എംപ്ലോയ്‌മെന്റ് ഡയറക്ടറുടെ നിര്‍ദ്ദേശ പ്രകാരം 2018-2020  വര്‍ഷത്തേക്കുളള സീനിയോറിറ്റി ലിസ്റ്റ് തയ്യാറാക്കുന്ന ജോലികള്‍ സമയബന്ധിതമായി  പൂര്‍ത്തിയാക്കേണ്ടതിനാല്‍ എംപ്ലോയ്‌മെന്റിന്റെ മറ്റു സേവനങ്ങള്‍ (രജിസ്‌ട്രേഷന്‍, പുതുക്കല്‍, അധികയോഗ്യത ചേര്‍ക്കല്‍) തുടങ്ങിയ ജോലികള്‍ ഡിസംബര്‍  20  വരെ നിര്‍ത്തിവെച്ചു. ഈ സേവനങ്ങള്‍ ഡിസംബര്‍ 21 മുതല്‍ പുനരരംഭിക്കും. എന്നാല്‍ ഓണ്‍ലൈന്‍ സേവനങ്ങള്‍ (രജിസ്‌ട്രേഷന്‍, പുതുക്കല്‍, അധികയോഗ്യത ചേര്‍ക്കല്‍) എന്നിവ സ്വന്തമായോ അക്ഷയ കേന്ദ്രങ്ങള്‍ മുഖേനയോ ചെയ്യാവുന്നതാണ്. അതിന്റെ വെരിഫിക്കേഷന്‍ ഡിസംബര്‍ 21 മുതല്‍ ആരംഭിക്കും. കൂടുതല്‍ വിവരങ്ങള്‍ക്ക്  0495 2376179

 'നോട്ട് റ്റു ടാബ് - ബി സ്‌പോട്‌സ്'  എന്ന  പേരില്‍ ജില്ലാതല സ്‌കൂള്‍ സൗഹൃദ ഫുട്‌ബോള്‍ ചാമ്പ്യന്‍ഷിപ്പ് നടത്തുന്നു.  മികച്ച കൗമാരതാരങ്ങളെ കണ്ടെത്തുന്നതിനും പ്രോത്സാഹിപ്പിക്കുന്നതിനും സ്‌കൂളുകളില്‍ കായിക വിദ്യാഭ്യാസത്തേയും  പ്രൊഫഷണല്‍ ഫുട്‌ബോളിനെയും കാര്യക്ഷമമാക്കുന്നതിനുമായി  ചൈല്‍ഡ് ലൈന്‍ ദോസ്തി ക്യാമ്പയിന്റെ ഭാഗമായാണ് പരിപാടി.  നവംബര്‍ 20ന് അന്താരാഷ്ട്ര ബാലാവകാശ ദിനത്തില്‍ കോട്ടപ്പടി സ്റ്റേഡിയത്തില്‍ വൈകുന്നേരം മൂന്നിനാണ് മത്സരം.

പെരിന്തല്‍മണ്ണ ഗവ. പോളിടെക്‌നിക് കോളേജില്‍ പാര്‍ട്ട് ടൈം ഡിപ്‌ളോമ സായാഹ്ന കോഴ്‌സുകളില്‍ കരാറടിസ്ഥാനത്തില്‍ ഇംഗ്ലീഷ്, കെമിസ്ട്രി, ഫിസിക്‌സ്, ഗണിതം, കമ്പ്യൂട്ടര്‍ എഞ്ചിനീയറിംഗ് വിഭാഗങ്ങളില്‍ ഗസ്റ്റ് ലക്ചറര്‍മാരെ നിയമിക്കുന്നു. താത്പര്യമുളളവര്‍ ബയോഡാറ്റയും അസ്സല്‍ സര്‍ട്ടിഫിക്കറ്റുകളുമായി നവംബര്‍ 22ന് രാവിലെ 9.30 ന് കോളേജില്‍ കൂടിക്കാഴ്ചയ്ക്ക് എത്തണം. ഫോണ്‍ : 04933 227253.

