മഹാത്മാഗാന്ധി ദേശീയ ഗ്രാമീണ തൊഴിലുറപ്പു പദ്ധതിയില്‍ ജില്ലയില്‍ ലേബര്‍ ബജറ്റിന്‍റെ 41 ശതമാനം നേട്ടം കൈവരിച്ചു. 18,54,000 തൊഴില്‍ ദിനങ്ങളാണ് ജില്ലയില്‍ ഈ വര്‍ഷം കേന്ദ്ര സര്‍ക്കാര്‍ അംഗീകരിച്ച ലേബര്‍ ബജറ്റ്. ജില്ലയില്‍ കഴിഞ്ഞ ദിവസം വരെ 7,52,674 തൊഴില്‍ ദിനങ്ങള്‍ സൃഷ്ടിച്ചതായി പദ്ധതിയുടെ ജില്ലാ പ്രോഗ്രാം കോ-ഓര്‍ഡിനേറ്ററായ ജില്ലാ കലക്ടര്‍ ആര്‍ ഗിരിജ അറിയിച്ചു. സംസ്ഥാന ശരാശരി 36.68 ആണ്. അംഗീകരിച്ച പദ്ധതി അടങ്കലായ 79.72 കോടിയില്‍ 24.31 കോടി രൂപയാണ് ഇതുവരെയുളള ചെലവ.് മുന്‍വര്‍ഷം ഇതേ സമയം ലേബര്‍ ബജറ്റിന്‍റെ 48 ശതമാനം തൊഴില്‍ ദിനങ്ങള്‍ സൃഷ്ടിച്ചിരുന്നു.

ശബരിമല തീര്‍ഥാടന കാലത്ത് വ്യാജമദ്യത്തിന്‍റെയും കഞ്ചാവ് ഉള്‍പ്പെടെ ലഹരി വസ്തുക്കളുടെയും വില്പന തടയുന്നതിന് പരിശോധന ശക്തമാക്കാന്‍ ഡെപ്യുട്ടി കളക്ടര്‍ പി.ടി. ഏബ്രഹാമിന്‍റെ അധ്യക്ഷതയില്‍ കളക്ടറേറ്റില്‍ ചേര്‍ന്ന ജില്ലാ വ്യാജമദ്യ നിയന്ത്രണ സമിതി യോഗം തീരുമാനിച്ചു. പരിശോധനയ്ക്കായി പ്രത്യേക സ്ക്വാഡിനെ നിയോഗിക്കും. ലഹരി വില്‍പ്പനക്കാരെ പിടികൂടാന്‍ സ്റ്റുഡന്‍റ്സ് പൊലീസ് കേഡറ്റുകളുടെ സഹായത്തോടെ നിരീക്ഷണം ശക്തമാക്കും. വിദ്യാര്‍ഥികള്‍ക്കായി ലഹരി ബോധവത്കരണ ക്ലാസുകള്‍ നടത്തും. മയക്കുമരുന്നിന്‍റെ വില്പ്പന നടക്കുന്നതായി ശ്രദ്ധയില്‍പ്പെട്ടാല്‍ ആര്‍ക്കും എക്സൈസ് വകുപ്പുമായി ബന്ധപ്പെടാം.

