സുഭിക്ഷ കേരളം പദ്ധതിയുടെ ഭാഗമായി കരനെല്‍ കൃഷി ചെയ്ത മാലോത്തെ സെബാസ്റ്റ്യന്‍ അഞ്ചാനിക്കലിന്റെ കരനെല്‍കൃഷിക്ക് നൂറുമേനി വിളവ്.   ഒരു ഏക്കര്‍ സ്ഥലത്താണ് തനതു ഇനമായ തൊണ്ണൂറാന്‍ നെല്‍വിത്തു ഉപയോഗിച്ച് കരനെല്‍കൃഷിയിറക്കിയത്. ഒരു ഏക്കര്‍  കരനെല്‍കൃഷിയില്‍ നിന്നും 150 പറ നെല്‍ ലഭിക്കുമെന്നാണ് പ്രതീക്ഷ.   വിത മുതല്‍ കൊയ്ത്തു വരെ കുടുംബാഗങ്ങള്‍  തന്നെയാണ് എല്ലാ കൃഷി പണികളും ചെയ്തിരുന്നത്. കരനെല്‍ കൃഷി പുതിയ അനുഭവമാണെന്നും വരും  വര്‍ഷങ്ങളിലും കരനെല്‍കൃഷി തുടരണമെന്നാണ് ആഗ്രഹമെന്നും കര്‍ഷകനായ സെബാസ്റ്റ്യന്‍ അഞ്ചാനിക്കല്‍ പറഞ്ഞു.

തൊഴില്‍ ആവശ്യങ്ങള്‍ക്ക് കര്‍ണാടകയിലേക്ക്  ദിവസേന പോയി വരുന്ന കാസര്‍കോട് ജില്ലക്കാര്‍ക്ക് പ്രത്യേക രജിസ്‌ട്രേഷന്‍, പാസ് എന്നിവ ആവശ്യമില്ലെന്ന് ജില്ലാ കളക്ടര്‍ ഡോ.ഡി.സജിത് ബാബു അറിയിച്ചു. കൊറോണ കോര്‍ കമ്മിറ്റി ഓണ്‍ലൈന്‍ യോഗത്തില്‍ അധ്യക്ഷത വഹിച്ച് സംസാരിക്കുകയായിരുന്നു കളക്ടര്‍. കര്‍ണാടകയില്‍ സ്ഥിരമായി താമസിക്കുകയും കാസര്‍കോട് ജില്ലയില്‍ ദിവസവും വന്നു പോവുകയും ചെയ്യുന്നവര്‍ 21 ദിവസത്തില്‍ ഒരു തവണ വീതം  കോവിഡ് 19 ജാഗ്രത വെബ് പോര്‍ട്ടലില്‍ ആന്റിജന്‍ പരിശോധന സര്‍ട്ടിഫിക്കറ്റ് അപ്‌ലോഡ് ചെയ്യണം.

ജില്ലയില്‍ 135 പേര്‍ക്ക് ഇന്നലെ (ആഗസ്ത് 28) കൊവിഡ് ബാധ സ്ഥിരീകരിച്ചു. 113 പേര്‍ക്ക് സമ്പര്‍ക്കം മൂലമാണ് രോഗബാധ. 15 പേര്‍ ഇതര സംസ്ഥാനങ്ങളില്‍ നിന്നെത്തിയവരും ഏഴു പേര്‍ ആരോഗ്യ പ്രവര്‍ത്തകരുമാണ്.
ഇതോടെ ജില്ലയില്‍ ഇതുവരെ റിപ്പോര്‍ട്ട് ചെയ്യപ്പെട്ട കൊവിഡ് പോസിറ്റീവ് കേസുകള്‍ 3309 ആയി. ഇവരില്‍ ഇന്ന് രോഗമുക്തി നേടിയ 137 പേരടക്കം 2275 പേര്‍ ആശുപത്രി വിട്ടു. കൊവിഡ് സ്ഥിരീകരിച്ച 22 പേര്‍ ഉള്‍പ്പെടെ 27 പേര്‍ മരണപ്പെട്ടു. ബാക്കി 1007 പേര്‍ ആശുപത്രികളില്‍ ചികില്‍സയിലാണ്.

ജില്ലയില്‍ കൊവിഡ് വ്യാപനം രൂക്ഷമാവുന്ന സാഹചര്യത്തില്‍ കൊവിഡ് പ്രതിരോധ പ്രവര്‍ത്തനങ്ങല്‍ ശക്തിപ്പെടുത്തി ജില്ലാ ഭരണസംവിധാനം. പൊലീസും ആരോഗ്യപ്രവര്‍ത്തകരും  വിട്ടുവീഴ്ചയില്ലാത്ത പ്രതിരോധ പ്രവര്‍ത്തനങ്ങളാണ് ജില്ലയില്‍ നടത്തുന്നത്. സമ്പര്‍ക്ക രോഗികളുടെ എണ്ണം കൂടിവരുന്ന സാഹചര്യത്തില്‍ ആഗസ്ത് 27 വരെയുള്ള കണക്ക് പ്രകാരം 79 തദ്ദേശസ്ഥാപനങ്ങളിലെയും കണ്ടോണ്‍മെന്റ് ഏരിയയിലേതുമായി 513 വാര്‍ഡുകളാണ് ജില്ലയില്‍ കണ്ടെയിന്‍മെന്റ് സോണുകളാക്കി അടച്ചിട്ടിട്ടുള്ളത്. ഈ  സാഹചര്യത്തില്‍ ജനങ്ങള്‍ കൂടുതല്‍ ജാഗ്രത പാലിക്കണമെന്ന്  ബന്ധപ്പെട്ടവര്‍ നിര്‍ദേശിച്ചു.

