സെന്‍സസ് 2027മായി ബന്ധപ്പെട്ട രൂപീകരിച്ച ജില്ലയിലെ നിശ്ചിത എണ്ണം വീടുകളുടെ  സമാഹാരമായ ഹൗസ്  ലിസ്റ്റിംഗ് ബ്ലോക്കുകളില്‍ (എച്ച് എല്‍ ബി) വിവരശേഖരണം 90 ശതമാനം പിന്നിട്ടെന്ന് പ്രിന്‍സിപ്പല്‍ സെന്‍സസ് ഓഫീസറായ ജില്ലാ കലക്ടര്‍ ആനി ജൂല തോമസ്.  പൊതുവിവരശേഖരണപ്രക്രിയ ജില്ലയില്‍ 82.13 ശതമാനം പിന്നിട്ടെന്നും മികച്ച ഉദ്യോഗസ്ഥ ഏകോപനത്തിലൂടെ പ്രവര്‍ത്തനങ്ങള്‍ കൂടുതല്‍ വേഗത്തിലാക്കണമെന്നും ജില്ലാ കലക്ടര്‍ കൂട്ടിച്ചേര്‍ത്തു.

ഏറ്റുമാനൂർ ഗവൺമെന്റ് ഐ.ടി.ഐയിൽ  ഒഴിവുള്ള എസ്.ടി വിഭാഗം, വനിത സംവരണം, ജനറൽ കാറ്റഗറി സീറ്റുകളിലേക്ക് അപേക്ഷ ക്ഷണിച്ചു. ജൂലൈ 25ന് വൈകിട്ട് അഞ്ചു മണിക്ക് മുൻപായി ഐ.ടി.ഐ ഓഫീസിൽ അപേക്ഷ സമർപ്പിക്കണം. ഫോൺ: 8921355164, 9496800788.

ആരോഗ്യം-ദേവസ്വം വകുപ്പ് മന്ത്രി കെ.മുരളീധരൻ വർക്കല ശിവഗിരി മഠം സന്ദർശിച്ചു.ശിവഗിരി മഠം പ്രസിഡന്റ് സച്ചിദാനന്ദ സ്വാമി, ജനറൽ സെക്രട്ടറി സ്വാമി ശുഭാംഗാനന്ദ, ഗുരുധർമ്മ പ്രചരണസഭാ സെക്രട്ടറി സ്വാമി അസംഗാനന്ദ ഗിരി, ശിവിഗിരി മഠം മുൻ ജനറൽ സെക്രട്ടറി സ്വാമി ഋതംഭരാനന്ദ എന്നിവർ മന്ത്രിയെ ഷാൾ അണിയിച്ച് സ്വീകരിച്ചു. മഹാ സമാധിയിലെത്തി മന്ത്രി കെ.മുരളീധരൻ ദർശനം നടത്തി.ഗുരുദേവന്റെ ദർശനങ്ങൾക്ക് കലാതീതമായ പ്രസക്തിയുണ്ടെന്നും ശാന്തിയും സമാധാനവും ലക്ഷ്യമിട്ടുള്ള ഗുരുദേവ സൂക്തങ്ങൾ മനുഷ്യന് എന്നും പ്രചോദനം നൽകുന്നതാണെന്നും മന്ത്രി പറഞ്ഞു. തുടർന്ന് പ്രഭാത ഭക്ഷണം കഴിച്ച ശേഷമാണ് മന്ത്രി മടങ്ങിയത്.

കാഞ്ഞിരപ്പള്ളി ജനറൽ ആശുപത്രിയിൽ നിലവിലുള്ള താൽക്കാലിക ഒഴിവിലേക്ക് ദിവസവേതനാടിസ്ഥാനത്തിൽ ഡോക്ടറെ നിയമിക്കുന്നതിനുള്ള വാക് - ഇൻ- ഇന്റവ്യൂ ജൂലൈ 31ന് ഉച്ചകഴിഞ്ഞ് രണ്ട് മുതൽ  വാഴൂർ ബ്ലോക്ക് പഞ്ചായത്ത് ഓഫീസിൽ   നടക്കും. എം.ബി.ബി.എസ് യോഗ്യതയും കേരളാ മെഡിക്കൽ കൗൺസിൽ രജിസ്ട്രേഷനും  ഉള്ളവർ സർട്ടിഫിക്കറ്റുകളുടെ അസ്സലും സാക്ഷ്യപ്പെടുത്തിയ പകർപ്പുകളും സഹിതം  ഉച്ചയ്ക്ക് ഒന്നിനു മുൻപ് എത്തണം. കാഷ്വാലിറ്റി വിഭാഗം കൈകാര്യം ചെയ്യുന്നതിൽ പ്രവൃത്തി പരിചയമുള്ളവർക്കും വാഴൂർ ബ്ലോക്ക് പഞ്ചായത്ത് പരിധിയിൽ താമസിക്കുന്നവർക്കും മുൻഗണന. ഫോൺ: 8281040553.