റേഷന്‍ മുന്‍ഗണനാ പട്ടികയില്‍ ഉള്‍പ്പെടുത്തുന്നതിന് നിലവില്‍ അപേക്ഷ സമര്‍പ്പിച്ചവരുടെയും ഒന്നാംഘട്ട അദാലത്തില്‍ ഹാജരാകാതിരുന്നവരുടെയും പരാതികള്‍ തീര്‍പ്പാക്കുന്നതിന് നവംബര്‍ മൂന്നു മുതല്‍ ഒന്‍പതുവരെ പഞ്ചായത്തു തലത്തില്‍ രണ്ടാംഘട്ട അദാലത്ത് നടത്തുമെന്ന് കോഴഞ്ചേരി താലൂക്ക് സപ്ലൈ ഓഫീസര്‍ അറിയിച്ചു. തീയതി, പഞ്ചായത്ത്, അദാലത്ത് സ്ഥലം എന്ന ക്രമത്തില്‍-നവംബര്‍ മൂന്നിന്, ഇലന്തൂര്‍, ഓമല്ലൂര്‍, കോഴഞ്ചേരി താലൂക്ക് സപ്ലൈ ഓഫീസ്. മൂന്നിന്, കുളനട, കുളനട എആര്‍ഡി 35. നാലിന്, കോഴഞ്ചേരി, കോഴഞ്ചേരി താലൂക്ക് സപ്ലൈ ഓഫീസ്. നാലിന്, പത്തനംതിട്ട മുന്‍സിപ്പാലിറ്റി, കോഴഞ്ചേരി താലൂക്ക് സപ്ലൈ ഓഫീസ്.

സരസകവി മൂലൂര്‍ സ്മാരകത്തിന്‍റെ ആഭിമുഖ്യത്തില്‍ ഇലവുംതിട്ട ചന്ദനക്കുന്ന് സരസകവി മൂലൂര്‍ സ്മാരക ഗവണ്‍മെന്‍റ് യുപി സ്കൂളില്‍ ഇന്ന്(1) രാവിലെ 10ന് മലയാളഭാഷാ ദിനാഘോഷം നടക്കും. മുന്‍ എംഎല്‍എയും മൂലൂര്‍ സ്മാരക മാനേജിംഗ് കമ്മിറ്റി പ്രസിഡന്‍റുമായ കെ.സി. രാജഗോപാലന്‍ അധ്യക്ഷത വഹിക്കും.പ്രൊഫ.എ.ഒ. വര്‍ഗീസ് മുഖ്യപ്രഭാഷണം നടത്തും. മാതൃഭാഷയുടെ മാധുര്യവും മാതൃഭാഷാ പഠനത്തിന്‍റെ പ്രാധാന്യവും കുട്ടികളിലും രക്ഷിതാക്കളിലും എത്തിക്കുകയെന്ന ലക്ഷ്യത്തിലാണ് പരിപാടി സംഘടിപ്പിക്കുന്നത്. വിദ്യാര്‍ഥികളും അധ്യാപകരും രക്ഷിതാക്കളും സ്വന്തം രചനകളും പ്രശസ്ത മലയാള സാഹിത്യകൃതികളില്‍ നിന്നുള്ള ഭാഗങ്ങളും അവതരിപ്പിക്കും.

ശബരിമല തീര്‍ഥാടന കാലയളവില്‍ ജില്ലയെ ഹര്‍ത്താല്‍, ബന്ത് എന്നിവയില്‍ നിന്നും ഒഴിവാക്കുന്നതു സംബന്ധിച്ചുള്ള രാഷ്ട്രീയ പാര്‍ട്ടി പ്രതിനിധികളുടെ ആലോചനായോഗം ജില്ലാ കളക്ടറുടെ അധ്യക്ഷതയില്‍ ഏഴിന് രാവിലെ 11ന് ജില്ലാ കളക്ടറുടെ ചേംബറില്‍ നടക്കും.

(പിഎന്‍പി 2913/17)

ശബരിമല തീര്‍ഥാടനവുമായി ബന്ധപ്പെട്ട് ശബരിമല, പമ്പ, നിലയ്ക്കല്‍ എന്നിവിടങ്ങളില്‍ ഡ്യൂട്ടിക്ക് നിയോഗിച്ചിരിക്കുന്ന ജീവനക്കാര്‍ക്ക് നവംബര്‍ 10ന് രാവിലെ 11ന് പത്തനംതിട്ട കിഴക്കേടത്ത് മറിയം കോംപ്ലക്സില്‍ പരിശീലനം നല്‍കും.

