ഉന്നതികളിലെ അടിസ്ഥാന സൗകര്യ വികസനത്തിനും പ്രശ്‌നപരിഹാരത്തിനും ഉയര്‍ന്ന പരിഗണന നല്‍കുമെന്ന് വനം വകുപ്പ് മന്ത്രി ഷിബു ബേബി ജോണ്‍. നെടുങ്കയം ഉന്നതിയിലെ അങ്കണവാടിയും കമ്മ്യൂണിറ്റി ഹാളും മറ്റൊരു സ്ഥലത്തേക്ക് മാറ്റി സ്ഥലപരിമിതി പരിഹരിക്കാന്‍ ശ്രമിക്കുമെന്നും മന്ത്രി പറഞ്ഞു. നെടുങ്കയം ഉന്നതിയില്‍ സന്ദര്‍ശനത്തിനെത്തിയ മന്ത്രിയുടെ മുമ്പാകെ ഉന്നതിയിലെ കുടുംബങ്ങള്‍ ഉന്നയിച്ച മിക്ക പരാതികളും പരിഹരിക്കാന്‍ മന്ത്രി നിര്‍ദ്ദേശം നല്‍കി

സൈനികർ, വിമുക്തഭടന്മാർ, വിമുക്തഭട വിധവകൾ എന്നിവർക്ക് സൗജന്യമായി നിയമസഹായം നൽകാൻ കോട്ടയം ജില്ലാ ലീഗൽ സർവ്വീസസ് അതോറിറ്റിയുടെ ആഭിമുഖ്യത്തിൽ ലീഗൽ സർവ്വീസസ് ക്ലിനിക്കിന്റെ സൗജന്യസേവനം എല്ലാ മാസവും രണ്ടാം വെള്ളിയാഴ്ച മണർകാടുള്ള ജില്ലാ സൈനികക്ഷേമ ഓഫിസിൽ ലഭിക്കും.

കേന്ദ്ര-സംസ്ഥാന സർക്കാരുകൾ സംയുക്തമായി നടപ്പാക്കുന്ന കാലാവസ്ഥാധിഷ്ഠിത വിള ഇൻഷുറൻസ് പദ്ധതിയിൽ ഖാരിഫ് വിളകൾ ജൂലൈ 31 വരെ ഇൻഷുർ ചെയ്യാം. ഇൻഷുറൻസ് സൈറ്റ് (pmfby.gov.in), കോമൺ സർവ്വീസ് സെന്റർ, അക്ഷയ സെന്റർ, ലോൺ എടുക്കുന്ന ബാങ്ക് എന്നിവ വഴി ഇൻഷുർ ചെയ്യാം. കോട്ടയം ജില്ലയിൽ നെല്ല്, കവുങ്ങ്, വാഴ, വെറ്റില, കശുമാവ്, ഗ്രാമ്പൂ, കൊക്കോ, ഇഞ്ചി, കിഴങ്ങുവർഗ്ഗ പച്ചക്കറി എന്നീ വിളകൾ ഇൻഷുർ ചെയ്യാൻ സാധിക്കും. ആധാർ കാർഡ്, ബാങ്ക് പാസ്ബുക്ക്, കരം അടച്ച രസീത് എന്നിവയുമായി അതത് കൃഷിഭവനുമായി ബന്ധപ്പെട്ടാൽ ഇൻഷുറൻസ് ചെയ്യുന്നതിന് സഹായം ലഭ്യമാകും. ഫോൺ: 18004257064.

മുണ്ടേരി ഉള്‍വനത്തിലെ വാണിയമ്പുഴ ഉന്നതിയില്‍ പ്രീ പ്രൈമറി സ്‌കൂളിനും കമ്യൂണിറ്റി ഹാളിനും കരുളായി ഉള്‍വനത്തിലെ മുണ്ടക്കടവ് ഉന്നതിയില്‍ അങ്കണവാടിക്കും വനംവകുപ്പ് സ്ഥലം നല്‍കുമെന്ന് വനം മന്ത്രി ഷിബു ബേബി ജോണ്‍. പ്രളയത്തില്‍ വീടും സ്ഥലവും നഷ്ടമായി ഏഴു വര്‍ഷമായി മുണ്ടേരി വിത്തുകൃഷി തോട്ടത്തിലെ സ്റ്റാഫ് ക്വാര്‍ട്ടേഴ്സില്‍ കഴിയുന്ന തണ്ടന്‍കല്ല്  ഉന്നതിക്കാരെ പുനരധിവസിപ്പിക്കുമെന്നും മന്ത്രി പറഞ്ഞു. തണ്ടന്‍കല്ലുകാര്‍ മുമ്പ് താമസിച്ചിരുന്ന മുണ്ടേരി വനത്തിനുള്ളിലെ സ്ഥലം വാസയോഗ്യമാണെന്ന് ജിയോളജി വകുപ്പ് റിപ്പോര്‍ട്ട് നല്‍കിയാല്‍ ആ സ്ഥലം ഉടന്‍ കൈമാറും.

