കോവിഡ് 19 വൈറസ് വ്യാപനത്തിന്റെ ഭാഗമായി സംസ്ഥാനം മുഴുവൻ അടിയന്തര ഘട്ടത്തിലായതിനാൽ പഴയന്നൂർ ബ്ലോക്ക് പഞ്ചായത്ത് ജനപ്രതിനിധികളും ജീവനക്കാരും ചേർന്ന് മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭാവന നൽകുന്നതിന് തുടക്കം കുറിച്ചു. ആദ്യഘട്ടമായി ബ്ലോക്ക് പഞ്ചായത്ത് പ്രസിഡന്റ് എം പദ്മകുമാർ രണ്ടു മാസത്തെ ഹോണറേറിയം സംഭാവന ചെയ്യുമെന്നും അറിയിച്ചു.
 

ചാഴൂർ ഗ്രാമപഞ്ചായത്തിൽ താമസിക്കുന്നവർക്ക് റേഷൻ കാർഡ് ഇല്ലെങ്കിലും റേഷൻ കൊടുക്കുന്നതിനുള്ള സൗകര്യം ഒരുക്കി. പഞ്ചായത്തിൽ റേഷൻ കാർഡില്ലാത്ത തങ്ങൾക്ക് അരി വേണം എന്ന് അറിയിച്ച് ഉപഭോക്താവിന് പഞ്ചായത്ത് റേഷൻ കടയിലേക്ക് ഒരു സത്യവാങ്മൂലം നൽകും. ഇത് റേഷൻ കടയിൽ നൽകിയാൽ സംസ്ഥാന സർക്കാർ പ്രഖ്യാപിച്ച ഭക്ഷ്യ വിഹിതം ലഭിക്കും. പെൻഷൻ ലഭിക്കാത്തവരുടെ പ്രശ്നങ്ങൾക്കും പഞ്ചായത്ത് പരിഹാരം കാണുന്നുണ്ട്.

ഗുരുവായൂർ നഗരസഭ പ്രത്യേക ക്യാമ്പിലേയ്ക്ക് നാട്ടുകാരും വിവിധ സന്നദ്ധ സംഘടനകളും സമ്മാനങ്ങൾ നൽകി. കോവിഡ് 19 പ്രതിരോധ പ്രവർത്തനങ്ങളുടെ ഭാഗമായാണ് ഗുരുവായൂരിൽ അഗതികൾക്കും അതിഥി തൊഴിലാളികൾക്കുമായി പ്രത്യേക ക്യാമ്പ് ആരംഭിച്ചത്. പച്ചക്കറി, പലചരക്ക് തുടങ്ങിയ ഭക്ഷണ സാധനങ്ങൾക്ക് പുറമെ വസ്ത്രങ്ങളും സംഭാവന നൽകുകയാണ് സംഘടനകൾ. അണിയറ ഗുരുവായൂർ സംഭാവന നൽകിയ ഷർട്ടുകൾ കെ. വി അബ്ദുൾ ഖാദർ എം എൽ എ അഗതികൾക്ക് വിതരണം ചെയ്തു.

കയ്പമംഗലം മണ്ഡലത്തിലെ ഏഴ് ഗ്രാമപഞ്ചായത്തിലും പ്രവർത്തിച്ചുകൊണ്ടിരിക്കുന്ന സമൂഹ അടുക്കളയിലേക്ക് സർക്കാർ സംരംഭമായ ഹോർട്ടി കോർപ്പിൽ നിന്നും ആവശ്യമായ പച്ചക്കറികൾ ലഭ്യമാക്കി. വളണ്ടിയർമാരുടെ സഹായത്തോടെ മതിലകം ബ്ലോക്കിൽ എത്തിച്ച പച്ചക്കറികൾ എം എൽ എ ഇ ടി ടൈസൺ മാസ്റ്ററുടെ മേൽനോട്ടത്തിൽ മണ്ഡലത്തിലെ അതത് പഞ്ചായത്ത് പ്രസിഡന്റുമാർക്ക് വീതിച്ചു നൽകി. തുടർന്നുള്ള ദിവസങ്ങളിലും പഞ്ചായത്തുകളിലെ സമൂഹ അടുക്കളയിലേക്ക് ആവശ്യമായ വിഭവങ്ങൾ സർക്കാർ സംവിധാനത്തിലൂടെ നൽകുവാൻ കഴിയുമെന്നും എം എൽ എ അറിയിച്ചു. മതിലകം ബ്ലോക്ക് പ്രസിഡന്റ് കെ കെ അബീദലി, ബി ഡി ഒ വിനീത സോമൻ, എ ഡി എ ജോതി പി ബിന്ദു തുടങ്ങിയവർ പങ്കെടുത്തു.