എം.ജി. സർവകലാശാല എംപ്ലോയ്മെന്റ് ഇൻഫർമേഷൻ ആൻഡ് ഗൈഡൻസ് ബ്യൂറോ ആൻഡ് മോഡൽ കരിയർ സെന്ററിന്റെ ആഭിമുഖ്യത്തിൽ ജൂലൈ 25ന്(ശനിയാഴ്ച) മോഡൽ കരിയർ സെന്ററിൽവച്ച് സൗജന്യ തൊഴിൽ മേള നടത്തും. വിവിധകമ്പനികളിലെ നൂറ്റൻപതിലേറെ ഒഴിവുകളിലേക്ക് അവസരം. ഉദ്യോഗാർഥികൾ https://bit.ly/mccktmjuly എന്ന ലിങ്ക് മുഖേന പേര് രജിസ്റ്റർ ചെയ്യണം. സ്പോട്ട് രജിസ്ട്രേഷനും ഉണ്ടായിരിക്കും. ഫോൺ: 0481-2731025, 9495628626, 6282317660.

കെൽട്രോൺ നടത്തുന്ന ഡിപ്ലോമ ഇൻ മോണ്ടിസോറി ടീച്ചർ ട്രെയിനിംഗ് കോഴ്സിന്റെ സൗജന്യ ഓൺലൈൻ വർക്ക്ഷോപ്പ് ജൂലൈ 25ന് (ശനിയാഴ്ച) വൈകുന്നേരം ഏഴു മുതൽ എട്ടു വരെ നടത്തും. ഫോൺ: 9495642722, 9072592412.

അയ്യങ്കാളി ജലോത്സവത്തിന്റെ ഭാഗമായി  സ്വാഗതസംഘം രൂപീകരിച്ചു. എം. വിൻസെന്റ് എം.എൽ.എയുടെ അധ്യക്ഷതയിൽ വെള്ളായണി രാജസൂയം ഓഡിറ്റോറിയത്തിൽ ചേർന്ന യോഗത്തിലാണ് സ്വാഗതസംഘം രൂപീകരിച്ചത്. 

നിലവിൽ പാലപ്പൂര് ഭാഗത്ത്‌ നിന്നും കുളങ്ങര ക്ഷേത്ര ഭാഗത്തെക്കാണ്  മത്സരം നടത്തുന്നത്. നിർമ്മാണം പുരോഗമിക്കുന്ന വെള്ളായണി-കല്ലിയൂർ പാലം അടുത്ത വർഷം പൂർത്തിയാകുന്നതോടെ കായലിൽ ഹൊറിസോണ്ടൽ ശൈലിയിൽ ട്രാക്ക് ഒരുക്കി വള്ളംകളി കൂടുതൽ ആവേശകരമാക്കാൻ മാറ്റാനും യോഗത്തിൽ തീരുമാനമായി. ഇത്തവണയും 
ജലോത്സവത്തോടനുബന്ധിച്ച് ഡി.ടി.പി.സി.യുടെ നേതൃത്വത്തിൽ കാക്കാമൂലയിൽ വിപുലമായ പരിപാടികൾ സംഘടിപ്പിക്കും.

മൂന്ന് പ്രമുഖ സ്വകാര്യസ്ഥാപനങ്ങളിലെ ഇരുന്നൂറിലേറെ ഒഴിവുകളിലേക്ക് ജൂലൈ 25ന് (ശനിയാഴ്ച) രാവിലെ 10 മുതൽ കോട്ടയം ജില്ലാ എംപ്ലോയ്മെന്റ് എക്സ്ചേഞ്ചിൽ പ്രവർത്തിക്കുന്ന എംപ്ലോയബിലിറ്റി സെന്ററിൽ വച്ച് അഭിമുഖം നടത്തും. പങ്കെടുക്കുന്നതിനായി എംപ്ലോയബിലിറ്റി സെന്ററിൽ രജിസ്റ്റർ ചെയ്യണം. ഫോൺ:8138908657, 0481-2563451.

ജൂലൈ മാസത്തെ ജില്ലാവികസന സമിതിയോഗം 25ന്(ശനിയാഴ്ച) രാവിലെ 11ന് കോട്ടയം ജില്ലാ ആസൂത്രണ സമിതി സെക്രട്ടേറിയറ്റ് കോൺഫറൻസ് ഹാളിൽ ചേരും.

എസ്.ആർ.സി കമ്മ്യൂണിറ്റി കോളജ് നടത്തുന്ന സർട്ടിഫിക്കറ്റ് ഇൻ മാനേജ്മെന്റ് ഓഫ് സ്പെസിഫിക് ലേണിംഗ് ഡിസോഡേഴ്സ് പ്രോഗ്രാമിന് https://app.srccc.in/register എന്ന ലിങ്കിലൂടെ ജൂലൈ 31 വരെ അപേക്ഷിക്കാം.  ഫോൺ: 9995113019, 9961613331.