വണ്ടാഴി ഗ്രാമപഞ്ചായത്തില്‍ 20 രൂപയ്ക്ക് ഊണുമായി ജനകീയ ഹോട്ടല്‍ പ്രവര്‍ത്തനമാരംഭിച്ചു. കണിമംഗലത്ത് ആരംഭിച്ച ജനകീയ ഹോട്ടലിന്റ ഉദ്ഘാടനം നെന്മാറ ബ്ലോക്ക് പഞ്ചായത്ത് പ്രസിഡന്റ് പി.വി രാമകൃഷ്ണന്‍ നിര്‍വഹിച്ചു. എല്ലാവര്‍ക്കും ഭക്ഷണം ലഭ്യമാക്കുകയാണ് ജനകീയ ഹോട്ടല്‍ പ്രവര്‍ത്തനം ലക്ഷ്യമിടുന്നതെന്നും നെന്മാറ ബ്ലോക്ക് പഞ്ചായത്തിന്റെ ധനസഹായവും ഇവര്‍ക്ക് ലഭ്യമാക്കുമെന്നും അദ്ദേഹം പറഞ്ഞു.

ജില്ലാ ആയുര്‍വേദ ആശുപത്രിയില്‍ പുതിയ എക്‌സ്‌റേ യൂണിറ്റ് ഉദ്ഘാടനം  ജില്ലാ പഞ്ചായത്ത് പ്രസിഡന്റ്  അഡ്വ.കെ. ശാന്തകുമാരി നിര്‍വഹിച്ചു. ഭാരതീയ ചികിത്സ വകുപ്പിന്റെയും  ജില്ലാ പഞ്ചായത്തിന്റെയും  ഫണ്ട് ഉപയോഗിച്ചാണ് എക്‌സറേ  യൂണിറ്റ് ആരംഭിച്ചത്. സാധാരണക്കാര്‍ക്ക് കുറഞ്ഞ ചെലവില്‍ എക്‌സറേ എടുക്കാതിനുള്ള സൗകര്യം ആശുപത്രിയില്‍ ലഭ്യമാകുമെന്ന്  ജില്ലാ പഞ്ചായത്ത് പ്രസിഡന്റ്  അഡ്വ.കെ. ശാന്തകുമാരി പറഞ്ഞു. ജില്ലാ പഞ്ചായത്ത് ആരോഗ്യ സ്റ്റാന്‍ഡിങ്ങ്  കമ്മിറ്റി ചെയര്‍പേഴ്‌സണ്‍ ബിന്ദു സുരേഷ് പരിപാടിയില്‍  അധ്യക്ഷയായി.

കോവിഡ് പ്രതിരോധ പ്രവര്‍ത്തനങ്ങളുടെ ഭാഗമായി  ഏര്‍പ്പെടുത്തിയിട്ടുള്ള അന്തര്‍ സംസ്ഥാന യാത്രക്കളുടെയും ചരക്ക് വാഹനങ്ങളുടെയും ഗതാഗത നിയന്ത്രണങ്ങളുമായി ബന്ധപ്പെട്ട് കേരള-തമിഴ്‌നാട് അതിര്‍ത്തിയായ വാളയാര്‍ ചെക്ക് പോസ്റ്റിലൂടെ ജില്ലയില്‍ എത്തുന്ന യാത്രക്കാരുടെ വിവരങ്ങള്‍ ശേഖരിക്കുകയും ആരോഗ്യ പരിശോധന നടത്തുന്നതും ചരക്ക്, സേവന, നികുതി വകുപ്പിന്റെ താത്ക്കാലികമായി ഏറ്റെടുത്ത ചെക്ക് പോസ്റ്റിലാണ്. ചെക്ക് പോസ്റ്റില്‍ ക്രമീകരണങ്ങള്‍ ഏര്‍പ്പെടുത്തി ജില്ലാ ദുരന്തനിവാരണ അതോറിറ്റി ചെയര്‍മാനും ജില്ലാ കലക്ടറുമായ ഡി.ബാലമുരളി ഉത്തരവിട്ടു.

ക്രമീകരണങ്ങള്‍ ചുവടെ നല്‍കുന്നു.

ജില്ലാ വികസന സമിതി യോഗം ഇന്ന് (ഓഗസ്റ്റ് 27) രാവിലെ 10.30 ന് സൂം മീറ്റിങ് വഴി നടക്കുമെന്ന് ജില്ലാ കലക്ടര്‍ അറിയിച്ചു. ബന്ധപ്പെട്ട ഉദ്യോഗസ്ഥര്‍ പങ്കെടുക്കണം

സംസ്ഥാന സഹകരണ യൂണിയന്‍ 2020 ഏപ്രില്‍ നടത്തിയ ജെ.ഡി.സി (ജൂനിയര്‍ ഡിപ്ലോമ ഇന്‍ കോ-ഓപ്പറേഷന്‍) പരീക്ഷയില്‍  പാലക്കാട് സഹകരണ പരിശീലന കേന്ദ്രത്തിലെ വിദ്യാര്‍ത്ഥി കെ.സൗമ്യ രണ്ടാം റാങ്ക് നേടിയതായി ഡെപ്യൂട്ടി രജിസ്ട്രാര്‍ അറിയിച്ചു.

ജില്ലയിലെ പൂട്ടിക്കിടക്കുന്ന സ്ഥാപനങ്ങളിലെ തൊഴിലാളികളും ഓണക്കാലത്തെ എക്സ്ഗ്രേഷ്യ ലിസ്റ്റില്‍ ഉള്‍പ്പെട്ട തൊഴിലാളികള്‍ക്കുള്ള  എക്സ്‌ഗ്രേഷ്യ  വിതരണം ആരംഭിച്ചു. ബാങ്ക് അക്കൗണ്ട് വിവരങ്ങള്‍ ഹാജരാക്കിയിട്ടുള്ളവര്‍ക്ക് അതത് അക്കൗണ്ടുകളില്‍ തുക നിക്ഷേപിച്ചിട്ടുണ്ട്. പൂട്ടിക്കിടക്കുന്ന കള്ളിയറ എസ്റ്റേറ്റിലെ തൊഴിലാളികള്‍ക്കുള്ള എക്സ്ഗ്രേഷ്യ വിതരണം ഇന്ന്  (ഓഗസ്റ്റ് 27)  ജില്ലാ ലേബര്‍ ഓഫീസില്‍ വിതരണം ചെയ്യുമെന്ന് ജില്ലാ ലേബര്‍ ഓഫീസര്‍(ഇ) അറിയിച്ചു. ബന്ധപ്പെട്ടവര്‍ റേഷന്‍ കാര്‍ഡ് സഹിതം ഹാജരാകണം.