കാലങ്ങളായി അവഗണിക്കപ്പെട്ട മലബാര്‍ ടൂറിസം രംഗത്ത് കഴിഞ്ഞ ഏതാനും വര്‍ഷങ്ങളായി വന്‍വികസന പ്രവര്‍ത്തനങ്ങളാണ് നടന്നുകൊണ്ടിരിക്കുന്നതെന്ന് ടൂറിസം സഹകരണ ദേവസ്വം വകുപ്പ് മന്ത്രി കടകം പള്ളി സുരേന്ദ്രന്‍. കണ്ണൂരിലെ നവീകരിച്ച കെടിഡിസി ത്രീ സ്റ്റാര്‍ ഹോട്ടല്‍ ലൂം ലാന്‍ഡിന്റെ ഉദ്ഘാടനം ഓണ്‍ലൈനായി നിര്‍വഹിച്ച് സംസാരിക്കുകയായിരുന്നു മന്ത്രി.
മലബാര്‍ ടൂറിസം രംഗം കുതിച്ചുചാട്ടത്തിന്റെ പാതയിലാണ്. ലോക ടൂറിസം ഭൂപടത്തില്‍ മലബാറിനെ മുന്‍നിരയിലെത്തിക്കാന്‍ കഴിഞ്ഞ നാലു വര്‍ഷത്തെ പ്രവര്‍ത്തനങ്ങളിലൂടെ സാധിച്ചതായും മന്ത്രി പറഞ്ഞു.

'ഇപ്പൊ ധൈര്യായി കെടന്നുറങ്ങാ... ഭയോന്നൂല്ല, സന്തോഷം മാത്രേ ഉള്ളൂ...' ഇത് കുറുമാത്തൂര്‍ പഞ്ചായത്തിലെ എ ദേവിയുടെ വാക്കുകളാണ്. ലൈഫ് ഭവനപദ്ധതിയില്‍ തളിരിട്ട ലക്ഷക്കണക്കിന് ജീവിതങ്ങളില്‍ ഒന്ന്. ദേവിക്ക് മാത്രമല്ല കൂനത്തെ സരസ്വതിക്കും ഇത് സുരക്ഷിതത്വത്തിന്റെ പൊന്നോണക്കാലമാണ്. മാനസികാസ്വാസ്ഥ്യമുള്ള മകനുമായി ദേവിക്കും പറക്കമുറ്റാത്ത കുഞ്ഞുങ്ങളുമായി സരസ്വതിക്കും മനസ്സമാധാനത്തോടെ സ്വന്തം കിടപ്പാടങ്ങളില്‍ ഇപ്പോള്‍ തലചായ്ക്കാം.

ജില്ലയില്‍ 95 പേര്‍ക്ക് കൊവിഡ് ബാധ സ്ഥിരീകരിച്ചു. 80 പേര്‍ക്ക് സമ്പര്‍ക്കം മൂലമാണ് രോഗബാധ. ഒരാള്‍ വിദേശത്തു നിന്നും അഞ്ചു പേര്‍ ഇതര സംസ്ഥാനങ്ങളില്‍ നിന്നും എത്തിയവരാണ്. ഒന്‍പത് ആരോഗ്യ പ്രവര്‍ത്തകര്‍ക്കും രോഗം സ്ഥിരീകരിച്ചു.
ഇതോടെ ജില്ലയില്‍ ഇതുവരെ റിപ്പോര്‍ട്ട് ചെയ്യപ്പെട്ട കൊവിഡ് പോസിറ്റീവ് കേസുകള്‍ 3404 ആയി. ഇവരില്‍ ഇന്നലെ രോഗമുക്തി നേടിയ 92 പേരടക്കം 2367 പേര്‍ ആശുപത്രി വിട്ടു. കൊവിഡ് സ്ഥിരീകരിച്ച 23 പേര്‍ ഉള്‍പ്പെടെ 28 പേര്‍ മരണപ്പെട്ടു. ബാക്കി 1009 പേര്‍ ആശുപത്രികളില്‍ ചികില്‍സയിലാണ്.

ജില്ലയില്‍ പുതുതായി കൊവിഡ് പോസിറ്റീവ് കേസുകള്‍ റിപ്പോര്‍ട്ട് ചെയ്യപ്പെട്ട 19 തദ്ദേശ സ്ഥാപന വാര്‍ഡുകള്‍ കൂടി കണ്ടെയിന്‍മെന്റ് സോണുകളായി ജില്ലാ കലക്ടര്‍ ടി വി സുഭാഷ് പ്രഖ്യാപിച്ചു. ഇവയില്‍ സമ്പര്‍ക്കം വഴി രോഗബാധയുണ്ടായ പയ്യന്നൂര്‍ നഗരസഭ  25,38,43, ചെറുകുന്ന് 3, മയ്യില്‍ 12, കണ്ണൂര്‍ കോര്‍പ്പറേഷന്‍ 38, പട്ടുവം 6, കുറുമാത്തൂര്‍ 14, തലശ്ശേരി നഗരസഭ 47, മുഴപ്പിലങ്ങാട് 7,9, പിണറായി 3, പരിയാരം 14, ചപ്പാരപ്പടവ് 1, ധര്‍മ്മടം 14, ഉളിക്കല്‍ 2 എന്നീ വാര്‍ഡുകള്‍ പൂര്‍ണമായി അടച്ചിടും.