മൃഗസംരക്ഷണ വകുപ്പിന്‍റെ ആഭിമുഖ്യത്തില്‍ മൃഗസംരക്ഷണ പരിശീലന കേന്ദ്രത്തില്‍ ഡിസംബര്‍ 27 മുതല്‍ 29 തിയതി വരെ പശു വളര്‍ത്തലില്‍ ത്രിദിന സൗജന്യ പരിശീലനം നടത്തുന്നു. താല്‍പ്പര്യമുളളവര്‍ നേരിട്ടോ 0491-2815454, 8281777080 നമ്പറുകളിലോ രജിസ്റ്റര്‍ ചെയ്യണം. രജിസ്റ്റര്‍ ചെയ്തവര്‍ ആധാര്‍ നമ്പറുമായി 27 ന് രാവിലെ 10 ന് മുമ്പ് മലമ്പുഴ മൃഗസംരക്ഷണ പരിശീലന കേന്ദ്രത്തില്‍ എത്തണം.

മഹാകവി മൊയിന്‍കുട്ടി വൈദ്യരുടെ ചരമ വാര്‍ഷികത്തില്‍ സംഘടിപ്പിക്കുന്ന വൈദ്യര്‍ മഹോത്സവത്തിന് തിരുവനന്തപുരം മാനവീയം വീഥിയില്‍ തുടക്കമായി. മുന്‍ സാംസ്‌ക്കാരിക വകുപ്പു മന്ത്രി എം.എ. ബേബി ഉദ്ഘാടനം നിര്‍വ്വഹിച്ചു. മാനവീയം ഇശലിമ്പം എന്ന പേരില്‍ കോട്ടയം ജില്ലയിലെ ഈരാറ്റുപേട്ടയില്‍ 25 നും എറണാകുളം പെരുമ്പാവൂരില്‍ 26 നും പരിപാടികള്‍ അവതരിപ്പിച്ച്  27 ന് കൊണ്ടോട്ടിയിലെത്തും. വൈദ്യര്‍ മാപ്പിള കലാ അക്കാദമി ചെയര്‍മാന്‍ ടി.കെ ഹംസ ഉദ്ഘാടന ചടങ്ങില്‍ അധ്യക്ഷനായിരുന്നു. ബഹുസ്വരതയുടെ നാനാര്‍ത്ഥങ്ങള്‍ എന്ന വിഷയത്തില്‍ എം.എ. ബേബി പ്രഭാഷണം നടത്തി.

കൊച്ചി: തീരപരിപാലന നിയമവുമായി ബന്ധപ്പെട്ട് തദ്ദേശ സ്ഥാപനങ്ങളില്‍ തീരുമാനമാകാത്ത കെട്ടിട നിര്‍മാണ അപേക്ഷകള്‍ക്കായി പ്രത്യേക അദാലത്ത് സംഘടിപ്പിക്കുമെന്ന് തദ്ദേശ സ്വയംഭരണ വകുപ്പ് മന്ത്രി കെ.ടി. ജലീല്‍ അറിയിച്ചു. 2008ന് മുമ്പ് നികത്തിയതും ഡാറ്റാബാങ്കില്‍ ഉള്‍പ്പെടാത്തതുമായ സ്ഥലത്ത് സര്‍ക്കാരിന്റെ സഹായത്തോടെയുള്ള പദ്ധതികള്‍ വഴി ഭവന നിര്‍മാണം നടത്തുന്നതിന് തദ്ദേശ സ്ഥാപന സെക്രട്ടറിമാരുടെ അനുമതി മതി. താല്‍ക്കാലിക നമ്പര്‍ ലഭിച്ച വീടുകള്‍ക്ക് ഗ്യാസ്, വൈദ്യുതി കണക്ഷനുകള്‍ ലഭിക്കുന്നതിനുള്ള തടസം നീക്കുമെന്നും മന്ത്രി വ്യക്തമാക്കി.

*വിവിധ മത്സരങ്ങള്‍ സംഘടിപ്പിക്കും 

** സ്റ്റാളുകള്‍ക്കുള്ള അപേക്ഷ 29 വൈകിട്ട് മൂന്നുവരെ സ്വീകരിക്കും

സംസ്ഥാന സര്‍ക്കാര്‍ സംഘടിപ്പിക്കുന്ന ലോക കേരള സഭയോടനുബന്ധിച്ച്  വിനോദ സഞ്ചാര വകുപ്പിന്റേയും കൃഷി വകുപ്പിന്റേയും ആഭിമുഖ്യത്തില്‍ 2018 ജനുവരി 7 മുതല്‍ 14 വരെ  വസന്തോത്സവം  സംഘടിപ്പിക്കും.  

സ്‌കൂള്‍തലത്തില്‍ നടപ്പിലാക്കിവരുന്ന മികച്ച വിദ്യാഭ്യാസ മാതൃകകള്‍ കണ്ടെത്തി അംഗീകരിക്കാനും രേഖപ്പെടുത്തി വ്യാപിപ്പിക്കുന്നതിനും സംസ്ഥാന വിദ്യാഭ്യാസ ഗവേഷണ പരിശീലന സമിതി (എസ്.സി.ഇ.ആര്‍.ടി) പദ്ധതി ആവിഷ്‌കരിച്ചു. പ്രീ-പ്രൈമറി മുതല്‍ ഹയര്‍ സെക്കണ്ടറി വരെയുള്ള സ്ഥാപനങ്ങള്‍ക്കും അധ്യാപക വിദ്യാഭ്യാസ സ്ഥാപനങ്ങള്‍ക്കും അവര്‍ നടപ്പിലാക്കിയതോ നടപ്പിലാക്കിവരുന്നതോ ആയ പദ്ധതികള്‍ ഇതില്‍ ഉള്‍പ്പെടുത്താം. വിദ്യാഭ്യാസ ഗുണമേന്മ വര്‍ദ്ധിപ്പിക്കല്‍, അക്കാദമിക മികവ്, വിലയിരുത്തല്‍ തുടങ്ങിയവയിലെ  മികച്ച മാതൃകകളാണ് എസ്.സി.ഇ.ആര്‍.ടി അന്വേഷിക്കുന്നത്.

