തൃശൂര്‍ സര്‍ക്കാര്‍ ദന്തല്‍ കോളേജില്‍ പുതുതായി മൂന്ന് തസ്തികകള്‍ സൃഷ്ടിച്ചതായി ആരോഗ്യ വകുപ്പ് മന്ത്രി കെ.കെ. ശൈലജ ടീച്ചര്‍ അറിയിച്ചു. നാലാം വര്‍ഷ ബി.ഡി.എസ്. കോഴ്‌സിനായി ഓര്‍ത്തോഡോണ്ടിക്‌സ് വിഭാഗത്തില്‍ ഒരു പ്രൊഫസര്‍ തസ്തികയും പ്രോസ്‌തോഡോണ്ടിക്‌സ്, ഓറല്‍ പത്തോളജി എന്നീ വിഭാഗങ്ങളിലായി ഓരോ അസോസിയേറ്റ് പ്രൊഫസര്‍ തസ്തികയുമാണ് സൃഷ്ടിച്ചത്.

പി.എന്‍.എക്‌സ്.5314/17

   സംസ്ഥാന വനിതാ വികസന കോര്‍പ്പറേഷന്‍, സംസ്ഥാനത്തെ 10 കേന്ദ്രങ്ങളിലായി 18നും 55നും മദ്ധ്യേ പ്രായമുള്ള വിധവകള്‍ക്ക്  ജില്ലതോറും സംരംഭകത്വ വികസന പരിശീലന പരിപാടികള്‍ ആരംഭിക്കുന്നു. 40 വയസ്സിനുമേല്‍ പ്രായമുള്ള അവിവാഹിതകള്‍, വിവാഹമോചിതര്‍, അവിവാഹിതരായ അമ്മമാര്‍ എന്നിവര്‍ക്കും അപേക്ഷിക്കാം. മൂന്ന് ദിവസത്തെ പരിശീലന പരിപാടിയില്‍ ആദ്യം രജിസ്റ്റര്‍ ചെയ്യുന്ന യോഗ്യരായ 30 പേരെ പരിശീലനത്തിനായി തെരഞ്ഞെടുക്കും.

   പരമ്പരാഗത കളിമണ്‍പാത്രനിര്‍മ്മാണ തൊഴിലാളികള്‍ക്ക് ഉപകരണങ്ങള്‍ ഉണ്ടാക്കുന്നതിനുളള കളിമണ്ണ് ലഭ്യമാക്കുന്നതിന്റെ ആവശ്യത്തിലേക്കായി തിരിച്ചറിയല്‍ കാര്‍ഡ് വിതരണം ചെയ്യും. കാസര്‍കോട് ബ്ലോക്ക് പഞ്ചായത്ത് പരിധിയില്‍ വരുന്ന കുമ്പള, മൊഗ്രാല്‍ പുത്തൂര്‍, ചെങ്കള, ചെമ്മനാട്, ബദിയടുക്ക, മധൂര്‍ എന്നീ പഞ്ചായത്തുകളില്‍ പ്രവര്‍ത്തിക്കുന്ന  വില്ലേജ് എക്സ്റ്റന്‍ഷന്‍ ഓഫീസുകളില്‍ അപേക്ഷ നല്‍കണം. അപേക്ഷാഫോറം ബന്ധപ്പെട്ട വില്ലേജ് എക്സ്റ്റന്‍ഷന്‍ ഓഫീസില്‍ ലഭിക്കും. അപേക്ഷയോടൊപ്പം രണ്ട് പാസ്‌പോര്‍ട്ട് സൈസ് ഫോട്ടോയും  സമര്‍പ്പിക്കണം.  അപേക്ഷ സമര്‍പ്പിക്കേണ്ട അവസാന തീയ്യതി ഈ മാസം 31.

  കാസര്‍കോട് പുലിക്കുന്നിലെ  ദേശീയപാത സ്ഥലം ഏറ്റെടുക്കല്‍ വിഭാഗം  സ്‌പെഷ്യല്‍ തഹസില്‍ദാരുടെ  ഓഫീസ്  അണങ്കൂര്‍ ഗവ. ആയുര്‍വ്വേദ ആശുപത്രിക്ക് വടക്ക് ഭാഗത്ത് പഴയ നാഷണല്‍ ഹൈവേക്ക് സമീപമുളള കെട്ടിടത്തിന്റെ ഒന്നാമത്തെ നിലയിലേക്ക്  മാറ്റി. വിലാസം സ്‌പെഷ്യല്‍ തഹസില്‍ദാരുടെ ഓഫീസ്, എല്‍ എ (എന്‍ എച്ച്) യൂണിറ്റ് 1, കാപ്പി വളപ്പ് റോഡ്, അണങ്കൂര്‍,  കാസര്‍കോട്.

   കുടുംബശ്രീ ജില്ലാമിഷന്റെയും കാഞ്ഞങ്ങാട് മുനിസിപ്പാലിറ്റിയുടെയും സംയുക്താഭിമുഖ്യത്തില്‍ ഈ മാസം  20 മുതല്‍ ആരംഭിക്കുന്ന ഫുഡ്‌ഫെസ്റ്റ് 2017 ന് ആവശ്യമായ  പന്തല്‍, സ്റ്റേജ്, ലൈറ്റ് ആന്റ് സൗണ്ട് അനുബന്ധസൗകര്യങ്ങള്‍ ഒരുക്കുന്നതിന്  ക്വട്ടേഷന്‍ ക്ഷണിച്ചു. ക്വട്ടേഷനുകള്‍ ഈ മാസം   16 ന് നാലുമണിക്കകം കുടുംബശ്രീ ജില്ലാമിഷന്‍ ഓഫീസില്‍  ലഭിക്കണം.  ഫോണ്‍ 04994 256111, 256102.

