അഞ്ച് കോടിയുടെ പുതിയ കെട്ടിട ഉദ്ഘാടനം ഇന്ന്

  ജില്ലയില്‍ കണ്ടയിന്‍മെന്റ് സോണ്‍ അല്ലാത്ത പ്രദേശങ്ങളില്‍ ഇനിയൊരറിയിപ്പ് ഉണ്ടാകുന്നതുവരെ വ്യാപാര സ്ഥാപനങ്ങള്‍ രാവിലെ ഏഴു മണി മുതല്‍ രാത്രി ഒന്‍പതുവരെ പ്രവര്‍ത്തിക്കാന്‍ അനുമതി നല്‍കി ജില്ലാ കലക്ടര്‍ ബി അബ്ദുല്‍ നാസര്‍ ഉത്തരവായി.
(പി.ആര്‍.കെ നമ്പര്‍ 2384/2020)

ആശങ്ക ഉയര്‍ത്തി രോഗബാധിതര്‍ ഇന്നലെ(സെപ്തംബര്‍ 08) 200 കടന്നു. 209 പേര്‍ക്കാണ് രോഗം ബാധിച്ചത്. 191 പേര്‍ രോഗമുക്തി നേടി. കൊല്ലം കോര്‍പ്പറേഷന്‍ പരിധിയിലാണ് കൂടുതല്‍ രോഗികള്‍, 38. കരിക്കോട് കിളികൊല്ലൂര്‍ ഭാഗത്ത്-6, തൃക്കടവൂര്‍-8, കടവൂര്‍-5, അയത്തില്‍-4 എന്നിവിടങ്ങളിലാണ് കൂടുതല്‍ പേര്‍.

ജില്ലയില്‍ സര്‍വീസ് നടത്തുന്ന ആംബുലന്‍സ് ഡ്രൈവര്‍മാര്‍ക്ക് പൊലീസ് നല്‍കുന്ന സാക്ഷ്യപത്രം നിര്‍ബന്ധമാക്കി ജില്ലാ കലക്ടര്‍ ബി അബ്ദുല്‍ നാസര്‍ ഉത്തരവിട്ടു. ജില്ലാ ഉന്നതതല ഉദ്യോഗസ്ഥ യോഗത്തിന്റെ തീരുമാനപ്രകാരമാണിത്. എല്ലാ ആംബുലന്‍സ് ഡ്രൈവര്‍മാരും കോവിഡ്-19 ജാഗ്രത ആപ്പ് ഡൗണ്‍ലോഡ് ചെയ്യണം. വാഹനം ഓടിക്കുമ്പോള്‍ ആപ് ഓണ്‍ ആയിരിക്കണം. ആംബുലന്‍സ് ഉടമകള്‍ ഇക്കാര്യങ്ങള്‍ ഉറപ്പാക്കണം. അവര്‍ ആംബുലന്‍സുകളുടെ വിവരങ്ങള്‍ പോര്‍ട്ടലില്‍ രജിസ്റ്റര്‍ ചെയ്തിരിക്കണം. ജോലിയിലുള്ള ഡ്രൈവരുടെ വിവരം യഥാസമയങ്ങളില്‍ പോര്‍ട്ടലില്‍ രേഖപ്പെടുത്തേണ്ടതാണെന്നും ഉത്തരവില്‍ ഉണ്ട്.

മഴക്കെടുതിയില്‍ ജില്ലയില്‍ എട്ട്  വീടുകള്‍ ഭാഗികമായി  തകര്‍ന്ന് 2,03,000 രൂപയുടെ നഷ്ടം കണക്കാക്കി. കൊട്ടാരക്കര  താലൂക്കിലാണ് മഴ കൂടുതല്‍ നാശം വിതച്ചത്.  
കൊട്ടാരക്കരയില്‍ രണ്ട് വീടുകള്‍ ഭാഗികമായി  തകര്‍ന്ന് 1.2 ലക്ഷം രൂപയുടെ നഷ്ടമുണ്ടായി. പത്തനാപുരത്ത് മൂന്ന് വീടുകള്‍ ഭാഗികമായി തകര്‍ന്നതില്‍ 60,000 രൂപയുടെ നഷ്ടം കണക്കാക്കി. പുനലൂരില്‍ രണ്ട് വീടുകള്‍  ഭാഗിക നാശമുണ്ടായതില്‍  13,000 രൂപയുടെ നഷ്ടമാണുണ്ടായത്. കൊല്ലത്ത് ഒരു വീട് ഭാഗികമായി തകര്‍ന്ന് 10,000 രൂപയുടെ നഷ്ടം കണക്കാക്കുകയും ചെയ്തു.
(പി.ആര്‍.കെ നമ്പര്‍ 2380/2020)