ഓഖി ചുഴലിക്കാറ്റില്‍ ദുരിതമനുഭവിക്കുന്നവര്‍ക്ക് സഹായം ലഭിക്കുന്നതിന് മുഖ്യമന്ത്രിയുടെ ദുരിതാശ്വാസനിധിയിലേക്ക് കേരള സ്റ്റേറ്റ് സ്‌പോര്‍ട്‌സ് കൗണ്‍സിലിലെ ജീവനക്കാര്‍ സര്‍ക്കാര്‍ നിര്‍ദേശപ്രകാരമുള്ള തുക നല്‍കുമെന്ന് സംസ്ഥാന സ്‌പോര്‍ട്‌സ് കൗണ്‍സില്‍ പ്രസിഡന്റ് ടി.പി. ദാസന്‍ അറിയിച്ചു. ജീവനക്കാരെ കൂടാതെ കൗണ്‍സില്‍ അംഗീകരിച്ചിട്ടുള്ള എല്ലാ സംസ്ഥാന സ്‌പോര്‍ട്‌സ് അസോസിയേഷനുകളും 5000 രൂപയില്‍ കുറയാത്ത തുകയും ജില്ലാ സ്‌പോര്‍ട്‌സ് അസോസിയേഷനുകള്‍ 1000 രൂപയില്‍ കുറയാത്ത തുകയും നല്‍കാന്‍ സന്നദ്ധത പ്രകടിപ്പിച്ചിട്ടുണ്ട്.

മുഖ്യമന്ത്രിയുടെ ദുരിതാശ്വാസ നിധിയിലേക്ക് തുറമുഖ-മ്യൂസിയം വകുപ്പ് മന്ത്രി രാമചന്ദ്രന്‍ കടന്നപ്പള്ളിയുടെ പേഴ്‌സണല്‍ സ്റ്റാഫ് അംഗങ്ങള്‍ ഒരു ലക്ഷം രൂപ മുഖ്യമന്ത്രി പിണറായി വിജയന് കൈമാറി. ഇന്ത്യന്‍ മെഡിക്കല്‍ അസോസിയേഷന്‍ അഞ്ചു ലക്ഷം രൂപ ദുരിതാശ്വാസ നിധിയിലേക്ക് നല്‍കി.  

പി.എന്‍.എക്‌സ്.5512/17

കൊച്ചി: നമ്മള്‍ ജനങ്ങള്‍ എന്ന വിഷയത്തില്‍ കേരള ശാസ്ത്രസാഹിത്യ പരിഷത്തും കരുമാലൂര്‍, ആലങ്ങാട്, കുന്നുകര ഗ്രാമപഞ്ചായത്തുകളിലെ വിവിധ വായനശാലകള്‍, സാംസ്‌കാരിക സംഘടനകള്‍ എന്നിവരുമായിച്ചേര്‍ന്ന് സംഘടിപ്പിക്കുന്ന 'ജനോല്‍സവം സാംസ്‌കാരിക പാഠശാല' ഇന്ന് (ഡിസംബര്‍ 24) രാവിലെ 10.00 മുതല്‍ വൈകീട്ട് 4.30 വരെ ആലങ്ങാട് കെഇഎം ഹൈസ്‌കൂളില്‍ നടക്കും. ഇതോടനുബന്ധിച്ച് ജനോല്‍സവം 2018 ന്റെ സ്വാഗത സംഘം രൂപീകരണവും നടക്കും. കൂടുതല്‍ വിവരങ്ങള്‍ക്ക് ബന്ധപ്പെടുക -9995339150

കൊച്ചി: വാര്‍ധക്യത്തില്‍ ഒറ്റപ്പെട്ടവര്‍ക്ക് ക്രിസ്മസ് സമ്മാനവുമായെത്തി നന്മയുടെ സന്ദേശം പ്രചരിപ്പിക്കുകയാണ് പട്ടികജാതി വികസന വകുപ്പിനു കീഴിലുള്ള എറണാകുളം ഗവ. പോസ്റ്റ് മെട്രിക്ക് ഹോസ്റ്റല്‍ ഫോര്‍ ബോയ്‌സിലെ വിദ്യാര്‍ഥികള്‍. ഹോസ്റ്റലിലെ 47 ഓളം വരുന്ന വിദ്യാര്‍ഥികള്‍ ചേര്‍ന്ന് സാമൂഹ്യനീതി വകുപ്പിനു കീഴിലുള്ള തേവര ഓള്‍ഡ് ഏജ് ഹോമിലെ അന്തേവാസികള്‍ക്ക് വാട്ടര്‍ പ്യൂരിഫയര്‍ സമ്മാനിച്ചിരിക്കുകയാണ്. ഹോസ്റ്റല്‍ അടയ്ക്കുമ്പോള്‍ വീട്ടില്‍ പോകുവാനായി വകുപ്പ് നല്‍കുന്ന യാത്രബത്ത, ഡിഎ തുകകള്‍ സ്വരൂപിച്ചാണ് ഇവര്‍ വാട്ടര്‍ പ്യൂരിഫയര്‍ വാങ്ങി നല്‍കുന്നത്.