കഴിഞ്ഞ അധ്യയനവര്‍ഷം 10, 12 ക്ലാസുകളില്‍ എല്ലാ വിഷയത്തിനും എ പ്ലസ്/എ1 ലഭിച്ച വിമുക്തഭടന്മാരുടെ മക്കള്‍ക്ക് ഒരു പ്രാവശ്യം നല്‍കിവരുന്ന ടോപ് സ്‌കോറര്‍ ഗ്രാന്റ് ലഭിക്കുന്നതിന് അപേക്ഷ ക്ഷണിച്ചു. ഓഗസ്റ്റ് അഞ്ചിന് മുമ്പായി തിരുവനന്തപുരം ജില്ലാ സൈനികക്ഷേമ ഓഫീസില്‍ അപേക്ഷ നല്‍കണം.  വിശദവിവരങ്ങള്‍ക്ക് ഫോണ്‍: 0471 2472748.
(പി.ആര്‍.പി 1768/2018)

* ഇന്ന് റേഷന്‍കടകള്‍ പ്രവര്‍ത്തിക്കും

ജൂണ്‍ മാസത്തെ റേഷന്‍ വിഹിതം ജൂലൈ നാലുവരെ ലഭിക്കുമെന്ന് ജില്ലാ സപ്ലൈ ഓഫീസര്‍ അറിയിച്ചു. ഇന്ന് (ജൂലൈ 1 ഞായറാഴ്ച) റേഷന്‍കടകള്‍ തുറന്നു പ്രവര്‍ത്തിക്കും.  റേഷന്‍വിഹിതം വാങ്ങുമ്പോള്‍ ബില്ല് കൃത്യമായും വാങ്ങണം.  ലഭിക്കുന്ന വിഹിതത്തിന്റെ കൃത്യത ഉറപ്പുവരുത്തണം.  
(പി.ആര്‍.പി 1767/2018)

മഹാത്മാ ഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയില്‍ ഏറ്റവും കൂടുതല്‍ പേര്‍ക്ക് 100 തൊഴില്‍ ദിനങ്ങള്‍ നല്‍കിയ ബ്ലോക്ക് പഞ്ചായത്തിനുള്ള  സംസ്ഥാന അവാര്‍ഡ് പോത്തന്‍കോട് കരസ്ഥമാക്കി. കഴിഞ്ഞ സാമ്പത്തിക വര്‍ഷം  1065 പേര്‍ക്കാണ് 100 ദിവസം വീതം തൊഴില്‍ നല്‍കിയത്.  കുറച്ചു തൊഴിലാളികള്‍ക്ക് 150 തൊഴില്‍ ദിനങ്ങള്‍ നല്‍കാനും സാധിച്ചു.

ഇതു കൂടാതെ ഏറ്റവും കൂടുതല്‍ ശരാശരി തൊഴില്‍ ദിനങ്ങള്‍ നല്‍കിയ പഞ്ചായത്തിനുള്ള പുരസ്‌കാരവും പോത്തന്‍കോടിനു തന്നെ. 91.88 % തൊഴില്‍ ദിനങ്ങളാണ് പഞ്ചായത്ത് നല്‍കിയത്. 2,850 പേര്‍ക്കായി  ആകെ 2,20,331 തൊഴില്‍ ദിനങ്ങളാണ് സൃഷ്ടിച്ചത്.

ക്ഷീര കര്‍ഷകരില്‍ നിന്നും പരമാവധി പാല്‍ ശേഖരിച്ച് ക്ഷീരസംഘങ്ങളില്‍ എത്തിക്കുക എന്ന ലക്ഷ്യവുമായി നേമം ബ്ലോക്ക് പഞ്ചായത്ത് ആവിഷ്‌കരിച്ച പദ്ധതികള്‍ വിജയകരം. ഇതു പ്രകാരം പ്രതിദിനം 18,400 ലിറ്റര്‍ പാലാണ് ബ്ലോക്കിന് കീഴിലെ ക്ഷീരസംഘങ്ങളില്‍ എത്തുന്നത്. പാല്‍ ഉല്‍പാദനത്തില്‍ സ്വയംപര്യാപ്തത നേടിയതായും ക്ഷീര വികസനമേഖലയില്‍ ഒന്നേകാല്‍ കോടി രൂപയുടെ പ്രവര്‍ത്തനമാണ് പഞ്ചായത്തിന് കീഴില്‍ നടന്നതെന്നും നേമം ബ്ലോക്ക് പഞ്ചായത്ത് പ്രസിഡന്റ് എല്‍. ശകുന്തള കുമാരി പറഞ്ഞു.

