മലപ്പുറം ബ്ലോക്ക് പഞ്ചായത്തിന്റെ അധീനതയില്‍ ഒതുക്കുങ്ങല്‍ ഗ്രാമപഞ്ചായത്തിന് സമീപമുള്ള കടമ്പോട്ട് ബാപ്പുട്ടിഹാജി സ്മാരക ബില്‍ഡിങിലെ  മുകള്‍ നിലയിലെ മുറികളും  താഴെ നിലയിലുള്ള രണ്ട് മുറികളും വാടകക്ക് നല്‍കുന്നതിന് അംഗീകാരമുള്ള വനിതാഗ്രൂപ്പുകള്‍/ സംഘങ്ങള്‍ എന്നിവരില്‍ നിന്ന് അപേക്ഷ ക്ഷണിച്ചു. ഗ്രൂപ്പുകളുടെ അഭാവത്തില്‍ വനിതാ സംരംഭകര്‍ക്കും അപേക്ഷിക്കാം. താത്പര്യമുള്ളവര്‍ സെപ്തംബര്‍ 11ന് വൈകീട്ട് നാലിനകം ബ്ലോക്ക് പഞ്ചായത്ത് ഓഫീസില്‍ അപേക്ഷ നല്‍കണമെന്ന് സെക്രട്ടറി അറിയിച്ചു.
 

മങ്കടയില്‍ പ്രവര്‍ത്തിക്കുന്ന ഗവ.ഫുഡ്ക്രാഫ്റ്റ് ഇന്‍സ്റ്റിറ്റ്യൂട്ടില്‍ ഹോട്ടല്‍ മാനേജ്‌മെന്റ് മേഖലയില്‍ ഒരു വര്‍ഷത്തെ കോഴ്‌സുകളില്‍ സീറ്റ് ഒഴിവുണ്ട്. ഫുഡ് ആന്‍ഡ് ബിവറേജ് സര്‍വീസ്, ഫ്രണ്ട് ഓഫീസ് ഓപ്പറേഷന്‍, ഹോട്ടല്‍ അക്കോമഡേഷന്‍ ഓപ്പറേഷന്‍ എന്നീ കോഴ്‌സുകളില്‍ ജനറല്‍, ഒ.ബി.സി, എസ്.സി, എസ്.ടി വിഭാഗങ്ങളിലാണ് സീറ്റ് ഒഴിവുള്ളത്. ഫോണ്‍: 0493 3295733, 9645078880, 9895510650.

തിരുവനന്തപുരം ഭാഗത്തു നിന്നും രാത്രി കൊല്ലം തീരക്കടലില്‍  വള്ളങ്ങളിലെത്തി ലൈറ്റ് ഉപയോഗിച്ചുള്ള  മത്സ്യബന്ധനം നടത്തിയ സാഹചര്യത്തില്‍ മറൈന്‍ എന്‍ഫോഴ്സ്മെന്റ്-കോസ്റ്റല്‍ പോലീസ് സേനകളുടെ സംയുക്ത പരിശോധനകള്‍ ശക്തമാക്കുമെന്ന് ജില്ലാ കലക്ടര്‍ ബി അബ്ദുല്‍ നാസര്‍. ജില്ലാ ദുരന്ത നിവാരണ അതോറിറ്റിയുടെ ഗൂഗിള്‍ മീറ്റ് വഴി നടന്ന ഉന്നത തല ഉദ്യോഗസ്ഥ യോഗത്തിലാണ് ഇക്കാര്യം പറഞ്ഞത്.

ശുചീകരണ പ്രവര്‍ത്തനങ്ങളില്‍ ഏര്‍പ്പെടുന്നവരുടെ മക്കളില്‍ ഒന്നു മുതല്‍ 10 വരെ ക്ലാസുകളില്‍ പഠിക്കുന്ന കുട്ടികള്‍ക്ക് പട്ടികജാതി വികസന വകുപ്പ് നല്‍കുന്ന സ്‌കോളര്‍ഷിപ്പിന് അപേക്ഷിക്കാം. ശുചീകരണ പ്രവര്‍ത്തനങ്ങളില്‍ ഏര്‍പ്പെടുന്നുവെന്ന് തൊഴില്‍ ഉടമ/സ്ഥാപന മേധാവിയുടെ സാക്ഷ്യപത്രം സഹിതം അപേക്ഷ സെപ്തംബര്‍ 15 നകം അതത് ബ്ലോക്ക് പട്ടികജാതി വികസന ഓഫീസില്‍ സമര്‍പ്പിക്കണം. വിശദ വിവരങ്ങള്‍ ജില്ലാ/ബ്ലോക്ക് പട്ടികജാതി വികസന ഓഫീസുകളില്‍ ലഭിക്കും. ഫോണ്‍: 0474-2794996.
 (പി.ആര്‍.കെ നമ്പര്‍ 2381/2020)

ജില്ലയില്‍ ഇന്നലെ(സെപ്തംബര്‍ 04) കോവിഡ് ബാധ നിരക്ക് ഏറ്റവും ഉയര്‍ന്ന സംഖ്യയിലെത്തി. 248 പേര്‍ രോഗബാധിതരായി. ആഗസ്റ്റ് 29 ന് 234 ആയിരുന്നു ഇതുവരെ ഉയര്‍ന്ന നിരക്ക്. 27 ന് 176 പേര്‍ക്കും 28 ന് 156 പേര്‍ക്കും രോഗം ബാധിച്ചിരുന്നു. 30 ന് 151 പേര്‍ക്കും 31 ന് 131 പേര്‍ക്കും രോഗം ബാധിച്ചിരുന്നു. തുടര്‍ന്നുള്ള മൂന്നു ദിവസങ്ങളില്‍ രോഗ നിരക്ക് 100 ന് താഴെയായിരുന്നു. ഇന്നലെ 114 പേര്‍ രോഗമുക്തി നേടിയിരുന്നു. ഏറ്റവും അധികം രോഗബാധിതര്‍ കൊല്ലം കോര്‍പ്പറേഷന്‍ പരിധിയിലാണ്, 59 പേര്‍. പള്ളിത്തോട്ടം, തൃക്കടവൂര്‍ ഭാഗങ്ങളിലാണ് കോര്‍പ്പറേഷന്‍ പരിധിയില്‍ കൂടുതല്‍ രോഗികള്‍, 18 വീതം.