ശക്തമായ മഴയിൽ കഴിഞ്ഞ മൂന്നു ദിവസത്തിനിടെ മലപ്പുറം ജില്ലയില്‍ 46 വീടുകൾ ഭാഗിമായി തകർന്നു. പൂർണ ഭവനനാശം റിപ്പോർട്ട് ചെയ്യപ്പെട്ടിട്ടില്ല. ജില്ലയിൽ ദുരിതാശ്വാസ ക്യാമ്പുകളും തുറന്നിട്ടില്ല. 33 അംഗ എൻ.ഡി.ആർ.എഫ് സംഘം നിലമ്പൂരിൽ ക്യാമ്പ് ചെയ്യുന്നുണ്ട്.
ബുധനാഴ്ച (ജൂലൈ 17) രാവിലെ എട്ടു മണി വരെയുള്ള കണക്കുകള്‍ പ്രകാരം കഴിഞ്ഞ 24 മണിക്കൂറിനിടെ 11 വീടുകളാണ് ഭാഗികമായി തകര്‍ന്നത്. കഴിഞ്ഞ 24 മണിക്കൂറിൽ ജില്ലയിൽ ലഭിച്ച ശരാശരി മഴയുടെ അളവ് 27.95 എം.എം. ആണ്.

കനത്ത മഴയില്‍ കടലുണ്ടിപ്പുഴയില്‍ ക്രമാതീതമായി വെള്ളം ഉയര്‍ന്നതിനെ തുടര്‍ന്ന് വേങ്ങര പഞ്ചായത്തിലെ ബാക്കിക്കയം റഗുലേറ്ററിന്റെ മുഴുവന്‍ ഷട്ടറുകളും പൂര്‍ണമായി തുറന്നു. നിലവിലെ ജലനിരപ്പ് 6.10 മീറ്ററാണ്. റഗുലേറ്ററിന്റെ മുന്നറിയിപ്പ് ലെവല്‍ 5.8 മീറ്ററും അപകട ലെവല്‍ 6.8 മീറ്ററുമാണ്. ഇരുകരകളിലും താമസിക്കുന്നവര്‍ ജാഗ്രത പുലര്‍ത്തണമെന്ന് ജില്ലാ കളക്ടര്‍ അറിയിച്ചു.

ആരാധനാലയം നിര്‍മിക്കാന്‍ എന്‍.ഒ.സി അനുവദിച്ച ശേഷം കെട്ടിട നിര്‍മാണ പെര്‍മിറ്റ് അനുവദിച്ചില്ലെന്ന പരാതിയില്‍ സംഭവവുമായി ബന്ധപ്പെട്ട എല്ലാ രേഖകളുമായി കമ്മീഷന്‍ ആസ്ഥാനത്ത് ഹാജരാവാന്‍ ഗ്രാമപഞ്ചായത്ത് സെക്രട്ടറിക്ക് സംസ്ഥാന ന്യൂനപക്ഷ കമ്മീഷന്റെ നിര്‍ദ്ദേശം. കമ്മീഷന്‍ അംഗം എ. സൈഫുദ്ദീന്‍ ഹാജിയുടെ അധ്യക്ഷതയില്‍ ഇന്നലെ (ജൂലൈ 17) മലപ്പുറം കളക്ടറേറ്റ് കോണ്‍ഫ്രന്‍സ് ഹാളില്‍ നടന്ന സിറ്റിങിലാണ് നിര്‍ദ്ദേശം. മമ്പുറം വി.കെ പടി ഇശാഅത്തുല്‍ ഉലൂം സംഘം സെക്രട്ടറി നല്‍കിയ പരാതി‌യില്‍ എ.ആര്‍ നഗര്‍ ഗ്രാമപഞ്ചായത്ത് സെക്രട്ടറിക്കാണ് നിര്‍ദ്ദേശം നല്‍കിയിരിക്കുന്നത്.

