്തില്‍ നിയമസഭാ തെരഞ്ഞെടുപ്പില്‍ വോട്ടര്‍മാരുടെ പങ്കാളിത്തം ഉറപ്പു വരുത്തുക,പരിസ്ഥിതി സൗഹൃദ ഗ്രീന്‍ ഇലക്ഷന്‍ സന്ദേശം പ്രചരിപ്പിക്കുക എന്നീ ലക്ഷ്യവുമായി ചെമ്പ്ര പീക്കിലേക്ക് സൈക്കിള്‍ റാലി സംഘടിപ്പിച്ചു. കല്‍പറ്റ ഹോളിഡേയ്സ് ഹോട്ടല്‍ പരിസരത്ത് നിന്നും ആരംഭിച്ച സൈക്കിള്‍ റാലി അസിസ്റ്റന്റ് കളക്ടര്‍ പി.പി അര്‍ച്ചന ഫ്ളാഗ് ഓഫ് ചെയ്തു. ജനാധിപത്യ പ്രക്രിയയില്‍ ഓരോ പൗരനും പങ്കാളികളാകണമെന്നും തെരഞ്ഞെടുപ്പിലൂടെ പ്രകൃതി സംരക്ഷണത്തിന് പ്രാധാന്യം നല്‍കണമെന്നും അസിസ്റ്റന്റ് കളക്ടര്‍ പറഞ്ഞു. 

പോളിംഗ് ഇതര ഡ്യൂട്ടിയ്ക്ക് നിയോഗിക്കപ്പെട്ട ഉദ്യോഗസ്ഥര്‍ക്ക് കല്‍പറ്റ എസ് കെ എം ജെ ഹൈസ്‌കൂളില്‍ സജ്ജീകരിച്ചിട്ടുള്ള ഡെസിഗ്‌നേറ്റഡ് വോട്ടേഴ്‌സ് ഫെസിലിറ്റേഷന്‍ സെന്ററില്‍ ഏപ്രില്‍ ഒന്ന് മുതല്‍ എട്ട് വരെയുള്ള തീയതികളില്‍ രാവിലെ പത്ത് മണി മുതല്‍ വൈകിട്ട് അഞ്ച് വരെ വോട്ട് ചെയ്യാനുള്ള സൗകര്യമുണ്ട്.

മാനന്തവാടിയില്‍ സെന്റ് പാട്രിക് ഹൈസ്‌ക്കൂള്‍, സുല്‍ത്താന്‍ ബത്തേരിയില്‍ സെന്റ് മേരിസ് കോളേജ്, കല്‍പറ്റയില്‍ എസ് കെ എം ജെ ഹൈസ്‌കൂള്‍ എന്നിവയാണ് ജില്ലയിലെ ഡിസ്ട്രിബ്യൂഷന്‍ സെന്ററുകള്‍.

ജില്ലയില്‍ പോളിങ് ഡ്യൂട്ടിക്കള്‍ക്ക് നിയോഗിക്കപ്പെട്ട ഉദ്യോഗസ്ഥര്‍ക്ക് അവരെ ഡ്യൂട്ടിക്ക് നിയോഗിച്ചിട്ടുള്ള നിയോജക മണ്ഡലത്തിലെ വിഎഫ്‌സികളില്‍ ഏപ്രില്‍ ഒന്ന് മുതല്‍ ഏഴ് വരെയുളള തീയതികളില്‍ രാവിലെ ഒന്‍പത് മണി മുതല്‍ വൈകിട്ട് അഞ്ച് വരെ വോട്ട് ചെയ്യാനുള്ള സൗകര്യമുണ്ട്. മാനന്തവാടി: സെന്റ് പാട്രിക് ഹൈസ്‌ക്കൂള്‍, സുല്‍ത്താന്‍ ബത്തേരി: അസംപ്ഷന്‍ ഹൈസ്‌ക്കൂള്‍, കല്‍പറ്റ: എസ് കെ എം ജെ എച്ച് എസ് എന്നിവയാണ്  വിഎഫ്‌സി സെന്ററുകള്‍.

അവശ്യസര്‍വ്വീസ് വിഭാഗത്തില്‍പ്പെട്ട ഉദ്യോഗസ്ഥര്‍ക്ക് അവരുടെ ഓഫീസ് മേധാവികള്‍ മുഖേന ഫോറം ഡി അപേക്ഷ സമര്‍പ്പിച്ചിട്ടുള്ളവരില്‍ റിട്ടേണിംഗ് ഓഫീസര്‍ അംഗീകരിച്ച പട്ടിക പ്രകാരം അനുബന്ധം 12 ന്റെ അടിസ്ഥാനത്തില്‍ സ്വന്തം നിയമസഭാ മണ്ഡലത്തില്‍ ക്രമീകരിച്ചിട്ടുള്ള പോസ്റ്റല്‍ വോട്ടിങ്ങ് സെന്ററുകളില്‍ എപ്രില്‍ ഒന്ന് മുതല്‍ ആറ് വരെയുള്ള തീയതികളില്‍ രാവിലെ ഒന്‍പത് മണി മുതല്‍ വൈകിട്ട് അഞ്ച് വരെ വോട്ട് ചെയ്യാനുള്ള സൗകര്യമുണ്ട്. മാനന്തവാടി: ആര്‍ ഡി ഒ ഓഫീസ്, സുല്‍ത്താന്‍ ബത്തേരി: മിനി സിവില്‍ സ്റ്റേഷന്‍, കല്‍പറ്റ: എസ് കെ എം ജെ എച്ച് എസ് എന്നിവയാണ് പോസ്റ്റല്‍ വോട്ടിംഗ് സെന്ററുകള്‍

