ആലപ്പുഴ: ഓഗസ്റ്റ് 10-ന് പുന്നമടക്കായലിൽ നടക്കുന്ന 70-ാമത് നെഹ്‌റു ട്രോഫി വള്ളംകളിയുടെ ആവേശഗാനം 'എടാ മോനെ വരുന്നോടാ മോനെ' എൻ.ടി.ബി.ആർ. സെക്രട്ടറിയായ സബ് കളക്ടർ സമീർ കിഷൻ ആലപ്പുഴ മുനിസിപ്പൽ ചെയർപേഴ്സൺ കെ.കെ. ജയമ്മയ്ക്ക് നൽകി പ്രകാശനം ചെയ്തു. ആലപ്പുഴ റവന്യു ഡിവിഷണൽ ഓഫീസിൽ നടന്ന ചടങ്ങിൽ  നഗരസഭ സ്ഥിരം സമിതി അധ്യക്ഷൻ എം.ആർ. പ്രേം, ഗാനത്തിന്റെ അണിയറ പ്രവർത്തകർ തുടങ്ങിയവർ പങ്കെടുത്തു. എൻ.കെ. കാർത്തിക് അമ്പലപ്പുഴ രചിച്ച പാട്ട് ബാബു നാരായണനാണ് സംഗീത നൽകിയത്. അൻവർ സാദത്താണ് പാടിയത്.

ആലപ്പുഴ: അമ്പലപ്പുഴ-ഹരിപ്പാട് റെയില്‍വെ സ്റ്റേഷനുകള്‍ക്കിടയിലുള്ള ലെവല്‍ ക്രോസ് നമ്പര്‍ 108 (കരുവാറ്റ തെക്കെ ഗേറ്റ്) ജൂലൈ 18-ന് രാവിലെ ആറ് മുതല്‍ വൈകുന്നേരം ആറ് വരെ അറ്റകുറ്റ പണികള്‍ക്കായി അടച്ചിടും.

ആലപ്പുഴ: ഫാര്‍മര്‍ പ്രൊഡ്യൂസര്‍ ഓര്‍ഗനൈസേഷന്‍(എഫ്.പി.ഒ.) അംഗങ്ങള്‍ക്ക് വിവിധ വിഷയങ്ങളില്‍ ബോധവത്കരണ ക്ലാസ് നല്‍കുന്നു. ജൂലൈ 20-ന് പകല്‍ 10 മണിക്ക് സ്റ്റേറ്റ് കൊയര്‍ മെഷീനറി മാനുഫാക്ചറിംഗ് ലിമിറ്റഡിന്റെ ചുങ്കത്തുള്ള ഹാളില്‍ സംഘടിപ്പിക്കുന്ന പരിപാടി കൃഷി വകുപ്പ് മന്ത്രി പി. പ്രസാദ് ഉദ്ഘാടനം ചെയ്യും. 10000 എഫ്.പി.ഒ. സാച്ചുറേഷന്‍ ഡ്രൈവിന്റെ ഭാഗമായി നടക്കുന്ന പരിപാടിയില്‍ ജില്ല കളക്ടര്‍ അലക്‌സ് വര്‍ഗീസ് അധ്യക്ഷനാകും.

ആലപ്പുഴ: വനിത ശിശുവികസനവകുപ്പിനു കീഴില്‍ മാവേലിക്കര ഐ.സി.ഡി.എസ്. പ്രോജക്ട് ഓഫീസിലെ ആവശ്യത്തിനായി 2024 ഓഗസ്റ്റ് ഒന്നു മുതല്‍ 2025 ജൂലൈ 31 വരെ ഒരു വര്‍ഷത്തേക്ക് കാര്‍/ജീപ്പ് (എ.സി) പ്രതിമാസ വാടകയ്ക്ക് നല്‍കാന്‍ താത്പര്യമുള്ള വാഹന ഉടമകളില്‍ നിന്നും മുദ്രവെച്ച ടെന്‍ഡറുകള്‍ ക്ഷണിച്ചു. ജൂലൈ 24-ന് പകല്‍ 12 മണിവരെ ടെന്‍ഡര്‍ സ്വീകരിക്കും.

ആലപ്പുഴ: 50 ശതമാനമോ അതില്‍ കൂടുതലോ തീവ്ര ശാരീരിക മാനസിക വെല്ലുവിളി നേരിടുന്ന മക്കളെ ഒറ്റയ്ക്ക് സംരക്ഷുന്ന ബി.പി.എല്‍. കുടുംബങ്ങളിലെ മാതാവ്/പിതാവ്/അടുത്ത ബന്ധുവിന് സ്വയം തൊഴില്‍ കണ്ടെത്താന്‍ സാമ്പത്തിക സഹായം നല്‍കുന്ന സ്വാശ്രയ പദ്ധതിയിലേക്ക് അപേക്ഷ ക്ഷണിച്ചു. ഒന്നില്‍ കൂടുതല്‍ ഭിന്നശേഷിക്കാരുള്ള കുടുംബമാണെങ്കില്‍ ഭിന്നശേഷി ശതമാനം 40 ആണെങ്കിലും പരിഗണിക്കും.

മലപ്പുറം ജില്ലയിൽ മൂന്ന് മലമ്പനി കേസുകൾ സ്ഥിരീകരിച്ച സാഹചര്യത്തിൽ പൊതുജനങ്ങൾ ജാഗ്രത പാലിക്കണമെന്ന് ജില്ലാ മെഡിക്കൽ ഓഫീസർ ഡോ. ആർ രേണുക അറിയിച്ചു.  പൊന്നാനിയിൽ ഒരു മലമ്പനി കേസ് കണ്ടെത്തിയതിന്റെ അടിസ്ഥാനത്തിൽ ആരോഗ്യ പ്രവർത്തകർ  പ്രദേശത്ത് ഗൃഹസന്ദർശന സർവ്വേ നടത്തുകയും,  രക്തസാമ്പിളുകൾ ശേഖരിക്കുകയും ചെയ്തിരുന്നു. ഇതിൽവീണ്ടും രണ്ട്  മലമ്പനി കേസുകൾ  കണ്ടെത്തുകയും രോഗം  സ്ഥിരീകരിക്കുകയും ചെയ്തു. ഇതോട് കൂടി പൊന്നാനിയിൽ മൂന്ന് മലമ്പനി കേസുകളാണ് സ്ഥിരീകരിച്ചിട്ടുള്ളത്.