ജില്ലയിലെ ടൂറിസം കേന്ദ്രങ്ങളെ പ്ലാസ്റ്റിക് മാലിന്യ മുക്തമാക്കുന്നതിനുള്ള മലപ്പുറം ജില്ലാ ഭരണകൂടത്തിന്റെ നടപടികളുടെ ഭാഗമായി ജില്ലാ അതിര്‍ത്തിയായ വഴിക്കടവ് പഞ്ചായത്തിലെ ആനമറിയില്‍ പ്ലാസ്റ്റിക് ചെക് പോസ്റ്റ് സ്ഥാപിച്ചു. നാടുകാണി ചുരത്തില്‍ പ്ലാസ്റ്റിക് മാലിന്യങ്ങള്‍ തള്ളുന്നത് തടയുകയാണ് ലക്ഷ്യം. വഴിക്കടവ് ഗ്രാമ പഞ്ചായത്ത് മുന്‍കയ്യെടുത്ത് സ്ഥാപിച്ച പ്ലാസ്റ്റിക് ചെക് പോസ്റ്റിന്റെ ഉദ്ഘാടനം ജില്ലാ കളക്ടര്‍ വി.ആര്‍ വിനോദ് നിര്‍വഹിച്ചു. ഗ്രാമപഞ്ചയാത്ത് പ്രസിഡന്റ് തങ്കമ്മ നെടുമ്പടി അധ്യക്ഷയായി.

ഊരകം എം.യു ഹയര്‍ സെക്കന്റിറി സ്കൂളിലേക്ക് സോഷ്യോളജി (എച്ച്.എസ്.എസ്.ടി ജൂനിയര്‍), പൊളിറ്റിക്കല്‍ സയന്‍സ് (എച്ച്.എസ്.എസ്.ടി ജൂനിയര്‍) വിഷയങ്ങളിലേക്ക് അതിഥി അധ്യാപകരെ നിയമിക്കുന്നു. ബന്ധപ്പെട്ട വിഷയത്തില്‍ ബിരുദാനന്തര ബിരുദം, ബി.എഡ്, സെറ്റ്/ എം.എഡ് എന്നിവയാണ് യോഗ്യത. കൂടുതല്‍ വിവരങ്ങള്‍ക്ക് ഫോണ്‍: 9400680907.

മലപ്പുറം ടൗൺ ബ്യൂട്ടിഫിക്കേഷൻ പദ്ധതികളുടെ  നിർവ്വഹണവുമായി ബന്ധപ്പെട്ട കാര്യങ്ങൾ ചർച്ച ചെയ്യാൻ പി. ഉബൈദുള്ള എം.എൽ.എ യുടെ അധ്യക്ഷതയിൽ യോഗം ചേർന്നു. മലപ്പുറം നഗരത്തിലെ പ്രധാന റോഡുകളിലും സിവിൽ സ്റ്റേഷൻ പരിസരത്തും  നടപ്പാതകൾ നിർമ്മിച്ച് ഇന്റര്‍ലോക്ക് വിരിക്കൽ, ഡിവൈഡറുകളിൽ പുൽത്തകിടിയും ലൈറ്റുകളും സ്ഥാപിക്കൽ, കൈവരി, പ്ലാന്റേഷൻ,  ലാന്റ്സ്കേപിങ്, ബസ് ബേകള്‍ സ്ഥാപിക്കല്‍, കിഴക്കേതല മുതൽ കളക്ടർ ബംഗ്ലാവ് വരെ പ്രധാന ജങ്ഷനുകളിൽ മിനി പാർക്കുകൾ, ആലുംകുണ്ട് ഇക്കോ ടൂറിസം ആന്റ് ബയോ ഡൈവേര്‍സിറ്റി പാര്‍ക്ക് എന്നീ പദ്ധതികള്‍ നടപ്പാക്കാനുള്ള നിര്‍ദ്ദേശങ്ങളാണ് യോഗത്തില്‍ ഉയര്‍ന്നത്.

