ഏനാദിമംഗലം പഞ്ചായത്തിലെ ഞക്കാട്ട് പാലത്തിന്റെ നിര്‍മാണ ഉദ്ഘാടനം അഡ്വ.കെ.യു. ജനീഷ് കുമാര്‍ എംഎല്‍എ നിര്‍വഹിച്ചു. എംഎല്‍എയുടെ ആസ്ഥി വികസന ഫണ്ടില്‍ നിന്നും 20 ലക്ഷം രൂപ വിനിയോഗിച്ചാണ് പാലം നിര്‍മിക്കുന്നത്. കെപി റോഡില്‍ നിന്നും ഞക്കാട്ട്  ഭാഗത്തെ ബന്ധിപ്പിക്കുന്ന പാലമാണിത്. പഞ്ചായത്തിലെ 13, 14 വാര്‍ഡുകള്‍ തമ്മില്‍ ബന്ധിപ്പിക്കുന്ന പാലത്തിന്റെ നിര്‍മാണത്തിന് എംഎല്‍എ ഫണ്ടില്‍ നിന്നും 20 ലക്ഷം രൂപ നല്‍കിയതിനൊപ്പം അപ്രോച്ച് റോഡ് നിര്‍മിക്കുന്നതിനായി എട്ടു ലക്ഷം രൂപ ഗ്രാമ പഞ്ചായത്തും വകയിരുത്തിയിട്ടുണ്ട്.

വേങ്ങര ഇരിങ്ങല്ലൂര്‍ കുടുംബാരോഗ്യകേന്ദ്രത്തിന്റെ പുതിയ കെട്ടിടത്തിന്റെ ശിലാസ്ഥാപനം ഇന്ന് (സെപ്തംബര്‍ ഏഴ്) രാവിലെ 10.30ന് പറപ്പൂര്‍ ഗ്രാമപഞ്ചായത്ത് പ്രസിഡന്റ് പറങ്ങോടത്ത് മുഹമ്മദ് കുട്ടി നിര്‍വഹിക്കും. 2019- 2020 വര്‍ഷത്തെ   ജനകീയാസൂത്രണ പദ്ധതിയിലുള്‍പ്പെടുത്തി   42,48000 രൂപ ചെലവിലാണ് കുടുംബാരോഗ്യ കേന്ദ്രത്തിനായി പുതിയ കെട്ടിടം നിര്‍മിക്കുന്നത്. ചടങ്ങില്‍ വൈസ് പ്രസിഡന്റ് നസീറ തൂമ്പത്ത് അധ്യക്ഷത വഹിക്കും. ഗ്രാമപഞ്ചായത്ത് മെമ്പര്‍മാര്‍, ജനപ്രതിനിധികള്‍, ആരോഗ്യവകുപ്പ് ഉദ്യോഗസ്ഥര്‍ തുടങ്ങിയവര്‍ പങ്കെടുക്കും.
 

 ആരോഗ്യമന്ത്രി കെ.കെ ശൈലജ ടീച്ചർ  സെന്റർ നാടിന് സമർപ്പിക്കും

 വടകര ജില്ലാ ആശുപത്രിയില്‍ ധന്വന്തരി ഡയാലിസിസ് സെന്റര്‍ കെട്ടിടം  സെപ്റ്റംബർ ഏഴിന് രാവിലെ 11ന്   ആരോഗ്യ സാമൂഹ്യനീതി വകുപ്പ് മന്ത്രി കെ.കെ. ശൈലജ ടീച്ചർ  ഉദ്ഘാടനം ചെയ്യും. കോഴിക്കോട് ജില്ലാ പഞ്ചായത്ത് പ്രസിഡണ്ടും ട്രസ്റ്റ് ചെയര്‍മാനുമായ ബാബു പറശ്ശേരി ചടങ്ങിൽ  അദ്ധ്യക്ഷത വഹിക്കും. സെന്ററിന് വേണ്ടി ജില്ലാ പഞ്ചായത്ത് ഒന്നരകോടി രൂപ ചെലവഴിച്ച്  മൂന്ന് നില കെട്ടിടത്തിന്റെ പ്രവൃത്തിയാണ് പൂര്‍ത്തീകരിച്ചത്.

പത്തനംതിട്ട ജില്ലയില്‍ ഇന്ന്(6) 113 പേര്‍ക്ക് കോവിഡ്-19 സ്ഥിരീകരിച്ചു. ഇന്ന് രോഗം സ്ഥിരീകരിച്ചവരില്‍ എട്ടു പേര്‍ വിദേശ രാജ്യങ്ങളില്‍ നിന്ന് വന്നവരും, 11 പേര്‍ മറ്റ് സംസ്ഥാനങ്ങളില്‍ നിന്നും വന്നവരും, 94 പേര്‍ സമ്പര്‍ക്കത്തിലൂടെ രോഗം ബാധിച്ചവരുമാണ്.