    അജാനൂര്‍ കുടുംബശ്രീ സി ഡി എസ്സിന്റെ നേതൃത്വത്തില്‍ അന്നം അമൃതം എന്ന പേരില്‍ നാടന്‍ കുത്തരി വിപണിയിലിറക്കി. കുടുംബശ്രീ കാര്‍ഷീക വികസന പദ്ധതിയായ മഹിളാ കിസാന്‍ സശാക്തീകരണ പരിയോജനയുടെ ഭാഗമായാണ് അരി ബ്രാന്‍ഡിംഗ് ചെയ്തത്. സി ഡി എസ്സില്‍ രജിസ്റ്റര്‍ ചെയ്തു പ്രവര്‍ത്തിക്കുന്ന  66 മഹിളാ സംഘകൃഷി ഗ്രൂപ്പിന്റെ നേതൃത്വത്തിലാണ് 32 ഹെക്ടര്‍ സ്ഥലം കൃഷി ചെയ്തത്. നെല്ല് സി ഡി എസ്സിന്റെ നേതൃത്വത്തില്‍ സംഭരിച്ച് അരിയാക്കി.  രാസകീടനാശിനി പ്രയോഗങ്ങള്‍ ഒന്നും ഇല്ലാതെ സുരക്ഷിതമായ നാടന്‍ പച്ചരി, പുഴുക്കലരി, പ്രമേഹരോഗികള്‍ക്ക് പോലും ഉപയോഗിക്കാവുന്ന തവിടുകളയാത്ത അരിയും ലഭ്യമാണ്.

    ജില്ലയില്‍ സാമൂഹ്യദ്രോഹ പ്രവര്‍ത്തികളില്‍ ഏര്‍പ്പെട്ട ഏഴു പേരെ അറസ്റ്റ് ചെയ്തു. കോടതിയില്‍ ഹാജരാക്കിയ  ഇവരെ ജുഡീഷ്യല്‍ കസ്റ്റഡിയില്‍ റിമാന്‍ഡ് ചെയ്തു. ഇക്കഴിഞ്ഞ ആറിന് ജില്ലയില്‍ ചില സ്ഥലങ്ങളില്‍ വാഹനങ്ങള്‍ക്ക്  നേരെ കല്ലെറിഞ്ഞ സംഭവങ്ങള്‍ ഉണ്ടായിരുന്നു. ഇത്തരം സാമൂഹ്യ ദ്രോഹ പ്രവര്‍ത്തികളില്‍ ഏര്‍പ്പെട്ടവര്‍ക്കര്‍ക്കെതിരെ ക്രിമിനല്‍ കേസുകള്‍ റജിസ്റ്റര്‍ ചെയ്തിട്ടുണ്ട്. ഇതുമായി ബന്ധപ്പെട്ട് പോലീസ് നടത്തിയ പരിശോധനയിലാണ് ഏഴുപേര്‍ പിടിയിലായത്. 

കാക്കനാട്: വോട്ടര്‍ പട്ടിക പുതുക്കുന്നതുമായി ബന്ധപ്പെട്ട അവലോകന യോഗം തിരഞ്ഞെടുപ്പ് നിരീക്ഷക സാംസ്‌കാരിക വകുപ്പ് സെക്രട്ടറി റാണി ജോര്‍ജിന്റെ അധ്യക്ഷതയില്‍ കളക്ട്രേറ്റ് സ്പാര്‍ക്ക് ഹാളില്‍ ചേര്‍ന്നു. ബൂത്ത് ലെവല്‍ ഓഫീസര്‍മാരുടെ ഗൃഹസന്ദര്‍ശനം ഡിസംബര്‍ 15 നകം പൂര്‍ത്തീകരിക്കുമെന്ന് സെക്രട്ടറി അറിയിച്ചു. വോട്ടര്‍ പട്ടിക പുതുക്കുന്നതുമായി ബന്ധപ്പെട്ട് രാഷ്ട്രീയ പാര്‍ട്ടി പ്രതിനിധികളുടെ യോഗം സംഘടിപ്പിക്കണമെന്ന് തിരഞ്ഞെടുപ്പ് കമ്മീഷന്റെ നിര്‍ദേശിച്ചിരുന്നു.

കേരള മോട്ടോര്‍ തൊഴിലാളി ക്ഷേമനിധി ബോര്‍ഡിലേക്ക് അടയ്ക്കാനുള്ള ഉടമാവിഹിതം സൗത്ത് ഇന്ത്യന്‍ ബാങ്കിന്റെ സംസ്ഥാനത്തെ എല്ലാ ശാഖകള്‍ വഴിയും സ്വീകരിക്കും. ഈ സൗകര്യം എല്ലാ ഉടമകളും ഉപയോഗിക്കണമെന്ന് ജില്ലാ എക്‌സിക്യൂട്ടീവ് ഓഫിസര്‍ അറിയിച്ചു