വനിതകൾ ഗൃഹനാഥരായിട്ടുള്ള കുടുംബങ്ങളിലെ കുട്ടികൾക്കായി വനിതാ ശിശു വികസന വകുപ്പിന് കീഴില്‍ നടപ്പിലാക്കിവരുന്ന വിദ്യാധനം സ്കോളർഷിപ്പ് പദ്ധതിയിലേക്ക് അപേക്ഷ ക്ഷണിച്ചു. അപേക്ഷകള്‍ www.schemes.wcd.kerala.gov.in എന്ന വെബ്‍സൈറ്റ് വഴി ഓണ്‍ലൈന്‍ ആയാണ് സമര്‍പ്പിക്കേണ്ടത്. 2024 ഡിസംബര്‍ 15 വരെ അപേക്ഷ സ്വീകരിക്കും. കൂടുതല്‍ വിവരങ്ങള്‍ക്ക് ഫോണ്‍: 0483 2950084.

പെരിന്തൽമണ്ണ ഗവ പോളിടെക്‌നിക് കോളേജിൽ ലാറ്ററൽ എൻട്രി പ്രവേശനത്തിന് സിവിൽ ബ്രാഞ്ചിൽ ജനറൽ വിഭാഗത്തിൽ ഒരു ഒഴിവുണ്ട്.  സ്പോട്ട് അഡ്മിഷന്‍ ജൂലൈ 18 ന് രാവിലെ ഒമ്പതു മണിക്ക് നടക്കും. പ്ലസ്ടു/ വി.എച്ച്.എസ്. റാങ്ക് ലിസ്റ്റിൽ ഉൾപെട്ടവർക്ക് പങ്കെടുക്കാം. താത്പര്യമുള്ളവർ എല്ലാ ഒറിജിനൽ സർട്ടിഫിക്കറ്റുകളും,പ്രോസ്പെക്ടസിൽ നിർദ്ദേശിക്കുന്ന ഫീസും സഹിതം  കോളേജിൽ ഹാജരാവണം. ഫീസ് എ.ടി.എം കാർഡ് മുഖേന മാത്രമേ സ്വീകരിക്കൂ.

സംസ്ഥാന പട്ടിക ജാതി പട്ടിക വർഗ്ഗ വികസന കോർപ്പറേഷൻറെ മലപ്പുറം ജില്ലാ ഓഫീസിലേക്ക് ആറു മാസ കാലയളവിലേക്ക് ഡ്രൈവറോടു കൂടി പെർമിറ്റുള്ള വാഹനം ലഭ്യമാക്കുന്നതിന് താൽപ്പര്യമുള്ള വാഹന ഉടമകൾ/അംഗീകൃത സ്ഥാപനങ്ങളിൽ നിന്നും ക്വട്ടേഷന്‍ ക്ഷണിച്ചു. ജൂലൈ 22 വൈകീട്ട് അഞ്ചു മണിക്കുള്ളില്‍ ക്വട്ടേഷൻ സമർപ്പിക്കണം.  കൂടുതല്‍ വിവരങ്ങൾ മലപ്പുറം പെരിന്തല്‍മണ്ണ റോഡിലെ ആഷിഫ് ബില്‍ഡിങില്‍  പ്രവർത്തിക്കുന്ന മലപ്പുറം ജില്ലാ ഓഫീസില്‍ ലഭിക്കും. ഫോൺ : 0483-2731496, 9400068510.

 ഈവർഷത്തെ ഐ.ടി.ഐ. പ്രവേശനത്തിനായി ഓൺലൈൻ അപേക്ഷ സമർപ്പിക്കുകയും ഫീസ് ഒടുക്കാത്തവരുമായ അപേക്ഷകർക്ക് ഫീസ് ഒടുക്കുന്നതിനും സമീപത്തുളള സർക്കാർ ഐ.ടി.ഐകളിൽ അസ്സൽ രേഖകളുമായി നേരിട്ടെത്തി   വെരിഫിക്കേഷൻ പൂർത്തിയാക്കുന്നതിനും ഇന്ന് (ജൂലൈ 18) കൂടി അവസരം ഉണ്ടായിരിക്കുമെന്ന് അരീക്കോട് ഗവ. ഐ.ടി.ഐ പ്രിന്‍സിപ്പല്‍ അറിയിച്ചു.