മലബാര്‍ ദേവസ്വം ബോര്‍ഡിന് കീഴിലെ മാനേജ്മെന്റ് ഫണ്ടില്‍ നിന്നും ശമ്പളത്തിന് അര്‍ഹതയുള്ള ക്ഷേത്ര ജീവനക്കാര്‍ക്കും മാനേജ്മെന്റ് ഫണ്ടില്‍ നിന്നും ധനസഹായത്തിനു  അര്‍ഹതയില്ലാത്ത എ, ബി  ഗ്രേഡ് ക്ഷേത്ര ജീവനക്കാര്‍ക്കും ബോര്‍ഡിന് കീഴിലുള്ള മറ്റു ക്ഷേത്രങ്ങളിലെ ജീവനക്കാര്‍ക്കും ഓണം ഉത്സവബത്ത/ ബോണസ് / കോവിഡ് 19 പ്രത്യേക ആശ്വാസ ധനസഹായം/ അഡ്വാന്‍സ് എന്നിവ അനുവദിക്കാന്‍ തീരുമാനമായതായി മലബാര്‍ ദേവസ്വം ബോര്‍ഡ് ഡെപ്യൂട്ടി  കമ്മീഷണര്‍ അറിയിച്ചു.

ജില്ലാ ആശുപത്രിയില്‍ ലാബ് അസിസ്റ്റന്റ് ഒഴിവിലേക്ക് ആശുപത്രി മാനേജ്‌മെന്റ് സമിതി മുഖേന താത്ക്കാലിക നിയമനം നടത്തുന്നു. അപേക്ഷകര്‍ സര്‍ക്കാര്‍ അംഗീകൃത സ്ഥാപനത്തില്‍ നിന്നും വി.എച്ച്.എസ്.ഇ, എം.എല്‍.ടി കോഴ്‌സ് പൂര്‍ത്തിയാക്കിയവരാകണം. പ്രായപരിധി 18-40 വയസ്സ്. പ്രവൃത്തി പരിചയം അഭികാമ്യം. താത്പര്യമുളളവര്‍ യോഗ്യത തെളിയിക്കുന്ന സര്‍ട്ടിഫിക്കറ്റുകളുടെ പകര്‍പ്പുകള്‍ സഹിതം  (ഓഗസ്റ്റ് 25) വൈകിട്ട് അഞ്ചിനകം districthospitalpkd@gmail.com ല്‍ അപേക്ഷിക്കണമെന്ന് സൂപ്രണ്ട് അറിയിച്ചു. ഫോണ്‍: 0491-2533327

ജില്ലയിലെ ഗവ. കോളേജുകളില്‍ 2020-2021 വര്‍ഷത്തെ ബിരുദ കോഴ്‌സുകളിലേക്കുള്ള സ്‌പോര്‍ട്‌സ് ക്വാട്ട സീറ്റുകളിലേക്ക്  (ബി.എ./ബി.കോം./ബി.എസ്.സി. - ഓരോ സീറ്റു വീതം) പരിഗണിക്കുന്നതിന് ഓണ്‍ലൈന്‍ അപേക്ഷ ക്ഷണിച്ചു. അപേക്ഷയുടെ പകര്‍പ്പ്, സ്‌പോര്‍ട്‌സ് സര്‍ട്ടിഫിക്കറ്റ് എന്നിവ sqdcpdsc2020@gmail.com ല്‍ ഓഗസ്റ്റ് 27 നകം നല്‍കണമെന്ന് സെക്രട്ടറി അറിയിച്ചു. അപേക്ഷകള്‍ നേരിട്ട് സ്വീകരിക്കുന്നതല്ല. ഫോണ്‍ : 0491-2505100.