ഏറെ നാളത്തെ പരിശ്രമത്തിനൊടുവില്‍ വെള്ളറട ഗ്രാമപഞ്ചായത്തിലെ വേങ്കോട് വാര്‍ഡിലെ വാഴവിളക്കുഴി കുളത്തിന് പുതുജീവന്‍. തൊഴിലുറപ്പ് പദ്ധതിയില്‍ ഉള്‍പ്പെടുത്തിയാണ് കുളം നവീകരിച്ചത്.  494 തൊഴില്‍ ദിനം ഉപയോഗപ്പെടുത്തിയാണ് പകുതിയോളം കാടുകയറി  പ്ലാസ്റ്റിക് മാലിന്യങ്ങളുടെ ചവറുകൂനയായി  മാറിയ വാഴവിളക്കുഴി കുളം നവീകരിച്ചത്. പ്രദേശത്തെ പ്രധാന ജലസ്രോതസാണ്.  മൂന്നു ലക്ഷം രൂപയാണ് നവീകരണ പദ്ധതി്ക്കായി വകയിരുത്തിയത്. 34 അടി നീളവും 28 അടി വീതിയുമുള്ള കുളത്തിന്റെ ബണ്ടുകള്‍ കയര്‍ ഭൂവസ്ത്രം ഉപയോഗിച്ച് ബലപ്പെടുത്തിയിട്ടുണ്ട്.

തിരുവനന്തപുരം കോര്‍പറേഷനില്‍ പട്ടികജാതി വകുപ്പിനു കീഴില്‍ ഇളംപള്ളി, രാജാജി നഗര്‍, എം.എസ്. നഗര്‍, ചെല്ലമംഗലം എന്നിവിടങ്ങളില്‍ പ്രവര്‍ത്തിക്കുന്ന വജ്ഞാന്‍വാടികളുടെ മേല്‍നോട്ട ചുമതല വഹിക്കുന്നതിന് പ്രദേശവാസികളായ പട്ടികജാതി വിഭാഗത്തില്‍പ്പെട്ട യുവതീ യുവാക്കളില്‍ നിന്ന് അപേക്ഷ ക്ഷണിച്ചു.  കമ്പ്യൂട്ടര്‍ പരിജ്ഞാനം വേണം.  5,000 രൂപ ഹോണറേറിയം ലഭിക്കും.  വെള്ളപേപ്പറില്‍ തയ്യാറാക്കിയ അപേക്ഷ യോഗ്യത സര്‍ട്ടിഫിക്കറ്റുകള്‍ സഹിതം ജൂലൈ 15 നകം തിരുവനന്തപുരം നഗരസഭാ പട്ടികജാതി വികസന ഓഫീസര്‍ക്ക് നല്‍കണം.
(പി.ആര്‍.പി 1763/2018)

കാക്കനാട്:  ജില്ലാ കലക്ടര്‍ മുഹമ്മദ് വൈ സഫിറുള്ള മുന്‍കൈയ്യെടുത്ത് നടപ്പാക്കിയ വിശപ്പുരഹിത നഗരം പദ്ധതി 'നുമ്മ ഊണി'ലൂടെ ഇന്നു (ജൂലൈ 1) മുതല്‍ പ്രതിദിനം 500 പേര്‍ക്ക് ഉച്ചഭക്ഷണം ലഭിക്കും.  പൈലറ്റ് പ്രോജക്ടായി തുടങ്ങിയ പദ്ധതി ഫലപ്രദമാണെന്നു കണ്ടെത്തിയ സാഹചര്യത്തില്‍ 300 പേര്‍ക്ക് ഭക്ഷണം നല്‍കിയിരുന്നിടത്ത് 500 പേര്‍ക്ക് ഭക്ഷണമൊരുക്കാന്‍ ജില്ലാ കലക്ടര്‍ നിര്‍ദ്ദേശിക്കുകയായിരുന്നു.  കൂടാതെ നഗരപ്രദേശങ്ങളിലൊതുങ്ങിയിരുന്ന 'നുമ്മ ഊണ്‍' ഇതോടെ ഗ്രാമങ്ങളിലേക്കുമെത്തും.  

ജലം ഒട്ടും പാഴാക്കാതെയുള്ള കൃഷി രീതിയായ തിരിനന (ഡ്രിപ്പ് ഇറിഗേഷന്‍) പ്രോത്സാഹിപ്പിക്കാനായി വെളളനാട് ബ്ലോക്ക് പഞ്ചായത്ത് ആരംഭിച്ച 'ഗ്രോബാഗ് തിരിനന' പദ്ധതി വിജയകരം.

മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതി പ്രവര്‍ത്തനങ്ങളുടെ ഭാഗമായി അതിയന്നൂര്‍ ബ്ലോക്കിലെ വിവിധ കാര്‍ഷിക നഴ്‌സറികളിലായി ഈ വര്‍ഷം ഉല്‍പ്പാദിപ്പിച്ചത് 1,15,015 വൃക്ഷത്തൈകള്‍. ലോകപരിസ്ഥിതി ദിനമായ ജൂണ്‍ അഞ്ചിന് സ്‌കൂളുകളിലും ഗവണ്‍മെന്റ് സ്ഥാപനങ്ങള്‍ക്കും റോഡിന്റെ പാതയോരങ്ങളിലും ഫലവൃക്ഷതൈകള്‍ വച്ചു പിടിപ്പിക്കുന്നതിന്റെ ഭാഗമായിട്ടാണ് തൈകള്‍ ഉല്‍പ്പാദിപ്പിച്ചത്. അറുപതു നഴ്‌സറികള്‍ രൂപീകരിച്ചിട്ടുണ്ട്.