നിയമസഭാ പൊതുതിരഞ്ഞെടുപ്പുമായി ബന്ധപ്പെട്ട തെരഞ്ഞെടുപ്പ് ഡ്യൂട്ടിയ്ക്ക് നിയോഗിക്കപ്പെട്ടിട്ടുള്ള ഉദ്യോഗസ്ഥര്‍ക്ക് പോസ്റ്റല്‍ ബാലറ്റ് മുഖാന്തിരം വോട്ട് രേഖപ്പെടുത്തുന്നതിന് അഞ്ച് വോട്ടേഴ്‌സ് ഫെസിലിറ്റേഷന്‍ സെന്ററുകളും (വി എഫ് സി) അവശ്യ വിഭാഗത്തില്‍പ്പെട്ട ജീവനക്കാര്‍ക്ക് പോസ്റ്റല്‍ വോട്ട് രേഖപ്പെടുത്തുന്നതിന് നാല് പോസ്റ്റല്‍ വോട്ടിംഗ് സെന്ററുകളും (പി വി സി), ഒരു ഡെസിഗ്‌നേറ്റഡ് വോട്ടേഴ്‌സ് ഫെസിലിറ്റേഷന്‍ സെന്ററുമാണ് ജില്ലയില്‍ ക്രമീകരിച്ചിട്ടുള്ളത്. 

ജില്ലയിലെ പാചകവാതക സിലിണ്ടറുകളുടെ വിതരണം സുഗമമാക്കുന്നതിനായി എല്ലാ ഗ്യാസ് ഏജന്‍സികളും സഹകരിക്കണമെന്ന് ജില്ലാ സപ്ലൈ ഓഫിസര്‍ അറിയിച്ചു. ഗാര്‍ഹിക/ ഗാര്‍ഹികേതര സിലിണ്ടറുകള്‍ ബുക്ക് ചെയ്യുന്ന ഗുണഭോക്താക്കള്‍ക്ക് സമയബന്ധിതമായി ഡെലിവറി നല്‍കുന്നതിന് പ്രത്യേക ശ്രദ്ധ പുലര്‍ത്തണമെന്ന് ഏജന്‍സികള്‍ക്ക് നിര്‍ദേശം നല്‍കി.

നിയമസഭ തിരഞ്ഞെടുപ്പിനുള്ള ഇലക്ട്രോണിക് വോട്ടിങ് മെഷീന്‍ (ഇ.വി.എം) കമീഷനിങ് ബുധനാഴ്ച്ച ജില്ലയിലെ എല്ലാ നിയമസഭ മണ്ഡലങ്ങളിലും നടത്തി. പലയിടത്തും രാത്രി വൈകിയാണ് പൂർത്തിയായത്. 

രാവിലെ എട്ടു മണിയോടെ സ്ഥാനാര്‍ഥികളുടെ ഏജന്റിന്റെ സാന്നിധ്യത്തിലാണ് കമീഷനിങ് തുടങ്ങിയത്. മണ്ഡലത്തിന്റെ ചുമതലയുള്ള പൊതുനിരീക്ഷകനും വരണാധികാരിയും മറ്റ് ഉദ്യോഗസ്ഥരും സന്നിഹിതരായി. 

സി-വിജില്‍ ആപ്പ് മുഖേന ജില്ലയില്‍ ബുധനാഴ്ച 255 പരാതികള്‍ ലഭിച്ചു. മുഴുവന്‍ പരാതികളും പരിഹരിച്ചു. ജില്ലയില്‍ ഇതുവരെ 2950 പരാതികളാണ് സി-വിജില്‍ ആപ്പ് വഴി ലഭിച്ചത്. നിയമസഭാ തെരഞ്ഞെടുപ്പിന്റെ മാതൃകാ പെരുമാറ്റ ചട്ടലംഘനവുമായി ബന്ധപ്പെട്ട് സി - വിജില്‍ ആപ്ല് മുഖേന പൊതുജനങ്ങള്‍ക്ക് നേരിട്ട് പരാതി നല്‍കാം.

നിയമസഭ തിരഞ്ഞെടുപ്പുമായി ബന്ധപ്പെട്ട് ഹരിതചട്ടം പ്രോത്സാഹിപ്പിക്കുന്നതിന്റെ ഭാഗമായി ജില്ലാ ശുചിത്വമിഷന്‍ ക്ലിക്ക് കണിക്കൊന്ന മൊബൈല്‍ ഫോട്ടോഗ്രാഫി എൻട്രികൾ ക്ഷണിച്ചു. ഒറ്റത്തവണ ഉപയോഗിക്കുന്ന പ്ലാസ്റ്റിക് അലങ്കാര വസ്തുക്കളും പൂച്ചെണ്ടുകളും ഒഴിവാക്കി സംസ്ഥാന പുഷ്പമായ കണിക്കൊന്ന, നാടന്‍ പൂക്കള്‍ എന്നിവ നല്‍കി സ്ഥാനാര്‍ത്ഥികളെയും പ്രമുഖ വ്യക്തികളെയും തിരഞ്ഞെടുപ്പ് പ്രചാരണത്തിന്റെ ഭാഗമായി സ്വീകരിക്കുന്നതിന്റെ മൊബൈല്‍ ഫോട്ടോകളാണ് അയക്കേണ്ടത്.  പ്രായഭേദമന്യേ എല്ലാവര്‍ക്കും പങ്കെടുക്കാം.