നാഷണല്‍ ഹെല്‍ത്ത് മിഷന്‍ ഫണ്ട് ഉപയോഗിച്ച് നാദാപുരം, താമരശ്ശേരി താലൂക്ക് ആശുപത്രികളില്‍ അത്യാധുനിക സൗകര്യങ്ങളോടെ പുതുതായി നിര്‍മ്മിച്ച എമര്‍ജന്‍സി ഡിപ്പാര്‍ട്ട്‌മെന്റിന്റെ ഉദ്ഘാടനം സെപ്റ്റംബർ ആറിന് രാവിലെ 11 മണിക്ക് ആരോഗ്യ വകുപ്പ് മന്ത്രി കെ.കെ ശൈലജ ടീച്ചർ നിർവഹിക്കും.

ആറന്മുളയില്‍ കോവിഡ് പോസിറ്റീവായ യുവതിയെ ആംബുലന്‍സ് ഡ്രൈവര്‍ പീഡിപ്പിച്ച സംഭവത്തില്‍ വനിതാ കമ്മിഷന്‍ സ്വമേധയാ കേസെടുത്ത് അടിയന്തരമായി റിപ്പോര്‍ട്ട് സമര്‍പ്പിക്കാന്‍ പത്തനംതിട്ട എസ്പിയോട് ആവശ്യപ്പെട്ടതായി ചെയര്‍പേഴ്‌സണ്‍ എം.സി.ജോസഫൈന്‍ പറഞ്ഞു. മനുഷ്യമനസ്സാക്ഷിയെ ഞ്ഞെട്ടിപ്പിക്കുന്ന ഈ സംഭവത്തില്‍ പീഡനത്തിനിരയായ യുവതിക്ക് എല്ലാവിധ പിന്തുണയും നല്‍കുന്നതാണ്. കോവിഡ് രോഗികളായ സ്ത്രീകള്‍ക്ക് പ്രത്യേക സംരക്ഷണം വേണമെന്ന് ഈ സംഭവം ഓര്‍മിപ്പിക്കുന്നു.

മുഖ്യമന്ത്രിയുടെ പ്രാദേശിക റോഡ് പുനരുദ്ധാരണ പദ്ധതിയിലുൾപ്പെടുത്തി ഉള്ളിയേരി ഗ്രാമപഞ്ചായത്തിലെ പുത്തഞ്ചേരി കോട്ടക്കുന്ന് റോഡ്, നാറാത്ത് പള്ളി കീരിയോടുമല റോഡ്  എന്നിവയുടെ പ്രവർത്തി ഉദ്ഘാടനം പുരുഷൻ കടലുണ്ടി  എം.എൽ.എ  നിർവഹിച്ചു. മുഖ്യമന്ത്രിയുടെ 100 ദിന കർമ്മപദ്ധതിയുടെ ഭാഗമായാണ്  റോഡുകൾ  നിർമ്മിക്കുന്നത്. 

പുത്തഞ്ചേരി കോട്ടക്കുന്ന് റോഡിന് 26 ലക്ഷം രൂപയും നാറാത്ത് പള്ളി കീരിയോടുമല റോഡിന് 20 ലക്ഷം രൂപയുമാണ് ചെലവഴിക്കുക. 

ഉള്ളിയേരി  പഞ്ചായത്തിൽ ക്യുആർ കോഡ് റൂട്ട് മാപ്പ് മൊബൈൽ ആപ്പ് സംവിധാനം ആരംഭിച്ചു. ഉള്ളിയേരി ഗ്രാമ പഞ്ചായത്തിന്റെ ഡിജിറ്റൽ പഞ്ചായത്ത്‌ പദ്ധതിയുടെ മൂന്നാം വാർഷികത്തോടനുബന്ധിച്ചാണ് പുത്തൻ കാൽവെപ്പ്. കോവിഡ് മാനദണ്ഡങ്ങൾ പാലിച്ച് പഞ്ചായത്ത് ഹാളിൽ നടന്ന ചടങ്ങിൽ  പുരുഷൻ കടലുണ്ടി എം.എൽ.എ   പദ്ധതി ഉദ്ഘാടനം ചെയ്തു. പഞ്ചായത്ത് പ്രസിഡന്റ് ഷാജു ചെറുക്കാവിൽ അധ്യക്ഷത വഹിച്ചു.