പൊതുവിദ്യാഭ്യാസ സംരക്ഷ യജ്ഞത്തിന്റെ ഭാഗമായി സംസ്ഥാനത്തെ എല്ലാ നിയോജക മണ്ഡലങ്ങളിലും ഒരു വിദ്യാലയം വീതം മികവിന്റെ കേന്ദ്രമാക്കി ഭൗതിക സൗകര്യ വികസനം നടത്തുന്ന പദ്ധതി ഭാഗമായി നിര്‍മാണം പൂര്‍ത്തിയാക്കിയ ജില്ലയിലെ നാലു വിദ്യാലയങ്ങളിലെ സ്‌കൂള്‍ കെട്ടിടങ്ങള്‍ ഇന്ന്(സെപ്തംബര്‍ 9) മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും. 100 ദിവസത്തെ കര്‍മ്മ പദ്ധതിയുടെ ഭാഗമായി നടക്കുന്ന പരിപാടി രാവിലെ 11 ന് വീഡിയോ കോണ്‍ഫറന്‍സ് വഴിയാണ് ഉദ്ഘാടനം. വിദ്യഭ്യാസ വകുപ്പ് മന്ത്രി പ്രൊഫ. സി രവീന്ദ്രനാഥ് അധ്യക്ഷനാകും.

ജില്ലാ ഹോമിയോ ആശുപത്രി ലാബിലേക്ക് ആവശ്യമായ റീ-ഏജന്റുകളും അനുബന്ധ സാധനങ്ങളും ആവശ്യാനുസരണം വിതരണം ചെയ്യുന്നതിന് അംഗീകൃത വിതരണക്കാരില്‍ നിന്നും ഓപ്പണ്‍ ടെണ്ടര്‍ ക്ഷണിച്ചു. സെപ്തംബര്‍ 16 ഉച്ചകഴിഞ്ഞ് 2.15 വരെ സമര്‍പ്പിക്കാം. വിശദ വിവരങ്ങള്‍ 0474-2791520 നമ്പരില്‍ ലഭിക്കും.
(പി.ആര്‍.കെ നമ്പര്‍ 2377/2020)

സമഗ്ര ശിക്ഷാ കേരള ജില്ലയിലെ ബ്ലോക്ക് റിസോഴ്‌സ് സെന്ററുകളില്‍ ബി ആര്‍ സി ട്രെയിനര്‍മാരെ ഡെപ്യൂട്ടേഷന്‍ വ്യവസ്ഥയില്‍ നിയമിക്കും. ഇതിനായി അഭിമുഖം കോവിഡ് മാനദണ്ഡ പ്രകാരം സെപ്തംബര്‍ 18 ന് രാവിലെ 10 മുതല്‍ എസ് എസ് കെ യുടെ ജില്ലാ പ്രോജക്ട് ഓഫീസില്‍ നടക്കും. അധ്യാപകര്‍ യോഗ്യത തെളിയിക്കുന്ന അസല്‍ സര്‍ട്ടിഫിക്കറ്റുകളും ഡെപ്യൂട്ടേഷന്‍ വ്യവസ്ഥയില്‍ ജോലി ചെയ്യുവാന്‍ മാതൃവകുപ്പില്‍ നിന്നുള്ള എന്‍ ഒ സി യും അനുബന്ധ രേഖകളും സഹിതം എത്തണം. ഫോണ്‍: 0474-2794098.
(പി.ആര്‍.കെ നമ്പര്‍ 2376/2020)