പട്ടികജാതി വിഭാഗത്തില്‍ പിന്നാക്കം നില്‍ക്കുന്ന നായാടി, വേടന്‍, വേട്ടുവന്‍, കളളാടി, അരുന്ധതിയാര്‍, ചക്കിലിയന്‍ വിഭാഗക്കാരില്‍ നിന്നും ശുചിമുറി നിര്‍മ്മാണത്തിന് ധനഹായ അപേക്ഷ ക്ഷണിച്ചു. നിലവില്‍ ശുചിമുറി ഇല്ലാത്തവരായിരിക്കണം അപേക്ഷകര്‍. ജാതി, വരുമാനം, ഓണര്‍ഷിപ്പ് സര്‍ട്ടിഫിക്കറ്റ്, ഗ്രാമ/ബ്ലോക്ക് പഞ്ചായത്തുകളില്‍ നിന്നും ഇതിന് മുമ്പ് ആനുകൂല്യം കൈപ്പറ്റിയിട്ടില്ലെന്ന സര്‍ട്ടിഫിക്കറ്റ് സഹിതം സെപ്റ്റംബര്‍ ഒന്‍പതിന് വൈകിട്ട് അഞ്ചിനകം ചിറ്റൂര്‍ ബ്ലോക്ക് പട്ടികജാതി വികസന ഓഫീസില്‍ അപേക്ഷ നല്‍കണമെന്ന് ബ്ലോക്ക് പട്ടികജാതി വികസന ഓഫീസര്‍ അറിയിച്ചു. ഫോണ്‍ : 8547630128.

ജില്ലയില്‍ സെപ്തംബര്‍ ഏഴിന് നടക്കുന്ന പട്ടയമേള നടത്തിപ്പുമായി ബന്ധപ്പെട്ട് ചര്‍ച്ച  ചെയ്യുന്നതിന് ഇന്ന് (ഓഗസ്റ്റ് 25) രാവിലെ 11 ന് ജില്ലാ കലക്ടറുട അധ്യക്ഷതയില്‍ കലക്ടറേറ്റില്‍ ഓഫീസ് മേധാവികളുടെ യോഗം ചേരുമെന്ന് ജില്ലാ കലക്ടര്‍ ഡി.ബാലമുരളി  അറിയിച്ചു. ബന്ധപ്പെട്ട ഉദ്യോഗസ്ഥര്‍ യോഗത്തില്‍ പങ്കെടുക്കണം.  

കോന്നി സര്‍ക്കാര്‍ മെഡിക്കല്‍ കോളജ് ആശുപത്രിയില്‍ കാന്റീന്‍ നടത്തുന്നതിനായി  മുദ്ര വെച്ച കവറുകളില്‍  ക്വട്ടേഷനുകള്‍  ക്ഷണിച്ചു. ക്വട്ടേഷന്‍ സ്വീകരിക്കുന്ന അവസാന തീയതി  ഈ മാസം  11.  വിശദവിവരങ്ങള്‍ കോളജ് ഓഫീസില്‍ നിന്നും പ്രവര്‍ത്തന സമയങ്ങളില്‍ ലഭിക്കും.

  കേരള മോട്ടോര്‍ തൊഴിലാളി ക്ഷേമനിധി ബോര്‍ഡില്‍ അംഗങ്ങളല്ലാത്ത സ്‌കാറ്റേര്‍ഡ് വര്‍ക്കേഴ്‌സ്, പാസഞ്ചര്‍ ഗൈഡുകള്‍, ഡ്രൈവിംഗ് സ്‌കൂള്‍ ജീവനക്കാര്‍, ഓട്ടോ മൊബൈല്‍ വര്‍ക്ക്‌ഷോപ്പ് തൊഴിലാളികള്‍ എന്നിവര്‍ക്കും ബോര്‍ഡില്‍ നിന്നും കോവിഡ് ധനസഹായമായി 1000 രൂപ അനുവദിക്കും. ധനസഹായം ലഭ്യമാകുന്നതിനായി  motorworker.kmtwwfb.kerala.gov.in എന്ന വെബ് പോര്‍ട്ടലിലൂടെ അംഗത്വം  രജിസ്റ്റര്‍ ചെയ്ത് ധനസഹായത്തിന് അര്‍ഹത നേടാവുന്നതാണെന്ന് ചെയര്‍മാന്‍  അഡ്വ. എം.എസ് സ്‌കറിയ അറിയിച്ചു.