(പിഎന്‍പി 2912/17)

വ്യവസായ സംരംഭങ്ങള്‍ ആരംഭിക്കുന്നതിന് ഖാദി ഗ്രാമവ്യവസായ ബോര്‍ഡ് അപേക്ഷ ക്ഷണിച്ചു.എന്‍റെ ഗ്രാമം, പി.എം.ഇ.ജി.പി പദ്ധതി പ്രകാരം മുടക്ക് മുതലിന്‍റെ 25 ശതമാനം മുതല്‍ 40 ശതമാനം വരെ സബ്സിഡി ലഭിക്കും.കൂടുതല്‍ വിവരങ്ങള്‍ ഇലന്തൂരിലുള്ള ജില്ലാ ഖാദി ഗ്രാമ വ്യവസായ ഓഫീസില്‍ ലഭിക്കും.ഫോണ്‍: 0468-2362070.

(പിഎന്‍പി 2911/17)

കോന്നി താലൂക്ക് വികസന സമിതി യോഗം ഈമാസം നാലിന് രാവിലെ 10.30 ന് താലൂക്ക് ഓഫീസില്‍ ചേരുമെന്ന് തഹസീല്‍ദാര്‍ അറിയിച്ചു.

(പിഎന്‍പി 2910/17)

ശിശുദിനാഘോഷവുമായി ബന്ധപ്പെട്ട ബ്ലോക്ക് തല മത്സരങ്ങളില്‍ ഒന്നാം സ്ഥാനം നേടിയവര്‍ക്കുള്ള ജില്ലാതല മത്സരം നവംബര്‍ നാലിന് രാവിലെ 10ന് പത്തനംതിട്ട (തൈക്കാവ്) ഗവണ്‍മെന്‍റ് വൊക്കേഷണല്‍ ഹയര്‍ സെക്കണ്ടറി സ്കൂളില്‍ നടക്കുമെന്ന് ജില്ലാ ശിശുക്ഷേമസമിതി സെക്രട്ടറി അറിയിച്ചു.മത്സരത്തില്‍ പങ്കെടുക്കുന്നവര്‍ രാവിലെ 9.30 ന് സ്കൂളില്‍ എത്തണം.

(പിഎന്‍പി 2909/17)

തിരുവനന്തപുരം: കെ.എസ്.ആര്‍.ടി.സി വെറ്റ് ലീസ് കരാര്‍ അടിസ്ഥാനത്തില്‍ അന്തര്‍ സംസ്ഥാന -ദീര്‍ഘദൂര സര്‍വീസുകള്‍ക്കായി നിരത്തിലിറക്കുന്ന സ്‌കാനിയ സൂപ്പര്‍ ഡീലകസ് ബസ്സുകള്‍ ഇന്നു മുതല്‍ (നവംബര്‍ ഒന്ന്) നിരത്തുകളില്‍ ഓടിത്തുടങ്ങും. ഇന്ന് ഉച്ച കഴിഞ്ഞു രണ്ടു മണിക്ക് തമ്പാനൂര്‍ സെന്‍ട്രല്‍ ഡിപ്പോയില്‍ നടക്കുന്ന ചടങ്ങില്‍ ഗതാഗത മന്ത്രി തോമസ് ചാണ്ടി അഞ്ചു ബസുകള്‍ ഫ്‌ളാഗ് ഓഫ് ചെയ്യും. പ്രീമിയം ക്‌ളാസ് ബസ്സുകള്‍ വാടക ഇനത്തില്‍ ലഭ്യമാക്കി ഓടിക്കുന്നതിനുള്ള തീരുമാനത്തിന്റെ അടിസ്ഥാനത്തിലാണീ സംരംഭം. കെ എസ് ആര്‍ ടി സി സി.എം.ഡി എ.ഹേമചന്ദ്രന്‍ ചടങ്ങില്‍ പങ്കെടുക്കും.