മലപ്പുറം ജില്ലയിലെ പോലീസ്, ഫയര്‍ ആന്‍ഡ് റെസ്‌ക്യൂ സര്‍വീസ് എന്നീ വകുപ്പുകളിലേക്ക് ഹോം ഗാര്‍ഡ് വിഭാഗത്തില്‍ ഒഴിവുള്ള തസ്തികകളിലേക്ക് യോഗ്യരായ സ്ത്രീ-പുരുഷ ഉദ്യോഗാര്‍ഥികളില്‍ നിന്നും അപേക്ഷ ക്ഷണിച്ചു. സൈനിക, അര്‍ധസൈനിക അല്ലെങ്കില്‍ സംസ്ഥാന സേനകളില്‍ നിന്ന് വിരമിച്ചവരും എസ്.എസ്.എല്‍.സിയും (അഭാവത്തില്‍ ഏഴാം ക്ലാസ്) നല്ല ശാരീരിക ക്ഷമതയുമുള്ള 35-നും 58-നും ഇടയില്‍ പ്രായമുള്ളവര്‍ക്ക് അപേക്ഷിക്കാം. പ്രതിദിനം 870 രൂപ വേതനവും (പ്രതിമാസം പരമാവധി 24,360 രൂപ) പ്രതിവര്‍ഷം 1500 രൂപ യൂണിഫോം അലവന്‍സും ലഭിക്കും.

സംസ്ഥാന സര്‍ക്കാരിന്റെ 100 ദിന കര്‍മ്മ പദ്ധതിയുടെ ഭാഗമായി കേരള സംസ്ഥാന പിന്നോക്ക വിഭാഗ വികസന കോര്‍പ്പറേഷന്‍ (കെ.എസ്.ബി.സി.ഡി.സി) മലപ്പുറം ജില്ലാ ഓഫീസ് സംഘടിപ്പിച്ച 'സമഗ്ര 2026' വായ്പാ വിതരണ മേളയുടെ ഉദ്ഘാടനം മുനിസിപ്പല്‍ വൈസ് ചെയര്‍പേഴ്സണ്‍ ജിതേഷ് ജി. അനില്‍ നിര്‍വ്വഹിച്ചു. വിവിധ പദ്ധതികളിലായി ആകെ 6.70 കോടി രൂപയുടെ വായ്പയാണ് മേളയില്‍ വിതരണം ചെയ്തത്. ഇതില്‍ ലഘുവായ്പാ പദ്ധതി പ്രകാരം വാഴക്കാട് സി.ഡി.എസിന് മൂന്ന് കോടി രൂപയും, കാവനൂര്‍ സി.ഡി.എസിന് 2.24 കോടി രൂപയും, വ്യക്തിഗത പദ്ധതികളില്‍ 1.55 കോടി രൂപയും ഉള്‍പ്പെടുന്നു. ഇതിലൂടെ 600-ല്‍ പരം ഗുണഭോക്താക്കള്‍ക്ക് പ്രയോജനം ലഭിക്കും.