എംപ്ലോയ്‌മെന്റ് എക്‌സ്‌ചേഞ്ചുകളിലെ രജിസ്‌ട്രേഷന്‍, അഡീഷണല്‍ സര്‍ട്ടിഫിക്കറ്റ് ചേര്‍ക്കല്‍, പുതുക്കല്‍ മുതലായ ദൈനംദിന പ്രവര്‍ത്തനങ്ങള്‍ ഡിസംബര്‍ 20 വരെ ഉണ്ടാവില്ലെന്ന് ജില്ലാ എംപ്ലോയ്‌മെന്റ് ഓഫീസര്‍ അറിയിച്ചു. ഈ കാലയളവില്‍ ംംം.ലാുഹീ്യാലി.േസലൃമഹമ.ഴീ്.ശി മുഖേന രജിസ്‌ട്രേഷന്‍, അഡീഷണല്‍ സര്‍ട്ടിഫിക്കറ്റ് ചേര്‍ക്കല്‍, പുതുക്കല്‍ എന്നിവ നിര്‍വ്വഹിക്കാം.  ഡിസംബര്‍ 20ന് ശേഷം 2018 ഫെബ്രുവരി 20 വരെ സീനിയോറിറ്റി നഷ്ടപ്പെടാതെ ഇവ ഓഫീസുകള്‍ മുഖേന നിവ്വഹിക്കാമെന്നും എംപ്ലോയ്‌മെന്റ് ഓഫീസര്‍ അറിയിച്ചു.

ജില്ലാ പ്ലാനിങ് ഓഫീസില്‍  പ്രോജക്ട് അസോസിയേറ്റ്, ഡാറ്റാ എന്‍ട്രി ഓപ്പറേറ്റര്‍ തസ്തികകളിലേക്ക് നാല് മാസത്തേക്ക് കരാറടിസ്ഥാനത്തില്‍ നിയമിക്കുന്നതിന് അപേക്ഷ ക്ഷണിച്ചു.  പ്രോജക്ട് അസോസിയേറ്റര്‍ക്ക് ബിരുദം, മലയാള ഭാഷയില്‍ പ്രാവീണ്യവും എഡിറ്റ് ചെയ്യുന്നതിനുള്ള കഴിവും, മലയാളം - ഇംഗ്ലീഷ് തര്‍ജ്ജമ ചെയ്യാനുള്ള കഴിവ്, കംപ്യൂട്ടര്‍ പരിജ്ഞാനം, ഇംഗ്ലീഷ്, മലയാളം ടൈപ്പിങ് പ്രാവീണ്യം, മലയാളം/ഇംഗ്ലീഷ് പി.ജി അഭികാമ്യം എന്നിവയാണ് യോഗ്യതകള്‍. വേതനം പ്രതിമാസം 25000 രൂപ.  

പിറന്നുവീണ കുഞ്ഞുങ്ങള്‍ക്ക് അന്നുതന്നെ ആധാര്‍ എന്റോള്‍മെന്റ്. മലപ്പുറം സഹകരണ ആശുപത്രിയില്‍ ഇന്നലെ ജനിച്ച കുഞ്ഞുങ്ങള്‍ക്കാണ് അക്ഷയ ജില്ലാ പ്രൊജക്ട് ഓഫീസിന്റെ നേതൃത്വത്തില്‍ ആധാര്‍ എന്റോള്‍മെന്റ് നടത്തിയത്. അഞ്ച് വയസ്സിന് താഴെയുള്ള എല്ലാ കുട്ടികള്‍ക്കും ആധാര്‍ ലഭ്യമാക്കുക എന്ന ലക്ഷ്യത്തോടെയാണ് അക്ഷയ ദിനമായ ഇന്നലെ (നവംബര്‍ 18) പരിപാടി സംഘടിപ്പിച്ചത്.