വലപ്പാട് ഗ്രാമപഞ്ചായത്തിലെ വീടുകളിലെ കൃഷി വിളവെടുത്ത് പച്ചക്കറി സമൂഹ അടുക്കളയ്ക്ക് കൈമാറുന്നു. കുടുംബശ്രീയുടെ നേത്യത്വത്തിലാണ് ഓരോ വാർഡുകളിൽ നിന്ന് പച്ചക്കറി ശേഖരിക്കുന്നത്. വി ടി എം എച്ച് എസ് എസ് കഴിമ്പ്രം സ്‌കൂളിലെ 10 ചാക്ക് അരി സമൂഹ അടുക്കളയിലേക്ക് നൽകി.

1003 അതിഥി തൊഴിലാളികൾക്ക് ഭക്ഷണ സാധാനങ്ങൾ എത്തിച്ചു നൽകി ചാഴൂർ ഗ്രാമപഞ്ചായത്ത്. 29 ക്യാമ്പുകളിലായാണ് അതിഥി തൊഴിലാളികൾ താമസിക്കുന്നത്. ഇവർക്ക് ഭക്ഷണം പാകം ചെയുന്നതിന് ആവശ്യമായ ഭക്ഷ്യസാധനങ്ങൾ അതത് ക്യാമ്പുകളിൽ പഞ്ചായത്ത് എത്തിച്ച് നൽകിയിട്ടുണ്ട്. ടാങ്കർ ലോറി വഴി ആവശ്യത്തിന് വെള്ളവും എത്തിക്കുന്നുണ്ട്.

പുന്നയൂർക്കുളം പഞ്ചായത്തിലെ വിവിധ പ്രദേശങ്ങളിൽ താമസിക്കുന്ന 692 അതിഥി തൊഴിലാളികൾക്ക് പഞ്ചായത്ത് ഭക്ഷണ സാധനങ്ങളുടെ കിറ്റ് വിതരണം ചെയ്തു. മൂന്ന് പേർ മുതൽ 78 പേർ വരെ താമസിക്കുന്ന 55 സ്ഥലങ്ങളുണ്ട് പഞ്ചായത്തിൽ. ഇവർക്ക് ഒരാഴ്ച്ചയ്ക്കുള്ള ഭക്ഷണത്തിനാവശ്യമായ പലചരക്ക് സാധനങ്ങൾ താമസസ്ഥലങ്ങളിൽ എത്തിച്ചു നൽകി.

കോവിഡ് 19 പ്രതിരോധത്തിന്റെ ഭാഗമായി ജില്ലയിൽ ലോക്ക് ഡൗൺ പ്രഖ്യാപിച്ച സാഹചര്യത്തിൽ ജില്ലയിലെ 65ഓളം വരുന്ന ട്രാൻസ് ജൻഡേഴ്സിന് സാമൂഹ്യനീതി വകുപ്പ് ഒരുക്കിയ കിറ്റുകൾ ജില്ലാ കളക്ടർ എസ് ഷാനവാസ് വിതരണം ചെയ്തു. അരി, ധാന്യങ്ങൾ, വെളിച്ചെണ്ണ, പഞ്ചസാര തുടങ്ങിയ നിത്യോപയോഗ സാധനങ്ങൾ അടങ്ങിയ കിറ്റാണ് 65 ഓളം വരുന്ന ട്രാൻസ്ജെൻഡേഴ്സിന് വിതരണം ചെയ്തത്. ജില്ലയിൽ ഏതാണ്ട് 75 ഓളം ട്രാൻസ്ജെൻഡേഴ്സാണ് ഉള്ളത്. ഇതിൽ 65 പേർക്കാണ് കിറ്റുകൾ വിതരണം ചെയ്തത്. സാമൂഹിക നീതി വകുപ്പ് ജില്ലാ ഇൻചാർജ് ആർ രാഗപ്രിയ വകുപ്പിലെ മറ്റ് ഉദ്യോഗസ്ഥർ തുടങ്ങിയവർ പങ്കെടുത്തു.