പെരിന്തല്‍മണ്ണ സബ് റീജിയണല്‍ ട്രാന്‍സ്പോര്‍ട്ട് ഓഫീസ് നിലവില്‍ പ്രവര്‍ത്തിക്കുന്ന കെട്ടിടത്തില്‍ നിന്നും സൗകര്യപ്രദമായ മറ്റൊരു കെട്ടിടത്തിലേക്ക് മാറ്റുന്നതിന് ഉത്തരവായിട്ടുണ്ട്. ഇതിന്റെ ഭാഗമായി പെരിന്തല്‍മണ്ണ ടൗണില്‍ നിന്നും അഞ്ചു കിലോമീറ്റര്‍ ചുറ്റളവില്‍ 3500 മുതല്‍ 4000 ചതുരശ്ര അടി വരെ വിസ്തീര്‍ണ്ണമുള്ള കെട്ടിടം വിട്ടുനല്‍കാന്‍ താല്പര്യമുള്ള കെട്ടിട ഉടമകള്‍ പെരിന്തല്‍മണ്ണ ജോയിന്റ് റീജിയണല്‍ ട്രാന്‍സ്പോര്‍ട്ട് ഓഫീസറുമായി ബന്ധപ്പെടണം. ഫോണ്‍- 04933 220856, 8547639053, 9847227904.

ജൂലൈ മാസത്തെ സ്യൂട്ട് കോണ്‍ഫ്രന്‍സ് ജൂലൈ 31 ന് ഉച്ചയ്ക്ക ശേഷം മൂന്നിന് കളക്ടറേറ്റ് കേണ്‍ഫ്രന്‍സ് ഹാളില്‍ ചേരും. ജില്ലാ കളക്ടര്‍ എതിര്‍ കക്ഷിയായിട്ടുള്ള കേസുകള്‍ നിശ്ചിത പ്രഫോര്‍മയില്‍ ഉള്‍പ്പെടുത്തി ജൂലൈ 27 നകം suitcellmalappuram@gmail.com എന്ന വിലാസത്തില്‍ അയക്കണം.

പിന്നാക്ക വിഭാഗ വികസന വകുപ്പ് ഇ-ഗ്രാന്റ്‌സ് പോര്‍ട്ടല്‍ മുഖേന നടപ്പിലാക്കുന്ന ഒ.ഇ.സി, ഒ.ബി.സി (എച്ച്) പ്രീമെട്രിക് വിദ്യാഭ്യാസാനുകൂല്യ പദ്ധതി പ്രകാരം സ്‌കൂളുകളില്‍ നിന്നുള്ള ഡാറ്റാ എന്‍ട്രി തീയതി ജൂലൈ 27 വരെ ദീര്‍ഘിപ്പിച്ചു. ആനുകൂല്യത്തിന് അര്‍ഹരായ വിദ്യാര്‍ത്ഥികളുടെ വിവരങ്ങള്‍ സ്‌കൂള്‍ ലോഗിന്‍ വഴി www.egrantz.kerala.gov.in എന്ന വെബ്സൈറ്റില്‍ നിശ്ചിത തീയതിക്കകം രേഖപ്പെടുത്തണം. ഫോണ്‍- 0492 2222335, ഇമെയില്‍-bcddpkd@gmail.com.

2026-27 അധ്യയന വര്‍ഷത്തില്‍ ഓരോ ഉപജില്ലയിലെയും തെരഞ്ഞെടുത്ത സര്‍ക്കാര്‍ പ്രൈമറി സ്‌കൂളുകളില്‍ ഇംഗ്ലീഷ് എന്റിച്ച്മെന്റ് പ്രോഗ്രാം നടപ്പിലാക്കുന്നതിനായി ദിവസവേതനാടിസ്ഥാനത്തില്‍ റിസോഴ്സ് അധ്യാപകരെ തെരഞ്ഞെടുക്കുന്നു. ഇതിനായുള്ള അഭിമുഖം ജൂലൈ 28-ന് രാവിലെ 10.30-ന് മലപ്പുറം വിദ്യാഭ്യാസ ഉപഡയറക്ടറുടെ കാര്യാലയത്തില്‍ നടക്കും. ഇംഗ്ലീഷ് ഭാഷയില്‍ ബിരുദവും ടി.ടി.സി / ഡി.എഡ് / ഡി.എല്‍.എഡ് / ബി.എഡ് യോഗ്യതയുമുള്ളവര്‍ക്ക് പങ്കെടുക്കാം. കമ്മ്യൂണിക്കേറ്റീവ് ഇംഗ്ലീഷ് കോഴ്സ് പാസായവര്‍ക്കും അസാപ് പരിശീലനം ലഭിച്ചവര്‍ക്കും മുന്‍ഗണന ഉണ്ടായിരിക്കും.