സംസ്ഥാന പിന്നോക്ക വിഭാഗ വികസന കോര്‍പ്പറേഷന്‍ പ്ലസ് ടു പരീക്ഷയില്‍ മുഴുവന്‍ വിഷയങ്ങള്‍ക്കും എ പ്ലസ് ലഭിച്ച ഒ.ബി.സി വിദ്യാര്‍ത്ഥികള്‍ക്കുള്ള സ്‌കോളര്‍ഷിപ്പ് വിതരണവും ലഘു വായ്പാ പദ്ധതിയില്‍ കുഴിമണ്ണ പഞ്ചായത്ത് സി.ഡി.എസിന് അനുവദിച്ച വായ്പ വിതരണവും മലപ്പുറം ഗവ.കോളേജ് ഓഡിറ്റോറിയത്തില്‍ നടന്നു. കോര്‍പ്പറേഷന്‍ നടപ്പിലാക്കുന്ന വിവിധ പദ്ധതികളെ കുറിച്ചുള്ള ബോധവല്ക്കരണ ക്ലാസ്സും നടത്തി.
5000 രൂപവീതമുള്ള സ്‌കോളര്‍ഷിപ്പ് 312 വിദ്യാര്‍ത്ഥികള്‍ക്ക് വിതരണം ചെയ്തു. 22 അയല്‍ക്കൂട്ടങ്ങളിലായി 112 കുടുംബങ്ങള്‍ക്ക് ലഘുവായ്പയുടെ പ്രയോജനം ലഭിക്കും.

    പിന്നാക്ക വിഭാഗ  വികസന  വകുപ്പ്  നടപ്പാക്കുന്ന പരമ്പരാഗത  കരകൗശല  വിദഗ്ദ്ധര്‍ക്ക്  പണിയായുധങ്ങള്‍ക്കുള്ള    ധനസഹായ പദ്ധതിയുടെ  ജില്ലയിലെ അപേക്ഷകരുടെ മുന്‍ഗണനാ ലിസ്റ്റ്  പ്രസിദ്ധീകരിച്ചിട്ടുണ്ട്.  ംംം.യരററ.സലൃമഹമ.ഴീ്.ശി  എന്ന വെബ്‌സൈറ്റില്‍ ലഭ്യമാകും.  ആക്ഷേപങ്ങള്‍ 15 ദിവസത്തിനകം മേഖലാ ഡപ്യൂട്ടി ഡയറക്ടര്‍, പിന്നാക്ക വിഭാഗ വികസന വകുപ്പ്, കോഴിക്കോട് സിവില്‍സ്റ്റേഷന്‍ (പി.ഒ), കോഴിക്കോട്-673020 എന്ന വിലാസത്തില്‍ രേഖാമൂലം അറിയിക്കണം.

    പട്ടികജാതി വികസന വകുപ്പ് നടപ്പിലാക്കി വരുന്ന കേന്ദ്രാവിഷ്‌കൃത പദ്ധതികളുടെ ഡി.ബി.ടി.എസ് രണ്ട് മുഖേനയുള്ള ആനുകൂല്യ വിതരണം കുറ്റമറ്റ രീതിയില്‍ നടപ്പിലാക്കുന്നതിന് ജില്ലാ പട്ടികജാതി വികസന ഓഫീസില്‍ ആറ് മാസത്തേക്ക് താല്‍ക്കാലികമായി സപ്പോര്‍ട്ടിങ് എന്‍ജിനിയറെ നിയമിക്കുന്നു.  ബി.ടെക് ബിരുദം (കംപ്യൂട്ടര്‍ സയന്‍സ്/ഐ.ടി) എം.സി.എ/എം.എസ്.സി.ഐ.ടി/ എം.എസ്.സി കംപ്യൂട്ടര്‍ സയന്‍സ് യോഗ്യതയുള്ള 20നും 30നും ഇടയില്‍ പ്രായമുള്ളവര്‍ക്ക് അപേക്ഷിക്കാം.